Mbulanɔ 4 - WE NU GALE 1995

Mɔizɛ ba nu a na obe Israɛlɛ wa dɛ mbula 'da Gale

¹ Nɛ Mɔizɛ tɔ̃a 'bɔ hã obe Israɛlɛ na: “Nɛ, obe Israɛlɛ, nɛ dɛ́ mbulanɔ kɛ mi bia hã nɛ ni. Nɛ dɛ na mɛ ni, nɛ ma hã sɛ wala na, nɛ 'bana nza, nɛ nɛ we sɛ we ba nùi kɛ NWA Gale 'da oyaa nɛ, a hã ma hã nɛ ni.

² Nɛ tɛ è mbé mɔ ngɔ mbulanɔ kɛ mi bia ma hã nɛ do zu li NWA Gale 'da nɛ ni gɔ. Nɛ nɛ tɛ fò 'bɔ tɛ nɛ kpo gɔ, nɛ é ma vɛ̃ fala dɛa to.

³ Nɛ zɔa zi mɛ kɛ NWA Gale 'da nɛ dɛa do gale Bala tɛ Peɔrɛ ni. A gbɛa zi owinɔ 'da nɛ, wanɔ vɛ̃ kɛ wa dɔnggɔ zi gale Bala ni.

⁴ Nɛ nde nɛ, kɛ nɛ 'bana zi dɛ olo nu a, NWA Gale 'da nɛ ni, nɛ 'bana nza sɔɛ gɛ vɛ̃.

⁵ “Mi bia zi ombulanɔ hã nɛ vɛ̃, ɔ nɛ kɛ NWA Gale 'da mi ba do nu a hã mi ni, takɔ nɛ dɛ sɛ mbulanɔ ni, 'da fala kɛ nɛ ɔ sɛ tɛ ngɔ nùi nɛ nɛ bi we ba ma ni.

⁶ Fala kɛ nɛ dɛ mbulanɔ ni vɛ̃ do wala olo nɛ, nɛ ogele nu kɔnggɔnɔ wa zɔ sɛ na, nɛ a owi hã zã. 'Da fala wa zele sɛ we mbulanɔ ni, nɛ wa tɔ̃ sɛ na: ‘Owinɔ kɔ nu kɔnggɛ gɛ, wa do hã zã do ĩ ti mɔ wena.’

⁷ “Mba gɔ, mbe gele nu kɔnggɔ, kɛ gale 'da wa kɔlɔ do wa, ɔ nɛ kɛ NWA Gale 'da lɛ kɔlɔ do lɛ ni bina. Gɛnɛ kɔ nu kɔnggɔ kɛ ma gã wena, nɛ nde gale 'da wa kɔ́lɔ́ do wa gɔ. Lɛ sa mɔ hã Gale 'da lɛ na, a gala lɛ, nɛ a gese nu nɛ.

⁸ Mbe gele nu kɔnggɔ, gɛnɛ kɔ ma gã wena, nɛ nde ma do mbula ɔ nɛ mbula mi hã ma hã nɛ sɔɛ gɛ ni bina.

⁹ Li nɛ sɔ̃́, nɛ nɛ dɛ́ zĩ na, da dɛ kɔ tɛ nɛ élé ngɔ mɛnɔ vɛ̃ nɛ zɔa zi do li nɛ ngboo ni gɔ. Nɛ lengge ma kɔ dungu nza 'da nɛ vɛ̃. Nɛ nɛ tɔ̃ sɛ we nɛ hã obe zã nɛ do obe yaa nɛ.

¹⁰ Nɛ lénggé do kɔ̃ tũi zi nɛ yula dati NWA Gale 'da nɛ tɛ ngɔ kala Sinai i, nɛ a tɔ̃ zi hã mi na: ‘Mɔ ngɛ́mɛ́ li owinɔ vɛ̃. Mi kɔ̃a we be mbulanɔ 'da mi hã wa, takɔ wa zele, nɛ wa yambala sɛ we dɛ kili mi kɔ dungu nza 'da wa vɛ̃. Nɛ wa be sɛ hã obe zã wa na, wa dɔnggɔ tɛ mɛ 'bɔ mi.’

¹¹ “Nɛ tɔ̃́ tɛlɛ tɛ kɛ nɛ yolo zi nɛ dɛ nyanga kala ni hã obe zã nɛ. Kala ni, ma fũ zi do we gbau, nɛ ma kũ gbaa dɛ ngɔ i. Gba zɛ̃ we do gba kutu kpia zi nɛ kpã kpã.

¹² Nɛ tɔ̃́ 'bɔ tɛlɛ tɛ kɛ NWA zi a dɛ kɔ nyɛa we, nɛ a wila we hã nɛ ni, do kɛ nɛ zele zi gɛlɛ a, nɛ nde nɛ zɔ́ a gɔ ni hã wa.

¹³ A tɔ̃a zi we ngɔ gba tɔkɛ 'da a do nɛ, do ngɔ mbulanɔ 'da a 'bu, kɛ a kɔma ma dɛ ngɔ tanɔ bɔa ni. Nɛ a tɔ̃a hã nɛ na, nɛ dɛ mbulanɔ ni, takɔ gba tɔkɛ ma 'bana fai.

¹⁴ Do 'da fala ni, nɛ NWA ba zi nu a hã mi na, mi be mbulanɔ ni vɛ̃ hã nɛ. Nɛ nɛ dɛ sɛ ma tɛ ngɔ nùi kɛ nɛ kɔlɔ we bi ma, hã nɛ ba ni.”

Ma wè na obe Israɛlɛ wa dɔnggɔ okpikima gɔ

¹⁵ “'Da fala kɛ NWA Gale 'da nɛ, a zi tɛ wele we hã nɛ kɔ nyɛa we tɛ ngɔ kala Sinai i ni, nɛ nde nɛ zɔ̃ zi a gɔ.

¹⁶ Kɔ we duzu ma, nɛ tɛ sɛ okpikima kɛ ma be ogale, wi wili, tabi wuko,

¹⁷ tabi osa'de, onɔɛ,

¹⁸ ogɔ̃, tabi okɔyɔ, kɔ nɛ te kɔ 'dã mɔ gɔ.

¹⁹ Sila nɛ tɛ ɔlɔ nɛ, kɔ nɛ dɔnggɔ wese, tabi zɛkɛ, tabi osɔlanɔ kɛ nɛ zɔ ma li nza i ni gɔ. We kɛ NWA Gale 'da nɛ la ki ni hã ogele nu kɔnggɔnɔ ngɔ nù gɛ.

²⁰ Nɛ nde kɛ 'da nɛ, nɛ a owinɔ 'da a. A nɛa zi ngɔ nù Ezipeto i, nɛ a fo nɛ kɔ ngamɛnɔ kɛ ma bɛlɛ zi nɛ ɔ nɛ we ni. A fua nɛ ni na, nɛ hɔ owinɔ 'da a, ɔ nɛ kɛ nɛ do ma sɔɛ gɛ ni.

²¹ Nɛ nde zã NWA Gale 'da nɛ nɔ̃lɔ̃ zi dɛ tɛ mi, tua do nɛ. Nɛ a 'bili zi na, mi kũ sɛ lì Yɔrdanɛ we le ngɔ dia nùi kɛ a hã ma hã nɛ ni gɔ.

²² Ma kɛ mi fe sɛ dɛ dɛ, mi kṹ sɛ lì Yɔrdanɛ dɛ kulu nɛ i gɔ. Nɛ nde nɛ nɛ kũ lì di ni we ba dia nùi kulu nɛ mɔ ni.

²³ Nɛ dɛ́ zĩ na, da dɛ kɔ tɛ nɛ élé ngɔ gba tɔkɛ kɛ NWA Gale 'da nɛ gba do nɛ ni gɔ. Nɛ nɛ tɛ sɛ kpikima mɛnɔ a bɛ̃a gɛnɛ nɛ ni kpo gɔ.

²⁴ We kɛ NWA Gale 'da nɛ a ɔ nɛ nyɛa we, kɛ ma bɛlɛ mɔ, nɛ ma ngutu vɛ̃ ni. A kɔ̃a na, ɛ ɔ tati a Gale 'da nɛ zu ɛ kpo.

²⁵ “'Do nɛ nyɛlɛ sɛ ngɔ nùi kɛ NWA kpua mbulu nɛ hã nɛ ni, nɛ nɛ ko sɛ obe, nɛ obe zã nɛ wa ko sɛ 'bɔ be zã wa. 'Da fala ni, nɛ nɛ tɛ sɛ̀ kpikima mɔ kpo, kɔ nɛ te kɔ 'dã mɔ gɔ, tabi nɛ tɛ dɛ̀ 'bɔ mɔ kɛ ma dè tɛ nwa gɔɛ ni gɔ. Nɛ dɛ na mɛ ni, nɛ zã NWA ma nɔ̃lɔ̃ sɛ dɛ tɛ nɛ.

²⁶ Sɔɛ gɛ, mi ia li nza do nùi do temɔɛnɔ 'da mi na, fala kɛ nɛ dɛ 'dã mɛnɔ ɔ na mɛ ni, nɛ 'do nɛ nyɛ́lɛ́ sɛ ngɔ nùi ni gɔ. Nɛ nɛ fe sɛ ngɔ nùi kɛ nɛ nɛ ba ma kulu lì Yɔrdanɛ i ni, nɛ nɛ kumu vɛ̃.

²⁷ NWA a pɛsɛ sɛ nɛ dɛ kɔ gele nu kɔnggɔnɔ, nɛ nɛ dɔ́ sɛ ngɔ gele nùnɔ kɛ a nɛ 'dɔlɔ do nɛ ni gɔ.

²⁸ Nɛ hɔ ngɔ gele nùnɔ ni, nɛ nɛ dɔnggɔ sɛ ogalenɔ kɛ owinɔ wa sɛa do te tabi 'do ta ni. Mɛ a ogale kɛ wa zɔ́ mɔ gɔ, wa zélé we gɔ, wa nyɔ́ngɔ́ mɔ gɔ, nɛ wa únú mɔ gɔ.

²⁹ Nɛ nde nɛ hɔ ngɔ nùnɔ ni, kɔ nɛ fa NWA Gale 'da nɛ do sila nɛ vɛ̃, do hi nɛ vɛ̃, nɛ nɛ kpa sɛ a.

³⁰ 'Da fala wenɔ mi tɔ̃ hã nɛ gɛ ma dɛ sɛ tɛ̃ ɛ, nɛ nɛ le sɛ kɔ ngamɔ ni, nɛ nɛ kpolo sɛ tɛ nɛ dɛ 'da NWA Gale 'da nɛ. Nɛ nɛ dɛ sɛ 'bɔ olo nu a mbé nɛ.

³¹ Mba gɔ, NWA Gale 'da nɛ, a a Gale kɛ a do mbɔkɔ li wena. A élé sɛ nɛ gɔ, a kúmú sɛ nɛ gɔ, nɛ a élé sɛ 'bɔ gba tɔkɛ kɛ a gba zi do oyaa nɛ ni gɔ.

Gale dɛa dia mɔ hã obe Israɛlɛ

³² “Nɛ lénggé mbe mɛnɔ ma la zɛ́ belee dati a kɛ na, wa ko nɛ ni. Nɛ lengge mɛnɔ ma la zɛ́, yolo do fala Gale dɛa zɛ́ do kuti wele dɛ ngɔ nùi gɛ ni. Mbé mɔ kɛ ma dɛa tɛ̃ ɛ gã la mɛnɔ kɛ NWA dɛa we nɛ ni ma boe nde?

³³ Mbé gele Owele kɛ gale 'da wa wele we hã wa dɛ kɔ nyɛa we, nɛ wa 'bana do tunu li wa ɔ nɛ nɛ gɛ ni wa boe nde?

³⁴ Tabi, mbé gele gale, kɛ a fua owinɔ 'da a ti mbula 'da ogele wele, nɛ a kala wa do winɔ 'da a ɔ nɛ wele kɛ 'da nɛ dɛa zi do nɛ tɛ Ezipeto i ni boe nde? A dɛa ogba sɔ mɔ do oɔngbamɔ, nɛ a bia ngawi 'da a dɛ li nɛ vɛ̃. Fo mbé gele gale ɔ nɛ a ni bina. Nɛ nde NWA Gale 'da nɛ a fua zi nɛ kɔ ngbá tɛ Ezipeto i, ɔ nɛ kɛ nɛ zɔa zi do li nɛ ni.

³⁵ “NWA dɛa zi mɛnɔ ni vɛ̃, takɔ a be hã nɛ na, ɛ zu ɛ kpo, ɛ a Gale, nɛ fo mbé gele gale bina.

³⁶ A dɛa na, nɛ zele gɛlɛ a yolo li nza i, takɔ nɛ yambala mɛnɔ kɛ zã a kɔa ni. Nɛ a dɛa 'bɔ na, nɛ zɔ gã nyɛa we ngɔ nù nga, nɛ a wele we hã nɛ dɛ kɔ nyɛa we ni.

³⁷ Wi a a ngboo hã a fua zi nɛ ngɔ nù Ezipeto do ngawi 'da a, kɛ ma nɛa ngɔ mɛnɔ vɛ̃ ni, we duzu kɛ a kɔa gɛnɛ oyaa nɛ, nɛ a saka nɛ, obe zã wa.

³⁸ Ngangga ni, nɛ kɔlɔ do ogele winɔ kɛ wa dɔ wena, nɛ wa nganda 'bɔ la nɛ ni, nɛ a ndaka sɛ wa dati nɛ. Nɛ a kã sɛ nɛ dɛ ngɔ nùi olo wa ni, nɛ a ba ma hã nɛ.

³⁹ Sɔɛ gɛ, nɛ ĩ́ na mɛ ni, nɛ tɛ nɛ ɔ ngɔ na, NWA a a Gale li nza do nù gɛ. Mbé gele gale bina.

⁴⁰ Nɛ dɛ́ mbulanɔ 'da a vɛ̃ kɛ mi hã ma hã nɛ sɔɛ gɛ. Nɛ nɛ, do obe zã nɛ vɛ̃, nɛ kpa sɛ dia mɔ. Nɛ 'do nɛ ma nyɛlɛ sɛ, nɛ nɛ dungu sɛ ngɔ nùi kɛ NWA Gale 'da nɛ hã ma hã nɛ do mɔ nɛ ni fai.”

Ole usu tɛ wi talɛ tɛ kulu Yɔrdanɛ si 'biti gba wese

⁴¹ Nɛ Mɔizɛ saka ole talɛ kulu lì Yɔrdanɛ si 'biti gba wese.

⁴² A saka olenɔ ni na, fala kɛ wele gbɛ ngba a, kɔ a gbɛ a do mbana gɔ, nɛ a sɛ̀nɛ̀ zi a gɔ, nɛ a usu tɛ̃ a di ni. A wia zi we usu tɛ̃ a tɛ kɔ mbe lenɔ ni kpo na, da dɛ kɔ wa gbɛ́ a gɔ.

⁴³ Mɔizɛ saka zi le Besɛrɛ, tɛ li gba zɔ̀ ngɔ mbɛ nù we duzu nu kpala Rubɛnɛ. Nɛ a saka le Ramɔtɛ, ngɔ nù Galadɛ, we duzu nu kpala Gadɛ. Nɛ a saka 'bɔ le Golanɛ, tɛ ngɔ nù Basanɛ, we duzu nu kpala Manase.

BƆA LƐNGGƐ 'DA MƆIZƐ

⁴⁴ Mɔizɛ hã mbula 'da Gale hã obe Israɛlɛ.

^45-46 Ma zi do 'do kɛ wa hɔa nza ngɔ nù Ezipeto. Nɛ wa zi a tɛ kɔ gbangɔlɔ̃ lì Yɔrdanɛ, si 'biti gba wese, kɛ ma ka mɔ dɛ tɛ le Bɛtɛ-Peɔrɛ. Nɛ le Bɛtɛ-Peɔrɛ zi a tɛ ngɔ nùi 'da Sihoni, nwa 'da Oamori, kɛ a ɔ zi tɛ Hɛsɛboni. Nɛ Mɔizɛ tɔa mbula ni hã wa dɛ di ni. Nɛ nde Mɔizɛ do obe Israɛlɛ wa bi zi Sihoni, nɛ wa nɛ ngɔ a.

⁴⁷ Nɛ wa ba zi nùi 'da a, do kɛ 'da Ɔgɛ, nwa ngɔ nù Basanɛ. (Owinɔ bɔa ni, wa dungu zi nwa tɛ kulu lì Yɔrdanɛ, si 'biti gba wese.)

⁴⁸ Obe Israɛlɛ wa ba zi nùi ni, yolo tɛ Arɔɛrɛ, do zu lì Arnoni we hɔ ngɔ kala Hɛrmoni, kɛ wa sa 'bɔ li ma na Sioni ni.

⁴⁹ Nùi ni, ma mba zi 'bɔ olenɔ kulu lì Yɔrdanɛ, si 'biti gba wese gbaa we hɔ tɛ Ndɔ Fio, si ba gɔtɔ, nɛ ma to nyanga kala Pisga.