Mbulanɔ 9 - WE NU GALE 1995

Obe Israɛlɛ wa kpàsà we dia dɛa to tɛ wa gɔ

¹ “Aa nɛ, obe Israɛlɛ, nɛ zélé mi sɛ! Nɛ kɔlɔ fala kũ lì Yɔrdanɛ ia. Nɛ kũ dɛ kulu lì i, nɛ nɛ ba sɛ nùi 'da owinɔ kɛ wa dɔa la ngɔ nɛ, nɛ wa nganda 'bɔ nɛa ngɔ nɛ ni. Nɛ ba sɛ ogã lenɔ 'da wa, kɛ wa dɛa gba ngbonɔ zĩ ma takpa, nɛ ngbonɔ ni ma ngala, nɛ ma to li nza ni.

² Oanakɛ, wa sanga owinɔ ni boe. Mɛ a Owele wa dulu wena, nɛ wa nganda 'bɔ wena. Nɛ zila wenɔ 'da wa kɛ winɔ wa tɔ̃ na, wele kpo wè tɛ bi wa, nɛ a nɛ ngɔ wa gɔ ni.

³ Nɛ nde ma 'bana sĩ, nɛ nɛ zɔ sɛ NWA Gale 'da nɛ tɛ la do dati nɛ ɔ nɛ nyɛa we, kɛ ma bɛlɛ mɛnɔ vɛ̃ ni. A ndaka sɛ wa, nɛ a dɛ na, nɛ nɛ ngɔ wa. Nɛ ba sɛ nùi 'da wa, nɛ nɛ kumu wa do ti, ɔ nɛ kɛ NWA kpua do mbulu nɛ ni.

⁴ “Nɛ nde 'da fala kɛ NWA a ndaka sɛ wa dati nɛ ni, nɛ nɛ tɛ to ngu'du nɛ gɔ. Nɛ tɛ tɔ̃́ na: ‘NWA ndaka wa, we kɛ lɛ dɛa de mɔ wena’ ni gɔ. Mba gɔ, NWA a ndaka sɛ winɔ ni dati nɛ, we kɛ wa a o'dã wele, dɛa to tɛ wa dè gɔ.

⁵ Nɛ a hã́ sɛ nùi 'da wa hã nɛ, we duzu kɛ dɛa to tɛ nɛ de wena ni gɔ. Nɛ nde NWA a ndaka sɛ wa we duzu 'dã dɛa to tɛ wa, do we duzu kɛ a kɔ̃a dɛ mbuli kɛ a kpua zi hã oyaa nɛ Abrahama, Izaka do Yakɔbɔ ni.

⁶ Nɛ ĩ do dia nɛ na, NWA è nɛ na, nɛ ba dia nùi ni, we kɛ dɛa to tɛ nɛ wia do ma ni gɔ, mba gɔ, nɛ a owi dɛ nga zu!

⁷ “Nɛ tɛ nɛ tɛ èlè ngɔ tɛlɛ tɛ kɛ nɛ dɛa zi na, zã NWA Gale 'da nɛ nɔ̃lɔ̃ tɛ li gba zɔ̃ i ni gɔ. Yolo do ngba soe nɛ hɔa zi nza ngɔ nù Ezipeto gbaa we hɔ dɛ ni, nɛ là fala dɛ nga zu dɛ tɛ̃ a gɔ.

Mɔizɛ gba ta zu obe Israɛlɛ ngɔ 'dã mɛ 'da wa

⁸ “'Da fala nɛ zi a ngɔ kala Horɛbɛ, nɛ nɛ hã dã hã NWA, nɛ zã a nɔ̃lɔ̃ dɛ tɛ nɛ nganda wena. Nɛ ma 'bana zi bi sĩ na, a kumu nɛ vɛ̃.

⁹ Mi kũ zi dɛ ngɔ kala i, we kala otanɔ bɔa, kɛ Gale kɔma mbɛti gba tɔkɛ 'da a do lɛ dɛ ngɔ nɛ ni. Nɛ mi ɔa i mɔ 'bu tũ nalɛ. Nɛ do kɔ̃ tũnɔ ni vɛ̃, mi nyɔngɔ mɔ gɔ, nɛ mi nɔ̀ 'bɔ mbamba lì gɔ.

^10-11 Nɛ 'do kɛ mi ɔa di ni 'bu tũi nalɛ ni, nɛ NWA Gale kala tanɔ bɔa kɛ a do tɛ̃ a, a kɔma ombula gba tɔkɛ dɛ ngɔ nɛ ni hã mi. Mɛ a ombulanɔ kɛ a tɔ̃a zi ma hã nɛ kɔ nyɛa we, do ngba soe nɛ mba zi ngba nɛ dɛ nyanga kala i ni.

¹² “Nɛ a tɔ̃ hã mi na: ‘Mɔ zĩlĩ kala dɔ̃, we kɛ owinɔ mɔ fua wa ngɔ nù Ezipeto dɛ nza gɛ, wa dɛa gã 'dã mɔ. Wa gbini mbula kɛ mi ba hã wa ni do'do. Wa gi mɔ mbali, nɛ wa dɛa do kpikima be wili ngɔmbɔ.’

¹³ Nɛ NWA tɔ̃ 'bɔ hã mi na: ‘Mi zɔa na, owinɔ gɛ wa a owi dɛ nga zu.

¹⁴ Mɔ é mi kɔ mi kumu wa, hã li wa mbiti ngɔ nùi gɛ do'do. Nɛ 'do nɛ, nɛ mi dɛ sɛ na, mɔ ko obe, nɛ mɔ sɛ a baa Owele kɛ wa dɔ wena, nɛ wa nganda 'bɔ la ngɔ owinɔ gɛ.’

¹⁵ “Mi zila ni, nɛ mi zĩlĩ kala do tanɔ bɔa dɛ kɔ̃ mi ni. Nɛ nyɛa we ma kpa zi ngɔ kala vɛ̃.

¹⁶ Nɛ nde mi nɛa we kɔlɔ do nyanga kala, nɛ mi zɔ na, nɛ gbini mbulanɔ, nɛ nɛ dɛa 'dã mɔ dɛ 'da NWA. Nɛ dula kpikima be wili ngɔmbɔ do mɔ bolo, we dɔnggɔ ma.

¹⁷ Mi nɛa we zɔ ní, nɛ mi lo tanɔ bɔa ni nù dɛ gbali nɛ ni. Nɛ ma gbini kisi kisi.

¹⁸ “'Do nɛ, nɛ mi tia 'bɔ mbé nɛ, nɛ mi gu li mi nù dati NWA. Nɛ mi 'bana dɛ nù ni 'do 'bu tũ nalɛ, mi nyɔngɔ mɔ gɔ, nɛ mi nɔ̀ 'bɔ mbamba lì gɔ. Mi dɛa zi na mɛ ni, we kɛ nɛ dɛa 'dã mɔ dɛ 'da NWA. Nɛ dɛa zi mɔ kɛ ma dè tɛ NWA gɔ ni, nɛ nɛ nɔ̃lɔ̃ zã a nganda wena.

¹⁹ Nɛ mi dɛa zi kili na, a kumu sɛ nɛ we kɛ zã a nɔ̃lɔ̃ ni. Nɛ nde a zila zi mi 'bɔ mbé nɛ.

²⁰ Zã NWA nɔ̃lɔ̃ zi dɛ tɛ Aroni wena, nɛ a kɔ̃a zi we gbɛ a. Nɛ nde do ngba soe ni, mi sambala zi we a wena.

²¹ 'Do nɛ, nɛ mi ba kpikima be wili ngɔmbɛ kɛ nɛ dɛa do mɔ mbali, nɛ mɛ a mɔ olo 'dã mɛ 'da nɛ ni, nɛ mi fi ma li we. Nɛ ma mbɔkɔ, nɛ mi gbɛlɛ, nɛ ma dɛ fũ. Nɛ mi sua fũ nɛ, nɛ mi a ma 'dɔ fua lì kɛ ma yolo ngɔ kala i ni.

²² “'Do ki ni, nɛ mbe tũ kpo, nɛ nɛ nɔ̃lɔ̃ zi 'bɔ zã NWA, 'da fala nɛ zi a tɛ Tabera do Masa do Kibrɔtɛ-Tava ni.

²³ Nɛ nɔ̃lɔ̃ zi 'bɔ zã a tɛ Kadɛsɛ-Barnea. A tumba zi nɛ na, nɛ nɛ, kɔ nɛ ba nùi a kpua mbulu nɛ hã nɛ ni, nɛ nɛ bɛ̃a. Nɛ gbìnì zi zã nɛ do a gɔ, nɛ nɛ bɛ̃a we dɛ mɛ kɛ a tɔ̃a hã nɛ ni.

²⁴ Do gbãlã we, yolo do ngba soe mi ĩ zi do ti nɛ ni, nɛ là fala dɛ nga zu dɛ tɛ NWA gɔ gbaa tia do sɔɛ gɛ.

²⁵ “We duzu ki ni, ma kɛ NWA 'bili zi we kumu nɛ. Nɛ nde mi tia, nɛ mi gu li mi nù, nɛ mi 'bana dɛ di ni 'do 'bu tũ nalɛ. Nɛ mi nyɔngɔ mɔ gɔ, nɛ mi nɔ̀ 'bɔ lì gɔ.

²⁶ Nɛ mi sambala NWA na: ‘Aa NWA Gale, mɔ tɛ kùmù owinɔ 'da mɔ gɔ, we kɛ wele wa a mɔ́ mɔ. Mɔ fua wa kɔ ngamɔ te ngɔ nù Ezipeto do ngawi 'da mɔ, kɛ ma nɛa ngɔ mɔ vɛ̃ ni.

²⁷ Kɔ mɔ kɔ̃, nɛ mɔ lengge do owi tonɔ 'da mɔ Abrahama, Izaka do Yakɔbɔ. Nɛ nu tɛ lènggè do 'dã mɛ do nga zu 'da owinɔ gɛ gɔ.

²⁸ Ní gɔ, nɛ owinɔ nu fua obe Israɛlɛ ngɔ nùi 'da wa ni wa tɔ̃ sɛ na, mɔ NWA, mɔ wè zi we kã owinɔ gɛ dɛ ngɔ nùi kɛ mɔ kpua mbulu nɛ hã wa ni gɔ. Tabi, wa tɔ̃ sɛ 'bɔ na, mɔ kɔ̃̀ zi gɛnɛ wa gɔ, nɛ mɔ fua wa ngɔ nù Ezipeto, takɔ mɔ gbɛ wa dɛ li gba zɔ̃ɛ gɛ.

²⁹ Aa NWA, gɛnɛ kɔ wa dɛa na mɛ ni, nɛ nde wa a owinɔ kɛ mɔ saka wa na, wa ɔ do mɔ́ mɔ. Nɛ mɔ kpasa wa do ngawi 'da mɔ, kɛ ma nɛa ngɔ mɔ vɛ̃ ni.’