Mbulanɔ 24 - WE NU GALE 1995

Mbula ngɔ wuko kɛ wili a bɛ̃a a

¹ “Mbe gɔ, nɛ wi wili ba wuko, nɛ 'do nɛ, nɛ a kɔ̃̀ 'bɔ gɛnɛ a gɔ, we kɛ a kpa a do mɔ kɛ ma dè tɛ̃ a gɔ ni. Nɛ wi wili ni kɔmɔ mbɛti bɛ̃ ngba wi, nɛ a e ma kɔ̃ a, nɛ a gese a dɛ 'da Owele a.

² Nɛ 'do nɛ, nɛ wuke ni ba gele wili.

³ Nɛ mbé wi wili tɔ̃ 'bɔ na, ɛ kɔ̃̀ gɛnɛ a gɔ. Nɛ a e 'bɔ mbɛti bɛ̃ ngba wi kɔ a, nɛ a gese a dɛ 'da Owele a. Tabi mbe gɔ, wi wili kɛ bɔa ni fe fia.

⁴ Fala kɛ mɛnɔ bɔa ni ma dɛ tɛ̃ ɛ, nɛ ma wè na, kuti wili wuke ni kpolo tɛ̃ ɛ 'da a gɔ. Ma wia na, a zɔ wuke ni li a na, a hɔa wi ndi we a. Fala kɛ a kpolo 'bɔ tɛ̃ a 'da wuke ni, nɛ nde a dɛa 'dã mɔ dati NWA. Ma wè na, nɛ dɛ tɛlɛ tɛ gã 'dã mɔ na mɛ ni ngɔ nùi kɛ NWA Gale 'da nɛ, a nɛ ba ma hã nɛ ni gɔ.

Mbulanɔ kpi do kpi

⁵ “'Da fala wi wili ba wuko dɔ̃ɔ iko, nɛ ma wè na, a nɛ bolo gɔ. Nɛ ma wè 'bɔ na, wa hã gele dɛa to mbati hã a gɔ. Ma wè na, a dɛ to na mɛ ni gɔ gbaa 'do sabɛlɛ kpo. Na mɛ ni, nɛ a wia we 'bana dɛ nu tɔa 'da a, nɛ a dɛ yangga do wuke 'da a.

⁶ “Ma wè na, wele nɛ we ba ku'da kɔ̃ nɛ, nɛ a e mɔ to tula 'da a do tikɔɛ nɛ gɔ. We kɛ a dɛ na mɛ ni, nɛ nu fɛlɛ a wa zɔlɔ sɛ nyɔngɔmɔ.

⁷ “Fala kɛ be Israɛlɛ kpo ba nya a be Israɛlɛ kɔ a usu a, kɔ a e a do ngbá, tabi a be gole a, nɛ wa gbɛ sɛ wi dɛa mɛ ni. Nɛ dɛ na mɛ ni, nɛ nɛ fo sɛ 'dã mɔ sanga nɛ do'do.

⁸ “Fala kɛ nɛ ɔ do zɛlɛ ngbɛlɛ, nɛ nɛ dɛ zĩ we dɛ mbulanɔ onganga levitɛnɔ wa e sɛ hã nɛ ni. Mɛ a mbulanɔ kɛ mi hã ma hã wa ni.

⁹ Tɛ nɛ tɛ èlè ngɔ mɛ NWA Gale 'da nɛ dɛa zi do Miriamɛ, 'da fala nɛ yula zi Ezipeto i tɛ si nɛ ni gɔ.

¹⁰ “Fala kɛ nya mɔ ba ku'da kɔ mɔ, nɛ mɔ tɛ lè kɔ tɔa 'da a, we ba mɔ do tikɔɛ nɛ gɔ.

¹¹ Mɔ 'bana sɛ dɛ nza nga, nɛ a hɔ do mɛ kɛ a kɔ̃a we e do tikɔɛ ku'da ni hã mɔ do tɛ̃ a.

¹² Fala kɛ ma ɔ do wi sã, kɔ a e gã tuli 'da a do tikɔɛ kɔ mɔ, nɛ ma tɛ ɔ̃ ngɔ dɛ 'da mɔ i gɔ.

¹³ Mɔ gésé ma hã a do kpo gɛ̃a wese ni, takɔ a gu ngɔ a, sɛ a ɔa yala de. Nɛ a ĩ sɛ ti gbãlã wele dɛa mɛ 'da mɔ. Nɛ NWA Gale 'da mɔ, a dɛ sɛ yangga do mɔ.

¹⁴ “Da dɛ kɔ nɛ bá hi tɛ nɛ do 'da sã mɔ nya nɛ be Israɛlɛ, tabi gɛnɛ kɛ a ɔ kɔ mbe lenɔ ngɔ nùi 'da nɛ ni, hã nɛ zũ a, nɛ nɛ e a do wi dɛ to hã nɛ yala iko gɔ.

¹⁵ Tũ kpo kpo, dati kɛ na wese le nù ni, ma wia na, mɔ futa mbili hã a olo toe a dɛa ngba soe ni. Mba gɔ, a a wi sã, nɛ a do mɔ dɛ do mbili ni da dɔ̃ boe. Fala kɛ mɔ fùtà a gɔ, nɛ a he sɛ mɔ do zu li mɔ hã nwa, nɛ mɔ te sɛ kɔ 'dã mɔ.

¹⁶ “Ma wè na, wa gbɛ Owele benɔ olo 'dã mɔ kɛ benɔ 'da wa wa dɛa ni gɔ. Nɛ ma wè tɛ mɛ 'bɔ na, wa gbɛ be olo 'dã mɔ kɛ Owele a wa dɛa ni gɔ. Wa wia tɛ gbɛ wele tati nɛ olo 'dã mɔ kɛ a wele nɛ a dɛa ni.

¹⁷ “Da dɛ kɔ nɛ 'bílí 'dã gulu we do bɛlɛ hã gɛnɛ tabi be gula iko gɔ. Nɛ tɛ bà gã tulu mɔ́ wi fio wili do tikɔɛ gɔ.

¹⁸ Nɛ zi a ongbá tɛ ngɔ nù Ezipeto, nɛ NWA Gale 'da nɛ, a fua zi nɛ dɛ nza, dɔ tɛ nɛ élé ngɔ nɛ gɔ. We duzu ki ni, ma kɛ mi hã ombulanɔ gɛ hã nɛ ni.

Mbula ngɔ kala kpalɛ dɛ nza

¹⁹ “'Da fala kɛ nɛ kala sɛ kpalɛnɔ 'da nɛ dɛ nza ni, kɔ fala kɛ tɛ nɛ ele ngɔ mbe lã nɛ dɛ fɔ i, nɛ nɛ tɛ kpòlò tɛ nɛ we ba ma gɔ. Nɛ la sɛ ki ni hã ogɛnɛnɔ, do obe gulanɔ, do owi fio wilinɔ. Nɛ dɛ na mɛ ni, nɛ NWA Gale 'da nɛ, a wele sɛ nu a tɛ nɛ kɔ mɛnɔ vɛ̃ nɛ dɛ sɛ ni.

²⁰ Nɛ dɛ sɛ 'bɔ kpasaa na mɛ ni, 'da fala nɛ kala sɛ kuti wala olivɛnɔ 'da nɛ ni. Nɛ nɛ tɛ kpòlò tɛ nɛ we kala kɛnɔ tɛ nɛ ele ngɔ nɛ ni gɔ. Ki ni sɛ a mɔ́ ogɛnɛnɔ, do obe gulanɔ, do owi fio wilinɔ.

²¹ 'Da fala nɛ 'bi sɛ kuti wala vinɔnɔ 'da nɛ ni, nɛ nɛ tɛ kpòlò tɛ nɛ ngɔ nɛ fala bɔa gɔ. Owala kɛnɔ tɛ nɛ ele ngɔ nɛ ni, mɛ sɛ a kɛ 'da ogɛnɛnɔ, do obe gulanɔ, do owi fio wilinɔ.

²² Nɛ zi a ongbá tɛ ngɔ nù Ezipeto, da dɛ kɔ tɛ nɛ élé ngɔ nɛ fala kpo gɔ. We duzu ki ni, ma kɛ mi hã mbulanɔ gɛ hã nɛ ni.