Mbulanɔ 29 - WE NU GALE 1995

NWA gba tɔkɔ do obe Israɛlɛ tɛ Moabɛ

¹ Mɔizɛ sa mɔ hã obe Israɛlɛ vɛ̃, nɛ a tɔ̃ hã wa na: “'Da fala kɛ nɛ zi a Ezipeto i ni, nɛ nɛ zɔa zi mɛ kɛ NWA Gale dɛa do nwa ngɔ nù Ezipeto, do owi olo li a, do owinɔ ngɔ nùi 'da a vɛ̃ ni do li nɛ ngboo.

² Nɛ zɔa zi gã ngamɛnɔ kɛ a hã zi hã wa, do ogã ɔngbamɛnɔ do ogba sɔ̃ mɛnɔ kɛ a dɛa zi ni.

³ Nɛ nde yolo di ni gbaa we hɔ sɔɛ gɛ, nwa hã̀ hã zã hã nɛ na, nɛ ĩ ti gulu mɛnɔ kɛ nɛ zɔa zi ni gɔ.

⁴ NWA kã nɛ do li gba zɔ̃ 'do 'bu sabɛlɛ nalɛ, nɛ a dɛa na, tulu tɛ nɛ do mɔ nyanga nɛ, ma tɛ ɛ̃̀ gɔ.

⁵ Nɛ zi do mapa we nyɔngɔ ma do dɔ́ we nɔ ma bina. Nɛ nde NWA hã zi mɛnɔ kɛ nɛ do wɔ nɛ ni hã nɛ, takɔ a be hã nɛ na, ɛ a Gale 'da nɛ.

⁶ Lɛ nɛa zi we hɔ tɛ fala gɛ, nɛ Sihoni, nwa ngɔ nù Hɛsɛboni, do Ɔgɛ, nwa ngɔ nù Basanɛ, wa tɛa, nɛ wa bi lɛ. Nɛ lɛ nɛa ngɔ wa li bole ni.

⁷ Lɛ ba nùi 'da wa, nɛ lɛ kɛ̃ ma dɛ kɔ̃ onu kpala Rubɛnɛ, do Gadɛ, do mbee nu kpala Manase.

⁸ Kɔ nɛ fá na, nɛ dɛ mbulanɔ vɛ̃ kɛ Gale hã ma hã lɛ kɔ gba tɔkɛ ni. Na mɛ ni, nɛ mɛnɔ vɛ̃ kɛ nɛ kɔ̃ sɛ we dɛ ma ni, nɛ ma Sɔkpɔ sɛ do dia nɛ.

⁹ “Nɛ, obe Israɛlɛ, nɛ mba li ngba nɛ dɛ dati NWA Gale 'da nɛ. Sɔɛ gɛ, okpasa winɔ, ogã winɔ, okumunɔ 'da nɛ, do ogele winɔ,

¹⁰ owukonɔ do obenɔ 'da nɛ, do ogɛnɛnɔ kɛ wa ɔ sanga nɛ, nɛ wa fa gua, nɛ wa so lì hã nɛ ni, nɛ vɛ̃ boe.

¹¹ Ngangga ni, NWA Gale 'da nɛ, a gba tɔkɔ do nɛ, nɛ a kɔ̃a na, nɛ kana tɛ nɛ na, lo dɛ sɛ olo gba tɔkɛ ni.

¹² Na mɛ ni, nɛ nɛ hɔ sɛ owinɔ 'da a, nɛ a sɛ a Gale 'da nɛ, ɔ nɛ kɛ a kpua zi mbulu nɛ hã nɛ, do oyaa nɛ Abrahama, Izaka do Yakɔbɔ ni.

¹³ Gba tɔkɛ nɛ gba ma, nɛ nɛ kana tɛ nɛ we dɛ ma ni, ma tati nɛ we duzu nɛ iko gɔ.

¹⁴ Ma 'bɔ we duzu lɛ gɛ vɛ̃, kɛ lɛ yolo dati NWA Gale 'da lɛ gɛ, do obe zã lɛ vɛ̃, kɛ lɛ tɛ kò wa di ni gɔɛ ni.

¹⁵ “Ta zu nɛ gba ngɔ tɛlɛ tɛ kɛ lɛ zi do ma tɛ Ezipeto i, do tɛlɛ tɛ kɛ lɛ la zi do ngɔ nùi 'da ogele nu kɔnggɔnɔ ni.

¹⁶ Nɛ zɔa zi 'dã yia osɛa tenɔ kɛ owinɔ ni wa dɔnggɔ ma ni. Wa sɛa zi ma do te tabi ta, nɛ wa dolo mbee nɛ do fɛ̃a mɔ bolo tabi mɔ mbali.

¹⁷ Kɔ nɛ dɛ zĩ na, da dɛ kɔ wele kpo sanga nɛ gɛ, wi wili, tabi wuko, tabi nu kpala nɛ, tabi nu kɔnggɔ nɛ síkí 'do ɛ lo do NWA Gale 'da lɛ, we dɔnggɔ galenɔ 'da ogele nu kɔnggɔnɔ gɔ. Wele sanga nɛ gɛ dɛ na mɛ ni, nɛ a ɔ sɛ nɛ gbolo, kɛ wele nyɔngɔ, nɛ a fe ni.

¹⁸ Nɛ nɛ gɛ vɛ̃, kɛ nɛ zila wenɔ ni sɔɛ gɛ, nɛ dɛ zĩ na, da dɛ kɔ wele kpo lénggé na, gɛnɛ kɔ ɛ là fala dɛ nga zu gɔ, nɛ ɛ kpa sɛ dia mɔ ni gɔ. Nɛ nɛ dɛ 'bɔ zĩ na, da dɛ kɔ wele é ngba ɛ li wala dɔnggɔ kpikima gɔ.

¹⁹ Wi dɛ na mɛ ni, nɛ nwa élé sɛ 'dã mɔ mɔ́ a gɔ. Nɛ ga nɔ̃lɔ̃ zã 'da nwa ma bɛlɛ sɛ a ɔ nɛ we ni. Nɛ a dɛ sɛ na, fɔmbanɔ vɛ̃ kɛ ma kɔ 'buki gɛ, ma te ngɔ a. Nɛ ta zu wele gbá sɛ 'bɔ ngɔ wi ni ngɔ nù gɛ gɔ.

²⁰ NWA a hã sɛ ngamɔ hã a, nɛ a fo sɛ a kɔ obe Israɛlɛ do'do. A dɛ sɛ ɔ nɛ kɛ fɔmba ngɔ yala gba tɔkɛ, kɛ wa kɔma ma kɔ 'buku mbula gɛ ma tɔ̃ ni.

²¹ “Nɛ 'da fala obe zã nɛ, mba do ogɛnɛnɔ kɛ wa yula nyɛlɛ wena ni, wa zɔ sɛ tɛlɛ tɛ kɛ NWA 'danga do nùi do ngamɛnɔ a tombo dɛ ngɔ nɛ ni, nɛ wa tɔ̃ sɛ na:

²² ‘Nùi gɛ ma 'danga vɛ̃. Tɔ̃, do we ma bɛlɛ ma, nɛ ma ngutu vɛ̃. Wa mí sɛ 'bɔ mɔ te'de gɔ, nɛ kpalɛ gã́ sɛ 'bɔ di ni gɔ. Gɛnɛ kɔ wɔkɔsɔ, nɛ nde ma hɔ́ sɛ di ni gɔ. Nùi 'da nɛ, ma ɔ sɛ nɛ le Sodɔmɛ do Gomɔrɛ, tabi le Adma do Sɛbɔimɛ kɛ zã nwa nãlã zi nganda wena, nɛ a 'danga ma ni.’

²³ Na mɛ ni, nɛ owinɔ ngɔ nùi gɛ vɛ̃, wa aka sɛ na: ‘Gulu kɛ nwa dɛa do nùi 'da nɛ ní ni we ge nde? Gulu kɛ zã nwa nɔ̃lɔ̃ zi nganda wena ní ni we ge nde?’

²⁴ Nɛ Owele wa gese sɛ na: ‘Ma hɔa ni mba gɔ, obe Israɛlɛ wa yala gba tɔkɛ kɛ wa gba zi sanga ngba wa do NWA Gale 'da oyaa wa, do 'da fala kɛ a fua zi wa ngɔ nù Ezipeto dɛ nza ni.

²⁵ Wa dɔnggɔ ogele galenɔ, kɛ wa dɔ̀nggɔ̀ zi mbe kuti wa dati gɔ ni, nɛ wa dɛ to hã wa. Ogalenɔ ni, NWA bɛ̃a zi na, obe Israɛlɛ wa tɛ dɔnggɔ wa gɔ.

²⁶ Ma kɛ zã NWA nɔ̃lɔ̃ dɛ tɛ owinɔ 'da a, kɔ a tumba ongamɛnɔ wa kɔma kɔ 'buki gɛ dɛ ngɔ nùi 'da wa ni.

²⁷ Zã NWA nɔ̃lɔ̃ zi dɛ tɛ owinɔ 'da a nganda wena. Nɛ a ndaka zi wa ngɔ nùi 'da wa, nɛ wa la dɛ ngɔ gele nu. Nɛ wa 'bana dɛ i mɔ tia do sɔɛ gɛ.’

²⁸ “Mbe mɛnɔ kɛ NWA ĩ ti ma zu a kpo, nɛ a usu ma do lɛ ni, ma boe. Nɛ nde a bia mbula 'da a hã lɛ, nɛ ma wia na, lɛ do obe zã lɛ, lɛ dɛ mbulanɔ ni fai.