Mbulanɔ 12 - WE NU GALE 1995

OMBULANƆ 'DA NWA GALE

¹ “Mbulanɔ gɛ, mɛ a ombula kɛ ma wia na nɛ zele, nɛ nɛ dɛ ma kɔ dungu nza 'da nɛ vɛ̃ tɛ ngɔ nùi kɛ NWA Gale 'da oyaa nɛ, a hã sɛ ma hã nɛ ni.

Fala dɔnggɔ do Gale ma sɛ kpo iko

² “Nɛ hɔ ngɔ nùi ni, nɛ nɛ ba ma, nɛ nɛ 'danga falanɔ vɛ̃ kɛ owinɔ wa dɔnggɔ do ogalenɔ 'da wa ni. Mɛ a ofalanɔ tɛ ngɔ ngala kalanɔ, do ngɔ obe kɛnɔ, do ti otenɔ kɛ onwá nɛ ma 'bɔ wena ni.

³ Nɛ gbini sɛ ogbagalanɔ, nɛ nɛ mbi otanɔ wa ndɛngɛlɛ dɛ ngɔ ngbɛ ɛ ni. Nɛ dɔ sɛ kpikima gale wuke Asera, nɛ nɛ gɔmɔ sanga osɛa tenɔ 'da winɔ ni dɛ nu. Nɛ dɛ na mɛ ni, nɛ nɛ 'danga sɛ fala dɔnggɔ do galenɔ ni, nɛ wa dɔ́nggɔ́ sɛ 'bɔ wa di ni gɔ.

⁴ “Nɛ tɛ dɔ̀nggɔ̀ NWA Gale 'da nɛ, ɔ nɛ tɛlɛ tɛ kɛ owinɔ ni wa dɔnggɔ do galenɔ 'da wa ni gɔ.

⁵ Nɛ nde NWA a saka sɛ mbe fala tɛ kɔ 'bili tɛ nùi 'da mbe nu kpala nɛ kpo. Nɛ nɛ nɛ sɛ dati a, nɛ nɛ dɔnggɔ tati a a dɛ di ni.

⁶ Nɛ nɛ dɔ sɛ sa'denɔ we dɔnggɔ do a, nɛ nɛ hã 'bɔ ogele dɔnggamɔ. Nɛ hã́ sɛ 'bɔ kpo mbee 'bu kɔ kpalɛnɔ 'da nɛ do dɔnggamɔ, mba do mɛnɔ kɛ nɛ tɛa do ma hã NWA do kɔ sila nɛ, tabi we dɛ olo mbulu ni. Nɛ nɛ hã sɛ 'bɔ Okuti be wili sa'denɔ 'da nɛ, ɔ nɛ ngɔmbɔ, bata, do dua hã a dɛ di ni.

⁷ Nɛ nɛ do nu fɛlɛ kulanɔ 'da nɛ vɛ̃, nɛ nyɔngɔ sɛ mɔ dati NWA Gale 'da nɛ, kɛ a wila nu a tɛ nɛ ni. Nɛ nɛ dɛ sɛ yangga we duzu dia mɛnɔ kɛ a dɛa do nɛ ni.

⁸ “Do 'da fala ni, nɛ dɔ́nggɔ́ sɛ 'bɔ NWA ɔ nɛ kɛ lɛ dɛ ma sɔɛ gɛ gɔ. Mba gɔ, gbaa tia do sɔɛ gɛ, wele do wele dɔnggɔ NWA ɔ nɛ kɛ zã a kɔa ni.

⁹ Nɛ dɛ na mɛ ni, we duzu kɛ nɛ tɛ lè ngɔ nùi kɛ NWA Gale 'da nɛ, a hã ma hã nɛ na, nɛ kpa dungu fio ngɔ nɛ ni gɔ.

¹⁰ Fala kɛ nɛ kũ lì Yɔrdanɛ, nɛ NWA a dɛ sɛ na, nɛ ba nùi, nɛ nɛ ɔ dɛ di ni. A amba sɛ zu nɛ ti kɔ owi sɛnɛ nɛ, nɛ nɛ kpa sɛ gɛ̃a dungu.

¹¹ Do 'da fala ni, nɛ NWA a saka sɛ le kɛ ma wia na, wa dɔnggɔ do a ni. Nɛ nɛ nɛ sɛ do mɛnɔ vɛ̃ kɛ mi ba nu mi na, nɛ dɔnggɔ do a ni dɛ di ni. Mɛ a osa'denɔ nɛ dɔ sɛ wa hã NWA ni, ogele dɔnggamɛnɔ, dɔnggamɔ kpo mbee 'bu kɔ kpalɛnɔ, do kɛnɔ nɛ kpo sɛ mbulu 'dɔlɔ ma hã NWA, do kɛnɔ nɛ tɛ sɛ do ma do kɔ sila nɛ iko ni.

¹² Nɛ, do obenɔ 'da nɛ, do owi tonɔ, do olevitɛnɔ wa ɔ kɔ lenɔ 'da nɛ ni, nɛ mba sɛ kpo, nɛ nɛ nɛ dati NWA do yangga. Nɛ tɛ nɛ tɛ èlè ngɔ olevitɛnɔ gɔ, we kɛ wa kpá sɛ 'bili tɛ nù mɔ́ wa gɔ.

¹³ Nɛ ma wè na, nɛ hã dɔnggamɛnɔ 'da nɛ tɛ fala kɛ nɛ saka ma do tɛ nɛ ni gɔ.

¹⁴ Nɛ hã sɛ ma dɛ fala kɛ NWA saka ni iko. A saka sɛ fala ni kɔ mbe 'bili tɛ nùi 'da nu kpala nɛ kpo. Nɛ nɛ gbɛ sɛ sa'denɔ 'da nɛ dɛ di ni. Nɛ nɛ dɛ sɛ 'bɔ ogele mɛnɔ vɛ̃ mi ba nu mi hã nɛ na, nɛ dɛ ni dɛ di ni.

¹⁵ “Nɛ hɔ́ kɔ lenɔ kɛ nɛ ɔ sɛ nɛ ngɔ nùi ni, nɛ nɛ wia sɛ we gbɛ sa'de, nɛ nɛ nyɔngɔ mulu nɛ, ɔ nɛ kɛ zã nɛ kɔa ni. Nɛ nyɔngɔ sɛ mɛnɔ kɛ NWA a hã sɛ ma hã nɛ ni. Nɛ vɛ̃, gɛnɛ kɔ wi ndi tabi wi kɛ a a sa li Gale ni, nɛ wia sɛ we nyɔngɔ ma ɔ nɛ kɛ nɛ wia we nyɔngɔ mulu dɛngbɛ do mulu zambɛlɛ ni.

¹⁶ Nɛ nde nɛ tɛ nyɔ̀ngɔ̀ takɔ sa'de gɔ. Nɛ 'bili gɛlɛ sa'de, nɛ tɔkɛ fo dɛ nù ɔ nɛ lì ni.

¹⁷ Nɛ wè tɛ nyɔngɔ Okpalɛnɔ, tabi nɔ dɔ̃ɛ, tabi gi mɔ do nɔɛ kɛ nɛ ia we dɔnggɔ do Gale ni gɔ. Nɛ tɛ nyɔngɔ 'bɔ Okuti be nadalamɛnɔ 'da nɛ, tabi omɛnɔ nɛ kpua mbulu 'dɔlɔ ma hã NWA, tabi odɔnggamɛnɔ kɛ nɛ hã ma do kɔ sila nɛ iko, tabi ogele dɔnggamɛnɔ ni gɔ.

¹⁸ Nɛ, do obenɔ 'da nɛ, do owi tonɔ, do olevitɛnɔ wa ɔ kɔ lenɔ 'da nɛ ni, nɛ nyɔngɔ sɛ mɛnɔ ni tati nɛ dɛ dati NWA Gale 'da nɛ Nɛ nɛ nyɔngɔ sɛ ma tɛ fala kɛ a saka na, wa dɔnggɔ do ɛ ni. Nɛ nɛ dɛ sí yangga di ni we mɛnɔ vɛ̃ kɛ nɛ dɛa ni.

¹⁹ Nɛ li nɛ sɔ na, kɔ dungi 'da nɛ tɛ di ni, da dɛ kɔ nɛ lá olevitɛnɔ iko gɔ.

²⁰ “'Da fala kɛ NWA Gale 'da nɛ a gã sɛ 'da nùi 'da nɛ, ɔ nɛ kɛ a kpua mbulu nɛ ni,

²¹ nɛ nɛ gbɛ sɛ sa'de, nɛ nɛ nyɔngɔ mulu nɛ dɛ nu tɔanɔ 'da nɛ ɔ nɛ kɛ zã nɛ kɔ̃a ni. Wi kɛ le 'da a ma nyɛlɛ do fala kɛ NWA saka na, wa dɔnggɔ do ɛ ni wena, nɛ a wia we saka mbe kɔ ongɔmbɔnɔ, do obatanɔ, tabi oduanɔ kɛ NWA a hã sɛ wa hã nɛ ni, nɛ a gbɛ a. Nɛ a nyɔngɔ ma dɛ nu tɔa 'da a ni, ɔ nɛ kɛ mi tɔ̃a hã nɛ ni.

²² Nɛ wi ndi tabi wi kɛ a a sa li Gale, a wia sɛ we nyɔngɔ mulu sa'de kɛ zã a kɔ̃a ni, ɔ nɛ kɛ a wia we nyɔngɔ mulu dɛngbɛ tabi mulu zambɛlɛ ni.

²³ Nɛ nde nɛ tɛ nyɔngɔ mulu kɛ tɔkɔ 'bana kɔ nɛ ni gɔ. We kɛ kpasi kɔ tɔkɔ boe, nɛ nɛ wè tɛ nyɔngɔ mulu mba do tɔkɛ kɛ ma hã kpasi ni gɔ.

²⁴ Nɛ tɛ nyɔngɔ tɔkɔ sa'de gɔ. Nɛ 'bili gɛlɛ sa'de, nɛ tɔkɛ fo dɛ nù ɔ nɛ lì ni.

²⁵ Fala kɛ nɛ dɛ mbulanɔ ni, nɛ nɛ, do obe zã nɛ, nɛ kpa sɛ dia mɔ, we kɛ nɛ dɛa mɔ kɛ ma ɔ bɔlɔ, nɛ ma dia tɛ NWA ni.

²⁶ “Ma kɛ nɛ kala sɛ osa'de dɔnggɔ do NWA, do odia mɛnɔ kɛ nɛ kpua mbulu we 'dɔlɔ hã a ni, nɛ nɛ tɛ do ma dɛ fala a saka sɛ na, wa dɔnggɔ do ɛ ni.

²⁷ Fala kɛ nɛ tɛ do osa'de we dɔ we dɔnggɔ do NWA Gale 'da nɛ, nɛ nɛ dɔ mulu nɛ do tɔkɔ nɛ vɛ̃ dɛ ngɔ gbagala 'da a. Fala kɛ mɛ a dɔnggamɔ kɛ ma be dɛa na, nɛ nɛ a sɛ tɔkɔ nɛ dɛ ngɔ gbagala 'da NWA, nɛ nɛ wia sɛ we nyɔngɔ mulu nɛ.

²⁸ Nɛ zélé, nɛ nɛ dɛ́ mbulanɔ vɛ̃ kɛ mi hã ma hã nɛ gɛ. Nɛ dɛ na mɛ ni, nɛ nɛ do obe zã nɛ, nɛ kpa sɛ dia mɔ 'da fala fai, we kɛ nɛ dɛa mɔ kɛ ma ɔ bɔlɔ, nɛ ma dia tɛ NWA 'da nɛ ni.

Nɛ tɛ dɔ̀nggɔ̀ ogale bɛlɛ gɔ

²⁹ “'Da fala nɛ kũ sɛ lì, nɛ nɛ le ngɔ nùi kulu nɛ mɔ ni, nɛ NWA Gale 'da nɛ, a kumu sɛ owinɔ wa ɔ ngɔ nùi di ni ni. Nɛ nɛ ba sɛ nùnɔ 'da wa, nɛ nɛ dungu dɛ di ni.

³⁰ Nɛ nde 'da fala kɛ NWA a kumu sɛ winɔ ni, nɛ nɛ dɛ zĩ na, da dɛ kɔ nɛ nɛ́ 'do dɛa to tɛ wa gɔ. Nɛ tɛ àkà we tɛlɛ tɛ kɛ wa dɔnggɔ zi do galenɔ 'da wa ni, kɔ nɛ dɔnggɔ tɛ mɛ 'bɔ wa gɔ.

³¹ Nɛ nɛ tɛ dɔ̀nggɔ̀ NWA Gale 'da nɛ, ɔ nɛ kɛ wa dɔnggɔ do galenɔ 'da wa ni gɔ. Mba gɔ, 'da fala owinɔ ni wa ma ngɔ dɔnggɔ galenɔ 'da wa, nɛ wa dɛ mɛnɔ vɛ̃ kɛ Gale 'da nɛ sɛnɛ ma wena ni. Nɛ mɛ ma 'danga nɛa ngɔ ngbɛ ɛ vɛ̃, mɛ a kɛ wa gbɛ obulu benɔ do oboko benɔ 'da wa, nɛ wa dɔ wa we dɔnggɔ do galenɔ 'da wa ni.