Mbulanɔ 19 - WE NU GALE 1995

Lenɔ we usu tɛ wi kɔ nɛ

¹ “'Do kɛ NWA Gale 'da nɛ, a kumu sɛ owinɔ a nɛ ba nùi 'da wa hã nɛ ni, nɛ nɛ ba sɛ nùi 'da wa. Kɔ nɛ ba lenɔ do tɔanɔ 'da wa do'do,

^2-3 nɛ nɛ kɛ̃ sɛ sanga nùi ni talɛ. Nɛ kɔ 'bili tɛ nùnɔ ni kpo kpo, nɛ saka sɛ le usu tɛ wi kpo, kɛ wala hɔ tɛ nɛ nyɛ̀lɛ̀ gɔ ni. Hã fala kɛ wele gbɛ ngba a, nɛ nde a gbɛ a do mbana gɔ, nɛ a yu dɛ kɔ nɛ dɔ̃.

⁴ Fala kɛ wele gbɛ ngba a, nɛ nde a sɛnɛ a gɔ, nɛ a gbɛ a do mbana gɔ, nɛ a wia sɛ we usu tɛ̃ a kɔ mbe le kpo kɔ lenɔ ni.

⁵ Lɛ bá na, Owele bɔa wa nɛa zamɔ fala nɛ kpo we 'bili te. Hã fala kɛ mbe kpo ba kpɛnɛmɛ 'da a we gɔmɔ te, kɔ gbali nɛ hɔ li te nɛ, hã ma lo ngba a, kɔ a fe, nɛ wi gɔmɔ te ni wia we yu dɛ kɔ le usu tɛ wi na, da dɛ kɔ wa gbɛ́ a gɔ.

⁶ Fala kɛ le usu tɛ wi sɔ kpo iko, kɔ wala nɛ nyɛlɛ sɔ wena, kɔ wi bili nu gbã fie, ndaka sɔ 'do wi gbɛ wi do nɔ̃lɔ̃ zã, nɛ a kpa sɔ a, nɛ a gbɛ a. Ki ni ma wè gɔ, we kɛ wi ni gbɛ̀ ngba a do mbana gɔ, nɛ a sɛ̀nɛ̀ 'bɔ a gɔ.

⁷ Ma kɛ mi ba nu mi hã nɛ na, nɛ saka ole talɛ we usu tɛ nɛ kɔ nɛ.

^8-9 “Nɛ dɛ́ mbulanɔ vɛ̃ kɛ mi hã ma hã nɛ sɔɛ gɛ, nɛ nɛ kɔ̃ gɛnɛ NWA Gale 'da nɛ, nɛ nɛ dɛ mɛ kɛ a be hã nɛ ni. Nɛ dɛ ní, nɛ NWA a gã sɛ 'da nùi 'da nɛ, nɛ a hã sɛ nùi vɛ̃ kɛ a kpua zi mbulu nɛ hã oyaa nɛ ni hã nɛ. Na mɛ ni, nɛ nɛ saka sɛ 'bɔ mbé le talɛ we usu tɛ wi kɔ nɛ dɛ ngɔ kɛnɔ dati ni.

¹⁰ Nɛ dɛ sɛ na mɛ ni na, da dɛ kɔ wa gbɛ́ wi kɛ a gbɛ̀ ngba a do mbana gɔ ni gɔ. Nɛ dɛ̀ na mɛ ni gɔ, nɛ gulu fie 'da wi ni ma zɔ sɛ nɛ.

¹¹ “Kɔ fala kɛ wele sɛnɛ ngba a, hã a gbɛ a do mbana, hã a yu dɛ kɔ mbe le usu tɛ wi kpo,

¹² nɛ ma wia na, kpasa winɔ kɔ le 'da a ni, wa tombo 'do a. Nɛ wa ba a si do a hã wi bili nu gbã fie na, a gbɛ a.

¹³ Nɛ nɛ tɛ dɛ̀ 'bako hã a gɔ. Nɛ dɛ na mɛ ni, nɛ nɛ fo sɛ wi gbɛ wi do mbana sanga nɛ, obe Israɛlɛ do'do, nɛ nɛ kpa sɛ dia dungu.

Mbula ngɔ li ngbala nùnɔ

¹⁴ “'Da fala nɛ sɛ ngɔ nùi kɛ NWA Gale 'da nɛ hã ma hã nɛ ni, nɛ nɛ tɛ kpòlò ã li ngbala sanga tɛ ngba nɛ gɔ.

Mbula ngɔ otemɔɛnɔ

¹⁵ “Fala kɛ temɔɛ kpo iko tɔ̃ na, wele dɛa 'dã mɔ, nɛ wi gɔnɔ we 'bílí sɛ 'dã we hã wi ni gɔ. Nɛ nde fala kɛ otemɔɛ bɔa tabi talɛ wa tɔ̃ na, wele dɛa 'dã mɔ, nɛ wa wia we 'bili 'dã gulu we hã a.

¹⁶ Fala kɛ wele 'bili bɛlɛ dɛ zu ngba a na, a dɛa 'dã mɔ,

¹⁷ nɛ ma wia na, winɔ ni wa nɛ bɔa nɛ tɛ fala dɔnggɔ do Gale. Nɛ onganganɔ do owi 'bili wenɔ wa dɛ toe di ni, wa gɔnɔ sɛ we 'da wa.

¹⁸ Nɛ ma wia na, owi 'bili wenɔ ni, wa nɛ miã we ni ngboo. Kɔ fala kɛ wa kpa na, temɔɛ 'bili a bɛlɛ dɛ zu nya be Israɛlɛ iko nde,

¹⁹ nɛ ma wia na, a kpa etumbui kɛ ma wia sɔ na, wi kɛ a 'bili bɛlɛ dɛ zu a ni, a kpa sɔ ma ni. Nɛ dɛ na mɛ ni, nɛ nɛ fo sɛ 'dã mɔ sanga nɛ do'do.

²⁰ Nɛ ogele winɔ wa zele sɛ we mɛ ma la ni, nɛ wa dɛ kili. Nɛ wa wé sɛ we dɛ tɛlɛ tɛ 'dã mɛ ni gɔ.

²¹ Nɛ tɛ dɛ̀ 'bako hã wi dɛ 'dã mɔ gɔ. Ma wia na, wa si ku'da 'dã mɛ hã a ɔ nɛ kɛ gɛ: Fio olo fio, gbali wi olo gbali wi, gogo wi olo gogo wi, kɔ̃ wi olo kɔ̃ wi, nyanga wi olo nyanga wi.