Mbulanɔ 25 - WE NU GALE 1995

Mbula ngɔ 'bili we

¹ “Mbe gɔ, nɛ obe Israɛlɛ bɔa wa mɔ̃lɔ̃, nɛ wa nɛ dati wi 'bili wenɔ, takɔ wa tɔ̃ ngbangga ni. Nɛ wa 'bili na, mbe kpo do dia gulu we, nɛ mbee nɛ tia do ngbangga.

² Kɔ fala kɛ wa 'bili we na, wa zɛ wi te do ngbangga ni, nɛ wi 'bili we a ba sɛ nu a na, wa gu zã wi ni nù, hã wa zɛ go'do a. Nɛ wa zɛ sɛ go'do wi ni we do 'da 'dã mɛ kɛ a dɛa ni.

³ Wa wia sɛ we zɛ go'do a hɔ ngɔ 'bu nɛ nalɛ. Nɛ nde ma tɛ là ngɔ 'bu nɛ nalɛ gɔ. Ma la ngɔ 'bu nɛ nalɛ, nɛ ma hã sɛ sape hã a li owinɔ.

Mbula ngɔ toe 'da ngɔmbɔ

⁴ “Nɛ tɛ ɛnzɛ nu ngɔmbɔ, do 'da fala kɛ a ma sanga kpalɛ na, kɔa nɛ fo tɛ̃ ɛ tɛ gbãlã nɛ ni gɔ.

Mbula ngɔ mɔ olo nya mɔ kɛ a fia

⁵ “Fala kɛ onya wi bɔa wa dɛ tɔa fala nɛ kpo, kɔ mbe kpo fe, nɛ nde a kò be gɔ, nɛ wuke olo a ni wè tɛ ba wili kɔ gele nu fɛlɛ gɔ. Nya wili a a ba sɛ a.

⁶ Nɛ kuti be kɛ wa nɛ ko a ni, a anga sɛ li wele kɛ a fia ni na, da dɛ kɔ li a mbiti ngɔ nù Israɛlɛ gɔ.

⁷ Nɛ nde fala kɛ wi ni kɔ̃̀ we ba wuke olo wi fio nya ɛ ni gɔ, nɛ ma wia na, wuke nɛ dɛ dati okpasa winɔ kɔ le ni, nɛ a tɔ̃ hã wa na: ‘Nya wili mi bɛ̃a we dɛ mɛ kɛ ma wia sɔ na, a dɛ hã nya a ni do'do. A kɔ̃̀ we anga li a dɛ nza ngɔ nù Israɛlɛ gɛ gɔ.’

⁸ A tɔ̃ ni do'do, nɛ okpasa winɔ kɔ le ni, wa sa sɛ mɔ hã nya wili a, nɛ wa aka a ngɔ we ni. Fala kɛ wa aka a, kɔ a 'bana tɛ bɛ̃ na, ɛ bá wuke olo nya e ni gɔ nde,

⁹ nɛ wuke ni, a nɛ sɛ dɛ gbali okpasa winɔ ni, nɛ a hɔlɔ mbee kpɔkpɔ nyanga nya wili a, nɛ a tufu sa nu a dɛ li a, nɛ a tɔ̃ na: ‘Mɛ wa dɛ do wi wili kɛ a bɛ̃a we ko be hã nya a na, a anga li a dɛ nza gɛ a ni.’

¹⁰ Nɛ do 'da fala ni, nɛ wa e sɛ li nu fɛlɛ kula 'da a tɛ ngɔ nù Israɛlɛ ni na: ‘Nu fɛlɛ kula 'da wi wili kɛ wa fua mbee kpɔkpɔ nyanga a.’

Wele tɛ gàsà bolo gɔ

¹¹ “Fala kɛ wi wili bɔa wa bi bolo, kɔ wuke 'da mbe kpo tɛ we gasa bole zu wili ɛ, kɔ a ba ga mbee wi wili ni,

¹² nɛ nɛ tɛ ĩ̀ 'bako hã wuke ni gɔ, nɛ 'bili kɔ̃ a do'do.

Nɛ bé bɔlɔ zu kɔ bia gole

^13-14 “'Da fala nɛ ma ngɔ we kilo, tabi we 'da du mɔ nde, nɛ nɛ tɛ zũ nu nɛ gɔ.

¹⁵ Nɛ we sɛ kilo tabi 'da du mɔ do bɔlɔ nɛ. Nɛ dɛ na mɛ ni, nɛ zu nɛ ma kutu sɛ mbu ngɔ nùi kɛ NWA Gale 'da nɛ, a nɛ ba ma hã nɛ ni.

¹⁶ Mba gɔ, NWA Gale 'da nɛ, a sɛnɛ wi zũ nu kilo wena.

Mbula we gbɛ Oamalɛkɛ

¹⁷ “Ta zu nɛ tɛ èlè ngɔ mɛ Oamalɛkɛ wa dɛa zi do nɛ, 'da fala nɛ yula zi Ezipeto i tɛ si nɛ ni gɔ.

¹⁸ Wa dɛ̀ zi kili Gale gɔ. Nɛ do 'da fala nɛ mbɔkɔ zi wena, kɔ ombe wa zi tɛ zĩ tɛ wa do 'do i ni, nɛ Oamalɛkɛ wa 'bɔa 'da nɛ, nɛ wa gbɛa wanɔ 'do mɔ ni.

¹⁹ Ma kɛ 'da fala NWA Gale 'da nɛ, a ba nùi hã nɛ, kɔ a kele zu nɛ ti kɔ̃ owi sɛnɛ nɛ vɛ̃, kɛ wa zĩ nɛ takpa ni, nɛ ma wia na, nɛ gbɛ sɛ Oamalɛkɛ vɛ̃. Nɛ kumu sɛ wa do tɛlɛ tɛ kɛ na, tɛ zu wele tɛ gbà 'bɔ mbé nɛ ngɔ wa gɔ. Da dɛ kɔ tɛ nɛ élé gɔ!