EFƐZƐ 4 - WE NU GALE 1995

Nɛ mbá kpo dɛ kɔ Kristo

¹ We duzu ki ni, ma hã mi, kɛ mi a wi bɔlɔkɔ we dɛa toe 'da Nwa ni, mi ala nu mi hã nɛ na, nɛ 'dáfá dungi 'da nɛ, kɔ ma we do dungi kɛ Gale sa zi mɔ hã nɛ we nɛ ni.

² Nɛ bá tɛ nɛ dɛ nù, nɛ nɛ ɔ́ do gɛa sila, do du sila. Nɛ nɛ kúnú sila nɛ ngɔ dɛa mɔ tɛ ngba nɛ we be kɔ̃a zã 'da nɛ hã wa.

³ Hi Wi Santo mba li nɛ kpo, kɔ nɛ dɛ́ nganda na, nɛ dɛ na do ngba nɛ, nɛ sila nɛ ɔ kpo.

⁴ Lɛ Owi Kristonɔ vɛ, lɛ a kili tɛ wi kpo, nɛ lɛ kpa 'bɔ Hi Wi Santo kpo. Nɛ lɛ gbini zã lɛ do kpo dia mɛ kɛ Gale kpua zi do mbulu nɛ hã lɛ 'da fala kɛ a sa zi do mɔ hã lɛ ni.

⁵ Nwa zu a kpo, nɛ kɔ̃a we 'da lɛ kpo, nɛ lɛ kpa batisimɔ kpo.

⁶ Gale zu a kpo, nɛ a a Baa winɔ vɛ́. A a nwa ngɔ winɔ vɛ, nɛ a dɛ to do wala 'da winɔ vɛ, nɛ a ɔ kɔ sila lɛ vɛ.

⁷ Nɛ wele kpo kpo sanga lɛ gɛ kpa ngawi dɛ to, ɔ nɛ kɛ Kristo hã ma hã a do dia zã 'da a ni.

⁸ We duzu ma, wa kɔma kɔ 'Buki na: “A kũ dɛ ngɔ i, a kala owele li bolo si do wa, nɛ a hã ngawi dɛ to hã owele.”

⁹ Kɛ 'Buki tɔ̃a na: “A kũ dɛ ngɔ i” ni, gulu nɛ na ge nde? Gulu nɛ na, dati kɛ na Kristo kũ dɛ ngɔ i ni, a zĩlĩ zi gbaa nù nga.

¹⁰ Wi kɛ a zĩlĩ gbaa nù nga ni, a 'bɔ a kpo wi kɛ a kũ gbaa li nza i ni, takɔ a 'dafa mɛnɔ nyanga nza gɛ vɛ́, kɔ ma we ngboo.

¹¹ Wi hã ngawi dɛ to kpi do kpi hã winɔ, wi a a. A ia ombe do Owi nɛ to, nɛ a e ombe owi gba olo nu Gale, nɛ ombe owi be Dia Sakoe, nɛ ombe owi zɔ mɔ tɛ eklezia, nɛ ombe owi be mɔ.

¹² A dɛa ni, takɔ a 'dafa owinɔ 'da Gale na, wa we tɛ dɛ tonɔ kpi do kpi, takɔ wa gã 'da kɔ̃a we 'da owinɔ kɔ Eklezia kɛ mɛ a kili tɛ Kristo ni.

¹³ Na mɛ ni, nɛ lɛ mba sɛ vɛ́ kpo dɛ kɔ kɔ̃a we 'da lɛ, nɛ lɛ ĩ ti Be 'da Gale ngboo. Nɛ kɔ̃a we 'da lɛ gã dɛ dati gbaa na, ma we ngboo, nɛ lɛ ɔ nɛ Kristo ni.

¹⁴ Nɛ lɛ sɛ 'bɔ a obe kɔ kɔ̃a we do kɛ na, Owi be gele wenɔ wa yɛkɛ lɛ nɛ́ kɛ bũ ba ga, nɛ ma la do ma mba mba ni gɔ. Ma dɛ tɛ ɛ ni do 'da fala Owi 'dã hãnɔ wa ɔlɔ winɔ do bia we bɛlɛnɔ 'da wa ni.

¹⁵ Nɛ nde ma wia na, lɛ be gbãlã we 'da Gale dɛ nza, nɛ lɛ dɛ ma do kɔ̃a zã. Lɛ dɛ́ ni, nɛ kɔ̃a we 'da lɛ ma gã sɛ dɛ dati gbaa, nɛ lɛ mba sɛ kpo do Kristo, kɛ a a zu Eklezia ni.

¹⁶ Kristo mba li omɔ tɛ kili tɛ wi kpi do kpi dɛ tɛ ngba ɛ kpo do dia nɛ. Kɔ fala kɛ omɔ tɛ kili tɛ wele kpo kpo dɛ to 'da ɛ do kɔ̃a zã ɔ nɛ kɛ ma wia ni, nɛ kili tɛ wi vɛ́ ma gã, nɛ ma nganda.

Lɛ kpóló dɛa mɔ tɛ lɛ

¹⁷ Ma a mi tɔ̃ hã nɛ, nɛ mi dala nu mi do zu li Nwa na: Nɛ tɛ dɛ̀ mɔ tɛ nɛ ɔ nɛ opaganɔnɔ, kɛ wa ĩ̀ ti Gale gɔ, nɛ wa nɛ 'do yia linggamɛnɔ 'da wa iko ni gɔ.

¹⁸ Gbãlã zã wa bi do'do, nɛ wa kpá sɛ kpasi kɛ Gale hã ma ni gɔ, we kɛ wa ĩ̀ ti mɔ kpo gɔ, nɛ sila wa nganda do'do.

¹⁹ Sape bá 'bɔ li wa gɔ, nɛ wa hã tɛ wa we dɛ 'dã mɛnɔ kpi do kpi, do yɛnggɛ vĩ zu yali.

²⁰ Nɛ nde we 'da Kristo kɛ nɛ yambala zi ni, ma ɔ̀ ni gɔ.

²¹ Mi ĩ na, nɛ́ kɛ nɛ a Owi Kristo ni, wa bia gbãlã we 'da a hã nɛ, nɛ nɛ zila ma.

²² Kɔ nɛ lá fala ã dɛa mɔ tɛ nɛ, kɛ nɛ zi do ma 'da fala kɛ nɛ tɛ hɔ̀ zi winɔ 'da Kristo gɔ ni. Ã dɛa mɔ tɛ nɛ ni, ma hã 'dã wɔ hã nɛ, nɛ ma ɔlɔ nɛ, nɛ ma 'danga nɛ.

²³ Kɔ ma wia na, nɛ kpolo linggamɛnɔ 'da nɛ vɛ̃, nɛ nɛ kifi sila nɛ.

²⁴ Nɛ 'dáfá dɛa mɔ tɛ nɛ na, nɛ hɔ mbé wi kɛ Gale dɛa a na, a hɔ ɛ, nɛ zu a a bɔlɔ, nɛ a santo nɛ́ kɛ gbãlã we 'da Gale be ma ni.

²⁵ We duzu ma, nɛ lá fala 'bili bɛlɛ, nɛ wele do wele tɔ̃́ gbãlã we hã ngba a. We kɛ lɛ vɛ́, lɛ a mɔ tɛ kili tɛ wi kpo.

²⁶ 'Da fala kɛ zã nɛ nɔ̃lɔ̃, nɛ nɛ dɛ zĩ na, dɔ nɛ dɛ́ 'dã mɔ gɔ. Nɛ wese tɛ gɛ̃̀ nɛ do nɔ̃lɔ̃ zã ni gɔ.

²⁷ Nɛ tɛ hã̀ wala hã Satana na, a ɔlɔ nɛ gɔ.

²⁸ Wi kɛ a zi a wi zũ ni, a tɛ zu 'bɔ mɔ gɔ. Nɛ nde ma wia na, a dɛ to do kɔ̃ a, takɔ a kpasa do nɛ, nɛ a gala 'bɔ do owinɔ kɛ wa do sã ni.

²⁹ Nɛ tɛ wèlè 'dã we hã ongba nɛ gɔ, nɛ nde nɛ tɔ̃́ tati a dia lɛnggɛ kɛ ma wia we gã 'da kɔ̃a we 'da ongba nɛ, nɛ ma 'dafa sila wa ni.

³⁰ Nɛ tɛ hã̀ 'bako hã Hi Wi Santo 'da Gale gɔ. Mba gɔ, Hi Wi Santo ɔ nɛ dã kɛ Gale gɔnɔ ma tɛ nɛ, we 'bɔ do 'da tũi kɛ a kpasa sɛ do nɛ ni.

³¹ Ma wia na, nɛ fo mãlã, dã, nɔ̃lɔ̃ zã, vũ to tɛ ngba wi, nga gɛlɛ, dɛla, mba do ogele 'dã mɛnɔ vɛ sanga nɛ do'do.

³² Nɛ nɛ dɛ́ de mɔ hã ongba nɛ. Nɛ ɔ́ do dia sila dɛ 'da wa, nɛ nɛ mbɔ́kɔ́ wa ngɔ 'dã mɛ wa dɛa do nɛ ni, ɔ nɛ kɛ Gale mbɔka zi tɛ mɛ 'bɔ nɛ we Kristo ni.