Mbulanɔ 34 - WE NU GALE 1995

Mɔizɛ fia

¹ Mɔizɛ yula ngɔ mbɛ nù Moabɛ, nɛ a kũ dɛ ngɔ kala Nebo, tɛ zu kala Pisga, kɛ ma ka mɔ dɛ li le Yeriko ni. A hɔa i mɔ, nɛ nwa bia nùi hã a vɛ̃, yolo ngɔ nù Galadɛ gbaa we hɔ ngɔ nù Danɛ.

² Onùnɔ ni mɛ a: nù 'da Nɛftali vɛ̃, nù Bɛnzamɛ, Manase do Yuda gbaa we hɔ tɛ nu gba lì Meditɛrane,

³ li gba zɔ̃ Negɛvɛ, do gbangɔlɔ̃ Yɔrdanɛ, le Yeriko (le o'betenɔ).

⁴ 'Do kɛ Mɔizɛ zɔa nùi do'do ni, nɛ nwa tɔ̃ hã a na: “Mɔ zɔ́ nùi kɛ mi kpua zi mbulu nɛ hã Abrahama, do Izaka, do Yakɔbɔ na, mi hã sɛ ma hã obe zã wa gɛ a ni. Mi bia ma hã mɔ, nɛ nde mɔ lé sɛ i mɔ gɔ.”

⁵ 'Do nɛ, nɛ Mɔizɛ, wi toe 'da NWA fia dɛ ngɔ nù Moabɛ, ɔ nɛ kɛ NWA tɔ̃a zi nɛ ni.

⁶ Nɛ NWA do tɛ̃ ɛ mi a dɛ kɔ gbangɔlɔ̃ Moabɛ, kɛ ma ka mɔ dɛ li le Bɛtɛ-Peɔrɛ ni. Nɛ nde yolo di ni gbaa we hɔ sɔɛ gɛ, wele ĩ̀ ti fala ngboo wa mi zi do Mɔizɛ ni gɔ.

⁷ Mɔizɛ fia, nɛ nde a do sabɛlɛ kama do 'bu nɛ bɔa. Nɛ a 'bana zi do ngawi vɛ̃, nɛ gbali a 'bana zi 'bɔ zɔ mɔ do dia nɛ.

⁸ Obe Israɛlɛ wa hia zi kɔa a 'do 'bu tũ talɛ dɛ ngɔ mbɛ nù Moabɛ ni.

⁹ Nɛ Yozue, be 'da Nunɛ dungu zi olo Mɔizɛ. A zi do hã zã wena, we kɛ Mɔizɛ ia zi kɔ̃ ɛ zu a na, a dungu olo ɛ. Obe Israɛlɛ wa zila zi Yozue, nɛ wa dɛa zi mbulanɔ vɛ̃ kɛ NWA hã ma hã wa do wala 'da Mɔizɛ ni.

¹⁰ Tɛ ngɔ nù Israɛlɛ ni, fo zi 'bɔ mbé wi gba olo nu Gale ɔ nɛ Mɔizɛ ni bina. NWA tɔ̃ zi lɛnggɛ do Mɔizɛ, ɔ nɛ kɛ wele tɔ̃ lɛnggɛ do ngba a ni.

¹¹ A tombo zi a, nɛ a dɛa ga oɔngbamɔ wena tɛ dati nwa ngɔ nù Ezipeto do owi olo li a, do owinɔ ngɔ nùi 'da a ni vɛ̃.

¹² Gɛlɛ kɔ Mɔizɛ si zi ngɔ, nɛ a dɛa ogba mɔ dɛ li obe Israɛlɛ vɛ̃, nɛ ma hã gã kili hã owele.