EFƐZƐ 5 - WE NU GALE 1995

Nɛ dɛ́ mɔ tɛ nɛ ɔ nɛ kɛ 'da Owi kɔ sa fala

¹ Nɛ 'bã́ olo kɔ̃ Gale, we kɛ nɛ a obenɔ 'da a, nɛ a kɔ̃ gɛnɛ nɛ wena.

² Nɛ kɔ̃́ gɛnɛ ngba nɛ ɔ nɛ kɛ Kristo kɔ̃a zi do gɛnɛ lɛ, nɛ a hã zi tɛ́ a vɛ we duzu lɛ ni. A hã zi kili tɛ a hã Gale ɔ nɛ dɔnggamɔ kɛ ma unu de wena, nɛ ma hã yangga hã Gale ni.

³ Nɛ a owinɔ 'da Gale, kɔ nɛ tɛ yɛ̀nggɛ̀ vĩ zu yɛli, do dɛ̀ mɔ sape, do dɛ̀ nga'ba gɔ. Nɛ nɛ tɛ sà mbamba li mɛnɔ ni gɔ.

⁴ Nɛ ma wè 'bɔ na, wa zele lɛnggɛ sape, do lɛnggɛ yɔnda, do 'dã we nu nɛ gɔ. Nɛ nde nɛ ha tɛ nɛ we dɔnggɔ Gale oto de mɛnɔ kɛ a dɛa ni.

⁵ Mba gɔ, nɛ ĩ na, wi yɛnggɛ vĩ zu yɛli, tabi wi dɛ mɔ sape, tabi wi dɛ nga'ba lé sɛ kɔ le nwa 'da Kristo do Gale gɔ. Dɛ nga'ba ma ɔ nɛ dɔnggɔ kpikima ni.

⁶ Dɔ wele ɔ́lɔ́ nɛ do lɛnggɛ bɛlɛ gɔ. Nɔ̃lɔ̃ zã 'da Gale ma te sɛ ngɔ Owi bɛ gɛnɛ a, we duzu 'dã mɛnɔ ni.

⁷ Kɔ nɛ tɛ mbà do owinɔ wa dɛ mɛnɔ ní ni gɔ.

⁸ Mba gɔ, nɛ zi a kɔ gba tũ, kɔ ngangga ni, nɛ mba kpo do Nwa, nɛ nɛ hɔa kɔ sa fala. We duzu ma, nɛ dɛ́ mɔ tɛ nɛ ɔ nɛ kɛ 'da owinɔ wa kɔ sa fala ni.

⁹ We kɛ sa fala dɛ na, wele ɔ do dia sila, do bɔlɔ zu, nɛ a dɛ gbãlã we dɛa mɔ.

¹⁰ Kɔ nɛ fá we ĩ ti mɛ kɛ ma hã yangga hã Nwa ni, nɛ nɛ dɛ́ ma.

¹¹ Nɛ tɛ mbà do owinɔ kɛ wa kɔ gba tũ, nɛ wa dɛ yia dɛa mɛnɔ ni gɔ. Nɛ nde nɛ bé 'dã mɛnɔ 'da wa dɛ wila fala.

¹² (Mɛ a sape wena we tɔ̃ lɛnggɛ mɛnɔ kɛ winɔ wa dɛ do usu nɛ ni.)

¹³ Kɔ fala kɛ mɛnɔ ni ma be tɛ ɛ dɛ wila fala ia, nɛ owinɔ wa ĩ sɛ ti tɛlɛ tɛ owi dɛ ma ngboo.

¹⁴ Mba gɔ, 'da fala kɛ mɔ kɛ wa usu ma usu ni be tɛ̃ ɛ nza, nɛ nde ma hɔa dɛ sa fala ia. Ma kɛ wa tɔ̃a na: “Aa mɔ, wi ɔ yala gɛ, mɔ túnú, mɔ kúlú ngɔ sanga ofionɔ, nɛ yele ngbala 'da Kristo ma yele sɛ ngɔ mɔ.”

¹⁵ Li nɛ sɔ̃́ kɔ dungi 'da nɛ. Nɛ tɛ dɛ̀ mɔ tɛ nɛ ɔ nɛ oyɔnda wi gɔ, nɛ nde nɛ dɛ́ mɔ do hã zã.

¹⁶ Nɛ kpa fala we dɛ de mɔ, nɛ nɛ dɛ́ ma, mba gɔ, ngba soenɔ gɛ ma dè gɔ.

¹⁷ We duzu ma, nɛ tɛ ɔ̀ nɛ oyɔnda wi gɔ, nɛ nde nɛ fá we ĩ ti mɛ kɛ Nwa kɔ̃a na, nɛ dɛ ni.

¹⁸ Nɛ tɛ nɔ̀ dɔ̃, nɛ ma ba nɛ gɔ, we kɛ bá dɔ̃ 'danga wele 'danga. Nɛ nde ma wia na, ngawi 'da Hi Wi Santo dunu kɔ sila nɛ.

¹⁹ Nɛ gá zuma 'da Gale we nganda do sila ngba nɛ, nɛ nɛ e sila nɛ vɛ we ga zuma kpi do kpi we dɔnggɔ do Nwa.

²⁰ Nɛ nɛ hã́ iɔ̃nae hã Baa lɛ Gale fai we mɛnɔ vɛ́, do zu li Nwa 'da lɛ Yezu Kristo.

We ngɔ ba ngba wi

²¹ Nɛ, owinɔ kɛ nɛ dɛ kili Kristo dɛa ni, nɛ zélé nu ngba nɛ.

²² Aa nɛ, owukonɔ, nɛ zélé nu wili nɛ, ɔ nɛ kɛ nɛ zele do nu Nwa ni.

²³ Mba gɔ, wi wili a nwa ngɔ wuko, ɔ nɛ kɛ Kristo a Nwa ngɔ Eklezia ni. Nɛ Kristo a hã kpasi hã Eklezia kɛ mɛ a kili tɛ a ni.

²⁴ Kɔ ma wia na owukonɔ wa zele nu wili wa kɔ mɛnɔ vɛ, ɔ nɛ kɛ Eklezia zele do nu Kristo ni.

²⁵ Nɛ nɛ, Owi wilinɔ, nɛ kɔ̃ gɛnɛ wukonɔ 'da nɛ, ɔ nɛ kɛ Kristo kɔ̃a do gɛnɛ Eklezia, nɛ a hã zi kili tɛ a we ma ni.

²⁶ A dɛa zi ni na, Eklezia hɔ mɔ mɔ́ Gale. A fɔlɔ zi ma do lì batisimɔ, do we nu Gale.

²⁷ A kɔ̃a zi na, Eklezia ma hɔ dia mɔ li a wele nɛ. A kɔ̃̀ zi na, mɔ ndi, do yɔa ti dɛa mɔ, do gele 'dã mɔ ɔ kɔ nɛ gɔ, nɛ nde ma ɔ santo, nɛ ma we ngboo.

²⁸ Ma wia na, Owi wilinɔ wa kɔ̃ gɛnɛ wukonɔ 'da wa, ɔ nɛ kɛ wa kɔ̃a do kili tɛ wa wele nɛ ngboo ni. Wi kɛ a kɔ̃ gɛnɛ wuke 'da a, nɛ nde a kɔ̃a gɛnɛ kili tɛ̃ a wele nɛ.

²⁹ Mba gɔ, wele wè tɛ sɛnɛ kpo kili tɛ̃ ɛ gɔ. Nɛ nde a dala ma, nɛ a fɔmɔ ma, ɔ nɛ kɛ Kristo fɔmɔ do Eklezia ni.

³⁰ Mba gɔ, lɛ a omɔ tɛ kili tɛ́ a.

³¹ Ma ɔ nɛ kɛ wa kɔma kɔ 'Buki 'da Gale na: “Ma hã wi wili a la sɛ baa a do naa a, nɛ a mba sɛ ngba a do wuke 'da a, nɛ wa bɔa nɛ, wa hɔ kili tɛ wi kpo.”

³² Gã we usu tɛ ɛ kɔ wenɔ gɛ. Mi tɔ̃ ni we lengge do dungi 'da Kristo do Eklezia.

³³ Nɛ nde ma tɛ mɛ 'bɔ na mɛ ni we duzu nɛ. Ma wia na, wi wili kpo kpo kɔ̃ gɛnɛ wuke 'da a ɔ nɛ kili tɛ a wele nɛ ni, nɛ wuko kpo kpo dĩlĩ fala tɛ wili a.