Mbulanɔ 23 - WE NU GALE 1995

¹ “Da dɛ kɔ wele kpo ɔ̀ do mbe wukonɔ 'da baa a gɔ. We kɛ wele dɛ na mɛ ni, nɛ nde a 'danga dɔlɔ li 'da baa a.

Owinɔ kɛ wa wè tɛ mba do owinɔ 'da NWA gɔ

² “Wi wili kɛ kulu lo'do a u ua ni, tabi wi wili kɛ ga a 'bi 'bili ni, ma wè na, a mba do winɔ 'da nwa gɔ.

³ “Wele kɛ wa kua a do gele wuko ni, a lé sɛ kɔ mba li ngba wi 'da winɔ 'da nwa gɔ. Gɛnɛ kɔ wa ko, hã wa sanza fala 'bu, nɛ nde obe yaa a wa mbá sɛ do owinɔ 'da nwa gɔ.

⁴ “Oamoni do Omoabɛ, wa lé sɛ kɔ mba li ngba wi 'da owinɔ 'da NWA fala kpo gɔ. Gɛnɛ kɔ wa ko, hã wa sanza fala 'bu, nɛ nde obe yaa wa wa wé sɛ we le kɔ mba li ngba wi gɔ.

⁵ Mba gɔ, 'da fala nɛ hɔa zi nza ngɔ nù Ezipeto, nɛ nɛ zi a li wala gɛnɛ ni, nɛ owinɔ ni wa yɛlɛ zi ti nɛ do nyɔngɔmɔ do lì nɔ nɔa gɔ. Ĩ na, wa sa zi mɔ hã Balamɛ, wi zɔ gulu mɔ, kɛ a a be 'da Beɔrɛ tɛ kɔ le Pɛtɔrɛ, tɛ ngɔ kala Mezopotami ni na, a tɛ. Nɛ a tɛa, nɛ wa futa a na, a fɔmbɔ nɛ.

⁶ Nɛ nde NWA Gale 'da nɛ, a kɔ̃̀ zi we zele Balamɛ gɔ. Nɛ a kpula fɔmba ni do wila nu, we kɛ a kɔ̃a gɛnɛ nɛ.

⁷ Nɛ kɔ dungu nza 'da nɛ vɛ̃, da dɛ kɔ nɛ fá na, Oamoni do Omoabɛ wa kpa dia dungu do dia mɔ gɔ.

⁸ “Da dɛ kɔ nɛ zɔ́ Oedɔmɛ li nɛ yala iko gɔ, we kɛ wa a onya nɛ. Nɛ da dɛ kɔ nɛ zɔ́ 'bɔ Oezipeto li nɛ yala gɔ, we kɛ nɛ zi a ogɛnɛ tɛ ngɔ nùi 'da wa.

⁹ Nɛ obe yaa wa kɛ wa ɔa ngɔ nùi 'da nɛ, wa wia sɛ we le kɔ mba li ngba wi 'da nɛ owinɔ 'da NWA.

Mbula ngɔ fala ɔi

¹⁰ “'Da fala nɛ nɛ sɛ we bi owi sɛnɛ nɛ ni, nɛ nɛ 'dafa sɛ fala ɔi 'da nɛ ɔ dia. Nɛ nɛ zímí tɛ nɛ ngɔ mɛnɔ kɛ ma wia we dɛ na, nɛ hɔ wi ndi li Gale ni.

¹¹ Fala kɛ mbe soda kpo sanga nɛ, a hɔ wi ndi li Gale, we kɛ lì tɛ̃ a ma hɔa iko do tũ, kɔ fala sa, nɛ a hɔ sɛ nza fala ɔi do'do, nɛ a lé sɛ 'bɔ i mɔ do gba wese gɔ.

¹² Nɛ nde do gɛ̃a wese, nɛ a fɔlɔ sɛ tɛ̃ a we hɔ sa wi li Gale. Kɔ wese le nù, nɛ a kpolo sɛ 'bɔ tɛ̃ a dɛ fala ɔi i.

^13-14 “Nɛ 'dafa sɛ mbe fala we yu nza te'de, nɛ fala ni, ma nyɛlɛ sɛ do fala ɔi nyɛla. Nɛ nɛ yu sɛ nza do i mɔ. Soda kpo kpo sɛ do mɔ zã do nù sanga mɔ bi bolonɔ 'da a boe. 'Da fala a hɔ sɛ nza tɛ fala ɔi ni, nɛ a zã sɛ nùi, nɛ a yu nza dɛ kɔ nɛ. Nɛ 'do nɛ, nɛ a mi ma dɛ olo nɛ.

¹⁵ Ma wia na, fala ɔi 'da nɛ, ma ɔ sa li Gale, we kɛ NWA Gale 'da nɛ, a yɛnggɛ do fala ɔi 'da nɛ we fɔmɔ nɛ. Nɛ a dɛ na, nɛ nɛ ngɔ owi sɛnɛ nɛ. Ma kɛ ma wia na, fala ɔi 'da nɛ, ma ɔ sa na, da dɛ kɔ a zɔ́ mɔ sape i mɔ, kɔ a kifi 'do a hã nɛ gɔ.

Mbulanɔ kpi do kpi

¹⁶ “Fala kɛ ngbá a yu kɔ wele a, kɔ a hɔ dɛ 'da nɛ, nɛ nɛ tɛ gèsè a hã wele a gɔ.

¹⁷ Nɛ ba wala hã a na, a 'bana dɛ kɔ mbe le kɛ a saka ma kɔ olenɔ 'da nɛ ni. Nɛ da dɛ kɔ nɛ é a do wi dɛ to hã nɛ iko gɔ.

¹⁸ “Be Israɛlɛ kpo, wi wili tabi wuko tɛ dɛ̃ ndumba dɛ falanɔ wa dɔnggɔ do sɛa tenɔ ni gɔ.

¹⁹ Nɛ mbili wa kpa ma do wala dɛ ndumba ni, ma tɛ lè kɔ tɔa 'da NWA Gale 'da nɛ, we si olo mbulu gɔ. We kɛ NWA sɛnɛ 'dã mɔ ɔ nɛ mɛ ni wena.

²⁰ “Fala kɛ nɛ hã mɔ ɔ nɛ mbili, nyɔngɔmɔ, tabi gele mɔ do ku'da hã nya nɛ be Israɛlɛ, nɛ nɛ tɛ fà na, a gese ku'da ni hã nɛ do mbé mɔ ngɔ nɛ gɔ.

²¹ Fala kɛ ma ɔ do gɛnɛ, sɛ nɛ nɛ gɔ mbé mɔ ngɔ ku'da ni de. Nɛ tɛ gɔ̀ mɔ ngɔ ku'da kɛ nya nɛ ba kɔ nɛ ni gɔ. Nɛ dɛ́ mbula gɛ, nɛ NWA Gale 'da nɛ, a wele sɛ nu a tɛ nɛ kɔ mɛnɔ vɛ̃ kɛ nɛ dɛ sɛ tɛ ngɔ nùi nɛ nɛ ba ma ni.

²² “Fala kɛ nɛ kpo mbulu hã dɔnggamɔ hã NWA Gale 'da nɛ nde, nɛ ma wè na, nɛ da'bà tɛ nɛ we dɛ mbuli ni gɔ. Nɛ dɛ ni, nɛ NWA a aka sɛ nɛ we ma, nɛ nɛ te sɛ do ngbangga dati a.

²³ Wele kpò mbulu hã NWA gɔ, nɛ nde a dɛ̃ 'dã mɔ gɔ.

²⁴ Nɛ nde fala kɛ nɛ kpo mbulu do kɔ sila he iko, nɛ ma wia na, nɛ dɛ olo nu nɛ.

²⁵ “Fala kɛ nɛ la wala do kɔ fɔ vinɔ mɔ́ mbe gele wele nde, nɛ nɛ wia we nyɔngɔ sɛ wala nɛ ɔ nɛ kɛ nɛ kɔ̃a ni. Nɛ nde ma wè na, nɛ 'bi mbe wala nɛ dɛ kɔ yele si do ma gɔ.

²⁶ Fala kɛ nɛ la wala do kɔ fɔ ble mɔ́ mbe gele wele nde, nɛ nɛ wia we fa mbe gbãlã kpalɛ dɛ kɔ nɛ, nɛ nɛ nyɔngɔ ma. Nɛ ma wè na, nɛ sɛlɛ ma do za gɔ.