Mbulanɔ 15 - WE NU GALE 1995

Mbula ngɔ gese ku'da

¹ “'Do sabɛlɛ sambo, nɛ ma wia na, nɛ gbɛ ku'da dɛ zu owinɔ kɛ wa ba mbili kɔ̃ nɛ ni, nɛ nɛ dɛ sɛ ni 'da fala fai.

² Mɛ ma wia na nɛ dɛ ni, ma kɛ: Fala kɛ mbe nya nɛ be Israɛlɛ ba mbili kɔ nɛ, kɔ ma hɔ Sɔkpɔ sabɛlɛ kɛ sambo, nɛ nɛ gbɛ ku'da nɛ dɛ zu a. Nɛ nɛ tɛ hɛ̃̀lɛ̃̀ a na, a gese ku'danɔ ni gɔ. We kɛ nwa do tɛ̃ a hã a kɔ̃a gɛnɛ kɛ na, wa gbɛ ku'danɔ ni.

³ Fala kɛ ma ɔ do gele wi, nɛ nɛ hɛ̃lɛ̃ a na, a gese ku'da a ba ni. Nɛ nde fala kɛ ma ɔ do nya nɛ be Israɛlɛ, nɛ nɛ gbɛ ku'da ni dɛ zu a.

⁴ “NWA Gale 'da nɛ, a hã sɛ odia mɔ hã nɛ wena tɛ ngɔ nùi kɛ a nɛ hã ma hã nɛ ni. Nɛ wele kpo kɔ nɛ gɛ, a dúngú sɛ sã gɔ.

⁵ Nɛ nde NWA a dɛ sɛ na mɛ ni, 'da fala kɛ nɛ zele a, kɔ nɛ dɛ mbulanɔ kpo kpo kɛ mi hã ma hã nɛ sɔɛ gɛ.

⁶ NWA Gale 'da nɛ, a hã sɛ odia mɔ hã nɛ wena, ɔ nɛ kɛ a kpua mbulu nɛ ni. Nɛ nɛ sɛ 'bɔ do mbé wɔ we ba ku'da mbili kɔ ogele nu kɔnggɔ bina. Nɛ nde ogele nu kɔnggɔnɔ wa tɛ sɛ we ba ku'da mbili kɔ̃ nɛ. Mba gɔ, nɛ sɛ a nwa ngɔ ogele nu kɔnggɔnɔ, nɛ nde gele nu kɔnggɔ kpo dúngú sɛ nwa ngɔ nɛ gɔ.

⁷ “Nɛ nde fala kɛ kɔ mbe le kɛ NWA Gale 'da nɛ, a hã ma hã nɛ ni, kɔ nɛ zɔ mbe nya nɛ be Israɛlɛ kpo kɔ sã, nɛ nɛ tɛ dɛ̀ sila hã a gɔ. Nɛ tɛ bɛ we hã ku'da hã a gɔ.

⁸ Nɛ e sɛ ku'da zu a ɔ nɛ kɛ a kɔa ni, nɛ nɛ dɛ sɛ ma do dia kɔ sila.

⁹ Dɔ 'dã linggamɔ lé kɔ sila nɛ, kɔ nɛ lengge na: ‘Ee, Sɔkpɔ sabɛlɛ sambo kɛ wa gbɛ sɛ do ku'da dɛ zu winɔ ni, ma kɔlɔ 'bɔ ia’ gɔ. Nɛ lengge ni, nɛ nɛ fa sɛ we bɛ na, nɛ hã ku'da hã nya nɛ be Israɛlɛ kɛ sã ba a ni gɔ. Kɔ nɛ bɛ̃ we gbaka nya nɛ be Israɛlɛ, kɛ a do sã ni, nɛ a da sɛ nɛ dati NWA, nɛ nɛ te sɛ do ngbangga.

¹⁰ Ma kɛ ma wia na, nɛ hã ku'da hã wi ni, nɛ nɛ hã ma do dia sila. Nɛ NWA Gale 'da nɛ, a zɔ sɛ dia sila 'da nɛ, nɛ a wele sɛ nu a tɛ mɛnɔ vɛ̃ nɛ kɔa we dɛ ma ni.

¹¹ Owi sãnɔ wa sɛ ngɔ nùi 'da nɛ boe fai. Ma kɛ mi ba nu mi hã nɛ na, nɛ be dia kɔ sila hã nya nɛ, obe Israɛlɛ, kɛ wa a wi 'bako, nɛ wa do sã ni.

Mbula ngɔ ongbá

¹² “Fala kɛ mbe nya nɛ be Israɛlɛ, wi wili tabi wuko a kɔ̃ na, nɛ oso ɛ kɔ ɛ hɔ ngbá, nɛ a dɛ sɛ to hã nɛ 'do sabɛlɛ gazɛlɛ. Kɔ ma hɔ sabɛlɛ kɛ sambo, nɛ nɛ e sɛ a na, a si.

¹³ Nɛ nde nɛ é sɛ a na, a la do wila kɔ̃ a iko gɔ.

¹⁴ Nɛ fo sɛ mbe kɔ mɛnɔ vɛ̃ Gale hã ma hã nɛ, ɔ nɛ obata, odua, kpalɛ, do dɔ̃, nɛ nɛ hã ma hã a.

¹⁵ Mba gɔ, tɛ nɛ tɛ èlè ngɔ kɛ na, nɛ zi a ngbá ngɔ nu Ezipeto, nɛ nwa fua nɛ kɔ nɛ ni gɔ. We duzu ki ni, ma kɛ mi hã mbula gɛ hã nɛ sɔɛ gɛ ni.

¹⁶ “Nɛ nde mbe gɔ, nɛ ngbá ni kɔ̃ sɛ we la nɛ gɔ, we kɛ a kɔ̃a gɛnɛ nɛ do nu fɛlɛ kula 'da nɛ. Nɛ a kɔ̃a we 'bana dɛ 'da nɛ ni.

¹⁷ Fala kɛ ma ɔ na mɛ ni, nɛ nɛ e a 'do gbangga nu tɔa, nɛ nɛ gbo zala a, takɔ ma be na, a sɛ a ngbá 'da nɛ fai. Fala kɛ ma ɔ do wuko ngbá, nɛ nɛ dɛ sɛ 'bɔ do a kpasaa na mɛ ni.

¹⁸ “Fala kɛ nɛ hã wala hã ngbá na, a la nde, nɛ nɛ tɛ dɛ̃ ma do mbé gele linggamɔ gɔ. Mba gɔ, a dɛa to hã mɔ 'do sabɛlɛ gazɛlɛ, nɛ a dɛa na, nɛ kpa odia mɔ nɛ ngɔ kɛ 'da wi dɛa to kɛ nɛ futa a futa ni fala bɔa. Ma kɛ ma wia na, nɛ e a ni. Nɛ NWA Gale 'da nɛ, a wele sɛ nu a tɛ nɛ kɔ mɛnɔ vɛ̃ kɛ nɛ kɔ̃a we dɛ ma ni.

Mbula ngɔ kuti obe wili sa'denɔ

¹⁹ “Nɛ e sɛ kuti be wili ngɔmbɔnɔ, do batanɔ do duanɔ 'da nɛ hã NWA Gale 'da nɛ. We duzu ki ni, ma wè na, nɛ e kuti be wili ngɔmbɔ li dɛa to gɔ, nɛ nɛ tɛ kɛlɛ sala tɛ kuti be wili bata gɔ.

²⁰ Nɛ sabɛlɛ kpo kpo, nɛ nɛ, do owi nu fɛlɛ nɛ, nɛ nyɔngɔ sɛ kuti sa'denɔ ni dɛ tɛ fala kɛ NWA Gale 'da nɛ saka na, nɛ dɔnggɔ do ɛ ni.

²¹ Nɛ nde fala kɛ kɔ kuti sa'denɔ ni, mbe nɛ nɛ ku, tabi li a o ua, tabi a do mbe gele kunda tɛ̃ a, nɛ ma wè na, nɛ gbɛ a we dɔnggɔ do NWA Gale 'da nɛ gɔ.

²² Nɛ nyɔngɔ a dɛ nu tɔa 'da nɛ i iko. Nɛ wi ndi tabi wi kɛ a a sa li Gale wia we nyɔngɔ a, ɔ nɛ kɛ a wia we nyɔngɔ do dɛngbɛ tabi zambɛlɛ ni.

²³ Nɛ nde nɛ tɛ nyɔngɔ tɔkɔ sa'de gɔ. Nɛ 'bili gɛlɛ sa'de, nɛ tɔkɔ tɛ̃ a fo dɛ nu ɔ nɛ lì ni.