Mbulanɔ 5 - WE NU GALE 1995

Ombulanɔ 'da Gale 'bu

¹ Mɔizɛ sa mɔ hã obe Israɛlɛ vɛ̃, nɛ a tɔ̃ hã wa na: “Nɛ, obe Israɛlɛ, nɛ zélé mbulanɔ vɛ̃ mi hã ma hã nɛ sɔɛ gɛ. Nɛ yámbálá ma, nɛ nɛ e ma fala dɛa to.

² NWA Gale 'da lɛ a gba zi tɔkɔ do lɛ tɛ ngɔ kala Sinai.

³ A gbà zi tɔkɛ ni tati a do obaa lɛ iko gɔ, nɛ nde a gba zi ma do lɛ vɛ̃ kɛ lɛ 'bana nza sɔɛ gɛ ni.

⁴ Tɛ ngɔ kala ni, NWA wila zi we dɛ li nɛ ngboo dɛ kɔ nyɛa we.

⁵ Do 'da fala ni, mi yula zi dɛ ngbala NWA do nɛ, nɛ mi tɔ̃a wenɔ a wila ni hã nɛ, we duzu kɛ nɛ dɛa zi kili nyɛa we, nɛ nɛ bɛ̃a we kũ dɛ ngɔ kala i. Nɛ NWA tɔ̃a zi na:

⁶ ‘Mi a NWA Gale 'da mɔ, mi a mi fua mɔ kɔ ngbá ngɔ nù Ezipeto.

⁷ “ ‘Mɔ tɛ dɔnggɔ ogele gale gɔ, mɔ dɔ́nggɔ́ tati a mi zu mi kpo.

⁸ “ ‘Mɔ tɛ sɛ̀ kpikima kɛ ma be mɔ li nza, tabi mɔ li nùi gɛ, tabi mɔ ti lì gɔ.

⁹ Nɛ mɔ tɛ bìlì zu mɔ nù dati osɛa mɛnɔ ni gɔ, mɔ tɛ dɔ̀nggɔ̀ ma gɔ. We kɛ mi a NWA Gale 'da mɔ, nɛ mi kɔ̃̀ gele gale kɛ zã mi gɔ. Fala kɛ wele bé we nu mi, nɛ mi hã sɛ etumbu hã a, do obe zã a, gbaa we hɔ ngɔ obe yaa a, do okanggadɔkɔ a.

¹⁰ Nɛ nde wanɔ kɛ wa kɔ̃a gɛnɛ mbulanɔ 'da mi, nɛ wa dɔnggɔ we nu mi dɔngga ni, mi be sɛ dia zã 'da mi hã wa, do obe zã wa kɔ sabɛlɛ do sabɛlɛ.

¹¹ “ ‘Mɔ tɛ sà li mi Gale yala iko gɔ. Mɔ sa li mi yala, nɛ mi NWA Gale 'da mɔ, mi hã sɛ etumbu hã mɔ.

¹² “ ‘Mɔ dúngú ɛngga do kɔ̃ tũ ɔmɔ tɛ wi we dɔnggɔ do mi, ɔ nɛ kɛ mi NWA Gale 'da mɔ, mi ba do nu mi hã mɔ ni.

¹³ 'Do tũ gazɛlɛ, mɔ dɛ sɛ tonɔ 'da mɔ vɛ̃,

¹⁴ nɛ tũi kɛ sambo, mɛ a tũ ɔmɔ tɛ wi we dɔnggɔ do mi NWA Gale 'da mɔ. Do tũi ni, nɛ vɛ̃ nɛ ɔmɔ sɛ tɛ nɛ. Mɔ do obenɔ 'da mɔ, do owi dɛa tonɔ 'da mɔ, do gele wi kɛ a ɔ kɔ tɔa 'da mɔ ni, do onadalamɛnɔ 'da mɔ, nɛ dɛ́ sɛ to kpo gɔ.

¹⁵ Dɔ tɛ zu mɔ élé gɔ, mɔ zi a ngbá tɛ ngɔ nù Ezipeto, nɛ mi fua mɔ dɛ nza do ngawi 'da mi, kɛ ma la mɔ vɛ̃ ni. Ma kɛ mi NWA Gale 'da mɔ, mi ba nu mi hã mɔ na, mɔ dungu ɛngga do kɔ tũ ɔmɔ tɛ wi ni.

¹⁶ “ ‘Mɔ dɔ́nggɔ́ baa mɔ do naa mɔ, ɔ nɛ kɛ mi ba zi do nu mi hã mɔ ni. Mɔ dɛ na mɛ ni, nɛ zu mɔ ma kutu sɛ mbu ngɔ nùi kɛ mi NWA Gale 'da mɔ, mi ba hã mɔ ni.

¹⁷ “ ‘Mɔ tɛ gbɛ wi gɔ.

¹⁸ “ ‘Mɔ tɛ ɔ́ do wili tabi wuko mɔ́ ngba mɔ gɔ.

¹⁹ “ ‘Mɔ tɛ zu mɔ gɔ.

²⁰ “ ‘Mɔ tɛ tɔ̃̀ bele do zu li ngba mɔ gɔ.

²¹ “ ‘Mɔ tɛ è sila mɔ ngɔ mɔ mɔ ngba mɔ gɔ. Mɔ tɛ è sila mɔ ngɔ kɛnɛ a, nùi 'da a, tɔa 'da a, owi tonɔ 'da a, ngɔmbɔ, punda, tabi gele mɔ mɔ a kpo gɔ.’

²² “Ki ni a ombulanɔ kɛ nwa hã zi ma hã nɛ vɛ̃, do 'da fala nɛ mba zi ngba nɛ ti nyanga kala i gɛ a ni. A tɔ́a zi ma do nga gɛlɛ kɔ nyɛa we do kɔ gba kutu. A hã zi tati a mbulanɔ gɛ iko, a è mbé nɛ ngɔ nɛ gɔ. 'Do nɛ, nɛ a kɔma zi ma dɛ ngɔ ota bɔa, nɛ a kala ma hã mi.

NWA ia Mɔizɛ do wi tɔ̃ toe 'da a

²³ “Nɛ do 'da fala ni, ngɔ kala vɛ̃ kutu do zɛ̃ we, nɛ nɛ zila zi wala gɛlɛ wi kɔ gba tũ. Nɛ ogã winɔ do okpasa wi nu kpala nɛ wa tɛa, nɛ wa kpa mi,

²⁴ nɛ wa tɔ̃ hã mi na: ‘NWA Gale 'da lɛ bia gã wi, do dɔ̃lɔ̃ li 'da a hã lɛ. Lɛ zila gɛlɛ a tɛ wele we kɔ nyɛa we. Nɛ lɛ zɔa sɔɛ gɛ na, gɛnɛ kɔ Gale wele we do wele, nɛ nde wi ni a fé gɔ.

²⁵ Kɔ gulu kɛ lɛ nɛ hɔ 'bɔ fɛna fio we ge nde? Gba nyɛa we gɛ ma kumu sɛ lɛ. Fala kɛ lɛ zele gɛlɛ NWA Gale 'da lɛ 'bɔ mbé nɛ, nɛ lɛ fe sɛ do gbãlã we.

²⁶ Mba gɔ, lɛ zɔ̀ mbe wele ɔ nɛ lɛ gɛ, kɛ a zila gɛlɛ Gale, wele kpasi tɛ wele we kɔ nyɛa we, nɛ a 'bana do tunu li a ni gɔ.

²⁷ Ma wia na, mɔ Mɔizɛ, mɔ kɔlɔ do NWA Gale 'da lɛ, nɛ mɔ do tɛ mɔ, mɔ zele wenɔ 'da a, nɛ mɔ tɔ̃ hã lɛ, nɛ lɛ zele sɛ nu mɔ, nɛ lɛ dɛ ma.’

²⁸ “Nɛ tɔ̃a zi na mɛ ni, nɛ NWA zila nu nɛ, nɛ a tɔ̃a hã mi na: ‘Mi zila we obe Israɛlɛ wa tɔ̃a ni. Nɛ wa tɔ̃a na mɛ ni gbãlã we.

²⁹ Fala kɛ wa dɛ sɔ na mɛ ni fai, kɔ wa hã sɔ tɛ wa we dɛ mbulanɔ 'da mi, nɛ wa do obe zã wa, wa dungu sɔ do dia nɛ 'da fala fai.

³⁰ Mɔ nɛ́, kɔ mɔ tɔ̃ hã wa na, wa kpolo tɛ wa dɛ nu tɔa tandenɔ 'da wa.

³¹ Nɛ nde mɔ 'bana sɛ do mi dɛ dɛ. Nɛ mi hã sɛ mbulanɔ 'da mi vɛ̃ hã mɔ. Nɛ mɔ be sɛ ma hã obe Israɛlɛ na, wa dɛ ma tɛ ngɔ nùi mi hã sɛ hã wa ni.’ ”

³² Nɛ Mɔizɛ tɔ̃ 'bɔ na: “Nɛ dɛ̃ mbulanɔ vɛ̃ kɛ NWA Gale 'da nɛ, a ba nu a na, nɛ dɛ́ ni. Nɛ nɛ tɛ bɛ gɛnɛ nɛ gɔ.

³³ Nɛ dɛ́ mɛnɔ vɛ̃ kɛ NWA Gale 'da nɛ, a bia hã nɛ ni. Nɛ dɛ na mɛ ni, nɛ 'do nɛ ma nyɛlɛ sɛ ngɔ nù gɛ, nɛ nɛ dɛ sɛ yangga ngɔ nùi kɛ nɛ nɛ ba do mɔ́ nɛ ni.