Mbulanɔ 27 - WE NU GALE 1995

OBE ISRAƐLƐ WA DUNGU ƐNGGA WE GBA TƆKƐ Wa kɔma sɛ ombulanɔ 'da Gale dɛ ngɔ ota

¹ 'Do nɛ, nɛ Mɔizɛ do okpasa winɔ, wa tɔ̃a hã obe Israɛlɛ na: “Nɛ dɛ́ mbulanɔ vɛ̃ kɛ mi hã ma hã nɛ sɔɛ gɛ.

² Do ngba soe kɛ nɛ kũ li Yɔrdanɛ, we le ngɔ nùi kɛ NWA Gale 'da nɛ hã ma hã nɛ ni, nɛ nɛ zĩ sɛ ogã ta, nɛ nɛ ndɔ mbu tɛ nɛ.

³ Nɛ nɛ kɔmɔ sɛ mbulanɔ vɛ̃ kɛ mi bia ma hã nɛ ni dɛ ngɔ otanɔ ni. 'Da fala nɛ le sɛ ngɔ nùi kulu lì Yɔrdanɛ, kɛ NWA Gale 'da oyaa nɛ, a kpua mbulu hã ma hã nɛ, nɛ ma do nyɔngɔmɔ la li ngele ni,

⁴ nɛ nɛ zĩ sɛ tanɔ ni dɛ ngɔ. Nɛ zĩ sɛ ma tɛ ngɔ kala Ebalɛ, nɛ nɛ ndɔ mbu tɛ nɛ ɔ nɛ kɛ mi tɔ̃a hã nɛ sɔɛ gɛ ni.

⁵ 'Do nɛ, nɛ nɛ dɛ sɛ gbagala do ta, we dɔ do sa'de hã NWA Gale 'da nɛ. Nɛ da dɛ kɔ nɛ sɛ́ tanɔ ni do mɔ bolo gɔ,

⁶ we kɛ ma wia na, tanɔ nɛ nɛ dɛ do gbagala hã NWA Gale 'da nɛ ni, ma tɛ ɔ̃ do ta kɛ wa sɛa ma sɛa gɔ. Nɛ dɔ sɛ sa'de we dɔnggɔ do nwa dɛ ngɔ gbagala ni.

⁷ Nɛ hã sɛ 'bɔ dɔnggamɔ, kɛ ma be dɛa na ni dɛ di ni, nɛ nɛ nyɔngɔ mbe dɔnggɔmɛ ni, nɛ nɛ dɛ yangga dɛ li NWA Gale 'da nɛ.

⁸ Nɛ nɛ kɔmɔ sɛ mbulanɔ 'da Gale dɛ ngɔ otanɔ nɛ zĩ, nɛ nɛ ndɔa mbui tɛ nɛ ni. Nɛ kɔmɔ sɛ ma do dia nɛ na, winɔ wa tɔlɔ.”

⁹ 'Do nɛ, nɛ Mɔizɛ do onganga levitɛnɔ kɛ wa zi kɛ zã a ni, wa tɔ̃ 'bɔ hã obe Israɛlɛ na: “Aa nɛ, obe Israɛlɛ, nɛ dúngú fio, kɔ nɛ zele lɛ sɛ. Sɔɛ gɛ, nɛ hɔa owinɔ 'da NWA Gale 'da nɛ.

¹⁰ Na mɛ ni, nɛ zélé nu a, nɛ nɛ dɛ́ mbulanɔ 'da a vɛ̃ kɛ mi hã ma hã nɛ sɔɛ gɛ ni.”

Gale a fɔmbɔ sɛ wi bɛ mbula

¹¹ Do kpo ngba soe ni, nɛ Mɔizɛ tɔ̃ hã obe Israɛlɛ na:

¹² “Nɛ kũ lì Yɔrdanɛ do'do, nɛ nu kpala Simeoni, Levi, Yuda, Isakarɛ, Yozɛfu do Bɛnzamɛ, wa yolo sɛ tɛ ngɔ kala Garizimɛ, we wele nu wa dɛ ngɔ winɔ.

¹³ Nɛ onu kpala Rubɛnɛ, Gadɛ, Asɛrɛ, Zabuloni, Danɛ do Nɛftali, wa yolo sɛ tɛ ngɔ kala Ebalɛ we fɔmbɔ winɔ.

¹⁴ Nɛ olevitɛnɔ, wa tɔ̃ sɛ wenɔ gɛ do nga gɛlɛ na:

¹⁵ “ ‘Wi kɛ a sɛ ta, tabi te, tabi a dolo kpikima mɔ bolo, hã a usu we dɔnggɔ ma, nɛ Gale a fɔmbɔ sɛ a. We kɛ NWA Gale sɛnɛ tɛlɛ tɛ kpikimanɔ ɔ na mɛ ni wena.’ Nɛ owinɔ vɛ̃ wa gese sɛ na: ‘Ma na mɛ ni!’

¹⁶ “ ‘Wele kɛ a hã sape hã baa a do naa a, nɛ Gale fɔmbɔ a.’ Nɛ owinɔ vɛ̃ wa gese sɛ na: ‘Ma na mɛ ni!’

¹⁷ “ ‘Wele kɛ a kpolo li ngbala sanga wa do ngba a, nɛ Gale fɔmbɔ a.’ Nɛ owinɔ vɛ̃ wa gese sɛ na: ‘Ma na mɛ ni!’

¹⁸ “ ‘Wele kɛ a be 'dã wala hã wi lɔa li, nɛ Gale fɔmbɔ a.’ Nɛ owinɔ vɛ̃ wa gese sɛ na: ‘Ma na mɛ ni!’

¹⁹ “ ‘Wele kɛ a gbɛ 'dã we olo dia we hã gɛnɛ, tabi hã be gula, tabi hã wi fio wili, nɛ Gale fɔmbɔ a.’ Nɛ owinɔ vɛ̃ wa gese sɛ na: ‘Ma na mɛ ni!’

²⁰ “ ‘Wele kɛ a ɔ do mbe kɔ wukonɔ 'da baa a, nɛ Gale fɔmbɔ a. We kɛ mɛ a dɛa ni, ma hã sape hã baa a.’ Nɛ winɔ vɛ̃ wa gese sɛ na: ‘Ma na mɛ ni!’

²¹ “ ‘Wele kɛ a ɔ do sa'de, nɛ Gale fɔmbɔ a.’ Nɛ owinɔ vɛ̃ wa gese sɛ na: ‘Ma na mɛ ni!’

²² “ ‘Wele kɛ a ɔ do boko nya a ngboo, tabi boko nya a be 'da baa a, tabi boko nya a be 'da naa a, nɛ Gale fɔmbɔ a.’ Nɛ owinɔ vɛ̃ wa gese sɛ na: ‘Ma na mɛ ni!’

²³ “ ‘Wele kɛ a ɔ do naa kɛnɛ a, nɛ Gale fɔmbɔ a.’ Nɛ owinɔ vɛ̃ wa gese sɛ na: ‘Ma na mɛ ni!’

²⁴ “ ‘Wele kɛ a gbɛ wele do usu nɛ, nɛ Gale fɔmbɔ a.’ Nɛ owinɔ vɛ̃ wa gese sɛ na: ‘Ma na mɛ ni!’

²⁵ “ ‘Wele kɛ wa futa a na, a gbɛ wi kɛ a dɛ̃ 'dã mɔ gɔ ni, nɛ Gale fɔmbɔ a.’ Nɛ owinɔ vɛ̃ wa gese sɛ na: ‘Ma na mɛ ni!’

²⁶ “ ‘Wele kɛ a bɛ̃ we dɛ mbulanɔ 'da Gale, nɛ Gale fɔmbɔ a.’ Nɛ owinɔ vɛ̃ wa gese sɛ na: ‘Ma na mɛ ni!’