Mbulanɔ 1 - WE NU GALE 1995

KUTI LƐNGGƐ 'DA MƆIZƐ

¹ 'Buki gɛ, ma be olɛnggɛnɔ kɛ Mɔizɛ tɔ̃a zi hã obe Israɛlɛ, do 'da fala kɛ wa zi tɛ li gba zɔ̃ si 'biti gba wese, tɛ kulu lì Yɔrdanɛ ni. Wa zi a kɔ gbangɔlɔ̃ Yɔrdanɛ, dɔ̃ɔ do le Sufɛ. Gbangɔlɛ̃ ni kɛ̃a sanga le Paranɛ do ole Tɔfɛlɛ, Labanɛ, Haserɔtɛ do Di-Zahabɛ.

² (Yolo tɛ ngɔ kala Horɛbɛ we hɔ Kadɛsɛ-Barnea, kɔ wa hɔ do wala ngɔ kalanɔ tɛ Seirɛ, nɛ wa gɔnɔ zi wala tũ 'bu ngɔ nɛ kpo.)

³ 'Do kɛ obe Israɛlɛ wa hɔa nza ngɔ nù Ezipeto ni, ma la sabɛlɛ 'bu nɛ nalɛ. Nɛ ma hɔa zɛkɛ 'da 'bu ngɔ nɛ kpo, kɔ̃ nɛ kpo, nɛ Mɔizɛ ma ngɔ be wenɔ vɛ̃ kɛ NWA ba zi nu ɛ hã a na, a be hã obe Israɛlɛ ni.

⁴ Ma dɛa tɛ̃ ɛ do 'do kɛ Mɔizɛ nɛa ngɔ Sihoni, nwa 'da Oamoni, do Ɔgɛ, nwa 'da Obasanɛ, li bolo ni. Sihoni ɔ zi tɛ Hɛsɛboni do Ɛdrei, nɛ Ɔgɛ ɔ zi Asɛtarɔtɛ.

⁵ Do 'da fala obe Israɛlɛ wa hɔa tɛ ngɔ nù Moabɛ, si 'biti gba wese, tɛ kulu lì Yɔrdanɛ ni, nɛ Mɔizɛ ndua be mbulanɔ 'da Gale hã wa na:

⁶ “'Da fala lɛ zi a tɛ ngɔ kala Horɛbɛ, nɛ NWA Gale 'da lɛ tɔ̃a hã lɛ na: ‘Nɛ ɔa dɛ ti nyanga kala gɛ 'do nɛ nyɛlɛ wena.

⁷ Kɔ nɛ kálá mɛnɔ 'da nɛ, kɔ nɛ lé wala. Nɛ lá dɛ ngɔ nù ngɔ kalanɔ, fala Oamori wa ɔ tɛ nɛ, do o'bili tɛ nùnɔ vɛ̃ kɛ zã wa, kɛ Okanana wa ɔ tɛ nɛ ni: mɛ a li zɔ̃ Yɔrdanɛ, le ngɔ kalanɔ, nyanga kalanɔ si 'biti gɛ̃a wese, lenɔ tɛ li gba zɔ̃ Negɛvɛ, do lenɔ nu gba lì. Nɛ nɛ́ dɛ ngɔ nù Kanana, gbaa we hɔ tɛ ngɔ kala Libanɛ, do nu gã lì Efratɛ.

⁸ Ki ni vɛ̃ a nùnɔ kɛ mi NWA, mi kpua zi mbulu hã ma hã oyaa nɛ, Abrahama, Izaka do Yakɔbɔ do obe zã wa gɛ a ni. Nɛ nɛ́, kɔ nɛ bá ma.’ ”

Mɔizɛ saka owi 'bili we

⁹ Nɛ Mɔizɛ tɔ̃ hã winɔ na: “Fala lɛ zi a tɛ ngɔ kala Sinai i ni, nɛ mi tɔ̃a zi hã nɛ na, mi wè tɛ ba dĩ tole fɔmɔ nɛ zu mi kpo gɔ.

¹⁰ NWA Gale 'da nɛ, a dɛa na, nɛ dɔ ɔ nɛ osɔlanɔ li nza gɛ ni.

¹¹ E kɔ NWA Gale 'da oyaa nɛ dɛ na, nɛ dɔ 'bɔ nɛ ngɔ ki ni fala koto kpo. Nɛ a wélé nu a tɛ nɛ, ɔ nɛ kɛ a kpua zi mbulu nɛ ni.

¹² Nɛ nde nɛ ĩ́ do dia nɛ na, dĩ tole kɛ mi 'dafa wenɔ 'da nɛ, nɛ mi gese nu aka wenɔ, nɛ mi 'bili we mɔ̃lãnɔ 'da nɛ ni, ma wè do mi zu mi kpo gɔ.

¹³ Kɔ nɛ sáká Owele sanga nɛ gɛ we gala mi. Nɛ sáká owanɔ kɛ wa a wi hã zã, nɛ wa a wi dĩ, nɛ wa wia do dɛa toe ni. Nɛ saka sɛ wa kɔ nu kpala nɛ kpo kpo, takɔ mi e sɛ wa do wi zɔ mɔ tɛ ongba wa.

¹⁴ Mi tɔ̃a zi na mɛ ni, nɛ nɛ kɔ̃a zi gɛnɛ linggamɛ 'da mi ni de wena.

¹⁵ Ma kɛ mi ngɛmɛ owi hã zã kɛ wa wia do dɛa toe ni na, wa zɔ mɔ tɛ nɛ. Owinɔ ni, wa dɛ zi 'bɔ to dati belee kɔ nu kpala nɛ. Mi ia ombe do wi ngɔ ogili wele koto kpo, nɛ ombe ngɔ Owele kama kpo, nɛ ombe ngɔ Owele 'bu wa mɔlɔ, nɛ ombe ngɔ Owele 'bu. Nɛ mi hã to zɔ mɔ tɛ nu kpala kpo kpo hã ombe nɛ.

¹⁶ “Do 'da fala ni, nɛ mi hã zi mbulanɔ gɛ hã wanɔ wa nɛ 'bili wenɔ 'da nɛ ni. Mi tɔ̃a hã wa na: ‘Nɛ gí zala nɛ tɛ owenɔ kɛ onya nɛ wa tɔ̃ hã nɛ ni. Nɛ nɛ gɔnɔ ngbangganɔ sanga obe Israɛlɛ, tabi kɛnɔ ngbala obe Israɛlɛ do ogɛnɛnɔ ni do dia nɛ ngboo.

¹⁷ Nɛ tɛ gɔ̀nɔ̀ ngbangga hã wele do bɛlɛ gɔ. Nɛ gɔnɔ ngbangga do bɔlɔ nɛ hã winɔ vɛ̃, wi sã tabi gã wi, nɛ nɛ tɛ dɛ̃ kili wele kpo gɔ, we kɛ nɛ gɔnɔ sɛ ngbangganɔ vɛ̃ do zu li Gale. Fala kɛ we hɔ, kɔ ma nɛ ngɔ nɛ do'do, nɛ nɛ tɛ do ma dati mi, nɛ mi 'bili sɛ ma.’

¹⁸ Do kpo 'da fala ni, nɛ mi hã zi ombula ngɔ mɛnɔ vɛ̃ ma wia na, nɛ dɛ ma ni hã nɛ.

Mɔizɛ tumba Owele na wa yɛnggɛ we zɔ nù Kanana

¹⁹ “'Do nɛ, nɛ NWA Gale 'da lɛ ba nu a hã lɛ, nɛ lɛ kulu ngɔ tɛ ngɔ kala Sinai, nɛ lɛ la do li gba zɔ̃ tɛ li wala ngɔ kalanɔ 'da Oamoni. Mɛ a gã li gba zɔ̃ kɛ nɛ zɔa ma, nɛ ma hã kili hã nɛ. Lɛ nɛa, nɛ lɛ hɔ Kadɛsɛ-Barnea,

^20-21 nɛ mi tɔ̃ hã nɛ na: ‘Nɛ hɔa ngɔ kalanɔ 'da Oamoni, kɛ NWA Gale 'da lɛ do oyaa lɛ, a hã ma hã lɛ ni ia. Nɛ zɔ́ ma! Nɛ nɛ́, kɔ nɛ bi nùi ni, nɛ nɛ ba ma, ɔ nɛ kɛ NWA ba do nu a ni. Nɛ tɛ dà'bà tɛ nɛ gɔ, nɛ nɛ tɛ dɛ̃ 'bɔ kili gɔ.’

²² “Nɛ nde nɛ tɛa zi 'da mi, nɛ nɛ tɔ̃ hã mi na: ‘Lɛ tómbó Owele dati lɛ, kɔ wa yɛnggɛ we zɔ nùi. Wa zɔ sɛ ma, nɛ wa si we tɔ̃ tɛlɛ tɛ kɛ ma ɔ nɛ ni hã lɛ. Nɛ wa be sɛ 'bɔ dia wala kɛ ma wia na, lɛ ba ma ni, do olenɔ kɛ lɛ hɔ sɛ te'de ni.’

²³ Linggamɛ ni dia tɛ mi, nɛ mi kala zi Owele sanga nɛ 'bu ngɔ wa bɔa, wele kpo kɔ nu kpala kpo kpo, nɛ mi tumba wa.

²⁴ Wa nɛa, nɛ wa kũ kalanɔ, nɛ wa la gbaa dɛ kɔ gbangɔlɔ̃ Ɛsɛkɔlɛ, nɛ wa yɛnggɛ ngɔ nùi.

²⁵ Nɛ wa si do owala tenɔ kɛ wa kpa zi ma i mɔ ni hã lɛ. Nɛ wa tɔ̃ hã lɛ na, nùi kɛ NWA Gale 'da lɛ hã ma hã lɛ ni, ma do nyɔngɔmɔ wena.

²⁶ “Wa tɔ̃a na mɛ ni, nɛ nde nɛ bɛ̃a nu NWA Gale 'da nɛ, nɛ nɛ nɛ̀ we ba nùi ni gɔ.

²⁷ Nɛ dungu zi nù tɛ nu tandenɔ 'da nɛ, nɛ nɛ lungu we na: ‘NWA sɛnɛ lɛ, ma hã a fua lɛ ngɔ nù Ezipeto dɛ nza na, a e lɛ ti mbula 'da Oamori, kɔ wa gbɛ lɛ ni.

²⁸ Gulu kɛ lɛ nɛ nɛ i mɔ we ge nde? Lɛ do kili wena, we kɛ owinɔ lɛ tumba wa ni, wa tɔ̃a hã lɛ na, owinɔ i mɔ ni, wa nganda wena, nɛ wa dulu 'bɔ la lɛ. Nɛ wa ɔ kɔ olenɔ kɛ gba ngbonɔ zĩ ma takpa, nɛ ngbonɔ ni nɛa gbaa, nɛ ma to li nza. Wa zɔa 'bɔ odu winɔ kɛ wa a obe zã Anakɛ ni.’

²⁹ “Mi nɛa we zele ni, nɛ mi gisa hã nɛ na: ‘Tɛ nɛ tɛ tànà gɔ, nɛ nɛ tɛ dɛ̃ kili wa gɔ.

³⁰ NWA Gale 'da nɛ, a kpe sɛ dati nɛ, nɛ a bi sɛ bolo zu nɛ, ɔ nɛ kɛ nɛ zɔa zi a tɛ dɛ ma tɛ Ezipeto i,

³¹ do li gba zɔ̃ɛ gɛ ni. Nɛ zɔa tɛlɛ tɛ kɛ a fɔmɔ nɛ li wala gɛnɛ 'da nɛ gbaa we hɔ dɛ ni. A zɔa mɔ tɛ nɛ ɔ nɛ kɛ baa be zɔ do mɔ tɛ be 'da a ni.’

³² Nɛ nde do 'da fala ni, nɛ gbìnì zã nɛ do NWA Gale 'da nɛ gɔ.

³³ Ĩ na, wi la zi dati tɛ li wala gɛnɛ we kpa dia fala ɔi hã nɛ wi a a. Do tũi, nɛ a kpe dati nɛ kɔ lɔnggɔ nyɛa we, nɛ do gba wese, nɛ a kpe dati nɛ kɔ lɔnggɔ zɛ̃ we.”

NWA hã etumbu hã Oisraɛlɛ

³⁴ Mɔizɛ 'bana tɛ wele we ni, nɛ a tɔ̃ 'bɔ na: “nwa zila bi tɛ wi 'da nɛ, nɛ zã a nɔ̃lɔ̃, nɛ a tɔ̃ hã nɛ na:

³⁵ ‘Mi kana tɛ mi na, wele kpo sanga nɛ owinɔ ngangga gɛ, kɛ zu nɛ dè gɔɛ ni, a lé sɛ ngɔ dia nùi kɛ mi kpua zi mbulu hã ma hã oyaa nɛ ni gɔ.

³⁶ Nɛ nde tati a Kalɛbɛ, be 'da Yɛfune, a zɔ sɛ le ni. Mi hã sɛ nùi a yɛnggɛ ngɔ nɛ we zɔ ma ni hã a, do obe zã a, we kɛ a 'bana dɛ olo nu mi.’ ” Nɛ Mɔizɛ tɔ̃ na:

³⁷ “We duzu nɛ, ma kɛ zã nwa nɔ̃lɔ̃ zi 'bɔ dɛ tɛ mi, nɛ a tɔ̃ hã mi na: ‘Mɔ, Mɔizɛ, mɔ lé sɛ tɛ mɛ 'bɔ ngɔ nùi ni gɔ.

³⁸ Nɛ nde wi kɛ a le sɛ 'di mɔ, wi a wi gala mɔ Yozue, be 'da Nunɛ. Mɔ ngándá sila a, we kɛ a kpe sɛ dati obe Israɛlɛ na, wa bi nùi ni, kɔ wa ba ma.’

³⁹ “'Do nɛ, nɛ nwa tɔ̃a zi hã lɛ vɛ̃ na: ‘Nɛ tɔ̃a zi we 'da obenɔ 'da nɛ na, owi sɛnɛ nɛ, wa kala sɛ wa si do wa. Nɛ nde sɔɛ gɛ, obenɔ ni, kɛ wa ĩ̀ ti gɔnɔ sanga 'dã mɔ do dia mɔ gɔ ni, wa le sɛ fala nɛ kpo do Yozue ngɔ nùi ni. Nɛ mi hã sɛ nùi ni hã wa, nɛ wa ɔ ngɔ nɛ.

⁴⁰ Nɛ nde we nɛ, nɛ kpóló tɛ nɛ, nɛ nɛ la do li gba zɔ̃ɛ si li wala gba lì Sala Tɔ̃.’

⁴¹ “Nɛ nɛa zi we zele ni, nɛ nɛ gisa hã mi na: ‘Lɛ dɛa 'dã mɔ dɛ 'da NWA. Nɛ nde ngangga ni, lɛ kɔ̃a we nɛ we bi bolo ɔ nɛ kɛ NWA Gale 'da lɛ ba do nu a hã lɛ ni.’ Nɛ wele do wele 'dafa zi tɛ̃ ɛ we bi bole, we kɛ nɛ lengge zi na, lo ba sɛ nùi ngɔ kalanɔ i da dɔ̃ iko.

⁴² Ma kɛ NWA tɔ̃a hã mi na: ‘Mɔ bá nu mɔ hã wa na, da dɛ kɔ wa nɛ́ bole gɔ, we kɛ mi 'do wa bina. Wa nɛ, nɛ owi sɛnɛ wa, wa bi sɛ wa, nɛ wa nɛ ngɔ wa.’

⁴³ Mi tɔ̃a zi toe ni hã nɛ, nɛ nɛ kɔ̃̀ zi we zele mi gɔ. Nɛ bɛ̃a we zele nu nwa, nɛ nɛ dɛa wali we nɛ we ba nùi ngɔ kalanɔ i.

⁴⁴ Nɛ Oamori kɛ wa ɔ ngɔ kalanɔ ni, wa zĩlĩ, nɛ wa bi nɛ tɛ Seirɛ, nɛ wa ndi 'do nɛ ɔ nɛ kɛ ogɔlɔ wa ndi 'do wele ni gbaa, nɛ wa hɔ Horma.

⁴⁵ Nɛ nɛa zi we kpolo tɛ nɛ, nɛ nɛ ala nu nɛ hã nwa, nɛ nde a kɔ̃̀ zi we zele nɛ gɔ. A lènggè zi do nɛ gɔ.

⁴⁶ Ma kɛ lɛ 'bana zi dɛ Kadɛsɛ-Barnea, nɛ 'do lɛ nyɛlɛ zi dɛ di ni wena.