Mbulanɔ 10 - WE NU GALE 1995

Gale fua ku'da 'dã mɔ zu obe Israɛlɛ

¹ “'Do nɛ, nɛ NWA ba zi nu a hã mi na: ‘Mɔ sɛ́ ta bɔa, nɛ ma we kɔ do kɛnɔ zi dati ni. Nɛ mɔ bɛ̃́lɛ̃́ 'bɔ sanduku do ma'baya, we a otanɔ ni kɔ nɛ. Mɔ dɛ ma do'do, nɛ mɔ kũ do ma dɛ 'da mi zu kala nga.

² Mɔ hɔ i nga, nɛ mi kɔmɔ sɛ kpo mbulanɔ zi ngɔ tanɔ mɔ ua ni dɛ ngɔ mbé kɛnɔ ni. Nɛ 'do nɛ, nɛ mɔ a sɛ ma kɔ sanduki.’

³ Mi zila zi na mɛ ni, nɛ mi fa te kasiã, nɛ mi dɛ do sanduku, nɛ mi sɛ 'bɔ ta bɔa, nɛ ma we kɔ do kɛnɔ zi dati ni. Nɛ mi kũ do ma dɛ ngɔ kala i.

⁴ Mi hɔa i mɔ, nɛ NWA kɔma mbulanɔ dɛ ngɔ mbá tanɔ ni, ɔ nɛ kɛ a kɔma ngɔ kɛnɔ zi dati ni. Mɛ zi a mbulanɔ 'bu kɛ NWA hã zi ma hã lɛ kɔ nyɛa we do ngba soe nɛ mba zi ngba nɛ tɛ nyanga kala i ni.

⁵ A kɔma zi ma do'do, nɛ a kala ma hã mi. Nɛ 'do nɛ, nɛ mi zĩlĩ, nɛ mi a ma kɔ sanduki mi bɛ̃lɛ̃ ni.”

⁶ (Obe Israɛlɛ wa kulu zi ngɔ nu zã lì, kɛ wele nɛ a mɔ́ Bɛne-Yakanɛ ni, nɛ wa la si le Mosera. Wa hɔa di ni, nɛ Aroni fe, nɛ wa mi a. Nɛ wa ia be 'da a Elazarɛ do nganga olo a.

⁷ Obe Israɛlɛ wa kulu ngɔ tɛ Mosera ni, nɛ wa la dɛ kɔ le Gudgoda. Nɛ wa yolo 'bɔ di ni, nɛ wa la si le Yotbata. Ofua lì ma dɔ tɛ Yotbata ni wena.

⁸ Do 'da fala ni, nɛ NWA hã zi to hã nu kpala Levi. Mɛ zi a to ba tole Sanduku Gba Tɔkɛ 'da NWA, do yolo dati NWA we dɛ to hã a, do wele nu wa tɛ winɔ do zu li a. Nɛ tonɔ ni, ma 'bana do mɔ́ wa fai tia do sɔɛ gɛ.

⁹ Gulu nɛ hã owi nu kpala Levi, wa kpà zi 'bili tɛ nùnɔ ɔ nɛ ongba wa gɔ ni. Wa dɛ zi to nganga, ɔ nɛ kɛ NWA Gale 'da nɛ, a tɔ́a nɛ hã wa ni.)

¹⁰ “Mi ɔa dɛ ngɔ kala i 'do 'bu tũ nalɛ ɔ nɛ kɛ zi dati ni. Nɛ NWA zila 'bɔ mi mbé nɛ, nɛ a la linggamɔ kumu nɛ.

¹¹ Nɛ a tɔ̃ hã mi na, mi nɛ, kɔ mi kpe dati nɛ, kɔ lɛ nɛ we ba nùi kɛ ɛ kpua zi mbulu nɛ hã oyaa lɛ na, ɛ ba sɛ ma hã wa ni.

Mɛ kɛ Gale kɔ̃a na lɛ dɛ ma

¹² “Nɛ, obe Israɛlɛ, nɛ zélé mɛnɔ kɛ Gale kɔa na, nɛ dɛ ni. A kɔ̃a na, nɛ dɔnggɔ ɛ, nɛ nɛ dɛ ombulanɔ 'da ɛ. Nɛ kɔ̃́ gɛnɛ ɛ NWA, nɛ nɛ dɛ to hã ɛ do kɔ sila nɛ vɛ̃, do ngawi 'da nɛ vɛ̃.

¹³ Nɛ nɛ dɛ́ mbulanɔ mi hã ma hã nɛ sɔɛ gɛ ni. Nɛ dɛ na mɛ ni, takɔ nɛ dungu do dia nɛ.

¹⁴ Mba gɔ, NWA a a wele li nza kɛ ma gã wena ni. Nɛ a 'bɔ a wele nùi do mɛnɔ ngɔ nɛ gɛ vɛ̃.

¹⁵ Gɛnɛ kɔ na mɛ ni, nɛ nde NWA kɔa gɛnɛ oyaa nɛ wena. Ma kɛ a saka nɛ sanga ogele winɔ ngɔ nù gɛ vɛ̃ ni. Nɛ a 'bana fala kɔ gɛnɛ nɛ, ɔ nɛ kɛ nɛ zɔ ma ni.

¹⁶ Na mɛ ni, nɛ bá sila nɛ vɛ̃ hã NWA, nɛ nɛ tɛ dɛ̀ 'bɔ nga zu dɛ tɛ̃ a gɔ.

¹⁷ Mba gɔ, NWA Gale 'da nɛ a nɛa ngɔ ogalenɔ vɛ̃, nɛ a a NWA ngɔ Onwanɔ vɛ̃. A gã wena, nɛ a nganda 'bɔ wena, nɛ wele wia we dɛ kili a. A kɛ̃́ sanga wele gɔ. Nɛ a kɔ̃̀ 'bɔ na, wa 'dɔlɔ de mɔ hã ɛ, sɛ nɛ ɛ dɛ to hã wele de gɔ.

¹⁸ A bi ngɔ obe gula do owi fio wili, nɛ a kɔ̃a gɛnɛ ogele winɔ kɛ wa ɔ sanga owinɔ 'da lɛ ɔ nɛ gɛnɛnɔ ni. Nɛ a hã nyɔngɔmɔ do tulu hã wa.

¹⁹ Kɔ na mɛ ni, nɛ bé tɛ mɛ 'bɔ kɔ̃a zã 'da nɛ dɛ 'da ogɛnɛnɔ ni. We duzu kɛ nɛ zi tɛ mɛ 'bɔ dati a ogɛnɛ tɛ ngɔ nù Ezipeto.

²⁰ “Nɛ dɛ́ olo nu NWA Gale 'da nɛ, nɛ nɛ dɔnggɔ tati a a zu a kpo. Nɛ ndá'dá tɛ nɛ do a, nɛ nɛ káná tɛ nɛ do li a zu a kpo.

²¹ Nɛ sámbálá a, we kɛ a zu a kpo a Gale 'da nɛ. Nɛ nɛ zɔa zi odia mɛnɔ do omɔ kilinɔ kɛ a dɛa we duzu nɛ ni do li nɛ ngboo.

²² 'Da fala oyaa nɛ wa hɔa zi tɛ ngɔ nù Ezipeto i ni, nɛ nde wa zi tati a Owele 'bu wa sambo iko. Nɛ ngangga ni, NWA Gale 'da nɛ dɛa na nɛ ko, nɛ nɛ dɛlɛ ɔ nɛ osɔlanɔ li nza i ni.