Mbulanɔ 33 - WE NU GALE 1995

Mɔizɛ wila nu a tɛ obe Israɛlɛ

¹ Dati kɛ na, Mɔizɛ wi 'da Gale fe ni, nɛ a wila zi nu a tɛ obe Israɛlɛ. Nɛ zélé wele nunɔ kɛ a wila zi ni. A na:

² “NWA yula ngɔ kala Sinai, nɛ a kulu ngɔ dɛ ngɔ nù Seirɛ, ɔ nɛ wese kɛ ma gba ngɔ nùi ni. A yolo tɛ ngɔ kala Paranɛ, nɛ a yele dɛ ngɔ owinɔ 'da a. A tɛa do oanzɛ koto do koto, nɛ nyɛa we hɔ si tɛ ngawili kɔ̃ a.

³ NWA kɔ̃a gɛnɛ owinɔ 'da a, obe Israɛlɛ, nɛ a fɔmɔ owinɔ vɛ̃ kɛ wa a mɔ a ni. Ma kɛ lɛ gu nù dɛ ti nyanga a, nɛ lɛ zele ombulanɔ 'da a.

⁴ “Lɛ kɔ̃a gɛnɛ mbulanɔ 'da a, kɛ mi Mɔizɛ mi hã ma hã nɛ ni. Ma ɔ nɛ mɔ olo gã gole ni, we duzu lɛ, obe Israɛlɛ.

⁵ Ogã wi ngɔ Israɛlɛ, do onu kpalanɔ vɛ̃ wa mba ngba wa, nɛ NWA Gale hɔa nwa ngɔ wa.”

⁶ Nɛ Mɔizɛ tɔ̃a dɛ ngɔ nu kpala Rubɛnɛ na: “Gɛnɛ kɔ nu kpala Rubɛnɛ wa dɔ̃ gɔ, nɛ nde, e kɔ wa 'bana do tunu li wa fai.”

⁷ A tɔ̃a dɛ ngɔ nu kpala Yuda na: “Aa NWA, mɔ zélé gɛlɛ owi nu kpala Yuda, nɛ mɔ gala wa. Mɔ gese wa dɛ 'da onya wa, kɔ wa dɛ na do wa, we kɛ wa bi do tɛ wa iko.”

⁸ A tɔ̃a dɛ ngɔ nu kpala Levi na: “NWA, mɔ kala Urimɛ do Tumimɛ, mɛnɔ kɛ wa aka do mɔ ni, nɛ mɔ hã ma hã owi nu kpala Levi. Wa a odia wi tonɔ 'da mɔ. Mɔ yamba zi wa tɛ kɔ le Masa, nɛ mɔ gɔnɔ dia gulu we hã wa tɛ nu lì Mɛriba.

⁹ Wa bia zi kɔ̃a we dɛ 'da mɔ, nɛ ma nɛa ngɔ kɛ wa kɔ̃a do owele wa, do onya wa do obenɔ 'da wa ni. Wa dɛa zi ombulanɔ 'da mɔ, do wala olo nɛ ngboo.

¹⁰ Wa a wa be sɛ hã owinɔ 'da mɔ na, wa dɔnggɔ mbula 'da mɔ, nɛ wa dɔ sɛ sa'de do fũ yɔmbɔ ngɔ gbagala 'da mɔ we dɔnggɔ do mɔ.

¹¹ NWA, mɔ gala wa na, wa dɛlɛ, nɛ wa nganda. Nɛ mɔ wele nu mɔ tɛ mɛnɔ vɛ̃, wa kɔ̃a we dɛ nɛ ni. Mɔ zɛ owi sɛnɛ wa na wa ala, nɛ wa tɛ kùlù 'bɔ mbé nɛ ngɔ gɔ.”

¹² A tɔ̃a dɛ ngɔ nu kpala Bɛnzamɛ na: “Bɛnzamɛ, mɛ a nu kpala kɛ NWA kɔ̃a gɛnɛ nɛ. A ɔ dɛ sanga wa, nɛ a kele zu wa tũ do gba wese, nɛ wa ɔ dɛ ti gɔ̃lɔ̃ a.”

¹³ A tɔ̃a dɛ ngɔ nu kpala Yozɛfu na: “E kɔ nwa wele nu a tɛ nùi 'da owi nu kpala Yozɛfu, nɛ kolo tɛ dɛ ngɔ nɛ, nɛ lì yolo zã nùi, nɛ ma go'do dɛ nza.

¹⁴ E kɔ wese ma to dɛ ngɔ wala tenɔ, nɛ ma fele do li zɔlɔ nɛ ngboo.

¹⁵ E kɔ ote ma hɔ ngɔ kalanɔ 'da wa, nɛ ma ko dia wala te.

¹⁶ E kɔ nùi 'da wa ma dunu do omɛnɔ vɛ̃ kɛ ma de wena ni. E kɔ NWA, kɛ a wila zi we zã gisa nwánɔ ni, a wele nu a tɛ wa, nɛ a be dia zã 'da a hã wa. E kɔ wila nui ni vɛ̃ ma zĩlĩ dɛ ngɔ nu kpala Yozɛfu, we kɛ wa saka a do kuti be sanga onya a.

¹⁷ E kɔ Yozɛfu kpa dɔ̃lɔ̃ li. A nganda ɔ nɛ wili ngɔmbɔ ni. A do ozamba a bɔa ɔ nɛ oza yele ni, nɛ a ndaka do ogele nu kɔnggɔnɔ, nɛ wa yu nyɛlɛ dɛ ndɔti nùi. Mbee za ni kpo, wi a ogba gili obe zã Efraimɛ, nɛ mbee nɛ kpo wi a owanɔ 'da Manase.”

¹⁸ A tɔ̃a dɛ ngɔ nu kpala Zabuloni do Isakarɛ na: “E kɔ gole kɛ owi nu kpala Zabuloni, wa be ma tɛ ngɔ gba lì ni ma ga. Nɛ e kɔ owi nu kpala Isakarɛ wa kpa dungu fio kɔ tɔa tande 'da wa.

¹⁹ Wa sa sɛ mɔ hã ogele nu kɔnggɔnɔ na, wa tɛ dɛ ngɔ kala 'da wa, nɛ wa dɔ sa'de dɛ di ni, we dɔnggɔ do NWA. Wa kpa kpamɛnɔ 'da wa 'dɔ gba lì do kɔ kɛnzɛnɔ nu gba lì.”

²⁰ A tɔ̃a dɛ ngɔ nu kpala Gadɛ na: “E kɔ NWA Gale, kɛ a hã gã nù hã nu kpala Gadɛ ni, a kpa dɔ̃lɔ̃ li. Gadɛ a ɔ nɛ gbɔgbɔ, kɛ a 'bɔ we ɛ̃ sanga sa'de, yolo do nyanga a we hɔ zu a ni.

²¹ Owi nu kpala Gadɛ wa kpa dia nù wena. Wa kpa nù kɛ ma a mɔ́ gã wi ni. Wa kpa ngba wa do ogã wi nu kpala Israɛlɛ, nɛ wa dɛa linggamɛ 'da NWA vɛ̃, kɛ a lingga zi we dɛ do Israɛlɛ ni.”

²² A tɔ̃a dɛ ngɔ nu kpala Danɛ na: “Danɛ ɔ nɛ zagbãlã gbɔgbɔ, kɛ a yula Basanɛ, nɛ a hɔ ni.”

²³ A tɔ̃a dɛ ngɔ nu kpala Nɛftali na: “NWA bia dia zã hã owi nu kpala Nɛftali, nɛ a wila nu a tɛ wa wena. Nùi 'da wa, ma yolo nu ndɔ Galile, nɛ ma mba do kɛnɔ si ba gɔtɔ.”

²⁴ A tɔ́a dɛ ngɔ nu kpala Asɛrɛ na: “E kɔ Gale wele nu a tɛ nu kpala Asɛrɛ nɛ ma nɛ ngɔ tala onya a. E kɔ onya a wa be dia kɔ sila hã a. Te olivɛ ma dunu sɛ ngɔ nùi 'da a, nɔ olivɛ ma zɔ́lɔ́ sɛ 'da a fala kpo gɔ.

²⁵ Owi sɛnɛ a, wa fa sɛ we ba le 'da a zãa, wa kpia nu ngboe, nɛ wa kã ma do mɔ bolo. E kɔ wa ɔ do ngawi li dungi 'da wa vɛ̃.

²⁶ “Aa nɛ obe Israɛlɛ, mbe gele gale ɔ nɛ wele kɛ 'da nɛ ni bina. A a kɔ yele ngbala 'da a, nɛ a kũ dɛ ngɔ kutu tɛ li nza i, nɛ a zĩlĩ we gbaka nɛ.

²⁷ Gale hã a kele zu nɛ 'da fala fai, ngawili kɔ̃ a ma amba zu nɛ. A ndaka owi sɛnɛ nɛ dati nɛ, nɛ a ba nu a hã nɛ na, nɛ kumu wa vɛ̃.

²⁸ “Ma kɛ obe Israɛlɛ wa kpa gɛ̃ dungu kɔ le, kɛ ma dunu do nyɔngɔmɔ wena. Mɛ a fala kɛ mbɔɛ ma yolo li nza i, nɛ ma 'bɔ nù nɛ nɛi.

²⁹ “Aa nɛ, obe Israɛlɛ, nɛ a owi yangga gbãlã we. Nu kɔnggɔ winɔ kɛ NWA kpasa wa, ɔ nɛ kɛ a kpasa do nɛ ni ngɔ nù gɛ bina. NWA zu a kpo, a amba zu nɛ ɔ nɛ ngele ni, a ɔ nɛ du kɔya kɛ ma hã ngawi hã nɛ, nɛ nɛ nɛ ngɔ owi sɛnɛ nɛ ni. Owi sɛnɛ nɛ wa tɛ sɛ, nɛ wa ala nu wa hã nɛ. Nɛ nɛ ma sɛ wa do wali 'da wa dɛ nù.”