EFƐZƐ 2 - WE NU GALE 1995

Gale kpasa lɛ do kɔ̃a zã 'da a

¹ Zi dati, nɛ ɔ zi nɛ winɔ kɛ wa fi fia ni, we duzu yɔa ti dɛa mɛnɔ do 'dã mɛnɔ 'da nɛ.

² Nɛ yɛnggɛ zi do li 'dã wala ɔ nɛ kɛ owinɔ nù gɛ wa yɛnggɛ ni. Nɛ nɛ zi 'dɔkɔlɔ nwa ngɔ o'dã hi winɔ kɔ bũi sanga li ngɔ gɛ. Nɛ tia do sɔɛ gɛ, 'dã hi wi ni 'bana dɛ to sanga owinɔ kɛ wa bɛa gɛnɛ we nu Gale ni.

³ Lɛ vɛ, lɛ ɔ zi tɛ mɛ 'bɔ nɛ wa ni. Lɛ dɛ zi mɛ kɛ sila lɛ tombo lɛ we dɛ ma ni. Nɛ lɛ nɛ zi 'dɔkɔlɔ 'dã wɔ kɔ zã lɛ, do 'dã linggamɔ kɔ sila lɛ iko. Gulu nɛ a zã Gale nɔ̃lɔ̃ zi dɛ tɛ lɛ, ɔ nɛ kɛ ma nɔ̃lɔ̃ zi dɛ tɛ ogele winɔ ni.

⁴ Nɛ nde Gale do 'bako li a we lɛ wena, we kɛ a kɔ̃a gɛnɛ lɛ la li ngele.

⁵ Na mɛ ni, gɛnɛ kɔ lɛ ɔ zi nɛ lɛ fĩ fia ni, we duzu yɔa ti dɛa mɛnɔ 'da lɛ, nɛ nde Gale mba li lɛ kpo do Kristo, nɛ a hã mbé kpasi hã lɛ. Tati a dia zã 'da Gale hã ma kpasa nɛ!

⁶ A tunu lɛ kɔ fio fala nɛ kpo do Kristo, nɛ a a lɛ do onwa fala nɛ kpo do a tɛ li nza i.

⁷ A dɛa ni we be dia zã 'da a dɛ 'da lɛ do wala 'da Kristo. Nɛ a kɔ̃a we be dia zã 'da a kɛ ma nɛa ngɔ mɔ vɛ́ ni hã owinɔ kɔ sabɛlɛnɔ 'do gɛ.

⁸ Mba gɔ, nɛ kpasa we dia zã 'da Gale, do wala kɔ̃a we kɛ nɛ kɔ̃a ni. Kpasi ni ma yòlò kɔ̃ nɛ gɔ, wi a Gale a hã ma hã nɛ.

⁹ Nɛ dɛ̀ to we nɛ dɛa, do kɛ wele dɔnggɔ tɛ̃ ɛ ngɔ nɛ gɔ.

¹⁰ Gbãlã we, lɛ a mɔ do kɔ̃ Gale. A dɛa lɛ, nɛ a mba li lɛ kpo do Yezu Kristo, takɔ lɛ dɛ dia mɛnɔ kɛ a 'dafa zi dati belee na, lɛ dɛ ma ni.

Oyuda do ogele winɔ wa mba kpo dɛ kɔ Kristo

¹¹ Nɛ, winɔ kɛ nɛ a Oyuda gɔ ni, Oyudanɔ wa sa li nɛ na omanda'ba. Wa tɔ̃ ní, we kɛ wa zɔ tɛ wa na, wa a owinɔ 'da Gale we gaza wa nɛa ni. Nɛ nde gaza ma dɛ ndala tɛ wele iko. Kɔ nɛ lénggé tɛlɛ tɛ kɛ nɛ zi do ma dati ni.

¹² Nɛ ĩ̀ zi ti Kristo gɔ, nɛ nɛ zi sanga winɔ kɛ Gale saka wa ni bina. Nɛ zi kɔ gba tɔkɛ kɛ Gale gba ma do owinɔ 'da a olo mbuli kɛ a kpua zi ma ni bina. Nɛ dungu zi ngɔ nù gɛ, nɛ nde fo zi de mɔ kɛ nɛ wia tɛ gbini zã nɛ do ma ni bina, nɛ nɛ ĩ̀ zi ti Gale gɔ.

¹³ Nɛ nyɛla zi do Gale wena, nɛ nde ngangga gɛ, nɛ mba kpo do Yezu Kristo, nɛ nɛ kɔla do Gale we duzu fie 'da Kristo.

¹⁴ Mba gɔ, Kristo 'dafa dɛa na sanga lɛ. A fua sɛnɛmɛ kɛ ma fi zi ngbo sanga lɛ Oyudanɔ do ogele winɔ ni, nɛ a mba li lɛ, nɛ lɛ hɔa wele kpo.

¹⁵ A gbɛa mbula 'da Oyudanɔ kɛ ma kɛa zi sanga wa do ogele winɔ ni, nɛ a 'dafa dɛa na sanga wa, nɛ a mba li wa bɔa nɛ dɛ kɔ a, nɛ wa hɔa wele kpo.

¹⁶ Fie 'da Kristo ngɔ finda te, ma fua sɛnɛmɔ vɛ, nɛ ma mba li nu fɛlɛ kulanɔ bɔa nɛ na, wa hɔ kili tɛ wele kpo, nɛ ma 'dafa dɛa na sanga winɔ do Gale dɛ olo nɛ.

¹⁷ Kristo tɛa, nɛ a bia Dia Sakoe kɛ ma tɔ̃ we dɛa na ni hã nɛ ogele winɔ, kɛ nɛ nyɛlɛ zi do Gale ni, nɛ a bia 'bɔ ma hã lɛ Oyudanɔ kɛ lɛ kɔla zi do Gale kɔla ni.

¹⁸ Kristo dɛa na, lɛ vɛ, Oyudanɔ do ogele winɔ, lɛ kɔlɔ do Baa lɛ Gale do wala 'da Hi Wi Santo kpo, kɛ lɛ kpa a ni.

¹⁹ We duzu ki ni, nɛ, owinɔ kɛ nɛ a Oyuda gɔ ni, nɛ 'bɔ a ogele wi, tabi ogɛnɛ gɔ. Nɛ hɔa wele le mba do owinɔ 'da Gale. Nɛ hɔa Owi nu fɛlɛ kula 'da Gale.

²⁰ Nɛ ɔ nɛ tɔa kɛ wa dɛa ma dɛ ngɔ ta ni. Nɛ tanɔ ni wi a Owi nɛ tonɔ 'da Kristo, do Owi gba do nu Gale. Nɛ Yezu Kristo do tɛ a a bɛlɛduma tɔa ni.

²¹ Tɔa vɛ ma ngua we duzu a, nɛ a gã 'bɔ 'da nɛ dɛ dati, takɔ ma hɔ tɔa santo 'da Nwa.

²² Nɛ nɛ mba vɛ́ kpo do Kristo, nɛ nɛ hɔa tɔa 'da Gale. Tɔa ni, mɛ a tɔa kɛ Hi Wi 'da Gale ɔ kɔ nɛ ni.