DANIƐLƐ 9 - WE NU GALE 1995

Sambala 'da Daniɛlɛ

^1-2 “Do kɔ kuti sabɛlɛ kɛ Dariusi, be 'da Sɛrsɛsi, wi nu kpala Omɛdɛ, a dungu nwa ngɔ nù Babilonia ni, nɛ mi Daniɛlɛ, mi zi tɛ yambala mɔ kɔ 'buku 'da Gale. Mi fa zi we ĩ ti gulu wenɔ NWA Gale tɔ̃a hã wi gba olo nu a Yeremi ngɔ osabɛlɛnɔ 'bu nɛ sambo, kɛ Yeruzalɛmɛ ma 'danga sɛ nɛ ni.

³ Mi bɛ̃a nyɔngɔ mɔ, nɛ mi he'de tulu gɛla, we 'bakoe 'da mi. Nɛ mi yolo dati NWA we sambala a, do we ala nu mi hã a.

⁴ Mi sambala NWA, nɛ mi gbala 'dã mɛnɔ 'da owinɔ 'da mi hã a. Mi na: “Aa NWA, mɔ a Gale kɛ mɔ gã wena, nɛ lɛ wia tɛ dɛ kili mɔ. Mɔ dɛ olo gba tɔkɛ kɛ mɔ gba do owinɔ 'da mɔ ni fai, nɛ mɔ be dia zã 'da mɔ hã owanɔ wa kɔ̃a gɛnɛ mɔ, nɛ wa dɛ mbulanɔ 'da mɔ ni.

⁵ “Nɛ nde lɛ dɛa 'dã mɔ, nɛ lɛ tia do ngbangga. Lɛ dɛa nga zu dɛ tɛ mɔ, nɛ lɛ bɛ̃a mbulanɔ 'da mɔ.

⁶ Lɛ zèlè nu Owi gba olo nu mɔ, kɛ wa tɔ̃a zi lɛnggɛ do zu li mɔ hã Onwanɔ 'da lɛ, do ogã winɔ, do oyaa lɛ, do owinɔ ngɔ nùi vɛ̃ ni gɔ.

⁷ Mɔ NWA, mɔ dɛ mɔ do bɔlɔ nɛ fai, nɛ nde sɔɛ gɛ dɛa mɔ tɛ lɛ hã sape hã lɛ. Nɛ ma na mɛ ni we duzu lɛ vɛ̃, owi Yeruzalɛmɛ do Oyuda, do tala gele obe Israɛlɛ kɛ wa dɔ̃ɔ tabi wa nyɛla wena, do wanɔ mɔ ndaka wa, nɛ mɔ pɛsɛ wa dɛ ngɔ gele nùnɔ we kɛ wa dɛ̃ olo nu mɔ gɔ ni.

⁸ Aa NWA, lɛ, do Onwanɔ 'da lɛ, do ogã winɔ, do oyaa lɛ, lɛ vɛ̃ do sape, we kɛ lɛ bɛ̃a we dɛ olo nu mɔ.

⁹ Nɛ gɛnɛ kɔ lɛ dɛa nga zu dɛ tɛ mɔ NWA Gale 'da lɛ, nɛ nde mɔ bia dia zã 'da mɔ hã lɛ, nɛ mɔ fua ku'da 'dã mɛ zu lɛ.

¹⁰ “Mɔ tɔ̃a zi hã lɛ na, lɛ dɛ́ mbulanɔ kɛ mɔ hã ma hã lɛ do wala 'da owi gba olo nu mɔ, nɛ nde lɛ zèlè we nu mɔ gɔ.

¹¹ Lɛ obe Israɛlɛ vɛ̃, lɛ bɛ̃a mbula nu mɔ, nɛ lɛ kɔ̃̀ we zele wenɔ mɔ tɔ̃a hã lɛ ni gɔ. Lɛ dɛa 'dã mɔ, nɛ mɔ dɛa na, ofɔmbanɔ kɛ Mɔizɛ, wi toe 'da mɔ kɔma zi kɔ 'buki 'da a ni, ma te ngɔ lɛ.

¹² Mɔ tɔ̃a zi we dɛ ngɔ lɛ, do ngɔ owinɔ wa kpe ti lɛ ni, nɛ ma dɛa tɛ̃ ɛ nɛ́ kɛ mɔ tɔ̃a ni. Mɔ fi gã 'bako kɔ le Yeruzalɛmɛ. Nɛ tɛlɛ tɛ 'bakoe ni tè mbe kɔ gele le fala kpo gɔ.

¹³ Nɛ 'bakonɔ vɛ̃ ma kpa lɛ gɛ, wa kɔma zi ma kɔ 'buku mbula 'da Mɔizɛ kɔma. Gɛnɛ kɔ na mɛ ni, nɛ nde lɛ àlà mbe nu lɛ hã mɔ, NWA Gale 'da lɛ na, mɔ mbɔkɔ zã mɔ gɔ, nɛ lɛ là fala dɛ 'dã mɛnɔ 'da lɛ gɔ, nɛ lɛ è 'bɔ linggamɔ zu lɛ we ĩ ti gbãlã we 'da mɔ gɔ.

¹⁴ Ma kɛ mɔ dɛa na, lɛ kpa 'bakoe gɛ, ɔ nɛ kɛ mɔ tɔ̃a zi ni. Mba gɔ, mɛnɔ vɛ̃ kɛ mɔ NWA Gale 'da lɛ mɔ dɛ ni, ma a bɔlɔ, nɛ nde lɛ bɛ̃a we zele mbulanɔ 'da mɔ.

¹⁵ “Aa NWA Gale 'da lɛ, mɔ bia zɛ́ ngawi 'da mɔ ngɔ nù Ezipeto, nɛ mɔ fua owinɔ 'da mɔ ngɔ nùi ni do'do, nɛ li mɔ 'bana dɔ̃lɔ̃ we nɛ tia do sɔɛ gɛ. Hã mɔ zɔ̃, lɛ bɛ̃a we nu mɔ, nɛ lɛ dɛa 'dã mɔ.

¹⁶ Nɛ nde mɔ NWA, mɔ dɛa zi de mɔ hã lɛ fai. Mɔ kɔ̃́, nɛ zã mɔ tɛ nɔ̃̀lɔ̃̀ dɛ tɛ le Yeruzalɛmɛ fai gɔ, we kɛ mɛ a le 'da mɔ, do kala santo 'da mɔ. Owinɔ wa zĩ lɛ takpa ni, wa mɔmɔ le 'da lɛ, nɛ wa hã sape hã lɛ owinɔ 'da mɔ, we duzu kɛ lɛ dɛa 'dã mɔ, nɛ oyaa lɛ wa dɛa zi 'bɔ 'dã mɔ.

¹⁷ Aa NWA Gale 'da lɛ, mɔ zélé sambala ala nu wi mi sambala do mɔ gɛ. Mɔ síkí li mɔ dɛ tɛ Tɛmpɛloe 'da mɔ kɛ ma 'danga ni, nɛ mɔ 'dafa ma, sɛ a winɔ wa ĩ na, mɔ a Gale 'da lɛ de.

¹⁸ Aa Gale 'da mi, mɔ gɛ́ zala mɔ hã mɔ zele we gɛ. Mɔ ká mɔ do sɔ̃a li, hã mɔ zɔ tɛlɛ tɛ kɛ wa 'danga do le 'da lɛ gɛ. Nɛ nde mɛ a le kɛ wa ia hã mɔ. Kɔ lɛ álá nu lɛ hã mɔ, nɛ lɛ gbíní zã lɛ do dia dɛa mɛnɔ lɛ dɛa hã mɔ ni gɔ, nɛ nde lɛ gbini zã lɛ do kɔ̃a zã 'da mɔ, kɛ ma é gɔɛ ni.

¹⁹ Aa NWA, mɔ gɛ́ zala mɔ hã lɛ! Mɔ fó ku'da 'dã mɛnɔ zu lɛ, nɛ mɔ gálá lɛ. Aa Gale 'da mi, mɔ tɛ 'bɔ̀ 'bɔa gɔ. Mɔ bí ngɔ le gɛ, nɛ mɔ bi 'bɔ zu lɛ owi kɔ nɛ, we kɛ lɛ a owinɔ 'da mɔ, nɛ le gɛ a mɔ mɔ.

Anzɛ Gabriɛlɛ tɔ̃a gulu yalɛ hã Daniɛlɛ

²⁰ “Mi sambala Gale ni gbaa, nɛ mi gbala 'dã mɛnɔ 'da mi, do kɛ 'da obe Israɛlɛ, owinɔ 'da mi. Nɛ mi ala 'bɔ nu mi hã NWA Gale 'da mi, we duzu kala santoe 'da a.

²¹ Kɔ mi tɛ sambala na mɛ ni, nɛ anzɛ Gabriɛlɛ, kɛ mi zɔa sɔ a kɔ yalɛ ni, a bũlũ do gbɛngɛ tɛ, nɛ a kɔlɔ do mi. A hɔa do 'da fala wa hã do dɔnggamɔ gɛ̃a wese ni.

²² Nɛ a ma ngɔ wele we hã mi na: ‘Daniɛlɛ, mi tɛa na, mi be gulu wenɔ mɔ zila ni hã mɔ.

²³ 'Da fala mɔ ma ngɔ ala nu mɔ hã Gale ni, nɛ a gisa nu nɛ hã mɔ. A kɔ̃a gɛnɛ mɔ, ma kɛ mi tɛa we tɔ̃ hã mɔ ni. Kɔ mɔ gɛ́ zala mɔ, nɛ mɔ dɛ́ nganda we ĩ ti gulu mɛ mɔ zɔa ni do dia nɛ.

²⁴ “ ‘Gale wia sabɛlɛ sambo fala 'bu nɛ sambo we owinɔ 'da mɔ, do we le santo 'da nɛ, takɔ nɛ la fala bɛ̃ nu a Gale, nɛ nɛ ɔmɔ tɛ dɛ 'dã mɔ. Nɛ Gale a fo sɛ 'dã mɛ ni zu nɛ, nɛ a dɛ sɛ na, nɛ dɛ bɔlɔ zu dɛa mɔ fai. Na mɛ ni, omɛnɔ wi gba olo nu Gale zɔa, nɛ a tɔ̃a ni, ma dɛ sɛ tɛ̃ ɛ. Nɛ wa 'dafa sɛ tɔa Tɛmpɛlo kɛ ma santo wena ni dɛ olo nɛ.

²⁵ Mɛ ma wia na, mɔ ĩ ti nɛ ni, ma kɛ: Yolo do 'da fala wa tɔ̃a lɛnggɛ 'dafa le Yeruzalɛmɛ dɛ olo nɛ ni, gbaa we hɔ ngɔ wi kɛ Gale saka a ni, ma ɔ sɛ sabɛlɛ sambo fala sambo. 'Do nɛ, nɛ wa 'dafa sɛ Yeruzalɛmɛ, do owalanɔ kɔ nɛ ni, do ngbonɔ kɛ ma zĩ ma takpa ni, nɛ toe ni ma ɔ sɛ sabɛlɛ sambo fala 'bu nɛ gazɛlɛ ngɔ nɛ bɔa. Nɛ nde mɛ sɛ a 'da fala ngamɔ.

²⁶ Nɛ do Sɔkpɔ kɔ̃ tũnɔ ni, nɛ wa gbɛ sɛ wi kɛ Gale saka a ni, nɛ fo sɛ wi amba zu a bina. 'Do nɛ, nɛ mbé gã wi a hɔ sɛ do osodanɔ 'da a, nɛ a 'danga sɛ le Yeruzalɛmɛ, do tɔa Tɛmpɛloe. Nɛ nde zã Gale ma nɔ̃lɔ̃ sɛ, nɛ a bi sɛ gã wi ni, nɛ a gbɛ a. Nɛ nde dati kɛ na gã wi ni fe ni, nɛ bolo ma te sɛ kɔ le ni, nɛ ma 'danga sɛ wena, ɔ nɛ kɛ Gale 'bili ni.

²⁷ Do tala ndɔti sabɛlɛ sambo ni, nɛ gã wi ni a e sɛ nga mbula ngɔ ogba gili wele. Nɛ 'do sabɛlɛ talɛ do dɔ nɛ, a bɛ̃ sɛ na, wa tɛ gbɛ osa'de hã Gale, do ha dɔnggamɔ hã a gɔ. Wi 'danga mɛ ni, a dɛ sɛ 'dã mɛnɔ 'da a gbaa na, kɔ̃ tũ fie Gale 'bili dɛ ngɔ a ni, ma we sɛ nɛ de.’ ”