Mbulanɔ 28 - WE NU GALE 1995

Gale a wele sɛ nu a tɛ wi dɛ mbula

^1-2 “Fala kɛ nɛ zele nu NWA Gale 'da nɛ, do wala olo nɛ ngboo, kɔ nɛ dɛ mbulanɔ 'da a vɛ̃ kɛ mi hã ma hã nɛ sɔɛ gɛ ni, nɛ a dɛ sɛ na, nu kɔnggɔ nɛ gã nɛ ngɔ tala gele nu kɔnggɔ winɔ ngɔ nu gɛ. Nɛ a dɛ sɛ 'bɔ na, nɛ kpa dia mɛnɔ gɛ:

³ “NWA a wele sɛ nu a tɛ olenɔ do ofɔnɔ 'da nɛ.

⁴ “NWA a wele sɛ nu a tɛ nɛ, nɛ nɛ ko sɛ obe dɛlɛ wena. Nɛ nɛ kpa sɛ okpalɛ dɛlɛ wena. Nɛ ongɔmbɔnɔ do obatanɔ do oduanɔ 'da nɛ, wa ko sɛ 'bɔ dɛlɛ wena.

⁵ “NWA a wele sɛ nu a tɛ Okpalɛnɔ 'da nɛ, nɛ ma dunu sɛ yangganɔ 'da nɛ ngurr. Nɛ a wele sɛ 'bɔ nu a tɛ nyɔngɔmɛ nɛ kpa sɛ kɔ kpalɛnɔ ni.

⁶ “NWA a wele sɛ nu a tɛ mɛnɔ vɛ̃ kɛ nɛ dɛ ma ni.

⁷ “'Da fala Owi sɛnɛ nɛ wa bi nɛ, nɛ NWA a dɛ sɛ na, nɛ nɛ ngɔ wa. Wa tɛ we bi nɛ si 'biti fala kpo, nɛ nɛ ndaka sɛ wa, nɛ wa pɛsɛ sɛ do li walanɔ vɛ̃.

⁸ “NWA a wele sɛ nu a tɛ tonɔ 'da nɛ, nɛ yangganɔ 'da nɛ ma dunu sɛ do kpalɛ. A wele sɛ nu a tɛ nɛ tɛ ngɔ nùi kɛ a hã ma hã nɛ ni.

⁹ “Fala kɛ nɛ zele nu NWA Gale 'da nɛ, kɔ nɛ dɛ mbulanɔ vɛ̃ kɛ a ia ni, nɛ a dɛ sɛ na, nɛ hɔ owinɔ 'da a ngboo, ɔ nɛ kɛ a kpua do mbulu nɛ ni.

¹⁰ Na mɛ ni, nɛ owinɔ ngɔ nù gɛ vɛ̃ wa zɔ sɛ na, NWA saka nɛ do owinɔ 'da a ngboo, nɛ wa dɛ sɛ kili nɛ.

¹¹ NWA Gale a hã sɛ odɔa be, do ogba gili be sa'de, do gba gili kpalɛ hã nɛ. Nɛ kpa sɛ mɛnɔ ni tɛ ngɔ nùi kɛ a kpua zi mbulu nɛ hã oyaa nɛ na, a hã sɛ ma hã nɛ ni.

¹² “Nɛ a hũi sɛ nu fala a usu do lì kole li nza i ni, nɛ ma tɛ sɛ dɛ ngɔ nùnɔ 'da nɛ do li zɔlɔ nɛ. Nɛ a dɛ sɛ na, mɛnɔ 'da nɛ ma dɛlɛ dɛ dati. Na mɛ ni, nɛ ogele nu kɔnggɔnɔ wa ba sɛ ku'da kɔ̃ nɛ. Nɛ nde nɛ sɛ do wɔ ba ku'da kɔ̃ wele bina.

¹³ NWA a dɛ sɛ na, nɛ ɔ nu kɔnggɔ kɛ ma kpe dati ogele nu kɔnggɔnɔ. Nɛ fo sɛ mbé gele nu kɔnggɔ dati nɛ bina. Fala kɛ nɛ dɛ mbulanɔ vɛ̃ kɛ mi hã ma hã nɛ sɔɛ gɛ, nɛ mɛnɔ vɛ̃ kɛ nɛ dɛ sɛ ni, ma Ia sɛ do dia nɛ.

¹⁴ Da dɛ kɔ nɛ lá fala dɛ mbulanɔ gɛ fala kpo gɔ, nɛ da dɛ kɔ nɛ dɔ́nggɔ́ gele galenɔ, nɛ nɛ dɛ lo hã wa gɔ.

Owi bɛ mbulanɔ wa kpa sɛ etumbu

¹⁵ “Nɛ nde fala kɛ nɛ zèlè nu NWA Gale 'da nɛ gɔ, kɔ nɛ dɛ̃ mbulanɔ vɛ̃ kɛ mi hã ma hã nɛ sɔɛ gɛ do li zuma nɛ gɔ, nɛ ongamɛnɔ gɛ ma hɔ sɛ hã nɛ:

¹⁶ “NWA a fɔmbɔ sɛ olenɔ do ofɔnɔ 'da nɛ.

¹⁷ “NWA a fɔmbɔ sɛ kpalɛnɔ do nyɔngɔmɛnɔ nɛ kpa sɛ kɔ kpalɛnɔ ni.

¹⁸ “NWA a fɔmbɔ sɛ nɛ na, dɔ nɛ kpá odɔa be, do dɔa kpalɛ, do dɔa ngɔmbɔ, do dɔa be bata, do dɔa be dua gɔ.

¹⁹ “NWA a fɔmbɔ sɛ mɛnɔ vɛ̃ kɛ nɛ kɔ̃a we dɛ ma ni.

²⁰ “Fala kɛ nɛ dɛ 'dã mɔ, kɔ nɛ bɛ̃ gɛnɛ NWA, nɛ a tombo sɛ fɔmba dɛ ngɔ nɛ. A dɛ sɛ na, gã kili ba nɛ. Nɛ zu nɛ ma vĩ sɛ kɔ mɛnɔ kɛ nɛ kɔ̃a we dɛ ma ni, nɛ nɛ kpa sɛ 'bako. A dɛ sɛ do nɛ ní gbaa na, nɛ kumu vɛ̃.

²¹ A tombo sɛ o'dã zɛlɛ na, ma gbɛ nɛ gbaa na, nɛ mbiti ngɔ nùi kɛ nɛ nɛ ba ma ni vɛ̃.

²² A tombo sɛ zɛlɛ ku'ba, do hɛ̃a mɔ, do ba we tɛ wi na ma ba nɛ. A dɛ sɛ na, nùi ba we, hã ma kolo kpalɛnɔ, nɛ ma mbulu vɛ̃. Mɛnɔ ni vɛ̃ ma dɛ sɛ hã nɛ gbaa na, nɛ e ngɔ nùi gɛ vɛ̃ do'do.

²³ Ngangga ma yolo sɛ, nɛ kolo tɛ́ sɛ gɔ, nɛ nùi ma nganda sɛ ti nyanga nɛ ɔ nɛ kpangba ta ni. Nɛ li nza gbogbo zu nɛ i, ma nganda sɛ ɔ nɛ tũ mɔ bolo ni.

²⁴ NWA a tombo sɛ kɛnzɛ do fumbɛlɛ dɛ ngɔ fɔnɔ 'da nɛ olo li kolo. A dɛ sɛ na mɛ ni gbaa na, nɛ kumu vɛ̃.

²⁵ “NWA a dɛ sɛ na, owi sɛnɛ nɛ wa nɛ ngɔ nɛ li bolo. Nɛ fala kɛ nɛ nɛ we bi wa si 'biti fala kpo, nɛ wa ndaka sɛ nɛ, nɛ nɛ pɛsɛ dati wa do li walanɔ vɛ̃. Nɛ onu kɔnggɔ winɔ ngɔ nu gɛ, wa zɔ mɛ kɛ ma hɔa hã nɛ ni, nɛ wa dɛ sɛ kili wena.

²⁶ Nɛ wɔlɔ nɛ, ma hɔ sɛ nyɔngɔmɔ nu oganakele do o'banggo, nɛ fo sɛ wi ndaka wa tɛ nɛ bina.

²⁷ NWA a dɛ sɛ na, kili hɛ̃ nɛ, ɔ nɛ kɛ a dɛa zi na ma hɛ̃ Oezipeto ni. A dɛ sɛ na zɛlɛ yole, do katolo, do gba talɛ ma te tɛ nɛ, nɛ nɛ tɛ kpàsà tɛ nɛ gɔ.

²⁸ A fi sɛ bɔ zu nɛ, nɛ a lɔ li nɛ, nɛ a vĩ zu nɛ.

²⁹ Do midi, nɛ nɛ tamba sɛ mɔ tu tu, ɔ nɛ owi ua li ni. Nɛ mɛnɔ kɛ nɛ 'dafa we dɛ ma ni, ma dé sɛ gɔ. Owele wa zɛlɛ sɛ tɛ nɛ, nɛ wa zũ sɛ mɛnɔ kɔ̃ nɛ vɛ̃, nɛ fo sɛ wi gala nɛ bina.

³⁰ “'Da fala kɛ mbe kpo sanga nɛ kpa we wuko, nɛ mbé gele wele a ɔ sɛ do wuke ni kɔ̃ a. Nɛ dɛ sɛ mbé tɔa, nɛ nde nɛ ɔ́ sɛ kɔ nɛ gɔ. Nɛ mi sɛ fɔ vinɔ, nɛ nde nɛ nyɔ́ngɔ́ sɛ wala nɛ gɔ.

³¹ Wa gbɛ sɛ ongɔmbɔnɔ 'da nɛ dɛ gbali nɛ, nɛ nde nɛ nyɔ́ngɔ́ sɛ sa'de nɛ gɔ. Wa zũ sɛ opundanɔ 'da nɛ dɛ gbali nɛ gɛ, nɛ nde wa gésé sɛ wa hã nɛ gɔ. Owi sɛnɛ nɛ wa kala sɛ obatanɔ 'da nɛ kɔ nɛ, nɛ nde wele ámbá sɛ wa gɔ.

³² Wa 'dɔlɔ sɛ obulu benɔ, do oboko benɔ 'da nɛ dɛ gbali nɛ gɛ, nɛ wa hɔ sɛ ngbá kɔ gele le. Nɛ ka sɛ mɔ dɛ wala olo wa tũ kpo kpo gbaa nɛ nɛ mbɔkɔ, nɛ nde wa sí sɛ 'do gɔ.

³³ Nɛ wa sɛ fɔnɔ 'da nɛ, nɛ nɛ mi kpalɛ li nɛ do zɛlɛ tɛ, nɛ ogele nu kɔnggɔ Owele wa nyɔngɔ sɛ ma olo nɛ. Nɛ dɛ sɛ to yala, nɛ wa zɛlɛ sɛ tɛ nɛ zɛla fai.

³⁴ Nɛ lengge sɛ ngamɛnɔ ni, nɛ ma fi bɔ zu nɛ.

³⁵ NWA a dɛ sɛ na, dani nyɔngɔ nyanga nɛ, nɛ ma tɛ ɛ gɔ. Nɛ kili ma hɛ̃ sɛ nɛ kpɛ kpɛ kpɛ, yolo do ti zu nɛ gbaa we hɔ tambala nyanga nɛ.

³⁶ “NWA Gale a 'dɔlɔ sɛ nɛ do nwa 'da nɛ dɛ ngɔ gele nu. Nɛ nùi ni sɛ a nù kɛ nɛ do oyaa nɛ, nɛ ɔ̃ mbe kuti nɛ ngɔ nɛ fala kpo gɔ. Nɛ hɔ i mɔ, nɛ nɛ dɔnggɔ sɛ okpikima galenɔ kɛ wa sɛa wa do te, tabi wa dɛa wa do ta ni.

³⁷ Nɛ owinɔ tɛ ngɔ nùi kɛ NWA nɛ kã sɛ nɛ dɛ se'de ni, wa 'bã sɛ nu wa we mɛnɔ kɛ ma hɔa hã nɛ ni. Nɛ wa fi sɛ tɔɛ zu nɛ, nɛ wa mɔmɔ nɛ.

³⁸ “Nɛ mi sɛ okpalɛ li fɔnɔ 'da nɛ wena, nɛ nɛ kala sɛ dɛ le bi sĩ iko, we kɛ odɔlanɔ wa 'danga sɛ ma vɛ̃.

³⁹ Nɛ mi sɛ fɔ vinɔ, nɛ nɛ 'dafa ti nɛ. Nɛ nde nɛ 'bí sɛ wala nɛ gɔ, we kɛ odɔkɔ wa nyɔngɔ sɛ wala nɛ vɛ̃. Na mɛ ni, fo sɛ dɔ̃ bina.

⁴⁰ Nɛ ote olivɛ ma gã sɛ tɛ falanɔ vɛ̃ ngɔ nùi 'da nɛ, nɛ nde nɛ kpá sɛ nɔ olivɛ gɔ, we kɛ wala nɛ ma dɛ sɛ sɛdɔkɔ, nɛ ma ala vɛ̃ dati kɛ na ma fele ni. Nɛ fo nɔ fɛlɛ tɛ nɛ sɛ bina.

⁴¹ Nɛ ko sɛ obulu be do oboko be, nɛ nde wa 'báná sɛ dɛ kɛ zã nɛ gɔ. We kɛ bolo ma bi sɛ nɛ, nɛ Owele wa kala sɛ wa vɛ̃, nɛ wa 'dɔlɔ wa.

⁴² Onga'di wa 'danga sɛ tenɔ, do Okpalɛnɔ 'da nɛ vɛ̃.

⁴³ “Ogele winɔ kɛ wa ɔ sɛ sanga nɛ ni, wa nganda sɛ wena, nɛ nde ngawi 'da nɛ, ma e sɛ gɛɔ do gɛɔ.

⁴⁴ Owinɔ ni wa e sɛ ku'da zu nɛ, nɛ nde nɛ é sɛ ku'da zu wa gɔ. Nɛ do Sɔkpɔ nɛ vɛ̃, nɛ nɛ hɔ sɛ owi dɛ to ti wa.

⁴⁵ “Ngamɛnɔ ni vɛ̃ ma kpa sɛ nɛ, nɛ ma 'bana sɛ dɛ sanga nɛ gbaa na, nɛ kumu. Ma dɛ sɛ tɛ̃ ɛ na mɛ ni, we kɛ nɛ bɛ̃a we dɔnggɔ NWA Gale 'da nɛ, nɛ nɛ bɛ̃ 'bɔ we dɛ ombulanɔ 'da a, kɛ a hã ma hã nɛ ni.

⁴⁶ Ongamɛnɔ ni ma 'bana sɛ fai we mbese nɛ do obe zã nɛ.

⁴⁷ NWA wila zi nu a tɛ nɛ do walanɔ vɛ̃. Nɛ nde nɛ dɛ̀ zi to hã a do yangga, do sila nɛ vɛ̃ gɔ.

⁴⁸ Na mɛ ni, nɛ hɔ sɛ ongbánɔ 'da Owi sɛnɛ nɛ, kɛ NWA nɛ tombo wa we bi nɛ ni. Wɔ ma ba sɛ nɛ, nɛ nɛ ala sɛ wɔ lì, nɛ nɛ yɛnggɛ sɛ do kũlĩ tɛ nɛ. Sã mɛnɔ vɛ̃ ma ba sɛ nɛ. Nɛ ngamɛnɔ ni ma ɔ sɛ nɛ dĩ tole ngbangbo zu 'baka nɛ, nɛ nɛ ba sɛ ma gbaa, nɛ nɛ kumu.

⁴⁹ “NWA a sa sɛ mɔ hã onu kɔnggɔnɔ gulu nù i, kɛ nɛ ĩ ti lɛnggɛ nu wa gɔ ni, nɛ a tombo wa dɛ ngɔ nɛ. Nɛ wa bi sɛ nɛ ɔ nɛ kɛ ziki bi sa'de ni.

⁵⁰ Mɛ sɛ a Owele kɛ li wa kolo wena, nɛ wa dɛ́ sɛ 'bako hã nɛ gɔ. Gɛnɛ kɔ kpasa wi tabi be, nɛ nde wa dɛ́ sɛ 'bako hã wele kpo gɔ.

⁵¹ Wa kala sɛ onadalamɛnɔ, do kpalɛnɔ 'da nɛ, nɛ nɛ fe sɛ wɔ. Wa lá sɛ kpalɛ, tabi dɔ̃, nɔ, be ngɔmbɔ, be bata tabi be dua kpo hã nɛ gɔ. Na mɛ ni, nɛ nɛ fe sɛ vɛ̃.

⁵² Wa bi sɛ lenɔ vɛ̃ tɛ ngɔ nùi kɛ NWA Gale 'da nɛ, a hã ma hã nɛ ni. Nɛ ongala ngbonɔ kɛ ma zĩ nɛ takpa, nɛ nɛ e sila nɛ ngɔ nɛ na, ma kele sɛ zu nɛ ni, wa gbini sɛ ma do'do.

⁵³ “'Da fala kɛ owi sɛnɛ nɛ wa linggi sɛ nɛ ni, nɛ 'bako 'da nɛ ma gã sɛ wena do tɛlɛ tɛ kɛ na, nɛ nyɔngɔ sɛ obenɔ kɛ NWA Gale 'da nɛ, a hã wa hã nɛ ni.

^54-55 Na mɛ ni, gɛnɛ kɔ wi wili kɛ a a wi dĩ, nɛ a a wi bɔlɔ zu ngboo ni, nɛ a nyɔngɔ sɛ mbe kɔ obenɔ 'da a, we kɛ a sɛ do nyɔngɔmɔ bina. Nɛ a hã́ sɛ mbe hã nya a, tabi hã wuke kɛ a kɔ̃a a ni, tabi hã tala obenɔ 'da a kɛ wa 'bana ni gɔ.

^56-57 Nɛ wuko wi bɔlɔ zu, kɛ a a wi dĩ, nɛ a kpa mɔ gbaa do tɛlɛ tɛ kɛ na, gulu e nyanga a nù we nɛ nɔ bina ni, a dɛ sɛ 'bɔ kpasaa na mɛ ni. 'Da fala kɛ owi sɛnɛ nɛ wa linggi sɛ le ni, nɛ wuke ni sɛ do nyɔngɔmɔ bina. Nɛ a usu sɛ tɛ̃ a, nɛ a nyɔngɔ nzɔ be kɛ a kua a dɔ̃ɔ ni, mba do gba tɔa olo be ni. Nɛ a kɛ sɛ sanga nɛ do wili a kɛ a ngɔ sila a ni, tabi do tala obenɔ 'da a gɔ.

⁵⁸ “Nɛ dɛ́ zĩ na, nɛ dɛ mbulanɔ 'da NWA vɛ̃ kɛ wa kɔmɔ ma kɔ 'buki gɛ do wala olo nɛ ngboo. Nɛ nɛ dɔ́nggɔ́ NWA Gale 'da nɛ, kɛ a do dɔ̃lɔ̃ li, nɛ ngawi 'da a nɛa ngɔ mɔ vɛ̃ ni.

⁵⁹ Nɛ dɛ̀ ni gɔ, nɛ a tombo sɛ o'dã zɛlɛ, do odani kpi do kpi kɛ ma é gɔ ni, dɛ ngɔ nɛ do obe zã nɛ.

⁶⁰ Nɛ a tombo sɛ 'bɔ o'dã zɛlɛnɔ vɛ̃, kɛ nɛ zɔa zi tɛ ngɔ nù Ezipeto i ni dɛ ngɔ nɛ, nɛ ma gbɛ sɛ nɛ.

⁶¹ Nɛ NWA a dɛ sɛ na, mbe 'dã zɛlɛnɔ do daninɔ, kɛ wa kɔ̀mɔ̀ we nɛ kɔ 'buku mbulanɔ 'da a gɛ gɔ ni, ma kumu nɛ.

⁶² Gɛnɛ kɔ wa kua zi nɛ dɔ wena, nɛ nɛ dɛlɛ ɔ nɛ osɔlanɔ li nza gɛ ni, nɛ nde tala nɛ wa 'bana sɛ bi sĩ iko. We kɛ nɛ zèlè nu NWA Gale 'da nɛ gɔ.

⁶³ Ɔ nɛ kɛ NWA dɛa zi na, nɛ ko dɛlɛ wena ni, a dɛ sɛ 'bɔ na, nɛ kumu vɛ̃. Nɛ a fo sɛ nɛ ngɔ nùi nɛ nɛ ba ma ni.

⁶⁴ “Nɛ a pɛsɛ sɛ nɛ vɛ̃ dɛ sanga ogele nu kɔnggɔnɔ, yolo ndɔti nùi we hɔ Sɔkpɔ nɛ. Nɛ nɛ dɔnggɔ sɛ okpikima galenɔ, kɛ wa sɛa wa do te, tabi wa dɛa wa do ta ni. Ĩ na, nɛ do oyaa nɛ, nɛ dɔnggɔ zɛ́ kuti wa dati gɔ.

⁶⁵ Nɛ fala kpo nɛ kpá sɛ dungu fio sanga gele nu kɔnggɔnɔ ni gɔ. Nɛ nɛ kpá sɛ 'bɔ fala mɔ nɛ na, nɛ dungu se'de gɔ. NWA a dɛ sɛ na, sila nɛ ɔ ngɔ ngbũu, nɛ nɛ fɛngɛ tɛ linggamɔ, nɛ nɛ mbɔkɔ vɛ̃.

⁶⁶ Nɛ hɔ sɛ fɛna fio fai, nɛ tũ kpo kpo, sila nɛ ma dunu sɛ do kili fio.

⁶⁷ 'Da fala nɛ zɔ sɛ mɛnɔ kɛ ma la ni, nɛ sila nɛ ma dunu sɛ do kili. Do titole kpo kpo, nɛ nɛ 'bã sɛ gɛ̃a wese. Nɛ do gɛ̃a wese kpo kpo, nɛ nɛ 'bã titole.

⁶⁸ Nɛ NWA a a sɛ nɛ kɔ masua, nɛ a gese nɛ dɛ ngɔ nù Ezipeto i. Gɛnɛ kɔ a tɔ̃a zi na, nɛ zɔ́ sɛ 'bɔ ma gɔ ni, nɛ a gese sɛ nɛ dɛ i mɔ. Nɛ hɔ i mɔ, nɛ nɛ yamba sɛ we be gole tɛ nɛ do ngbá hã owi sɛnɛ nɛ. Nɛ nde wele kpo kɔ̃́ sɛ we oso nɛ gɔ.”

TALA LƐNGGƐNƆ 'DA MƆIZƐ

⁶⁹ Nɛ zélé we kɔ gba tɔkɛ kɛ NWA ba zi nu a hã Mɔizɛ na, a gba do obe Israɛlɛ do zu li ɛ tɛ ngɔ nù Moabɛ i gɛ. (Gba tɔkɛ ni, ma dɛ ngɔ kɛ a gba zi do wa tɛ ngɔ kala Sinai i ni.)