Mbulanɔ 14 - WE NU GALE 1995

Mbula ngɔ dungu gɛla

¹ “Nɛ a obenɔ 'da NWA Gale 'da nɛ. Na mɛ ni, 'da fala kɛ fio fe, kɔ nɛ dungu gɛla a, nɛ nɛ tɛ yɔ̀lɔ̀ mɔ tɛ nɛ gɔ. Nɛ nɛ tɛ kɛ̀lɛ̀ 'bɔ mili zu nɛ kɛ si dati nɛ ni gɔ.

² We kɛ wele nɛ a mɔ́ NWA Gale 'da nɛ. A saka nɛ sanga owinɔ ngɔ nù gɛ vɛ̃, takɔ nɛ ɔ owinɔ 'da a ngboo.

Osa'denɔ kɛ wa ɔ sa do wanɔ wa ɔ́ sa gɔ ni

³ “Ma wè na, nɛ nyɔngɔ mɔ kɛ ma a mɔ ndi li NWA ni gɔ.

⁴ Nɛ zɔ́ li osa'denɔ nɛ wia we nyɔngɔ wa ni, ma kɛ: ngɔmbɔ, bata, dua,

⁵ zu gbã gua, dɛngbɛ, dua zamɔ, ngbamu, zambɛlɛ,

⁶ do tala gele osa'denɔ kɛ sala nyanga wa bɔa, nɛ wa nyɔngɔ wɔkɔsɔ, nɛ wa ngbuku ma, nɛ wa nyɔngɔ a fi bɔa ni.

⁷ Nɛ li sa'denɔ kɛ nɛ wè tɛ nyɔngɔ wa gɔ ni, ma kɛ: samo, bia, do kpã, we kɛ gɛnɛ kɔ wa nyɔngɔ wɔkɔsɔ, nɛ wa ngbuku, nɛ wa nyɔngɔ ma fala bɔa ni, nɛ nde sala nyanga wa ma bɔa gɔ.

⁸ Nɛ tɛ nyɔngɔ 'bɔ ngulu gɔ, we kɛ gɛnɛ kɔ sala nyanga a bɔa, nɛ nde a ngbúkú wɔkɔsɔ we nyɔngɔ 'da nɛ fala bɔa gɔ. Nɛ tɛ nyɔ̀ngɔ̀ mulu sa'denɔ ni gɔ, nɛ nɛ tɛ 'bè 'bɔ tɛ fia wa gɔ.

⁹ “We duzu osa'de 'dɔ lì, nɛ wia we nyɔngɔ okɔyɔ do osa'denɔ kɛ kɔa tɛ wa boe ni.

¹⁰ Nɛ nde wanɔ kɛ kɔa tɛ wa bina ni, nɛ nyɔ́ngɔ́ sɛ wa gɔ. Nɛ zɔ sɛ wa li nɛ na, wa a osa'de ndi li Gale.

¹¹ Nɛ wia we nyɔngɔ onɔɛnɔ vɛ̃ kɛ wa a sa li Gale ni.

^12-18 Nɛ zɔ́ li onɔɛnɔ kɛ nɛ wé sɛ we nyɔngɔ wa gɔ ni, ma kɛ: ziki, zakanga, nɔɛ lì, gbagbaladangga, gãlã nu tɔa ngolo, ngɔ gili ozakanganɔ vɛ̃, ganakele, gba nɔɛ li go, dili gba tũ, be kɔa lì, ngɔ gili konggonɔ kpi do kpi, dili gba sɔ̃, be dili, ngɔ gili ganakelenɔ, nyɔlã, kɔa lì, nɔɛ ngele, ngɔ gili gbombenɔ kpi do kpi, kuludu do pipili.

¹⁹ “Obe sa'denɔ kɛ sala 'baka wa boe ni, wa a osa'de ndi li Gale. Nɛ ma wè na, nɛ nyɔngɔ wa gɔ.

²⁰ Nɛ ombe kɔ wa ni, gɛnɛ kɔ sala 'baka wa boe, nɛ nde wa ɔ sa li Gale. Nɛ nɛ wia we nyɔngɔ wanɔ ni.

²¹ “Nɛ tɛ nyɔ̀ngɔ̀ sa'de kɛ a fia iko ni gɔ. Nɛ wia we hã sa'denɔ wa fia iko ni hã ogɛnɛnɔ wa ɔ kɔ nɛ ni. Tabi nɛ wia we be gole nɛ hã owi la walanɔ. Nɛ nde nɛ tɛ nyɔ́ngɔ́ ma gɔ, mba gɔ, kili tɛ nɛ vɛ̃ a mɔ́ NWA Gale 'da nɛ. “Da dɛ kɔ nɛ gí be dua do lì bele naa a gɔ.

Mbula ngɔ dɔnggamɔ kpo mbee 'bu

²² “Kɔ sabɛlɛ kpo kpo, 'da fala nɛ kala kpalɛ li fɔnɔ 'da nɛ ni, nɛ nɛ gɔ̀nɔ̀ sanga nɛ 'bu, nɛ nɛ fo sɛ kɔ nɛ kpo mbee 'bu, nɛ nɛ e ma.

²³ 'Do nɛ, nɛ nɛ nɛ sɛ do ma dɛ tɛ fala kɛ NWA Gale 'da nɛ a saka sɛ na, nɛ dɔnggɔ do ɛ ni. Nɛ hɔ i mɔ, nɛ nɛ nyɔngɔ sɛ mɛnɔ nɛ ia ma ni dɛ li NWA. Mɛnɔ ni sɛ a ble 'da nɛ, dɔ̀, do nɔɛ 'da nɛ. Nɛ nɛ nyɔngɔ sɛ 'bɔ kuti obe ngɔmbɔnɔ, do obatanɔ do oduanɔ 'da nɛ dɛ di ni. Nɛ dɛ sɛ na mɛ ni, takɔ nɛ yambala we dɔnggɔ NWA Gale 'da nɛ fai.

²⁴ Nɛ nde 'da fala nɛ zɔ na, NWA hã kpalɛnɔ hã nɛ wena, nɛ li wala we nɛ tɛ fala dɔnggɔ do a ma nyɛlɛ wena, nɛ fo fala we kala mɛnɔ ni dɛ i mɔ bina,

²⁵ nɛ ma wia na, nɛ be gole mɛnɔ ni, nɛ nɛ kala mbili nɛ, nɛ nɛ tɛ do ma dɛ fala dɔnggɔ do NWA Gale 'da nɛ.

²⁶ Nɛ nɛ oso sɛ mɛnɔ vɛ̃ kɛ zã nɛ kɔ̃a ni, ɔ nɛ ongɔmbɔ, obata, tabi odua, dɔ̃ vinɔ, tabi gele dɔ̃nɔ iko ni. Nɛ nɛ do nu fɛlɛ kulanɔ 'da nɛ, nɛ nyɔngɔ sɛ mɛnɔ ni, nɛ nɛ nɔ dɔ̃nɔ, nɛ nɛ dɛ yangga.

²⁷ “Nɛ ta zu nɛ tɛ èlè ngɔ olevitɛnɔ, kɛ wa ɔ kɔ le 'da nɛ ni gɔ. Wa do nù mɔ wa, ɔ nɛ kɛ 'da nɛ ni bina.

²⁸ We duzu ki ni, ma wia na, 'do sabɛlɛ talɛ, nɛ kpo mbee 'bu kɔ Okpalɛnɔ 'da nɛ kɛ nɛ ia ma ni, nɛ ngɛmɛ li ma dɛ kɔ olenɔ 'da nɛ.

²⁹ Nɛ ngɛmɛ sɛ li ma na, ma gala olevitɛnɔ kɛ wa do nù mɔ́ wa bina ni. Ma gala sɛ 'bɔ ogɛnɛnɔ, do obe gulanɔ, do owi fio wilinɔ kɛ wa ɔ sanga nɛ ni. Ma wia na, wa tɛ, nɛ wa kpa nyɔngɔmɛnɔ vɛ̃ kɛ wa kɔa ni. Nɛ dɛ na mɛ ni, nɛ NWA Gale 'da nɛ, a wele sɛ nu a tɛ nɛ kɔ mɛnɔ vɛ̃ kɛ nɛ kɔa we dɛ ma ni.