Mbulanɔ 6 - WE NU GALE 1995

Mbula kɛ ma gã wena

¹ “Ki ni a mbulanɔ vɛ̃ kɛ NWA Gale 'da nɛ ba nu a hã mi na, mi be ma hã nɛ gɛ a ni. Kɔ ma wia na, nɛ dɛ sɛ ma ngɔ nùi kɛ nɛ kɔlɔ we ba ma ni.

² Nɛ kɔ dungu nza 'da nɛ vɛ̃, nɛ do obe zã nɛ, nɛ dɔ́nggɔ́ NWA Gale 'da nɛ. Nɛ nɛ dɛ́ 'bɔ mbulanɔ 'da a vɛ̃ kɛ mi hã ma hã nɛ gɛ. Nɛ dɛ na mɛ ni, nɛ 'do nɛ ma nyɛlɛ sɛ ngɔ nùi gɛ.

³ Nɛ, obe Israɛlɛ, nɛ zélé mbulanɔ ni, nɛ nɛ dɔnggɔ ma, nɛ nɛ dungu sɛ do dia nɛ. Na mɛ ni, nɛ nɛ dɛlɛ sɛ ngɔ nùi kɛ NWA Gale 'da oyaa nɛ, a kpua zi mbulu nɛ hã nɛ ni. Nɛ mɛ a nù kɛ ma do nyɔngɔmɔ la li ngele.

⁴ “Obe Israɛlɛ, nɛ zélé! NWA, a zu a kpo a NWA Gale 'da lɛ.

⁵ Ma wia na, mɔ kɔ̃ gɛnɛ NWA Gale 'da mɔ do sila mɔ vɛ̃, mɔ hã tɛ mɔ hã a, nɛ mɔ dɛ to hã a do ngawi 'da mɔ vɛ̃.

⁶ Nɛ mɔ dɛ nganda na, mɔ tɛ èlè ombulanɔ mi hã ma hã mɔ sɔɛ gɛ ni gɔ.

⁷ Mɔ be sɛ ma hã obe zã mɔ, nɛ mɔ tɛ là fala tɔlɔ ma, we gbangba 'da nɛ gɔ. Mɔ tɔ̃ sɛ lɛnggɛ nɛ tɛ nu tɔa 'da mɔ, tabi tɛ li wala. Nɛ mɔ lengge sɛ 'bɔ ma 'da fala mɔ nɛ ɔ nù, tabi 'da fala mɔ nɛ kulu ngɔ ni.

⁸ Mɔ kpo sɛ ma dɛ zã 'baka mɔ do dati mɔ na, da dɛ kɔ tɛ zu mɔ élé ngɔ nɛ gɔ.

⁹ Mɔ kɔmɔ ma dɛ 'do gbangga nu tɔa 'da mɔ do onu ngbo lenɔ 'da mɔ.

Mɔizɛ mbisa obe Israɛlɛ na wa lengge do Gale

¹⁰ “NWA Gale 'da nɛ, a kã sɛ nɛ dɛ ngɔ nùi kɛ a nɛ ba ma hã nɛ ni. A dɛ sɛ ɔ nɛ kɛ a kpua zi do mbulu nɛ hã oyaa nɛ Abrahama, Izaka do Yakɔbɔ ni. Nɛ hɔ i mɔ, nɛ nɛ kpa sɛ ogã le kɛ ma de wena, nɛ nde nɛ a nɛ dɛ̀ ma gɔ ni.

¹¹ Nɛ nɛ kpa sɛ otɔa ma dunu do odia mɔ, nɛ nde nɛ a nɛ à dia mɛnɔ ni kɔ nɛ gɔ. Nɛ kpa sɛ 'bɔ o'de kɛ nɛ a nɛ zã̀ ma gɔ, do owala tenɔ kɛ nɛ a nɛ mì ma gɔ ni. 'Da fala NWA a kã sɛ nɛ dɛ ngɔ nùi ni, nɛ nɛ kpa sɛ nyɔngɔmɔ wena.

¹² Fala kɛ nɛ zɔ na mɛ ni, nɛ nɛ dɛ nganda na, da dɛ kɔ tɛ nɛ élé ngɔ NWA, kɛ a fua zi nɛ kɔ ngbá tɛ ngɔ nù Ezipeto ni gɔ.

¹³ “Nɛ dɔnggɔ sɛ NWA Gale 'da nɛ, nɛ nɛ sambala tati a a zu a kpo. Nɛ kana sɛ tɛ nɛ do zu li a zu a kpo iko.

¹⁴ Nɛ tɛ sàmbàlà ogele gale gɔ. Gɛnɛ kɔ galenɔ 'da winɔ kɛ zã nɛ ni, nɛ tɛ sàmbàlà mbe kpo sanga wa gɔ.

¹⁵ Fala kɛ nɛ sambala ogele galenɔ, nɛ zã NWA Gale ma nɔ̃lɔ̃ sɛ dɛ tɛ nɛ wena. Nɛ a kumu sɛ nɛ vɛ̃. We kɛ NWA Gale 'da nɛ, kɛ a do nɛ boe ni, a kɔ̃̀ gɛnɛ mbé gele gale kɛ zã a gɔ.

¹⁶ “Nɛ tɛ yàmbà NWA Gale 'da nɛ, ɔ nɛ kɛ nɛ dɛa zi tɛ kɔ le Masa ni gɔ

¹⁷ Nɛ zélé mbulanɔ vɛ̃ kɛ a hã ma hã nɛ ni, nɛ nɛ tɛ èlè mbe kpo kɔ nɛ gɔ.

¹⁸ Nɛ dɛ́ mɔ do bɔlɔ zu, nɛ nɛ dɛ mɔ kɛ ma hã yangga hã NWA ni. Kɔ nɛ dɛ na mɛ ni, nɛ nɛ dungu sɛ do dia nɛ. Nɛ nɛ we sɛ we ba dia nùi kɛ NWA kpua mbulu nɛ hã oyaa nɛ ni.

¹⁹ Nɛ nɛ ndaka sɛ owi sɛnɛ nɛ, ɔ nɛ kɛ NWA tɔ̃a zi ni.

²⁰ “Do 'do nza, nɛ obenɔ 'da nɛ, wa aka sɛ nɛ na: ‘Gulu kɛ NWA Gale 'da lɛ, a hã mbulanɔ gɛ hã nɛ we ge nde?’

²¹ Nɛ nɛ gese sɛ hã wa na: ‘Lɛ zi a kɔ ngbá ti nwa ngɔ nù Ezipeto. Nɛ NWA Gale fua lɛ ngɔ nùi ni dɛ nza, do ngawi 'da a kɛ ma nɛa ngɔ mɛnɔ vɛ̃ ni.

²² A dɛa zi oɔngbamɔ, nɛ a hã kili hã owi Ezipeto, do nwa 'da wa, do owi ti nu a vɛ̃, nɛ lɛ zɔa zi ma do li lɛ ngboo.

²³ A fua zi lɛ ngɔ nù Ezipeto dɛ nza, nɛ a kã lɛ dɛ ngɔ nùi gɛ we hã ma hã lɛ, ɔ nɛ kɛ a kpua zi mbulu nɛ hã oyaa lɛ na, a dɛ sɛ ma ni.

²⁴ 'Do nɛ, nɛ NWA Gale 'da lɛ, a ba zi nu a hã lɛ na, lɛ zélé mbulanɔ ni vɛ̃, nɛ lɛ dɔnggɔ ɛ. Lɛ dɛ na mɛ ni, nɛ lɛ sɛ do dia dungu 'da fala fai. A zɔ sɛ mɔ tɛ lɛ na, lɛ 'bana nza ɔ nɛ kɛ lɛ do ma sɔɛ gɛ ni.

²⁵ Fala kɛ lɛ dɛ mbulanɔ vɛ̃ kɛ NWA Gale 'da lɛ hã ma hã lɛ ni, nɛ a dɛ sɛ yangga do lɛ.’