Mbulanɔ 26 - WE NU GALE 1995

Dɔnggamɔ kuti kpalɛnɔ

¹ “Nɛ le sɛ ngɔ nùi kɛ NWA Gale 'da nɛ, a hã ma hã nɛ ni. Nɛ nɛ ba sɛ ma, nɛ nɛ dungu dɛ di ni.

² Nɛ 'da fala kɛ nùi ma ko sɛ kpalɛ hã nɛ, nɛ wele kpo kpo a kala sɛ mbe zu kuti kpalɛnɔ a kpa ngɔ nùi kɛ NWA hã ma hã nɛ ni, nɛ a a ma kɔ yele, nɛ a nɛ do ma dɛ fala kɛ NWA Gale 'da nɛ, a saka sɛ na, nɛ dɔnggɔ do ɛ ni.

³ A hɔ i mɔ, nɛ a kpa nganga kɛ a dɛ toe do 'da fala ni, nɛ a tɔ̃ hã a na: ‘Mi tɔ̃ dɛ dati NWA Gale 'da mi sɔɛ gɛ na, mi hɔa ngɔ nùi a kpua zi mbulu nɛ hã oyaa lɛ na, a hã sɛ ma hã lɛ ni ia.’

⁴ Nɛ nganga a ba sɛ yele wi ni tɛa do ma ni, nɛ a e ma dɛ dati gbagala 'da NWA Gale 'da nɛ.

⁵ Nɛ wi ni a tɔ̃ sɛ hã NWA Gale nɛ́ mɛ gɛ: ‘Yaa mi zi a Aramɛ, a ɔ́ zi kpo fala gɔ. A la zi dɛ Ezipeto, nɛ a ɔa i mɔ fala nɛ kpo do owinɔ wa kã a ni. 'Do nɛ, nɛ owinɔ ni wa kua, nɛ wa dɛlɛ, nɛ wa hɔ gã nu kɔnggɔ, nɛ wa nganda wena.

⁶ Nɛ nde owi Ezipeto wa zɛlɛ tɛ lɛ, nɛ wa hã ngamɔ hã lɛ, nɛ lɛ dɛa to ngbá.

⁷ Lɛ zɔa na mɛ ni, nɛ lɛ sa mɔ hã mɔ NWA Gale 'da oyaa lɛ na mɔ gbaka lɛ. Mɔ zila hiamɔ gɛlɛ lɛ, nɛ mɔ zɔa ngamɛ do 'bakoe kɛ lɛ kpa ma, do tɛlɛ tɛ kɛ wa zɛlɛ tɛ lɛ ni.

⁸ Nɛ mɔ fua lɛ ngɔ nù Ezipeto dɛ nza do ngawi 'da mɔ, kɛ ma nɛa ngɔ mɔ vɛ̃ ni. Mɔ dɛa ogba sɔ̃ mɔ do oɔngbamɔ, do omɔ kɛ ma hã kili hã wele ni.

⁹ Mɔ kã lɛ gbaa dɛ i nga, nɛ mɔ hã nùi kɛ ma do nyɔngɔmɔ la li ngele gɛ hã lɛ.

¹⁰ Ma kɛ mi kala mbe tɛ kuti kpalɛ mi kpa ma ngɔ nùi kɛ mɔ NWA, mɔ hã ma hã mi ni, nɛ mi tɛa do nɛ hã mɔ.’ “Wi ni tɔ̃ ni do'do, nɛ a e sɛ mɛ kɛ a tɛa nɛ ni dɛ dati NWA Gale 'da nɛ.

¹¹ 'Do nɛ, nɛ nɛ dɛ sɛ yangga we duzu dia dɛa mɛnɔ vɛ̃, kɛ NWA dɛa hã nɛ do onu fɛlɛ nɛ ni. Nɛ nɛ dɛ sɛ yangga ni fala nɛ kpo do olevitɛnɔ, do ogɛnɛnɔ wa ɔ ngɔ nùi 'da nɛ ni.

¹² “Sabɛlɛ talɛ talɛ, nɛ nɛ hã sɛ kpo mbee 'bu kɔ kpalɛnɔ 'da nɛ hã Gale. Nɛ nɛ e ma, nɛ nɛ tɛ sɛ do ma hã olevitɛnɔ, do ogɛnɛnɔ, do obe gulanɔ, do owi fio wilinɔ. Na mɛ ni, nɛ nu fɛlɛ kula kpo kpo wa kpa sɛ nyɔngɔmɔ na, wa nyɔngɔ, nɛ zã wa hɛ̃.

¹³ Nɛ dɛ ni do'do, nɛ nɛ tɔ̃ sɛ hã NWA Gale 'da nɛ na: ‘Aa NWA, mi kala kpo mbee 'bu kɔ kpalɛnɔ 'da mi vɛ̃, ma hã mi ia hã mɔ gɛ. Mi hã ma hã olevitɛnɔ, do ogɛnɛnɔ, do obe gulanɔ, do owi fio wilinɔ, ɔ nɛ kɛ mɔ ba do nu mɔ na lɛ dɛ ni. Mi bɛ mbula kɛ mɔ ia si ngɔ kpo mbee 'bu kɔ kpalɛnɔ ni gɔ. Nɛ mi èlè 'bɔ mbula ngɔ ma kpo gɔ.

¹⁴ 'Da fala mi dungu zi gɛla, nɛ mi nyɔngɔ mɔ kpo kɔ mɛnɔ ni gɔ Nɛ 'da fala mi hɔa zi wi ndi li mɔ, nɛ mi 'bè tɛ nɛ we fo mbe zu nɛ gɔ. Nɛ mi hã̀ 'bɔ mbe do dɔnggamɔ hã obɔzɔ yaa mi gɔ. NWA Gale 'da mi, mi zila olo nu mɔ, nɛ mi dɛa mbulanɔ vɛ̃ kɛ mɔ ia ni.

¹⁵ Mɔ ká mɔ dɛ nù nga, dɛ ngɔ fala lɛ dɔnggɔ do mɔ ni, hã mɔ wele nu mɔ tɛ lɛ obe Israɛlɛ, winɔ 'da mɔ. Mɔ wélé 'bɔ nu mɔ tɛ dia nùi kɛ mɔ hã ma hã lɛ gɛ, ɔ nɛ kɛ mɔ kpua zi mbulu nɛ hã oyaa lɛ ni.’

Obe Israɛlɛ wa a winɔ 'da NWA ngboo

¹⁶ “Sɔɛ gɛ, NWA Gale 'da nɛ, a ba nu a hã nɛ na, nɛ dɛ mbulanɔ 'da a kɛ a ia ma hã nɛ ni vɛ̃. Nɛ dɛ́ zĩ na, nɛ dɛ ma do kɔ sila nɛ vɛ̃.

¹⁷ Sɔɛ gɛ, nɛ kpua mbulu hã NWA na, a sɛ a Gale 'da nɛ, nɛ nɛ dɛ sɛ olo nu a do ombulanɔ 'da a vɛ̃.

¹⁸ Sɔɛ gɛ, NWA kɔ̃a gɛnɛ nɛ na, nɛ a owinɔ 'dɛ ɛ ngboo, ɔ nɛ kɛ a kpua mbulu nɛ hã nɛ ni. Nɛ a ba nu a hã nɛ na, nɛ dɛ mbulanɔ 'da ɛ vɛ̃.

¹⁹ Nɛ dɛ na mɛ ni, nɛ a dɛ sɛ na, nu kɔnggɔ nɛ gã la ngɔ tala gele nu kɔnggɔ winɔ a dɛa wa ni. Nɛ nɛ kpa sɛ dɔ̃lɔ̃ li do dĩ do zu li a. Nɛ nɛ sɛ a owinɔ 'da a ngboo, ɔ nɛ kɛ a kpua do mbulu nɛ ni.”