Mbulanɔ 2 - WE NU GALE 1995

¹ “Nɛ 'do nɛ, nɛ lɛ kpula tɛ lɛ, nɛ lɛ la do li gba zɔ̃ɛ si li wala gba lì Sala Tɔ̃, ɔ nɛ kɛ NWA ba zi do nu a hã lɛ ni. Nɛ lɛ ɔa tũ dɛlɛ wena, tati a tɛ zĩ do kɛ zã kalanɔ tɛ Seirɛ ni.

Obe Israɛlɛ wa la do ngɔ nù Edɔmɛ, Moabɛ do Amoni

² “Nɛ mbe tũ kpo, nɛ NWA tɔ̃a zi hã mi na,

³ lɛ ɔa tũ dɛlɛ wena tɛ zĩ do kɛ zã kalanɔ gɛ. Kɔ ngangga ni, lɛ bá si gbãlã ngɔ.

⁴ Nɛ a tɔ̃a zi hã mi na, mi e mbulanɔ gɛ hã nɛ na: ‘Nɛ nɛ la di ni do ngɔ nù Seirɛ, nù kɛ onya nɛ, obe zã Ezau, wa ɔ tɛ nɛ ni, nɛ wa dɛ sɛ kili nɛ.

⁵ Nɛ nde da dɛ kɔ nɛ bí wa gɔ, we kɛ mi hã́ sɛ mɔ kpo ngɔ nùi 'da wa hã nɛ gɔ, gɛnɛ kɔ be fala e nyanga wi, nɛ nde mi hã sɛ hã nɛ di ni gɔ. Mba gɔ, mi hã zi nùi ngɔ kalanɔ tɛ Seirɛ hã Ezau do obe zã a.

⁶ Nyɔngɔmɛnɔ do lì kɛ nɛ kpa sɛ ma di ni ni, nɛ oso sɛ ma usa.’ ”

⁷ Nɛ Mɔizɛ tɔ̃ 'bɔ na: “Tɛ nɛ tɛ èlè ngɔ kɛ NWA Gale 'da nɛ wila zi nu a tɛ mɛnɔ vɛ̃ nɛ dɛa ni gɔ. A zɔa mɔ tɛ nɛ li wala gɛnɛ 'da nɛ tɛ li gba zɔ̃ɛ gɛ. A zi fala nɛ kpo do nɛ gbaa 'do 'bu sabɛlɛ nalɛ, nɛ nɛ zɔ̀lɔ̀ mɔ kpo gɔ.

⁸ “Nɛ lɛ là zi do wala Seirɛ, fala obe zã nya lɛ Ezau, wa ɔ tɛ nɛ ni gɔ. Lɛ là zi 'bɔ do wala le Elatɛ, do Ɛsioni-Gebɛrɛ we la dɛ wala Ndɔ Fio gɔ. Nɛ lɛ kpula wala we la do li gba zɔ̃ Moabɛ.

⁹ NWA nɛa zi we zɔ ni, nɛ a tɔ̃ hã mi na: ‘Nɛ tɛ tùlù Omoabɛ kɛ wa a obe zã Lɔtɛ ni gɔ, nɛ nɛ tɛ bì 'bɔ bolo do wa gɔ, we kɛ mi hã́ sɛ mɔ kpo ngɔ nùi 'da wa hã nɛ gɔ. Mba gɔ, mi hã nù Arɛ hã wa do mɔ́ wa.’ ”

¹⁰ (Owinɔ wa ɔ zi dati ngɔ nù Arɛ a Oemi. Mɛ a Owele kɛ wa dɔ zi wena, nɛ wa nganda 'bɔ wena. Wa dulu zi ɔ nɛ obe zã Anakɛ ni.

¹¹ Ɔ nɛ kɛ wa wia zi kɔ̃ do obe zã Anakɛ ni, nɛ ombe winɔ wa zɔ zi wa ɔ nɛ Orɛfa ni. Nɛ nde Omoabɛ wa sa zi li wa na, Oemi.

¹² Nɛ owinɔ wa ɔ zi ngɔ nù Seirɛ a Ohori. Obe zã Ezau wa kpa zi wa di ni, nɛ wa ndaka wa, nɛ wa gbɛ wa, nɛ wa ba fala olo wa. Obe Israɛlɛ wa dɛa zi 'bɔ kpasaa na mɛ ni, we ba nùi kɛ NWA hã ma hã wa ni.)

¹³ “'Do nɛ, nɛ NWA ba zi nu a na, lɛ kũ lì Zerɛdɛ. Nɛ lɛ kũ, ɔ nɛ kɛ a tɔ̃a hã lɛ ni.

¹⁴ Ki ni, nɛ nde 'do kɛ lɛ kulu zi ngɔ Kadɛsɛ-Barnea ni, ma la 'bu sabɛlɛ talɛ ngɔ nɛ ngbɛ'dɛ'dɛ. Do 'da fala ni, nɛ nde owinɔ kɛ wa wia zi sabɛlɛ bi bolo ni, wa fia vɛ̃, ɔ nɛ kɛ nwa tɔ̃a zi ni.

¹⁵ NWA do tɛ̃ a hã a dɛa zi ni na, wa vɛ̃ wa kumu, nɛ wele kpo tɛ 'bànà nza gɔ

¹⁶ 'Do kɛ wa vɛ̃ wa fia ni,

¹⁷ nɛ nwa tɔ̃a zi hã lɛ na:

¹⁸ ‘Di ngangga ni, nɛ nɛ le li ngbala nù Moabɛ, we la do ngɔ nù Arɛ.

¹⁹ Nɛ kɔlɔ sɛ dɔ̃ɔ do nùi 'da Oamoni. Nɛ nɛ tɛ tùlù wa gɔ, we kɛ mi hã́ sɛ mɔ kpo ngɔ nùi 'da wa bã nɛ gɔ. Mba gɔ, wa tɛ mɛ 'bɔ a obe zã Lɔtɛ, nɛ mi hã zi nùi ni hã wa do mɔ́ wa.’ ”

²⁰ (Wa lengge zi na, wele nùi ni a mɔ́ Orɛfa. Mba gɔ, wa a wa ɔ zɛ́ di ni dati, nɛ Oamoni wa sa zɛ́ li wa na, Ozamzumi.

²¹ Mɛ zi a Owele wa dɔ wena, nɛ wa nganda wena. Wa dulu zi ɔ nɛ obe zã Anakɛ ni. Nɛ nde Oamoni wa nɛa we hɔ di ni, nɛ nwa kumu Ozamzumi, nɛ Oamoni wa ba fala olo wa ni, nɛ wa 'bana dɛ di ni.

²² NWA dɛa zi 'bɔ kpasaa na mɛ ni we Oedɔmɛ, obe zã Ezau, kɛ wa ɔ zi ngɔ nù Seirɛ ni. Oedɔmɛ wa nɛa we hɔ di ni, nɛ NWA kumu Ohori, nɛ Oedɔmɛ wa ba fala olo wa ni, nɛ wa 'bana dɛ di ni tia do sɔɛ gɛ.

²³ Nɛ Oavi, wa ɔ zi ngɔ nùnɔ nu kolo gba lì Meditɛrane. Nɛ Owele wa yula tɛ ngolo lì Krɛtɛ, nɛ wa ndaka Oavi, nɛ wa ba nùi olo wa ni, gbaa we hɔ tɛ Gaza.)

²⁴ “'Do kɛ lɛ la do ngɔ nù Moabɛ ni, nɛ NWA tɔ̃a zi hã lɛ na: ‘Ngangga ni, nɛ kúlú ngɔ hã nɛ kũ lì Arnoni. Mi ia Sihoni, nwa 'da Oamori, kɛ a ɔ tɛ Hɛsɛboni ni do nùi 'da a vɛ̃ ti mbula 'da nɛ. Nɛ bí a, nɛ nɛ ndo ba nùi 'da a.

²⁵ Yolo sɔɛ gɛ, mi nɛ dɛ na, onu kɔnggɔ winɔ ngɔ nù gɛ, wa dɛ kili nɛ wena. Fala kɛ wa zele sakoe 'da nɛ, nɛ wa tana sɛ kili do ti.’

Obe Israɛlɛ wa nɛa ngɔ nwa Sihoni li bolo

²⁶ “'Da fala kɛ lɛ zi a tɛ li gba zɔ̃ Kɛdemɔtɛ ni, nɛ mi tumba zi Owele do lɛnggɛ dɛa na hã nwa Sihoni tɛ Hɛsɛboni i na:

²⁷ ‘Mɔ kɔ̃, nɛ mɔ hã wala hã lɛ, kɔ lɛ la do ngɔ nùi 'da mɔ. Lɛ là sɛ do li gba wala iko.

²⁸ Lɛ ɔ do wɔ lì tabi wɔ nyɔngɔmɔ nde, nɛ lɛ oso sɛ ma kɔ̃ mɔ usa. Lɛ kɔ̃a tati a we la do ngɔ nùi 'da mɔ iko.

²⁹ Lɛ la sɛ do di ni gbaa na, lɛ kũ lì Yɔrdanɛ dɛ ngɔ nùi kɛ NWA Gale 'da lɛ hã ma hã lɛ ni. Obe zã Ezau, kɛ wa ɔ ngɔ nù Edɔmɛ, do Omoabɛ, kɛ wa ɔ ngɔ nù Arɛ, wa hã zi wala hã lɛ na mɛ ni, nɛ lɛ la do ngɔ nùi 'da wa.’

³⁰ “Nɛ nde nwa Sihoni bɛ̃a zi na, lɛ tɛ là do ngɔ nùi 'da a gɔ. Mba gɔ, NWA Gale 'da nɛ, a nganda zi sila a, takɔ a e a dɛ kɔ̃ lɛ, sɛ a lɛ ba nùi 'da a de. Mɛ a nùi kɛ lɛ ngɔ ma sɔɛ gɛ.

³¹ 'Do nɛ, nɛ NWA Gale tɔ̃a zi hã mi na: ‘Mi ia nwa Sihoni do nùi 'da a dɛ kɔ̃ nɛ. Nɛ bi a, nɛ nɛ ndo ba nùi 'da a.’

³² Nɛ nwa Sihoni ngbula zi li osodanɔ 'da a vɛ̃, nɛ a hɔ nza, nɛ a kpa ngba a do lɛ dɔ̃ɔ do le Yahasi, nɛ a bi lɛ.

³³ Nɛ nde NWA Gale 'da lɛ ia zi a dɛ kɔ̃ lɛ, nɛ lɛ gbɛa a do obenɔ do osodanɔ 'da a vɛ̃.

³⁴ “Ma kɛ do 'da fala ni, lɛ ba lenɔ 'da a vɛ̃, nɛ lɛ 'danga ma. Nɛ lɛ gbɛa 'bɔ owi wilinɔ do owukonɔ do obenɔ vɛ̃. Lɛ là zi wele kpo do tunu li a gɔ.

³⁵ Nɛ nde lɛ la zi tati a onadalamɛnɔ do odia mɛnɔ kɛ lɛ kala ma li bole kɔ lenɔ ni.

³⁶ NWA Gale 'da lɛ dɛa zi na, lɛ ba olenɔ vɛ̃ yolo tɛ Arɔɛrɛ, kɛ ma do nu kolo lì Arnoni, do le kɛ ma do go'do gbangɔlɔ̃ gbaa we hɔ Galadɛ. Nɛ nde le kpo kɛ ma nɛa zi ngɔ lɛ do ngawi ni bina.

³⁷ Nɛ lɛ kɔlɔ zi do nùi 'da Oamoni, tabi nu kolo lì Yabɔkɛ gɔ. Nɛ olenɔ ngɔ kalanɔ, tabi falanɔ vɛ̃ nwa ga lɛ na, lɛ tɛ hɔ̀ tɛ nɛ gɔ ni, lɛ kɔ̀lɔ̀ do ma gɔ.