Mbulanɔ 17 - WE NU GALE 1995

¹ “Nɛ tɛ gbɛ̀ ngɔmbɔ, bata, tabi dua kɛ a do kunda tɛ̃ a ni, we dɔnggɔ do NWA Gale 'da nɛ gɔ. We kɛ NWA sɛnɛ ma wena.

^2-3 “Mbe gɔ, nɛ ngba soe kpo, nɛ nɛ zele na, kɔ mbe le kpo sanga olenɔ kɛ NWA Gale 'da nɛ, a hã ma hã nɛ ni, wi wili tabi wuko a dɛa 'dã mɔ dɛ 'da NWA, nɛ a 'danga gba tɔkɛ 'da a. Mba gɔ, a dɔnggɔ ogele galenɔ, nɛ a dɛ to hã wa. Tabi a dɔnggɔ 'bɔ wese, tabi zɛkɛ, tabi osɔlanɔ, kɛ mbula 'da NWA bɛ̃a ni.

⁴ Fala kɛ nɛ zele we na mɛ ni, nɛ nɛ nɛ́ miã we ni ngboo. Kɔ fala kɛ nɛ kpa na, 'dã mɔ ɔ ni ma dɛa tɛ̃ ɛ do gbãlã we ngɔ nù Israɛlɛ nde,

⁵ nɛ nɛ fó wi ni kɔ le dɛ nza, nɛ nɛ lo a do ta, nɛ nɛ gbɛ a.

⁶ Nɛ nde nɛ wia tɛ gbɛ wi ni, tati a do 'da fala kɛ otemɔɛ bɔa, tabi odɔa temɔɛ wa tɔ̃ na, a dɛa 'dã mɛ ni ni. Temɔɛ ɔ kpo iko, nɛ nɛ tɛ gbɛ a gɔ.

⁷ Otemɔɛnɔ ni wa sɛ a wi dati we lo wi dɛ 'dã mɛ ni do ta, sɛ nɛ tala winɔ wa lo a de. Nɛ dɛ sɛ na mɛ ni na, nɛ fo 'dã mɔ sanga nɛ do'do.

Tɛlɛ tɛ gɔnɔ wenɔ

⁸ “Mbe gɔ, nɛ owi 'bili wenɔ wa kpa sɛ we kɛ ma nganda wena ni na wa 'bili ma. Ɔ nɛ ngbangga 'da wi kɛ a ia dani tɛ ngba a, tabi kɛ 'da wi kɛ a gbɛa ngba a do mbana, tabi a gbɛ a do mbana gɔ ni. Ma ɔ na mɛ ni, nɛ nɛ nɛ sɛ tɛ fala kɛ nwa saka na, nɛ dɔnggɔ do ɛ ni.

⁹ Nɛ nɛ be gulu we 'da nɛ hã onganga levitɛnɔ do wi 'bili we kɛ a dɛ toe do 'da fala ni. Nɛ wa be sɛ tɛlɛ tɛ kɛ ma wia na, nɛ 'bili do we ni hã nɛ.

¹⁰ Wa gɔnɔ sɛ we ni, nɛ nɛ dɛ kpasaa ɔ nɛ kɛ wa tɔ̃a hã nɛ ni.

¹¹ Nɛ kɔ̃ sɛ gɛnɛ lɛnggɛnɔ 'da wa, nɛ nɛ dɛ sɛ mbulanɔ kpo kpo vɛ̃ kɛ wa tɔ̃ sɛ hã nɛ ni.

¹² Wi kɛ a dɛ sɛ wali na, ɛ dɛ́ mbula nu nganga kɛ a dɛ toe tɛ fala dɔnggɔ do nwa ni gɔ, tabi a bɛ̃ 'bɔ we dɛ mbula nu wi 'bili we, nɛ ma wia na, wa gbɛ a. Nɛ dɛ sɛ na mɛ ni na, nɛ fo 'dã mɔ sanga nɛ obe Israɛlɛ do'do.

¹³ Na mɛ ni, nɛ winɔ vɛ̃ wa zele sɛ we mɛ ma la ni, nɛ wa dɛ kili. Nɛ wele kpo yámbá sɛ we dɛ tɛlɛ tɛ wali ɔ na mɛ ni gɔ.

Ombulanɔ kɛ ma zɔa nwa

¹⁴ “Fala kɛ nɛ ba nùi kɛ NWA Gale 'da nɛ, a nɛ hã ma hã nɛ ni, hã nɛ dungu di ni, nɛ mbe gɔ, nɛ nɛ kɔ̃ sɛ na lo kpa nwa, ɔ nɛ kɛ 'da ogele nu kɔnggɔnɔ vɛ̃ kɛ zã nɛ ni.

¹⁵ Nɛ nɛ ĩ do gbãlã we na, wi kɛ nɛ nɛ saka sɛ a na a dungu nwa ni, a a wele kɛ NWA Gale saka a ni. Nɛ a sɛ a nya nɛ be Israɛlɛ ngboo. Nɛ wè do saka wele kɛ a a gɛnɛ iko ni na, a dungu nwa ngɔ nɛ gɔ.

¹⁶ Nɛ ma wè na, nwa ni a ɔ do gba gili ombalata gɔ. Nɛ ma wè 'bɔ na, a tombo Owele na, wa nɛ we oso ombalata tɛ ngɔ nù Ezipeto gɔ. We kɛ NWA Gale 'da nɛ tɔ̃a zi hã nɛ na, nɛ tɛ kpòlò sɛ 'bɔ tɛ nɛ mbé nɛ tɛ ngɔ nùi ni gɔ.

¹⁷ Nwa ni tɛ kàlà dɔa wuko gɔ, we kɛ a dɛ na mɛ ni, nɛ gili owukonɔ ni, wa dɛ sɛ na, a siki 'do a hã Gale. Nɛ ma wè 'bɔ na, a ngɛmɛ fɛ̃a mɔ bolo, tabi mɔ mbali dɔ wena gɔ.

¹⁸ “'Da fala a dungu sɛ nwa ni, nɛ wa zɔ sɛ mbulanɔ 'da Gale kɔ 'buku mbula kɛ onganga levitɛnɔ wa usu ma ni, nɛ wa kɔmɔ dɛ kɔ gele 'buku hã a.

¹⁹ Nɛ ma wia na, 'buki ni ma kɔlɔ do a, nɛ a tɔlɔ ma kɔ dungu nza 'da a vɛ̃. Na mɛ ni, nɛ a yambala sɛ we dɔnggɔ nwa, nɛ a dɛ sɛ mbulanɔ vɛ̃ kɛ wa kɔma kɔ 'buki ni do dia nɛ ngboo.

²⁰ Nɛ mbulanɔ ni ma gala sɛ a na, a tɛ lènggè na, ɛ nɛa ngɔ tala onya ɛ obe Israɛlɛ vɛ̃ gɔ. Ma gala sɛ 'bɔ a na, a tɛ là fala dɛ mbulanɔ 'da nwa be sĩ gɔ. Nɛ a dungu sɛ nwa 'do sabɛlɛ dɔ wena. Nɛ a do obe zã a, wa dungu sɛ nwa ngɔ nù Israɛlɛ kɔ sabɛlɛ do sabɛlɛ.