Mbulanɔ 16 - WE NU GALE 1995

Mbula ngɔ ɛngga Hɔ Nza kɔ Ngbá

¹ “Ma hɔ kɔ zɛkɛ 'da kpo, tabi zɛkɛ Abibɛ, nɛ tɛ nɛ tɛ èlè ngɔ dungu ɛngga Hɔ Nza kɔ Ngbá gɔ. Nɛ dungu ɛngga ni we dɔnggɔ NWA Gale 'da nɛ. Mba gɔ, a fua zi nɛ kɔ ngbá tɛ ngɔ nù Ezipeto i do kɔ zɛkɛ ni, do tũ.

² Nɛ gbɛ sɛ onadalamɛnɔ 'da nɛ we dungu do ɛngga ni. Mɛ sɛ a obata, odua, tabi ongɔmbɔ. Nɛ dɛ sɛ mɔ dɔɛ ni dɛ fala kɛ nwa saka ma na, wa dɔnggɔ do ɛ ni.

³ “'Da fala ɛngga ni, nɛ nɛ nyɔngɔ sɛ mapa, kɛ wa à ina hana mapa tɛ nɛ gɔ ni. Ki ni mɛ a mapa 'bako, nɛ nyɔngɔ sɛ ma 'do tũ sambo. Nɛ dɛ sɛ na mɛ ni, takɔ ma be tɛlɛ tɛ gbɛngɛ tɛ kɛ nɛ hɔa zi do nza ngɔ nù Ezipeto ni. Nɛ nyɔngɔ sɛ mapa 'bakoe ni, nɛ tɛ nɛ ma gba sɛ ngɔ kɔ̃ tũi nɛ hɔa zi nɛ nza ngɔ nù Ezipeto, nɛ nɛ kpa zi do ngamɛnɔ wena ni.

⁴ Kɔ̃ tũnɔ sambo ni, ma wè na, nɛ e ina kɛ ma hana mapa ni kɔ tɔanɔ 'da nɛ gɔ. Do kuti kɔ̃ tũi, nɛ sa'de kɛ nɛ dɔnggɔ sɛ do Gale do gɛ̃a wese ni, nɛ é sɛ tala nɛ ngɔ gɔ, nɛ nyɔngɔ sɛ ma vɛ̃.

⁵ “Nɛ dúngú sɛ ɛngga ni dɛ kɔ mbe lenɔ kɛ NWA Gale 'da nɛ hã wala na, nɛ ɔ kɔ nɛ ni iko gɔ.

⁶ Nɛ nde nɛ dungu sɛ ma dɛ kɔ le kɛ a saka sɛ ma na, wa dɔnggɔ ɛ kɔ nɛ ni. Nɛ nɛ gbɛ sɛ sa'de we dɔnggɔ do NWA do gɛ̃a wese, 'da fala wese ma ngɔ le nù ni. Ki ni, mɛ a 'da fala nɛ hɔa zi nɛ nza kɔ ngbá ngɔ nù Ezipeto ni.

⁷ Nɛ gi sɛ sa'de, nɛ nɛ nyɔngɔ dɛ fala NWA saka ni. Nɛ fala sa do titole, nɛ nɛ si dɛ nu tɔa 'da nɛ.

⁸ Nɛ nyɔngɔ sɛ mapa kɛ wa à ina hana mapa tɛ nɛ gɔ ni 'do tũ gazɛlɛ. Nɛ do tũi kɛ sambo, nɛ mba sɛ li ngba nɛ vɛ̃ we dɔnggɔ NWA Gale 'da nɛ. Nɛ nɛ dɛ́ sɛ gele dɛa to gɔ.

Mbula ngɔ ɛngga Kala Kpalɛ

⁹ “Nɛ tɔlɔ sɛ pɔsɔ sambo, yolo do 'da fala nɛ kala do kpalɛnɔ dɛ nza ni,

¹⁰ nɛ nɛ dúngú ɛngga Kala Kpalɛ, tabi ɛngga Pantɛkotɛ, we dɔnggɔ do NWA Gale 'da nɛ. Nɛ 'dafa sɛ odɔnggamɔ kɛ nɛ hã do kɔ sila nɛ, nɛ nɛ hã ma hã NWA, nɛ ma we do 'da dia mɔ kɛ a dɛa hã nɛ ni.

¹¹ Nɛ nɛ sɛ dɛ fala kɛ NWA a saka sɛ na, nɛ dɔnggɔ do ɛ ni, nɛ nɛ nyɔngɔ mɔ fala nɛ kpo. Nɛ nyɔngɔ sɛ mɛ ni, nɛ nɛ dɛ yangga fala nɛ kpo do obenɔ 'da nɛ, do owi tonɔ 'da nɛ, mba do olevitɛnɔ, ogɛnɛnɔ, obe gulanɔ, do owi fio wilinɔ kɛ wa ɔ kɔ nɛ ni.

¹² Nɛ dɛ́ mbulanɔ gɛ vɛ̃, nɛ ta zu nɛ tɛ èlè na, nɛ zi a ongbá tɛ ngɔ nù Ezipeto i ni gɔ.

Mbula ngɔ ɛngga Ɔ ti Da

¹³ “Fala kɛ nɛ zɛ kpalɛnɔ 'da nɛ, kɔ nɛ kpĩlĩ dɔ̃nɔ 'da nɛ, kɔ ma e, nɛ nɛ dungu sɛ ɛngga Ɔ ti Da 'do tũ sambo.

¹⁴ Nɛ nɛ nyɔngɔ sɛ mɔ, nɛ nɛ dɛ yangga. Nɛ nyɔngɔ sɛ mɛ ni fala nɛ kpo do obenɔ 'da nɛ, do owi tonɔ 'da nɛ, mba do olevitɛnɔ, ogɛnɛnɔ, obe gulanɔ, do owi fio wilinɔ kɛ wa ɔ kɔ nɛ ni.

¹⁵ Nɛ dungu sɛ ɛngga ni 'do tũ sambo we hã dɔ̃lɔ̃ li hã NWA Gale 'da nɛ. Nɛ nɛ dungu sɛ ma tɛ fala a saka na, wa dɔnggɔ do ɛ ni. Nɛ nɛ dɛ sɛ yangga wena, we kɛ do 'da fala ni, nɛ nwa a wele sɛ nu a tɛ kpalɛnɔ 'da nɛ, do tɛ dɛa tonɔ 'da nɛ vɛ̃.

¹⁶ “Sabɛlɛ kpo kpo, nɛ owi wilinɔ vɛ̃ sanga nɛ gɛ, wa yolo sɛ dati NWA Gale 'da nɛ fala talɛ, tɛ fala a saka na, wa dɔnggɔ do ɛ ni. Wa yolo sɛ ní do 'da fala ɛngga Hɔ Nza kɔ Ngbá, ɛngga Kala Kpalɛ, do ɛngga Ɔ ti Da. Nɛ wa nɛ sɛ tɛ fala dɔnggɔ do Gale, nɛ nde wa nɛ́ sɛ do wila kɔ̃ wa iko gɔ.

¹⁷ Wele do wele a nɛ sɛ do dɔnggamɔ kɛ a kpa ma, nɛ ma we do 'da kɛ NWA Gale 'da nɛ wila do nu a tɛ nɛ ni.

Mbula ngɔ bɔlɔ zu dɛa mɔ

¹⁸ “Nɛ saka sɛ owi 'bili we tɛ̃ ɛ do tɛ̃ ɛ kɔ lenɔ kpo kpo, kɛ NWA Gale 'da nɛ, a hã sɛ ma hã nɛ ni. Owinɔ ni wa 'bili sɛ wenɔ 'da owinɔ do bɔlɔ nɛ ngboo.

¹⁹ Nɛ ma wè na, wa gbɛ 'dã we hã owi dia gulu wenɔ do bɛlɛ gɔ. Wa tɛ zɔ̃ bula li wele, sɛ nɛ wa gɔnɔ dia we hã a de gɔ. Wele futa avoka hã wa na, wa 'bili dia gulu we hã ɛ, nɛ wa tɛ kɔ̃̀ gɛnɛ nɛ gɔ. We kɛ avoka ni, ma wia we lɔ li wi hã zã do wi bɔlɔ zu na, wa gɔnɔ ngbangga do 'dã nɛ.

²⁰ Nɛ dɛ́ nganda na, nɛ 'bili wenɔ do bɔlɔ nɛ ngboo. Nɛ dɛ na mɛ ni, nɛ nɛ kala sɛ nùnɔ kɛ NWA Gale 'da nɛ, a hã ma hã nɛ ni. Nɛ nɛ dungu sɛ ngɔ nùi ni, nɛ 'do nɛ nyɛlɛ.

²¹ “'Da fala nɛ dɛ sɛ gbagala we dɔnggɔ do NWA Gale 'da nɛ ni, nɛ nɛ é sɛ kpikima gale wuke kɛ li a a Asera ni kɛ zã nɛ gɔ.

²² Nɛ nɛ ti ndɛ̀ngɛ̀lɛ̀ 'bɔ ta we dɛ ma do kpikima na, nɛ dɔnggɔ ma gɔ, we kɛ NWA sɛnɛ mɛnɔ ni wena.