Mbulanɔ 18 - WE NU GALE 1995

Mbulanɔ kɛ ma zɔa onganganɔ

¹ “Onganganɔ kɛ wa a nu kpala Levi ni, wa kpá sɛ 'bili tɛ nù mɔ́ wa ngɔ nù Israɛlɛ gɔ. Nɛ nde wa kpasa sɛ do dɔnggamɛnɔ do ogele mɛnɔ kɛ owinɔ wa tɛ do ma hã NWA ni.

² Wa kpá sɛ 'bili tɛ nù ɔ nɛ kɛ 'da ogele nu kpala obe Israɛlɛ ni gɔ. NWA sɛ a kpamɛ 'da wa, ɔ nɛ kɛ a kpua zi do mbulu nɛ ni.

³ “Ma kɛ 'da fala obe Israɛlɛ wa gbɛ sɛ ongɔmbɔ, do obata we dɔnggɔ do Gale ni, nɛ wa hã sɛ 'baka nɛ, 'bangga nɛ do gba tɔa zã nɛ hã onganganɔ.

⁴ Nɛ ma wia na, nɛ hã 'bɔ kuti kpalɛ li fɔnɔ 'da nɛ, ɔ nɛ ble, mbé dɔ́, nɔ, do kuti sala tɛ bata kɛ nɛ kɛlɛ sɛ ni hã wa.

⁵ Nɛ dɛ sɛ ní, we kɛ nwa saka nu kpala Levi kɔ tala gele nu kpala obe Israɛlɛ vɛ̃ na, wa dɛ to nganga hã ɛ fai.

⁶ “Fala kɛ mbe levitɛ kpo kɔ̃ we la fala a dungu nɛ ni, we nɛ dɛ fala Nwa saka na, wa dɔnggɔ do ɛ ni,

⁷ nɛ a wia we dɛ to nganga 'da a hã NWA Gale 'da a dɛ di ni, ɔ nɛ kɛ ogele levitɛnɔ wa dɛ ma ni.

⁸ A wia we kpa nyɔngɔmɔ we kɔ̃ do tala ogele nganganɔ ni. Nɛ a wia we 'bana do mɛnɔ kɛ onu fɛlɛ a wa tombo do a ni.

Gale yaka zala owi dɛ sɔ̃nɔ

⁹ “'Da fala nɛ le ngɔ nùi kɛ NWA Gale 'da nɛ, a hã ma hã nɛ ni, nɛ nɛ tɛ dɛ̀ gã 'dã mɛnɔ kɛ winɔ ngɔ nùi ni, wa dɛ ma ni gɔ.

¹⁰ Da dɛ kɔ wele kpo gbɛ́ be 'da a we dɔnggɔ do ogale gɔ. Nɛ wele kpo tɛ hɔ wi dɛ sɔ̃, tabi wi 'bɛnɛ mɔ, tabi wi fa gulu mɔ, tabi wi kɛ a tɔ̃ wenɔ ma hɔ sɛ 'do nza ni gɔ. Nɛ dɔ wele bá 'bɔ tunumɔ gɔ.

¹¹ Da dɛ kɔ wele kpo to zeke gɔ, nɛ a te wèlè we do obɔzɔ gɔ.

¹² NWA Gale 'da nɛ, a sɛnɛ owinɔ kɛ wa dɛ 'dã mɛnɔ ɔ na mɛ ni wena. We duzu ki ni, ma kɛ a ndaka sɛ owinɔ ngɔ nùi kɛ nɛ nɛ ba ma ni.

¹³ Nɛ ma wia na, nɛ ba sila nɛ vɛ̃ hã NWA Gale 'da nɛ.”

NWA kpua mbulu tombo wi gba olo nu a kpo

¹⁴ 'Do nɛ, nɛ Mɔizɛ na: “Tɛ ngɔ nùi kɛ nɛ kɔlɔ we ba ma ni, owinɔ di ni ni, wa nɛ 'do mbula nu owi sɔ̃nɔ, tabi owi 'bɛnɛ mɛnɔ. Nɛ nde NWA Gale 'da nɛ, a bɛ̃a na, nɛ tɛ dɛ̃ na mɛ ni gɔ.

¹⁵ Ma kɛ a tombo sɛ wi gba olo nu a ɔ nɛ mi gɛ hã nɛ. Wi ni sɛ a be le 'da nɛ ngboo, nɛ ma wia na, nɛ zele wenɔ kɛ a tɔ̃ sɛ hã nɛ ni.

¹⁶ Do ngba soe kɛ nɛ mba zi ngba nɛ tɛ nyanga kala Sinai ni, nɛ nɛ bɛ̃a zi we zele 'bɔ gɛlɛ NWA, tabi we zɔ nyɛa we 'da a, we kɛ nɛ dɛa zi kili na, lo fe sɛ.

¹⁷ Ma kɛ NWA tɔ̃a zi hã mi na: ‘Wa tɔ̃a gbãlã we.

¹⁸ Mi tombo sɛ wi gba olo nu mi ɔ nɛ mɔ gɛ hã wa. Nɛ a sɛ a be le 'da nɛ ngboo. Mi tɔ̃ sɛ we kɛ ma wia na a wele ni hã a, nɛ a tɔ̃ sɛ wenɔ vɛ̃ kɛ mi ba nu mi na, wa dɛ ni.

¹⁹ A wele sɛ we do zu li mi, nɛ mi hã sɛ etumbu hã owinɔ vɛ̃ kɛ wa bɛ̃ we zele nu a ni.

²⁰ Nɛ nde fala kɛ mbe wi gba olo nu mi a yamba wele we do zu li mi, nɛ nde mi a mi bà nu mi na, a dɛ ni gɔ, nɛ a fe sɛ we duzu ma. Ma sɛ 'bɔ na mɛ ni we wi kɛ a wele sɛ we do zu li gele galenɔ ni.’

²¹ “Mbe gɔ, nɛ nɛ aka sɛ tɛ nɛ na, lo nɛ ĩ̀ na lɛnggɛ nu wi gba olo nu Gale, ma yolo 'da Gale gɔ ni nɛ nde?

²² Fala kɛ wi gba olo nu Gale wele we do zu li NWA Gale, hã ma dɛ̀ tɛ̃ ɛ gɔ, nɛ nde we ni ma yòlò nu NWA gɔ. Nɛ lá ni ma be sɛ na, wi gba olo nu Gale ni, a dɛa wali, nɛ a tɔ̃a ma do tɛ̃ a wele nɛ iko. Nɛ ma wè na, nɛ dɛ kili a gɔ.