Mbulanɔ 7 - WE NU GALE 1995

Obe Israɛlɛ wa a winɔ 'da Gale ngboo

¹ “NWA Gale 'da nɛ, a kã sɛ nɛ dɛ ngɔ nùi ni, nɛ nɛ ba sɛ ma do mɔ nɛ. Nɛ kɔlɔ do nùi ni, nɛ a ndaka sɛ ogele nu kɔnggɔnɔ dati nɛ. Onu kɔnggɔnɔ a nɛ ndaka wa ni, mɛ sɛ a onu kɔnggɔ sambo, kɛ wa dɛlɛ wena, nɛ wa nganda nɛa ngɔ nɛ ni. Wi a: Ohiti, Ogirgasi, Oamori, Okanana, Opɛrizi, Ohivi do Oyebuzi.

² Gale 'da nɛ a e sɛ owinɔ ni dɛ kɔ̃ nɛ, nɛ nɛ nɛ sɛ ngɔ wa. Nɛ ma wia na, nɛ kumu wa vɛ̃. Nɛ tɛ dè na do wa gɔ, nɛ nɛ tɛ dɛ̃ 'bɔ 'bako hã wa gɔ.

³ Nɛ tɛ bà ko sanga tɛ ngba nɛ do wa gɔ, nɛ nɛ tɛ è benɔ 'da nɛ na, wa ba ko ti wa gɔ.

⁴ We duzu kɛ nɛ dɛ na mɛ ni, nɛ owinɔ ni wa dɛ sɛ na, obe zã nɛ wa siki 'do wa dɛ 'da NWA Gale we sambala ogele galenɔ. Fala kɛ wa dɛ na mɛ ni, nɛ zã NWA Gale ma nɔ̃lɔ̃ sɛ dɛ tɛ nɛ, nɛ a kumu sɛ nɛ do ti.

⁵ Ma kɛ ma wia na, nɛ gbini gbagala dɔnggɔ do galenɔ 'da wa do'do, nɛ gbini sanga tanɔ kɛ wa ndɛngɛlɛ we dɔnggɔ ma ni, nɛ nɛ 'danga gale wuke Asɛra kɛ wa sɛa ni, nɛ nɛ dɔ osɛa tenɔ 'da wa do'do.

⁶ Mba gɔ, nɛ a owinɔ 'da NWA Gale 'da nɛ. A saka nɛ sanga owinɔ ngɔ nù gɛ vɛ̃ na, nɛ hɔ owinɔ 'da a, ngɔ sila a ngboo.

NWA élé dɛ mbuli 'da a gɔ

⁷ “NWA kɔ̃a gɛnɛ nɛ, nɛ a saka nɛ. A sàkà nɛ we kɛ nɛ dɛlɛ la tala gele winɔ ni gɔ. Nɛ zi a be nu kɔnggɔ sĩ sanga gele kɛnɔ ngɔ nù gɛ iko.

⁸ Nɛ nde nwa kɔ̃a gɛnɛ nɛ, nɛ a dɛa olo mbuli kɛ a kpua zi hã oyaa nɛ ni. Ma kɛ a fua zi nɛ ngɔ nù Ezipeto do ngawi 'da a kɛ ma nɛa ngɔ mɛnɔ vɛ̃. Nɛ a kpasa nɛ ti kɔ̃ nwa ngɔ nùi ni.

⁹ Nɛ ĩ́ na tati a NWA Gale 'da nɛ, a zu a kpo a ngbongbo Gale. Winɔ kɛ wa dɛ mbulanɔ 'da a dɛa ni, a be sɛ kɔa zã 'da a hã wa, nɛ a dɛ sɛ olo gba tɔkɛ 'da a do wa kɔ sabɛlɛ do sabɛlɛ.

¹⁰ Nɛ nde wanɔ wa sɛnɛ a ni, a dá'bá sɛ tɛ̃ a we hã etumbu hã wa, nɛ a gbɛ wa gɔ.

¹¹ Kɔ ngangga ni, nɛ dɛ́ olo mbulanɔ vɛ̃ kɛ mi bia ma hã nɛ sɔɛ gɛ ni.

¹² “Fala kɛ nɛ zele mbulanɔ gɛ, kɔ nɛ dɛ ma, nɛ NWA Gale 'da nɛ, a 'bana sɛ tɛ dɛ mbuli a kpua zɛ́ hã oyaa nɛ ni. Nɛ a be sɛ 'bɔ kɔ̃a zã 'da a hã nɛ.

¹³ A kɔ̃ sɛ gɛnɛ nɛ, nɛ a wele nu a tɛ nɛ na, nɛ kpa de mɔ wena, nɛ nɛ ko 'bɔ obe dɛlɛ wena. A wele sɛ 'bɔ nu a tɛ Okpalɛnɔ 'da nɛ, do nɔnɔ, do owala tenɔ 'da nɛ, nɛ a hã sɛ onadalamɔ hã nɛ wena. Mɛnɔ ni vɛ̃, a dɛ sɛ ma hã nɛ 'da fala nɛ sɛ a ngɔ nùi kɛ a kpua zi mbulu nɛ hã oyaa nɛ na, a hã sɛ ma hã nɛ ni.

¹⁴ Nɛ la sɛ ngɔ tala gele nu kɔnggɔnɔ do kpamɔ. Nɛ nɛ, owi wilinɔ do owukonɔ, tabi onadalamɛnɔ 'da nɛ, nɛ dúngú sɛ ndɔlɔ gɔ.

¹⁵ NWA Gale a fɔmɔ sɛ nɛ kɔ zɛlɛ mɛnɔ vɛ̃. Nɛ a fí sɛ 'dã zɛlɛnɔ kɛ a fi zi tɛ owi Ezipeto ni tɛ nɛ gɔ. Nɛ nɛ kpá sɛ ngamɔ ɔ nɛ kɛ nɛ zɔa zi owi Ezipeto tɛ kpa ma ni gɔ. Nɛ nde a fi sɛ zɛlɛnɔ ni tɛ owi sɛnɛ nɛ.

¹⁶ Nɛ ma wia na, nɛ kumu onu kɔnggɔnɔ vɛ̃ kɛ NWA Gale 'da nɛ ia wa dɛ kɔ̃ nɛ ni. Nɛ tɛ dɛ̃ 'bako hã wa gɔ, nɛ nɛ tɛ dɔnggɔ 'bɔ ogalenɔ 'da wa gɔ. Nɛ dɛ na mɛ ni, nɛ ma ɔlɔ sɛ nɛ na, nɛ le kɔ 'dã mɔ.

NWA Gale a fɔmɔ sɛ owinɔ 'da a

¹⁷ “Nɛ tɛ tɔ̃̀ na, owinɔ ni wa nganda nɛa ngɔ lo, kɔ lo nɛ dɛ fala ndaka wa nɛ nde gɔ.

¹⁸ Nɛ tɛ dɛ̀ kili wa gɔ, nɛ lénggé do mɛ kɛ NWA Gale 'da nɛ, a dɛa zi do nwa ngɔ nù Ezipeto do owinɔ 'da a vɛ̃ ni.

¹⁹ Nɛ zɔa zi ongamɛnɔ kɛ a hã ma hã wa, do ogã ɔngbamɛnɔ kɛ a dɛa zi ni. A fua zi nɛ ngɔ nùi ni do ngawi 'da a, kɛ ma nɛa ngɔ mɛnɔ vɛ̃ ni. A dɛ sɛ do owinɔ vɛ̃ kɛ nɛ dɛ kili wa ni, kpasaa ɔ nɛ kɛ a dɛa zi do Oezipeto ni.

²⁰ A tombo sɛ ologbo dɛ ngɔ wa, nɛ a kumu sɛ wanɔ wa yu sɛ, nɛ wa usu tɛ wa ni.

²¹ We duzu ma, nɛ tɛ dɛ̃ kili ogele nu kɔnggɔnɔ ni gɔ. NWA Gale 'da nɛ do nɛ boe, nɛ a a Gale kɛ a gã wena, nɛ Owele wa wia we dɛ tati a kili a zu a kpo.

²² “Kɔ fala kɛ nɛ nɛ kɔlɔ do nùi we ba ma, nɛ a ndaka sɛ owinɔ ngɔ nùi ni do'do. A ndaka sɛ wa gɛɔ gɛɔ, nɛ nɛ wé sɛ we gbɛ winɔ ni fala kpo do ti gɔ. Nɛ gbɛ wa vɛ̃ do ti, nɛ osa'de zamɛnɔ wa ko sɛ dɛlɛ wena, nɛ wa hã sɛ ngamɔ hã nɛ.

²³ NWA a e sɛ owi sɛnɛ nɛ dɛ kɔ̃ nɛ. Nɛ a dɛ sɛ na, zu wa vĩ do'do, gbaa na wa kumu vɛ̃.

²⁴ A e sɛ 'bɔ Onwanɔ 'da wa dɛ kɔ̃ nɛ. Nɛ mbiti sɛ wa, nɛ nɛ 'danga mɛnɔ vɛ̃, kɛ ma wia tɛ gba ta zu wele ngɔ wa ni. Wele kpo kɔ wa yóló sɛ dati nɛ gɔ.

²⁵ Ma wia na, nɛ dɔ okpikima galenɔ 'da wa vɛ̃. Nɛ nɛ tɛ ɔ̃ do wɔ tɛ mɔ mbalinɔ, do fɛ̃a mɔ bolonɔ wa he'de ni gɔ. Nɛ tɛ kàlà ma do mɔ nɛ gɔ. We kɛ nɛ kala mɛnɔ ni, nɛ ma ɔlɔ sɛ nɛ na, nɛ le kɔ 'dã mɔ.

²⁶ Da dɛ kɔ 'dã mɛnɔ ni lé kɔ tɔa 'da nɛ gɔ. Ma le kɔ nɛ, nɛ nɛ kumu sɛ do ma vɛ̃ fala nɛ kpo. We duzu ma, ma wia na nɛ 'danga mɛnɔ ni, nɛ nɛ sɛnɛ ma, nɛ nɛ tɛ kɔlɔ do ma gɔ.