EFƐZƐ 3 - WE NU GALE 1995

Dɛa toe 'da Polo sanga ogele winɔ

¹ We duzu ma, mi Polo, mi sambala Gale we nɛ kɛ nɛ a Oyuda gɔ ni. Mi a wi bɔlɔkɔ we duzu toe kɛ Yezu Kristo tumba mi we dɛ hã nɛ ni.

² Kafi bina, nɛ zila we toe kɛ Gale hã hã mi do dia zã 'da a na, mi dɛ hã nɛ ni.

³ Gale hũi hã zã mi na, mi ĩ ti linggamɛ 'da a kɛ a usu zi kɔ sila a ni. Mi kɔma be lɛnggɛ ngɔ nɛ sĩ,

⁴ kɔ nɛ tɔlɔ ma, nɛ nɛ zɔ sɛ na, mi ĩ ti linggamɛ 'da Gale kɛ a usu zi kɔ sila a, nɛ ma dɛa tɛ ɛ ngangga ni do wala 'da Yezu Kristo ni.

⁵ Usu linggamɛ ni, Gale bè zi ma hã owinɔ dati ni gɔ. Nɛ nde ngangga gɛ, a bia ma do wala 'da Hi Wi 'da a hã Owi nɛ tonɔ 'da Kristo, do Owi gba olo nu a kɛ a saka wa ni.

⁶ Usu linggamɛ ni ma kɛ: Dia Sakoe ma dɛa na, ogele winɔ wa kpa de mɛ 'da Gale fala nɛ kpo do Oyudanɔ. Wa bɔa nɛ, wa hɔa wele kpo, nɛ wa wia tɛ kpa mɔ do mbuli kɛ Gale kpua zɛ́ ma hã owinɔ 'da a do wala 'da Yezu Kristo ni.

⁷ Nɛ mi hɔa wi dɛa to we be Dia Sakoe ni, we duzu kɛ Gale zi do dia zã dɛ 'da mi, nɛ a saka mi, nɛ a hã ngawi dɛ ma hã mi.

⁸ Mi gɛ, mi a nda go'do owinɔ 'da Gale vɛ́, nɛ nde Gale bia dia zã 'da a hã mi, nɛ a saka mi we be Dia Sakoe hã owinɔ kɛ wa a Yuda gɔ ni. Dia Sakoe ni ma tɔ̃ lɛnggɛ de mɛnɔ kɛ ndɔti nɛ bina, nɛ lɛ kpa ma do wala 'da Kristo ni.

⁹ Gale tumba mi we be tɛlɛ tɛ kɛ linggamɔ kɔ sila a ma dɛ sɛ do tɛ ɛ ni dɛ nza. Gale kɛ a dɛa mɛnɔ vɛ ni, a usu zɛ́ ma dɛ kɔ sila a belee dati a ndo nyanga dɛ mɛnɔ.

¹⁰ A dɛa ni, takɔ ngangga gɛ, ogã hi winɔ do Onwanɔ kɛ wa do ngawi li ngɔ i ni, wa ĩ ti gã hã zã 'da a we duzu dɛa toe 'da Eklezia.

¹¹ Gale 'dafa zɛ́ linggamɛ ni belee dati a ndo nyanga dɛ mɛnɔ, nɛ a dɛa ma do wala 'da Yezu Kristo, Nwa 'da lɛ.

¹² Kɔ nɛ́ kɛ lɛ kɔ̃a zu li Kristo, nɛ lɛ mba kpo do a ni, lɛ kpa wala we kɔlɔ do Gale do gɛ̃a sila.

¹³ We duzu ki ni, mi aka nɛ na, nɛ tɛ zɔ̀ zɛlɛ tɛnɔ kɛ mi kpa we duzu nɛ ni, kɔ nɛ mbɔkɔ gɔ. Zɛlɛ tɛnɔ ni ma hã dia mɔ hã nɛ, nɛ nɛ dɔnggɔ tɛ nɛ do ma.

Kristo kɔ̃a gɛnɛ lɛ

¹⁴ We duzu ma, mi gu gba zugolo dati Baa lɛ Gale,

¹⁵ kɛ a a gba gulu nu fɛlɛ kulanɔ li nza i, do nù nga vɛ ni.

¹⁶ Nɛ mi aka Gale, kɛ a do dia mɔ li nza i wena ni na, a hã ngawi hã nɛ do wala 'da Hi Wi 'da a, takɔ sila nɛ nganda dɛ dati.

¹⁷ Nɛ a dɛ́ na, Kristo ɔ dɛ kɔ sila nɛ fai we duzu kɔ̃a we nɛ kɔ̃a do a ni. Mi aka 'bɔ Gale na, tɛlɛ tɛ kɛ nɛ kɔ̃a do a, nɛ nɛ kɔ̃ 'bɔ do ongba nɛ ni, ma bá nù kɔ sila nɛ fai.

¹⁸ Na mɛ ni, nɛ nɛ mba sɛ do owinɔ 'da Gale vɛ́, nɛ nɛ ĩ ti kɔ̃a zã 'da Kristo kɛ ma gã la li ngele, nɛ ma do ndɔti nɛ bina ni.

¹⁹ Gbãlã we, gɛnɛ kɔ wele wè tɛ ĩ ti kɔ̃a zã 'da Kristo vɛ do dia nɛ gɔ, nɛ nde mi aka Gale na, nɛ ĩ ti ma, takɔ nɛ ba tɛlɛ tɛ Gale ngboo.

²⁰ Gale do ngawi we dɛ mɛnɔ kɛ ma nɛa ngɔ kɛnɔ lɛ gɔ kɔ̃ a, tabi lɛ lengge do ma ni. Nɛ a dɛ ma do ngawi 'da a kɛ ma dɛ to kɔ sila lɛ ni.

²¹ E kɔ lɛ owinɔ kɔ Eklezia kɛ lɛ mba kpo do Yezu Kristo ni, lɛ dɔnggɔ Gale 'da fala fai kɔ sabɛlɛ do sabɛlɛ! Amɛ.