Mbulanɔ 11 - WE NU GALE 1995

NWA a gã wena

¹ “Nɛ kɔ̃́ gɛnɛ NWA Gale 'da nɛ, nɛ dɛ́ to hã a, nɛ nɛ dɛ́ mbulanɔ 'da a do olo nu a vɛ̃. Nɛ tɛ là ma kpo gɔ.

² Nɛ zɔa zi gã wi do ngawi 'da NWA Gale 'da nɛ, nɛ nɛ ĩ ti ma, nɛ ma bia mɔ hã nɛ. We mi tɔ̃ gɛ, ma we duzu obenɔ 'da nɛ gɔ, we kɛ wa zɔ ma gɔ. Wi a nɛ a nɛ zɔa zi

³ ogba sɔ̃ mɛnɔ a dɛa ni. Nɛ zɔa zi mɛ a dɛa do nwa ngɔ nù Ezipeto do nùi 'da a vɛ̃ ni.

⁴ Nɛ nɛ zɔa 'bɔ tɛlɛ tɛ mɛ kɛ NWA dɛa zi do osoda Ezipeto, do ombalatanɔ do ongilingilinɔ 'da wa ni. A bindi zi wa vɛ̃ 'dɔ gba lì Sala Tɔ̃, 'da fala wa tɛ ndaka 'do nɛ ni.

⁵ Nɛ ĩ ti mɛnɔ kɛ NWA dɛa zi we nɛ li gba zɔ̃ i, dati kɛ na nɛ hɔ dɛ ni.

⁶ Nɛ lénggé do mɛ kɛ a dɛa zi do Datanɛ do Abiramɛ, obenɔ 'da Eliabɛ, kɛ a a wi nu kpala Rubɛnɛ ni. Nùi zu'du zi dɛ li wele vɛ̃, nɛ ma mi wa, do onu fɛlɛ kulanɔ 'da wa, do tandenɔ, do owi dɛa tonɔ, do osa'denɔ 'da wa vɛ̃.

⁷ Nɛ zi a otemɔɛ gã dɛa mɛnɔ kɛ NWA dɛa ni vɛ̃.

NWA a wele sɛ nu a tɛ nùi 'da nɛ

⁸ “Nɛ dɛ́ ombulanɔ vɛ̃ kɛ mi hã ma hã nɛ sɔɛ gɛ. Nɛ dɛ na mɛ ni, nɛ nɛ kpa sɛ ngawi we kũ lì, nɛ nɛ ba sɛ nùi kɛ nɛ nɛ le ngɔ nɛ ni.

⁹ Nɛ tũ kɔ̃ nɛ ma dɔ sɛ ngɔ nùi kɛ nwa 'bili zi na, ɛ ba sɛ ma hã oyaa nɛ do obe zã wa ni. Mɛ a nù kɛ ma do nyɔngɔmɔ la li ngele.

¹⁰ Nùi kɛ nɛ nɛ ba ma ni, ma ɔ̃ nɛ nù Ezipeto, kɛ nɛ la zi ngɔ nɛ ni gɔ. 'Da fala nɛ zi a i mɔ ni, kɔ nɛ mi kpalɛ ia, nɛ nɛ dɛ to nganda wena we gba wala lì na, ma la do kɔ fɔnɔ.

¹¹ Nɛ nde nùi kɛ nɛ kɔlɔ we le ngɔ nɛ gɛ, mɛ a nù ngɔ kalanɔ do kɔ gbangɔlɔ̃nɔ. Mɛ a nù kɛ kolo tɛ ngɔ nɛ wena.

¹² Nɛ NWA Gale 'da nɛ, a zɔ mɔ tɛ ma zɔa fai, ndo do nyanga sabɛlɛ gbaa we hɔ ndɔti nɛ.

¹³ “Ma kɛ ma wia na, nɛ dɛ mbulanɔ kɛ mi hã ma hã nɛ sɔɛ gɛ, nɛ nɛ kɔ̃ gɛnɛ NWA Gale 'da nɛ, nɛ nɛ dɛ́ to hã a do sila nɛ vɛ̃.

¹⁴ Nɛ dɛ na mɛ ni, nɛ a tombo sɛ kuti kolo dɛ ngɔ nùi 'da nɛ, nɛ a tombo 'bɔ ma do li zɔlɔ nɛ na, nɛ kpa odia kpalɛ, do ble, do dɔ̃ do nɔ.

¹⁵ Nɛ nɛ kpa sɛ 'bɔ wɔkɔsɔ we onadalamɛnɔ 'da nɛ. Nɛ kpa sɛ nyɔngɔmɛnɔ vɛ̃, kɛ nɛ kɔ̃a gɛnɛ nɛ ni.

¹⁶ Nɛ dɛ́ a nga na, da dɛ kɔ nɛ lá fala dɔnggɔ NWA Gale 'da nɛ, kɔ nɛ dɔnggɔ ogele galenɔ gɔ.

¹⁷ Ní gɔ nɛ zã NWA ma nɔ̃lɔ̃ sɛ dɛ tɛ nɛ. Nɛ a kpe sɛ wala lì kole do'do, nɛ nùi 'da nɛ ma kolo sɛ, nɛ kpalɛ ga sɛ tɛ nɛ gɔ. Nɛ gɛnɛ kɔ nɛ ɔ ngɔ dia nùi kɛ a hã ma hã nɛ ni, nɛ nɛ fe sɛ i mɔ dɔ̃ iko.

¹⁸ Tɛ nɛ tɛ èlè ngɔ mbulanɔ ni gɔ, nɛ ba ma dɛ kɔ sila nɛ. Nɛ kpo sɛ ma dɛ tɛ zã 'baka nɛ, do tɛ dati nɛ na, da dɛ kɔ tɛ nɛ élé ngɔ nɛ gɔ.

¹⁹ Nɛ bé ma hã obenɔ 'da nɛ, nɛ nɛ tɔ̃ we ma tɛ nu tɔanɔ 'da nɛ, tabi tɛ li wala gɛnɛ. Nɛ tɔ̃́ 'bɔ we ma do 'da fala kpe tɛ nɛ, tabi 'da fala nɛ dɛ to ni.

²⁰ Nɛ kɔ́mɔ́ ma dɛ 'do gbangga nu tɔanɔ 'da nɛ do nu ngbonɔ 'da nɛ.

²¹ Na mɛ ni, nɛ tũ kɔ̃ nɛ do obenɔ 'da nɛ, ma dɛlɛ sɛ ngɔ nùi kɛ NWA Gale 'da nɛ, a kpua mbulu hã ma hã oyaa nɛ ni. Nɛ ɔ sɛ di ni gbaa ndɔti nɛ a kɛ li nza do nùi ma 'danga, sɛ nɛ de.

²² “Nɛ dɛ́ mbulanɔ vɛ̃ kɛ mi hã ma hã nɛ ni do wala olo nɛ ngboo. Nɛ kɔ̃̀ gɛnɛ NWA Gale 'da nɛ, nɛ nɛ dɛ́ mɛnɔ vɛ̃ kɛ a ba nu a na, nɛ dɛ ma ni. Nɛ nɛ hã tɛ nɛ vɛ̃ hã a.

²³ Nɛ dɛ ni, kɔ fala kɛ nɛ kɔlɔ do nùi, nɛ nɛ ba ma ni, nɛ NWA a ndaka sɛ ogele nu kɔnggɔnɔ dati nɛ do'do. Nɛ nɛ ba sɛ nùi olo nu kɔnggɔnɔ kɛ wa dɛlɛ wena, nɛ wa nganda 'bɔ nɛa ngɔ nɛ ni.

²⁴ Nùnɔ vɛ̃ kɛ nɛ e sɛ nyanga nɛ ngɔ nɛ ni, wele nɛ sɛ a mɔ nɛ. Nɛ nùi 'da nɛ, ma yolo sɛ tɛ li gba zɔ̃, si ba gɔtɔ gbaa we hɔ ngɔ okala Libanɛ, si gbãlã ngɔ. Nɛ ma yolo nu gã lì Efratɛ, si 'biti gba wese gbaa we hɔ nu gba lì Meditɛrane, si 'biti gɛ̃a wese.

²⁵ NWA Gale 'da nɛ a dɛ sɛ na, owinɔ wa dɛ kili nɛ, tɛ falanɔ vɛ̃ nɛ la sɛ tɛ nɛ ngɔ nùi ni. Nɛ wele kpo wé sɛ we yolo dati nɛ gɔ, ɔ nɛ kɛ Gale kpua do mbulu nɛ hã nɛ ni.

²⁶ “Nɛ zélé mi sɛ! Sɔɛ gɛ mi ia wila nui 'da Gale do fɔmba 'da a dati nɛ na, nɛ saka sanga nɛ.

²⁷ Fala kɛ nɛ dɛ mbula 'da NWA Gale 'da nɛ, kɛ mi hã ma hã nɛ sɔɛ gɛ ni, nɛ a wele sɛ nu a tɛ nɛ.

²⁸ Nɛ nde fala kɛ nɛ dɛ̃ mbulanɔ ni gɔ, kɔ nɛ la wala mi bia hã nɛ ni, we dɔnggɔ ogele galenɔ kɛ nɛ dɔ̀nggɔ̀ zɛ́ mbe kuti wa gɔ ni, nɛ Gale a fɔmbɔ sɛ nɛ.

²⁹ 'Da fala kɛ NWA Gale kã nɛ dɛ ngɔ nùi nɛ nɛ ba ma ni, nɛ nɛ ba sɛ kana tɛ nɛ tɛ ngɔ kala Garizimɛ we kpa wila nu 'da a. Nɛ tɛ ngɔ kala Ebalɛ nɛ ba kana tɛ nɛ we kpa fɔmba.

³⁰ (Okalanɔ bɔa ni, ma si kulu lì Yɔrdanɛ, si 'biti gɛ̃a wese, tɛ ngɔ nùi 'da Okanana, kɛ wa ɔ kɔ gbangɔlɔ̃ lì Yɔrdanɛ ni. Nɛ ma kɔlɔ dɔ̃ɔ do ote sɛnɛnɔ kɛ wa dɔnggɔ ogalenɔ ti nɛ tɛ kɔ le More, kɛ ma ka mɔ dɛ Gilgalɛ i ni.)

³¹ Nɛ kɔlɔ dɔ̃ɔ we kũ lì Yɔrdanɛ, we ba nùi kɛ NWA Gale 'da nɛ, hã ma hã nɛ ni ia. Fala kɛ nɛ ba ma, kɔ nɛ dungu ngɔ nɛ,

³² nɛ nɛ dɛ mbulanɔ vɛ̃ kɛ mi hã ma hã nɛ sɔɛ gɛ ni do dia nɛ ngboo.