Mbulanɔ 32 - WE NU GALE 1995

¹ “Aa nɛ, li nza do nù, nɛ gɛ̃ zala nɛ, hã nɛ zele lɛnggɛnɔ 'da mi do dia nɛ.

² Ombulanɔ mi be ni, ma 'bɔ sɛ nùi, ɔ nɛ kɛ kolo tɛ, nɛ ma 'bɔ Okpalɛnɔ ni. Bia wenɔ 'da mi ma ala sɛ ɔ nɛ kɛ mbɔɛ ala dɛ zu wɔkɔsɔnɔ, nɛ ma 'bɔ zu nɛ ni.

³ Mi dɔnggɔ sɛ zu li NWA, nɛ obe Israɛlɛ wa tɔ̃ sɛ na, Gale 'da lɛ, a gã wena.

⁴ “NWA kele zu owinɔ 'da a, nɛ a dɛ mɔ do wala olo nɛ, nɛ dɛa mɔ tɛ̃ a vɛ̃ a bɔlɔ. Gale 'da lɛ a Gale tɔ̃ gbãlã we, a lá fala dɛ olo nu a gɔ. A dɛ mɔ kɛ ma a bɔlɔ, nɛ a do du sila.

⁵ Nɛ nde nɛ a owi dɛ 'dã mɔ, nɛ do dia linggamɔ zu nɛ bina. Nɛ a owi dɛ mɔ sape, nɛ dɛa 'dã mɔ dɛ 'da NWA.

⁶ Aa nɛ, owi bɔnɔ, kɛ nɛ lénggé mɛ gɔɛ gɛ, gulu kɛ nɛ dɛ 'dã mɔ dɛ 'da NWA we ge nde? A a baa nɛ, a a dɛa nɛ, nɛ a ia nɛ do owinɔ 'da a.

⁷ “Nɛ lénggé kɔ̃ tũnɔ zi dati ni, nɛ ta zu nɛ ɔ ngɔ sabɛlɛ ma la zi belee ni, nɛ nɛ áká Owele nɛ do oyaa nɛ, kɔ wa tɔ̃ we mɛnɔ kɛ ma la zi ni hã nɛ.

⁸ Gale kɛ a nɛa ngɔ mɔ vɛ̃ ni, a kɛ̃a nùi dɛ kɔ̃ onu kɔnggɔnɔ, nɛ a be fala kɛ owinɔ wa wia we ɔ nɛ ni hã wa, nɛ a e gale ngɔ nu kɔnggɔ kpo kpo.

⁹ Nɛ nde a saka obe zã Yakɔbɔ, nɛ a e wa do winɔ 'da a ngboo.

¹⁰ “NWA kpa zi obe Israɛlɛ, nɛ nde wa yɛnggɛ mba mba do li gba zɔ̃, kɛ fo wele tɛ nɛ bina, nɛ bũ fi tɛ nɛ vioo ni. Nɛ a zɔa mɔ tɛ wa, nɛ a fɔmɔ wa, ɔ nɛ kɛ a fɔmɔ do gbali a wele nɛ ni.

¹¹ A dɛ zi do wa kpasaa ɔ nɛ ziki, kɛ a be hã obenɔ 'da a na, wa bũlũ ni. Fala kɛ obenɔ wa nɛ te nɛ, nɛ a tɔndɔ wa do sala 'baka a.

¹² NWA kpe ti owinɔ 'da a zu a kpo, gele gale gálá a tɛ nɛ gɔ.

¹³ “A ia zi owinɔ 'da a na, wa ɔ kɔ le ngɔ kalanɔ, nɛ wa nyɔngɔ kpalɛ li fɔnɔ di ni ni. A dɛa zi na, nɔ gɔlɔ fo do ngbala otanɔ hã wa. Nɛ ote olivɛnɔ wa mi ngɔ tanɔ ni, ma gã do dia nɛ ngboo.

¹⁴ Wa nyɔnga mulu obata, do odua, do ongɔmbɔ, kɛ wa do nɔ wena ni. Nɛ wa nɔa lì bele sa'denɔ 'da wa. Fũ farini dɛ do mapa 'da wa dia zi la li, nɛ dɔ̃ vinɔ 'da wa ɛ̃fɛ̃ nu wa ndirr!

¹⁵ “Kɔ wa nɛa we kpa mɔ wena do'do, nɛ ma nganda zu wa. Zã wa hɛ̃a gbaa do nu sila wa vɛ̃, nɛ wa bɛ̃a gɛnɛ Gale, kɛ a dɛa wa ni. Wa bɛ̃a gɛnɛ gã wi kele zu wa, kɛ a kpasa wa ni.

¹⁶ Wa nɔ̃lɔ̃ zã Gale, we kɛ wa dɔnggɔ osɛa te. Wa dɛa ogã 'dã mɔ, nɛ ma zɛlɛ sila a.

¹⁷ Wa hã dɔnggamɔ hã ogele galenɔ, kɛ wa a ngbongbo Gale gɔ, nɛ oyaa wa wa ĩ zɛ́ mbe kuti ti wa gɔ, nɛ wa dɔnggɔ zɛ́ mbe wa fala kpo gɔ ni.

¹⁸ “Ta zu wa ila ngɔ Gale 'da wa, kɛ a a gã wi kele zu wa ni, Nɛ wa la fala a kɛ a hã kpasi hã wa ni.

¹⁹ “NWA zɔa mɛnɔ kɛ obenɔ 'da a wa dɛa ni, nɛ zã a nɔ̃lã, nɛ a bɛ̃a gɛnɛ wa, nɛ a kɔ̃̀ 'bɔ we zɔ mɔ tɛ wa mbé nɛ gɔ.

²⁰ Nɛ a tɔ̃a na: ‘Mi gálá sɛ 'bɔ wa mbé nɛ gɔ, kɔ mi zɔ mɛ ma nɛ hɔ hã wa ni, we kɛ wa a owi dɛ vĩ zu dɛa mɔ, mi wè tɛ gbini zã mi do wa gɔ. Wa dɔnggɔ mi gɔ, nɛ wa dɛ́ kili mi gɔ.

²¹ Wa dɔnggɔ osɛa te, nɛ ma nɔ̃lɔ̃ zã mi, nɛ ma yulu bɔnɛ kɔ sila mi. We kɛ osɛa galenɔ ni, wa a ngbongbo Gale gɔ. Nɛ nde mi yulu sɛ tɛ mɛ 'bɔ bɔnɛ kɔ sila obe Israɛlɛ. Mi tombo sɛ Owele hã wa, kɛ wa a ngbongbo nu kɔnggɔ Israɛlɛ gɔ, nɛ obe Israɛlɛ wa dɛ sɛ bɔnɛ hã wa. Mi dɛ sɛ na, wa ɔ do mãlã dɛ tɛ gele nu kɔnggɔ, kɛ wa zɔla hã zã ni.

²² Nɔ̃lɔ̃ zã 'da mi ma nyɛ sɛ ɔ nɛ we ni, nɛ ma bɛlɛ sɛ mɛnɔ ngɔ nù gɛ vɛ̃, nɛ ma hɔ sɛ gbaa kɔ le 'da ofionɔ i, nɛ nyanga kalanɔ ti nù i ma ngutu sɛ vɛ̃.

²³ “ ‘Mi dɛ sɛ na ngamɛnɔ wa kpa ni, ma gã dɛ dati. Mi ndɔlɔ sɛ wa do kpilinɔ 'da mi, nɛ kpilinɔ ni, ma ba sɛ wa.

²⁴ Wɔ, do bawe tɛ wi, do 'dã zɛlɛ, ma gbɛ sɛ wa, mi tombo sɛ dã sa'de na, wa gbɛ wa, nɛ odã gɔ̃ wa gɔmɔ sɛ wa, nɛ wa fe.

²⁵ Gɛnɛ kɔ wa a li wala, nɛ bolo ma bi sɛ wa nɛ ma gbɛ wa. Tabi wa ɔ dɛ kɔ tɔa, nɛ kili ma hɛ̃ sɛ wa. Obe zagbãlã do obe zɔnga wa fe sɛ wala kpo. Gɛnɛ kɔ onzɔ be do okpasa wi, nɛ nde wa 'báná sɛ do tunu li wa gɔ.

²⁶ “ ‘Mi kɔ̃a sɔ na, mi kumu wa vɛ̃, da dɛ kɔ ta zu wele gbá 'bɔ ngɔ wa gɔ.

²⁷ Nɛ nde mi wè tɛ dɛ na mɛ ni gɔ. Fala kɛ mi kumu wa, nɛ owi sɛnɛ wa wa to sɛ ngu'du wa na, lo a lo nɛa ngɔ wa do ngawi 'da lo.’

²⁸ “Nu kɔnggɔ obe Israɛlɛ wa lénggé mɔ gɔ, wa do hã zu wa bina.

²⁹ Wa ɔ sɔ do wi hã zã, nɛ wa ĩ sɔ ti fala wa nɛ Sɔkpɔ do nɛ ni.

³⁰ Gulu kɛ wele zu a kpo iko, nɛ a nɛ ngɔ obe Israɛlɛ kama kpo ni we ge nde? Nɛ gulu kɛ Owele bɔa, nɛ wa nɛ ngɔ obe Israɛlɛ koto kpo ni we ge nde? Mɛ a we duzu kɛ Gale 'da wa, kɛ a do nganda vɛ̃ ni, a la wa do'do.

³¹ “Owi sɛnɛ wa, wa ĩ na ogalenɔ 'da lo wa a osulu gale iko, wa ngàndà ɔ nɛ Gale 'da obe Israɛlɛ gɔ.

³² Owi sɛnɛ wa wa dɛa gã 'dã mɔ, ɔ nɛ owi Sodɔmɛ do Gomɔrɛ ni. Wa vɛ̃ wa ɔ nɛ te kɛ ma ko, nɛ wala nɛ ma ɔ fã, kɔ wele nyɔngɔ, nɛ ma dɛ a 'danga ni.

³³ Wa dãlã ɔ nɛ nga dɔ̃, kɛ ma ba wele ɔ nɛ faliã gɔ̃ ni.

³⁴ “Ta zu NWA gba ngɔ mɛnɔ kɛ owi sɛnɛ obe Israɛlɛ wa dɛa ni. Nɛ a 'bɔ tati a ngba soe ma wia na, a hã do etumbu hã wa ni.

³⁵ NWA a bili sɛ nu gbã, nɛ a hã etumbu hã wa. Ngba soe kɛ wa te sɛ ni kɔla ia. Kɔ̃ tũ ngamɛ 'da wa nyɛlɛ 'bɔ gɔ.

³⁶ “Nɛ nde NWA a kpasa sɛ owinɔ 'da a. A lengge sɛ do ngamɛ wa zɔ ni. Fala kɛ a zɔ na, ngawi 'da wa ia do'do, kɔ fo 'bɔ wi gbaka wa bina,

³⁷ nɛ a tɔ̃ sɛ hã wa na: ‘Ogalenɔ kɛ nɛ gbini zi zã nɛ do wa na, wa kele sɛ zu nɛ ni, wa 'bɔ ni a do nde?

³⁸ Nɛ gbɛ zi osa'de we dɔnggɔ do wa, nɛ nɛ dala wa do kɛndɔ sa'denɔ ni, nɛ nɛ e dɔ̃ ti wa na wa nɔ. E kɔ wa tɛ, hã wa gala nɛ. E kɔ wa wɛlɛ tɛ wa, hã wa amba zu nɛ.’

³⁹ “Gale na: ‘Mi zu mi kpo a ngbongbo Gale, fo mbé gele gale, kɛ a a ngbongbo Gale ni bina. Mi a mi gbɛ wele, nɛ mi 'bɔ a mi hã kpasi hã wele. Mi e dani tɛ wele, nɛ mi dɛ 'bɔ na, dani ni ma ɛ̃. Wele kpo wè tɛ amba mi gɔ.

⁴⁰ Ɔ nɛ kɛ mɛ a gbãlã we na, mi a Gale wele kpasi ni, mi ba kɔ̃ mi dɛ ngɔ, nɛ mi zonggo tɛ mi na:

⁴¹ Mi bili sɛ nu gbã hã owi sɛnɛ mi, nɛ mi hã sɛ etumbu hã wanɔ kɛ wa kɔ̃̀ mi gɔ ni. Mi bɛngɛ sɛ nu du kɔya 'da mi, nɛ mi nɛ sɛ do ma we 'bili ngbangga do bɔlɔ nɛ.

⁴² Li kpilinɔ 'da mi ma fo sɛ do tɔkɔ tɛ wa, nɛ mi gbɔtɔ sɛ du kɔya 'da mi we gbɛ do owinɔ vɛ̃ kɛ wa sɛnɛ mi ni. Mi lá sɛ wele kpo kɔ wa do tunu li a gɔ, Gɛnɛ kɔ wi dani tabi wi bɔlɔkɔ, nɛ mi gbɛ sɛ wa vɛ̃.’

⁴³ “Aa nɛ, onu kɔnggɔnɔ, nɛ dɔ́nggɔ́ owinɔ 'da NWA. Gɛnɛ kɔ wi a wio nde, kɔ a gbɛ wa, nɛ NWA a bili sɛ nu gbã nɛ hã a. A hã sɛ etumbu hã owi sɛnɛ a, nɛ a fo sɛ ku'da 'dã mɔ zu owinɔ 'da a.”

⁴⁴ Mɔizɛ do Yozue, be 'da Nunɛ, wa tɔlɔ zi lɛnggɛnɔ kɔ zuma ni dɛ ngɔ hã obe Israɛlɛ na, wa zele ma.

Mɔizɛ tɔ̃a tala mbulanɔ hã obe Israɛlɛ

⁴⁵ Mɔizɛ bia ombulanɔ 'da NWA hã owinɔ do'do,

⁴⁶ nɛ a tɔ̃ na: “Nɛ fá na, nɛ dɛ ombulanɔ vɛ̃ kɛ mi hã ma hã nɛ sɔɛ gɛ. Nɛ bé sɛ ma hã obe zã nɛ, takɔ wa dɔnggɔ mbulanɔ 'da Gale vɛ̃ do wala olo nɛ ngboo.

⁴⁷ Nɛ nɛ tɛ zɔ̀ mbulanɔ gɛ li nɛ yala iko gɔ, we kɛ ma hã sɛ kpasi hã nɛ. Nɛ dɛ́ ma, nɛ nɛ ɔ sɛ, nɛ 'do nɛ nyɛlɛ ngɔ nùi kɛ nɛ nɛ ba ma kulu lì Yɔrdanɛ i ni.”

⁴⁸ Do Sɔkpɔ ngba soe ni, nɛ NWA tɔ̃a hã Mɔizɛ na:

⁴⁹ “Mɔ nɛ́ dɛ ngɔ okala Abarimɛ, tɛ ngɔ nù Moabɛ, kɛ ma ka mɔ dɛ Yeriko ni. Mɔ hɔ i mɔ, nɛ mɔ kũ dɛ ngɔ kala Nebo, kɔ mɔ zɔ nù Kanana, kɛ mi nɛ hã ma hã obe Israɛlɛ ni.

⁵⁰ 'Do nɛ, nɛ mɔ fe sɛ dɛ ngɔ kala ni, ɔ nɛ kɛ nya mɔ Aroni fia zi ngɔ kala Hɔrɛ i ni.

⁵¹ We kɛ nɛ bɔa nɛ, nɛ dɛa zi 'dã mɔ dɛ 'da mi dɛ li obe Israɛlɛ vɛ̃. Mba gɔ, 'da fala nɛ hɔa zi tɛ lì Mɛriba, dɔ̃ɔ do le Kadɛsɛ, tɛ li gba zɔ̃ Tisinɛ ni, nɛ nɛ gbìnì zi zã nɛ do mi gɔ. Nɛ nɛ bà wala hã mi na, mi be ngawi 'da mi kɛ ma santo ni hã obe Israɛlɛ gɔ.

⁵² Ma kɛ mɔ ka sɛ mɔ dɛ ngɔ nùi kɛ mi hã ma hã obe Israɛlɛ ni ka iko, nɛ nde mɔ lé sɛ i mɔ gɔ.”