EFƐZƐ 1 - WE NU GALE 1995

¹ Wi a mi Polo, kɛ Gale saka mi do kɔ̃a zã 'da a, nɛ a ia mi do wi nɛ toe 'da Yezu Kristo ni. Mi kɔma mbɛti gɛ hã nɛ, owinɔ 'da Gale tɛ kɔ le Efɛzɛ, kɛ nɛ mba kpo do Yezu Kristo, nɛ nɛ 'bana tɛ kɔ̃ gɛnɛ a do sila nɛ kpo ni.

² E kɔ Baa lɛ Gale, do Nwa Yezu, wa be dia zã 'da wa hã nɛ, nɛ wa dɛ 'bɔ na, nɛ dungu do gɛ̃a sila.

Gale dɛa dia mɔ hã lɛ do wala 'da Kristo

³ E kɔ lɛ dɔ́nggɔ́ Gale, Baa Nwa 'da lɛ Yezu Kristo! A wila nu a tɛ lɛ do wala 'da Kristo kɛ lɛ mba kpo do a ni, nɛ a hã odia mɔ kpi do kpi kɔ li nza i hã lɛ, we gala do hi lɛ.

⁴ Mba gɔ, dati kɛ na Gale dɛ nùi ni, nɛ nde a saka zɛ́ lɛ, nɛ a mba lɛ kpo do Kristo, takɔ lɛ ɔ santo li a, nɛ mɔ kɔ'dɔ wi tɛ ɔ̀ kɔ lɛ gɔ.

⁵ Gale kɔ̃a gɛnɛ lɛ, ma kɛ a 'bili zɛ́ do kɔ sila a belee na, lɛ sɛ a benɔ 'da a do wala 'da Yezu Kristo. A dɛa zi na mɛ ni do kɔ̃a zã 'da a.

⁶ Kɔ lɛ dɔ́nggɔ́ Gale we gã dia zã kɛ a bia ma hã lɛ do wala 'da Yezu Kristo, Be 'da a ngɔ sila a ni.

⁷ Nɛ́ kɛ lɛ mba kpo do Kristo ni, ma kɛ tɔkɔ tɛ́ a gɔnɔ zu lɛ kɔ 'dã mɔ, nɛ Gale fua ku'da 'dã mɛnɔ zu lɛ do'do ni. Na mɛ ni, Gale bia na, dia zã 'da a dɛ 'da lɛ

⁸ ma gã la li ngele. A hã gã hã zã do ĩ ti mɔ hã lɛ,

⁹ nɛ a bia usu mɛnɔ kɛ a 'dafa ni hã lɛ na, lɛ ĩ ti nɛ. A 'dafa zɛ́ belee na, a dɛ sɛ linggamɛ 'da a do wala 'da Kristo.

¹⁰ Kɔ fala kɛ tũ nɛ ma we, nɛ a ngɛmɛ sɛ mɛnɔ li nza i, do kɛnɔ nù nga gɛ vɛ́ dɛ kɔ̃ Nwa kpo, wi a Kristo.

¹¹ Nɛ́ kɛ lɛ mba kpo do Kristo ni, Gale ia lɛ do owinɔ 'da a. A dɛa ni, we kɛ a 'bili zɛ́ do kɔ sila a belee we dɛ ma, nɛ a dɛ mɛnɔ vɛ́ nɛ́ kɛ a kɔ̃a ni.

¹² Kɔ ma wia na lɛ, kɛ lɛ a wi dati we gbini zã lɛ do Kristo ni, lɛ dɔnggɔ Gale we gã dia zã 'da a.

¹³ Nɛ nɛ, ogele winɔ tɛ mɛ 'bɔ, kɛ nɛ mba kpo do Kristo ni, nɛ zila Dia Sakoe, kɛ mɛ a gbãlã we 'da Gale ni, nɛ ma hã kpasi hã nɛ, nɛ nɛ kɔ̃a zu li Kristo. Nɛ Gale gɔnɔ dã tɛ nɛ we be na, nɛ hɔa owinɔ 'da a. Dã ni wi a Hi Wi Santo, kɛ Gale kpua zɛ́ mbulu hã a hã owinɔ 'da a ni.

¹⁴ Gale hã Hi Wi Santo hã lɛ ɔ nɛ mbe nu dia mɛnɔ kɛ a kpua zɛ́ mbulu hã ma hã winɔ 'da a ni. Kɛ a dɛa ni ma be hã lɛ na, ngba soe nɛ we, nɛ lɛ kpasa sɛ, nɛ lɛ hɔ sɛ owinɔ 'da a ngboo. Kɔ lɛ dɔ́nggɔ́ Gale we gã dia zã 'da a.

Polo sambala Gale

¹⁵ Mi zila sako kɔ̃a we nɛ kɔ̃a do Nwa Yezu Kristo, do kɔ̃a zã 'da nɛ dɛ 'da owinɔ 'da Gale vɛ́ ni. We duzu ma,

¹⁶ mi lá fala hã iɔ̃nae hã Gale we duzu nɛ gɔ, nɛ mi lengge do nɛ kɔ sambala 'da mi fai.

¹⁷ Mi aka Baa lɛ, Gale 'da Nwa 'da lɛ Yezu Kristo, kɛ a do dɔ̃lɔ̃ li wena ni na, a hũi linggamɛnɔ 'da nɛ, nɛ a be tɛlɛ tɛ̃ a hã nɛ, takɔ nɛ ĩ ti a ngboo.

¹⁸ Mi aka 'bɔ Gale na, a hũi hã zã 'da nɛ, takɔ nɛ ĩ ti de mɛ kɛ a sa zi mɔ hã nɛ we nɛ, nɛ nɛ gbini zã nɛ do ma ni. Nɛ nɛ ĩ 'bɔ ti gã kpamɛnɔ kɛ a kpua mbulu nɛ hã owinɔ 'da a ni.

¹⁹ Nɛ nɛ ĩ 'bɔ ti ngawi 'da a kɛ ma nɛa ngɔ mɛnɔ vɛ, nɛ a fɔmɔ do lɛ owinɔ kɛ lɛ kɔ̃a zu li a ni.

²⁰ Mɛ a kpo ngawi a tunu zi do Kristo kɔ ofionɔ, nɛ a ia a ngɔ ngawili kɔ̃ a tɛ li nza ngɔ i ni.

²¹ Gale ia Kristo ngɔ ohi winɔ li ngɔ gɛ vɛ, kɛ wa a onwa, tabi ogã wi, nɛ wa do ngawi wena ni. Nɛ a ia li zu a, nɛ li ni nɛa ngɔ li gã winɔ vɛ kɛ li wa dɔ̃lɔ̃ sɔɛ gɛ, do ngba soenɔ ma tɛ sɛ ni.

²² Gale a mɛnɔ vɛ ti nyanga Kristo, nɛ a ia a do gã nwa ngɔ Eklezia.

²³ Eklezia a kili tɛ Kristo, nɛ Eklezia kpa ngawi 'da a vɛ kɔ̃ Kristo, nɛ Kristo kpa ngawi kɔ̃ Gale.