Mbulanɔ 21 - WE NU GALE 1995

Mbula ngɔ wɔlɔ wi kɛ wa gbɛa a do usu nɛ

¹ “Mbe gɔ, nɛ wa gbɛ wele do usu nɛ, nɛ nɛ kpa wɔlɔ a dɛ kɔ fɔ, tɛ ngɔ nùi kɛ NWA Gale 'da nɛ, a nɛ hã sɛ ma hã nɛ ni. Nɛ nde nɛ ĩ̀ ti wi gbɛ a gɔ.

² Fala kɛ ma ɔ na mɛ ni, nɛ okpasa winɔ do owi 'bili wenɔ 'da nɛ, wa nɛ sɛ tɛ fala ni. Nɛ wa we 'da du li wala, yolo do fala nɛ kpa do wɔlɛ ni, we hɔ tɛ lenɔ kpo kpo kɛ zã nɛ ni.

³ Wa dɛ sɛ na mɛ ni, we ĩ ti le kɛ ma kɔla dɔ̃ɔ do fala wa kpa do wɔlɛ ni. Wa kpa le ni, nɛ okpasa winɔ kɔ nɛ ni, wa ba sɛ be zɔnga ngɔmbɔ, kɛ wa tɛ è a li dɛa to gɔ ni.

⁴ Nɛ wa tɛ do a dɛ nu fua lì kɛ ma ɔ̃́sɔ̃́ fala kpo gɔ, nɛ wa mì 'bɔ kuti kpalɛ nu kolo nɛ gɔ ni. Nɛ wa gbini sɛ gɛlɛ ngɔmbɛ dɛ di ni.

⁵ Nɛ ma wia na, onganga levitɛnɔ wa ɔ boe. Wa a owi kɛ Gale saka wa na, wa dɛ to hɛ̃ ɛ, nɛ wa wele nu wa tɛ Owele do zu li ɛ. We kɛ wa a wa wia we 'dafa we mɔ̃lã, do we e dani tɛ ngba wi.

⁶ 'Do nɛ, nɛ okpasa winɔ vɛ̃ kɔ le kɛ ma kɔla do fala wa kpa do wɔlɛ ni, wa fɔlɔ sɛ kɔ̃ wa dɛ ngɔ ngɔmbɛ kɛ wa gbini gɛlɛ a ni.

⁷ Nɛ wa tɔ̃ sɛ na: ‘Lɛ a lɛ gbɛ wi gɛ gɔ, nɛ lɛ ĩ̀ 'bɔ ti wi dɛa mɛ gɛ gɔ.

⁸ Aa nwa, mɔ fò ku'da 'dã mɛ gɛ zu lɛ owinɔ 'da mɔ, obe Israɛlɛ, kɛ mɔ fua zi lɛ kɔ ngbá ngɔ nù Ezipeto ni. Mɔ fó ku'da 'dã mɛ zu lɛ, nɛ gulu fie 'da a ma tɛ zɔ́ lɛ gɔ.’

⁹ Na mɛ ni, nɛ dɛ́ mɔ kɛ ma dia tɛ NWA 'da nɛ ni, nɛ gulu fie 'da wi wa gbɛa a iko ni, ma zɔ sɛ nɛ gɔ.

Mbula ngɔ wuko kɛ wa ba a li bolo

¹⁰ “Mbe ngba soe kpo, hã nɛ bi owi sɛnɛ nɛ, nɛ NWA Gale 'da nɛ a dɛ na, nɛ nɛ ngɔ wa, nɛ nɛ kala sɛ mbe winɔ si do wa.

¹¹ Nɛ mbe gɔ, nɛ wele kpo sanga nɛ, a zɔ sɛ wuko kɔ winɔ ni, kɛ a dia zɔnga li a wena, nɛ a kɔ̃ we ba a do wuko 'da a.

¹² Ma ɔ na mɛ ni, nɛ a we sɛ we ba wuke ni si do a. Nɛ wuke ni a kɛ́lɛ́ zu a, nɛ a 'bílí ɛ̃lɛ̃ kɔ a,

¹³ nɛ a kpóló tulu tɛ̃ a, we dungu gɛla baa a do naa a. A dungu sɛ gɛla ni 'do zɛkɛ kpo. Nɛ 'do nɛ, nɛ wi ni we sɛ we ba a do wuke 'da a.

¹⁴ Kɔ fala kɛ do 'do, kɔ wi ni kɔ̃́ 'bɔ gɛnɛ wuke ni gɔ, nɛ a e sɛ a na, a si. Nɛ ma wè na, a be gole wuke ni na, a hɔ ngbá mɔ́ gele wele gɔ. We kɛ a ba zi a do nga nɛ na, a hɔ wuke 'da a.

Mbula ngɔ mɔ kɛ kuti be kpa ma

¹⁵ “Mbe gɔ, nɛ wi wili kala owuko bɔa. Nɛ ma dɛ na, a kɔ̃ gɛnɛ mbee nɛ nɛ ngɔ ngba a. Nɛ wa do bɔa nɛ, wa ko obulu be hã a. Nɛ nde kuti be, a a be 'da wuko kɛ wi ni kɔ̃̀ gɛnɛ a ngboo gɔ ni.

¹⁶ Nɛ 'da fala wi ni lengge we kɛ̃ mɛnɔ 'da a dɛ sanga obenɔ 'da a, nɛ ma wè na, a hã omɛnɔ kɛ ma sɔ we kuti be ni, hã be hɔ dɛ 'do a, be 'da wuko kɛ a kɔa gɛnɛ a wena ni gɔ.

¹⁷ Ma wia na, a hã mɛnɔ hã kuti be nɛ ngɔ kɛ 'da onya a fala bɔa. Gɛnɛ kɔ a a be 'da wuke kɛ a kɔ̃̀ gɛnɛ a gɔɛ ni, nɛ ma wia na, a dɛ na mɛ ni. Mba gɔ, a a kuti be 'da a. Nɛ ma wia na, a hã mɛnɔ hã a ɔ nɛ kɛ ma wia ni.

Mbula ngɔ be zagbãlã kɛ a zélé nu wele a gɔ

¹⁸ “Mbe gɔ, nɛ mbe wele do be zagbãlã be 'da a, nɛ zu a nganda wena. Nɛ gɛnɛ kɔ wa hã etumbu hã a, nɛ nde a kɔ̃̀ we zele Owele a gɔ.

¹⁹ Ma ɔ na mɛ ni, nɛ Owele a wa ba a, nɛ wa nɛ do a dati okpasa winɔ kɔ le 'da wa ni na, wa 'bili we 'da a.

²⁰ Wa hɔ i mɔ, nɛ wa tɔ̃ sɛ hã okpasa winɔ na: ‘Be 'da lɛ gɛ, zu a nganda wena, nɛ a kɔ̃̀ we zele lɛ gɔ. A yɛnggɛ vĩ zu yali, nɛ a nɔ dɔ̃ wena.’

²¹ 'Do nɛ, nɛ owinɔ kɔ le ni, wa lo sɛ a do ta, nɛ wa gbɛ a. Nɛ dɛ na mɛ ni, nɛ nɛ fo sɛ 'dã mɔ sanga nɛ do'do. Nɛ obe Israɛlɛ vɛ̃, wa zele sɛ we nɛ, nɛ kili ba wa.

Mbula ngɔ wi kɛ wa gãlã a nu te, nɛ wa gbɛ a

²² “Fala kɛ wa gãlã wi dɛ 'dã mɔ nu te, kɔ wa gbɛ a,

²³ nɛ ma wè na, wɔlɛ ni ɔ dɛ nu te ni gbaa tũ gɔ. Ma wia na, nɛ mi ma do ngba soe ni. We kɛ le kɛ owi kɔ nɛ wa gãlã wɔlɔ wele nu te gbaa we hɔ tũ ni, nɛ NWA fɔmbɔ ma fɔmba. Nɛ mí wɔlɔ wi ni. Na mɛ ni, nɛ nɛ fáká sɛ le kɛ NWA Gale 'da nɛ, a nɛ hã ma hã nɛ ni gɔ.