ƐSTƐRƐ 1 - WE NU GALE 1995

Nwa Sɛrsɛsi dɛa gbalimɔ

¹ We lɛ nɛ tɔ̃ nɛ gɛ, ma dɛa zɛ́ tɛ̃ e kɔ le 'da nwa Sɛrsɛsi. Sɛrsɛsi zi a nwa ngɔ 'bili tɛ nù kama do 'bu nɛ bɔa ngɔ nɛ sambo. Nùi 'da a ndila zi Indɛ, gbaa nɛ ma Sɔkpɔ Etiopi.

^2-3 Ma nɛa we hɔ tɛ talɛ sabɛlɛ dɛa to nwa 'da Sɛrsɛsi, nɛ a si kɔ tɔa nwa 'da a, tɛ kɔ gba ngbo te Suzɛ. Nɛ a dɛa gbalimɔ we owi ti nu a do owi olo li a vɛ̃. Owinɔ kɛ nwa Sɛrsɛsi sa zi mɔ hã wa tɛ gbalimɛni, wi zi a: ogã wi ngɔ sodanɔ ngɔ nù Pɛrsɛ do Medi, do owi fɔmɔ le, do ogã wi ngɔ 'bili tɛ nùnɔ.

⁴ A yɛlɛ ogã kpamɛnɔ 'da a, do odia mɛnɔ kɛ ma be dɔ̃lɔ̃ li to nwa 'da a ni dati wa. Ogba ɛngganɔ ni ɔa zi gbaa zɛkɛ gazɛlɛ vɛ̃.

⁵ Ma nɛa we hɔ ndɔti nɛ, nɛ nwa sa mɔ hã owinɔ vɛ̃, wi sã tabi wi kpamɔ kɛ wa kɔ gba ngbo 'da a tɛ Suzɛ ni, nɛ a dɛ gbalimɔ hã wa. Gbalimɛ ni dɛa tɛ̃ ɛ dɛ kɔ obe fɔnɔ kɛ zã tɔa nwa 'da Sɛrsɛsi ni, nɛ ma ɔa pɔsɔ kpo.

⁶ Wa dɛa zi da, nɛ wa fi ofɛ̃a tulu gɛza do yoo nɛ ngɔ nɛ. Wa kpua otulunɔ ni do fila fɛlɛ dɛ tɛ gba sala wa dɛa do dia ta marbrɛ, nɛ wa kɔ'bɔ nu fɛlɛ do fɛ̃a mɔ bolo. Wa dɛa omɔ dungu do mɔ mbali, do fɛ̃a mɔ bolo. Nɛ wa fi mɔ dungunɔ ni tɛ fala kpo, wa gɛza ma de wena do ofila be ta, ofɛ̃a nɛ, otũ nɛ, ombe ma nde ndila.

⁷ Wa kɛ̃ dɔ̃nɔ do okɔpɔ mɔ mbali. Okɔpɔnɔ vɛ̃ ma wè kɔ̃ do ngbɛ ɛ gɔ. Wa kɛ̃ dɔ̃nɔ vɛ̃ de wena we be dia zã 'da nwa Sɛrsɛsi.

⁸ Wele kpo kpo nɔ dɔ̃ɛ ɔ nɛ kɛ zã a kɔ̃a ni. We kɛ nwa ba nu ɛ hã Owi tonɔ 'da a na, wa dɛ vɛ̃ a wɛ 'dɛ ɛ do kɛ 'da ogɛnɛnɔ 'dɛ ɛ.

⁹ 'Da fala ni, nɛ Vasti, kɛnɛ nwa Sɛrsɛsi dɛa tɛ mɛ 'bɔ gbalimɔ hã ongba a wukonɔ do kɔ tɔa 'da nwa 'di.

Nwa Sɛrsɛsi bɛ̃a kɛnɛ a Vasti

¹⁰ Do kpo soe kɛ gbalimɛ dɛa tũ sambo ni, nɛ nwa Sɛrsɛsi zi do yangga wena, we kɛ a nɔa dɔ̃. Nɛ a sa mɔ hã ohɔla wi wili sambo, kɛ wa dɛ to ti kɔ̃ a ni, li wa a: Mɛhumanɛ, Bizta, Harbona, Bigta, Abagta, Zetarɛ do Karkasi.

¹¹ Nɛ a ba nu a hã wa na, wa nɛ, hã wa kpa kɛnɛ ɛ Vasti, nɛ wa tɔ̃ hã a na, a gu ndasa nwa 'da a zu a, nɛ wa tɛ do a 'di nga. A kɔ̃a we be dia zɔnga 'da kɛnɛ a hã owi ti nu a, do otala winɔ wa tɛa ɛngga ni, we kɛ dia zɔnga 'da kɛnɛ a kpa zi li Owele vɛ̃.

¹² Ohɔla wi wilinɔ ni wa tɔ̃a toe hã Vasti, nɛ a bɛ̃a we dɛ olo nu wili a. Nɛ bɛ̃a we 'da a ma hã dã hã nwa wili a wena.

¹³ Nɛ nwa aka ogã wi tɔ̃ mbulanɔ 'da a. We kɛ owenɔ 'da a vɛ̃, ogã wi tɔ̃ mbulanɔ, wa zɛ́ a wa gbaka a tɛ 'dafa ma.

¹⁴ Nwa gbini zi zã a wena do Owi tɔ̃ mbulanɔ sambo, kɛ a zi do wa ni, li wa a: Karsɛna, Setarɛ, Admata, Tarsisi, Merɛsi, Marsɛna do Mɛmukanɛ. Wa vɛ̃ a Owi ti nu nwa tɛ ngɔ nù Pɛrsɛ do Medi. Nɛ wa dɛ tonɔ kɛ ma nɛa ngɔ ongbɛ ɛ vɛ̃, tɛ ngɔ nù 'da nwa Sɛrsɛsi ni.

¹⁵ Sɛrsɛsi hɔlɔ nu ɛ, nɛ a tɔ̃ hã wa na: “Mi nwa, mi ba nu mi, nɛ mi tombo to do ohɔla wi wilinɔ 'da mi hã kɛnɛ mi Vasti, nɛ a bɛ̃a we dɛ olo nu mi. Hã mbula 'da lɛ, ma kɔ̃ sɛ na mi dɛ do a nɛ nde?”

¹⁶ Nɛ Mɛmukanɛ gese hã nwa do Owi ti nu a na: “Vasti, kɛnɛ nwa dɛa 'danga wena. Nɛ nde a dɛ̃ 'dã mɛ ni hã nwa zu a kpo gɔ, a dɛa 'bɔ hã Owi ti nu nwa do Owi wilinɔ ngɔ nù 'da nwa gɛ vɛ̃.

¹⁷ Owukonɔ vɛ̃ wa zele sɛ we 'dã mɛ 'da Vasti, nɛ wa ma sɛ ngɔ yɔndɔ sila owili wa. Nɛ wa tɔ̃ sɛ gulu nɛ na: ‘Nwa ba zi nu a na, wa nɛ, hã wa kpà kɛnɛ ɛ Vasti tɛ do a, nɛ kɛnɛ a bɛ̃a we nu a, nɛ ma dɛa ge nde?’

¹⁸ Sɔɛ gɛ, we mɛ Vasti dɛa gɛ, ma yɛ'bɛ sɛ nu owukonɔ 'da Owi ti nu nwa, tɛ ngɔ nù Pɛrsɛ do Medi gɛ vɛ̃. Wa ndo sɛ di bɛ̃ we nu owili wa, do yɔndɔ sila wa. Nɛ ki ni sila wi wilinɔ sɛ do dã.

¹⁹ “Hã aa nwa, fala kɛ mɔ zɔ a dia nde, nɛ mɔ dɛ mbɛti, nɛ mɔ ba nu mɔ na, Vasti 'bɔ mbé nɛ a kɛnɛ mɔ gɔ. Nɛ mɔ saka mbé wuko, kɛ a wia we dɔnggɔ mɔ nɛ ngɔ ã wele kɛ ni, nɛ mɔ ba a. Mbɛti 'da mɔ, ma le sɛ kɔ mbulanɔ tɛ ngɔ nù Pɛrsɛ do Medi, nɛ wele kpo wé sɛ we gbɛ ma gɔ.

²⁰ Fala kɛ olo nu mɔ yɛ'bɛ kɔ obe lenɔ ngɔ gba nù 'da mɔ gɛ vɛ̃, nɛ wuko kpo kpo a ba sɛ tɛ̃ a we wili a, gɛnɛ kɔ wi wili ɔ do wi sã, tabi wi kpamɔ, nɛ a dɔnggɔ sɛ a.”

²¹ Linggamɛ ni dia tɛ nwa do Owi ti nu a, nɛ a zila mbula 'da Mɛmukanɛ.

²² A tɔ̃a, nɛ wa tombo ombɛti kɔ 'bili tɛ nùnɔ 'da a vɛ̃. Mbɛtinɔ ni, wa dɛa zɛ́ ma do tɛlɛ tɛ kɔma mɛnɔ, do lɛnggɛ nu owinɔ kpi do kpi ngɔ nùi 'da nwa ni. Wa kɔma kɔ ombɛtinɔ ni na: “Wi wili a nwa ngɔ nu tɔa 'da a, nɛ ma wia na, wa tɔ̃ lɛnggɛ nu a nu tɔa 'da a.”