Mbulanɔ 22 - WE NU GALE 1995

Mbula ngɔ 'dafa fala mɔ mɔ́ ngba wi

¹ “Fala kɛ nɛ zɔ ngɔmbɔ, tabi bata tabi dua mɔ nya nɛ be Israɛlɛ, a tɛ yu wala, nɛ nɛ tɛ è a, kɔ a la gɔ. Nɛ bá a, nɛ nɛ gese a hã wele a.

² Nɛ nde fala kɛ wele a ɔ nyɛlɛ wena, tabi nɛ ĩ̀ ti wele a gɔ nde, nɛ nɛ ba sa'de ni si do a dɛ nu tɔa 'da nɛ. Kɔ 'da fala nɛ zɔ wele a tɛ fa a, nɛ nɛ gese a hã a.

³ Nɛ dɛ sɛ 'bɔ kpasaa na mɛ ni, 'da fala kɛ nɛ kpa punda, du tulu, tabi mbe mɔ kɛ ma tia kɔ̃ nya nɛ be Israɛlɛ ni. Nɛ wè tɛ la ma iko gɔ.

⁴ “Fala kɛ nɛ zɔ punda, tabi ngɔmbɔ mɔ nya nɛ be Israɛlɛ, nɛ nde a tia nù dɛ li wala, nɛ nɛ tɛ là a gɔ. Nɛ gbáká wele sa'de ni we 'be a dɛ ngɔ.

Ombulanɔ kpi do kpi

⁵ “Wuko wè tɛ he'de tulu mɔ wi wili gɔ. Nɛ wi wili wè tɛ mɛ 'bɔ tɛ he'de tulu mɔ wuko gɔ. NWA Gale 'da nɛ, a sɛnɛ owinɔ kɛ wa dɛ mɔ tɛ wa na mɛ ni wena.

⁶ “Fala kɛ nɛ kpa tɔa nɔɛ dɛ nù, tabi do ngɔ te, kɔ nɛ zɔ na, naa nɔɛ ɔa ngɔ kuli dɛ kɔ nɛ, tabi a 'bɛ̃lɛ̃ obe, nɛ ma wè na, nɛ ba a gɔ.

⁷ Nɛ wia sɛ we e naa nɔɛ ni, nɛ a yu, nɛ nɛ kala tati a obe nɔɛnɔ olo a ni. Nɛ dɛ na mɛ ni, nɛ nɛ kpa sɛ dia mɔ wena, nɛ nɛ dungu sɛ nza 'do nɛ nyɛlɛ.

⁸ “Fala kɛ nɛ dɛ mbé tɔa, kɔ nɛ dɛ fala dungi do zu tɔa i, nɛ nɛ dɛ sɛ be ngbo dɛ tɛ nɛ. Nɛ dɛ sɛ na mɛ ni na, da dɛ kɔ wele te nù, hã a fe, kɔ wa é we zu nɛ gɔ.

⁹ “Nɛ tɛ mì gele kpalɛ tɛ kɔ fɔ vinɔnɔ 'da nɛ gɔ. Nɛ dɛ na mɛ ni, nɛ nɛ 'bé sɛ tɛ wala te, tabi kpalɛ kpo li fɔɛ ni gɔ, nɛ e sɛ ma vɛ̃ hã Gale.

¹⁰ Nɛ tɛ kpo ngɔmbɔ do punda dɛ tɛ ngbɛ na, wa dɛ to fala nɛ kpo gɔ.

¹¹ “Nɛ tɛ hè'dè tulu kɛ wa dɛa ma do sala bata mba do tukia kpo ni gɔ.

¹² “Nɛ singbi sɛ nu tulunɔ kɛ nɛ gu ngɔ nɛ ni vɛ̃ singbi.

Mbula ngɔ ba ngba wi

¹³ “Mbe gɔ, nɛ wi wili ba wuko, nɛ 'do nɛ, nɛ a kɔ̃̀ 'bɔ gɛnɛ wuke ni gɔ.

¹⁴ Nɛ a ma ngɔ nda sako li a na ɛ nɛa zi we ba a, nɛ nde a ĩ ti wili dati ĩ.

¹⁵ Fala kɛ ma hɔ na mɛ ni, nɛ Owele wuke ni, wa ba sɛ gã tuli kɛ be zɔnga ni do wili a wa ɔa zi do ngba wa dɛ ngɔ nɛ do kuti nɛ ni, nɛ wa nɛ do ma dati okpasa winɔ kɔ le ni. Nɛ wa be tɔkɛ tɛ tuli ni hã okpasa winɔ, nɛ ma be na, wi wili ni a ɔa zi do a dati.

¹⁶ Wa hɔ i mɔ, nɛ baa wuke a tɔ̃ sɛ hã okpasa winɔ na: ‘Mi ba zi be 'da mi do wuko hã wi wili gɛ. Kɔ ngangga ni, a kɔ̃̀ 'bɔ mbé gɛnɛ a gɔ.

¹⁷ A nda sako li a na, ɛ nɛa zi we ba a, nɛ nde a ɔa do gele wili dati ɔa. Nɛ nde kɛ gɛ mɛ a mɔ kɛ ma be na, be 'da mi a ĩ̀ zi ti wili dati a kɛ na, a ba wili ni gɔ. Nɛ zɔ̀ tɔkɛ tɛ tuli kɛ wa ɔa zi do ngba wa dɛ ngɔ nɛ do kuti nɛ ni, ma kɛ.’

¹⁸ A tɔ̃ ni do'do, nɛ okpasa winɔ kɔ le ni, wa ba sɛ wi wili, nɛ wa zɛ a.

¹⁹ Nɛ dɛ ngɔ etumbui ni, a futa sɛ 'bɔ mbili fɛ̃a mɔ bolo kama kpo hã baa wuke. A futa sɛ ma we duzu 'dã we a yɛ'bɛ do zu li be zɔnga be Israɛlɛ ni. Nɛ 'do nɛ, nɛ wuke ni a 'bana sɛ do kɛnɛ a. Nɛ kɔ dungu nza 'da a vɛ̃, a wé sɛ we bɛ̃ wuke ni gɔ.

²⁰ “Nɛ nde mbe gɔ, nɛ mɛ a gbãlã we na, mɔ kɛ ma be na, wuke ni ĩ̀ zi ti wi wili dati gɔ ni bina.

²¹ Ma ɔ ni, nɛ wa ba sɛ wuke ni, nɛ wa nɛ do a dɛ kpongbo nu tɔa 'da baa a. Nɛ owi wilinɔ kɔ le ni, wa lo sɛ a do ta, nɛ wa gbɛ a. Mba gɔ, a dɛa mɔ sape sanga owinɔ 'da lɛ. A ĩ ti wili dati a kɛ na, a ba wili ni. Nɛ dɛ na mɛ ni, nɛ nɛ fo sɛ 'dã mɔ sanga nɛ, obe Israɛlɛ do'do.

²² “Fala kɛ wa mbala wele tɛ ɔ do ko mɔ wili, nɛ wa gbɛ sɛ wi dɛ 'dã mɛnɔ ni bɔa nɛ. Nɛ dɛ sɛ na mɛ ni na, nɛ fo 'dã mɔ sanga nɛ, obe Israɛlɛ do'do.

²³ “Mbe gɔ, nɛ wi wili kpa ngba a do be zɔnga kɛ a kɔ̃a wili ia, nɛ a wɛlɛ a, nɛ a ɔ do a. Nɛ nde ma dɛa tɛ̃ ɛ dɛ kɔ le.

²⁴ Ma dɛ na mɛ ni, nɛ nɛ kala sɛ wa bɔa nɛ, nɛ nɛ hɔ do wa kɔ le dɛ nza. Nɛ nɛ lo wa do ta, nɛ nɛ gbɛ wa. Be zɔnga ni wia do fio, mba gɔ, a a dɛ kɔ le, nɛ nde a hè mɔ na wa gala ɛ gɔ. Nɛ wi wili ni wia tɛ mɛ 'bɔ do fio, we kɛ a ɔa do wuko kɛ a kɔa wili ia ni. Nɛ dɛ na mɛ ni, nɛ nɛ fo sɛ 'dã mɔ sanga nɛ do'do.

²⁵ “Nɛ nde mbe gɔ, nɛ wi wili kpa be zɔnga kɛ a kɔ̃a wili ni do zamɔ, nɛ a wɛlɛ a. Na mɛ ni, nɛ wa gbɛ sɛ tati a wi wili ni iko.

²⁶ Nɛ nɛ dɛ́ sɛ mɔ do be zɔnga ni gɔ. We kɛ a dɛ̃ 'dã mɔ kɛ ma wia do fio ni gɔ. (Mbula ni ma 'bɔ kpasaa we wi kɛ a bi ngba a, nɛ a gbɛ a ni.)

²⁷ Wi wili ni, a wɛlɛ be zɔnga kɛ a kɔ̃a wili ni do zamɔ i. Nɛ gɛnɛ kɔ a he sɔ mɔ, nɛ nde fo sɔ wi gala a bina.

²⁸ “Mbe gɔ, nɛ wi wili kpa be zɔnga kɛ a kɔ wili gɔ ni, nɛ a wɛlɛ a, nɛ a ɔ do a, nɛ wele kpa wa.

²⁹ Ma ɔ na mɛ ni, nɛ wi wili ni, a hã sɛ mbili 'bu nɛ mɔlɔ hã baa be zɔnga ni. Nɛ ma gɔa na, wi wili ni ba be zɔnga ni do wuke 'da a, we kɛ a wɛlɛ a, nɛ a ɔ do a. Nɛ kɔ dungu nza 'da a vɛ̃, a wé sɛ we bɛ̃ wuke ni gɔ.