DANIƐLƐ 8 - WE NU GALE 1995

Daniɛlɛ zɔa wili bata do wili dua kɔ yalɛ

¹ “Do kɔ talɛ sabɛlɛ dɛa to nwa 'da Baltazarɛ, nɛ mi Daniɛlɛ, mi yala 'bɔ mbé zu mi, nɛ mɔ hɔa li mi kɔ yalɛ ni.

² Mi yala zu mi, nɛ nde mi a tɛ Suzɛ, le kɛ gba ngbo zĩ ma takpa, tɛ ngɔ 'bili tɛ nù Elamɛ. Nɛ mi dɛ nu lì kɛ li nɛ a Ulai.

³ Nɛ mi nɛa we ka mɔ, nɛ mi zɔ wili bata, nɛ nde a yula dɛ nu lì ni. A do zamba zu a bɔa, nɛ ma dulu wena. Mbee nɛ dulu nɛa ngɔ ngbɛ ɛ. Zamba a kɛ dulu wena ni, ma kunu do ngɔ go'do.

⁴ Nɛ mi zɔa wili bata ni tɛ fi zamba zu a si 'biti gɛ̃a wese, si gbãlã ngɔ, do si ba gɔtɔ. Mbé gele sa'de kpo wè zi we yolo dati a gɔ. Nɛ wa wè zi we fo wele ti kɔ̃ a gɔ. A dɛ mɛnɔ ɔ nɛ kɛ zã a kɔ̃a ni, nɛ ngawi 'da a gã dɛ dati gã fai.

⁵ “Mi 'bana tɛ lengge mɛnɔ mi zɔa ni, nɛ wili dua yolo si 'biti gɛ̃a wese, nɛ a yu nganda wena, ɔ nɛ kɛ nyanga a ndɔ́ nù gɔ ni. A do gba sɔ̃ zamba zu a, kɛ ma do ngɔ zɔ̃ a.

⁶ Nɛ a nɛ kɔlɔ do wili bata mi zɔa sɔ a dɛ nu lì ni, nɛ a la dɛ tɛ̃ a do ngawi 'da a vɛ̃.

⁷ Mi zɔa a tɛ bi wili bata do nɔ̃lɔ̃ zã vɛ̃. Nɛ a to a, nɛ a gbini zamba zu a bɔa nɛ. Nɛ wili bata ni 'bɔ do ngawi we yolo dati wili dua bina. Nɛ wili dua tia do a, nɛ a ma a ti nyanga a. Nɛ wele wè we fo a ti kɔ̃ wili dua ni gɔ.

⁸ Nɛ ngawi 'da wili dua ma gã dɛ dati gã fai. A nɛa we kpa ngawi wena do'do, nɛ gã zamba zu a gbini. Nɛ mbe gele nɛ nalɛ kunu do olo ki ni. Mɔ zɔ ma, nɛ mɔ ɔngbɔ. Ma zɛnggɛ kpo kpo si 'biti falanɔ nalɛ tɛ nyanga nza gɛ.

⁹ “Nɛ mbé be zamba a sɔlɔ 'bɔ dɛ tɛ mbe kpo sanga ozanɔ nalɛ ni. Nɛ be za ni gã, nɛ a be ngawi 'da a si ba gɔtɔ, si 'biti gba wese, do si ngɔ nùi kɛ ma dia la mɔ vɛ̃ ni.

¹⁰ Be za ni bi 'bɔ do owinɔ tɛ li nza i. Nɛ ombe sanga owinɔ ni, mba do mbe osɔlanɔ, wa ala nù, nɛ be za ni ma wa ti nyanga a.

¹¹ Nɛ a bi 'bɔ gã wi ngɔ owinɔ li nza i ni. Nɛ a kpe wala dɔnggamɛnɔ kɛ wa tɛ do ma hã gã wi tũ kpo kpo ni, nɛ a faka tɔa Tɛmpɛloe 'da gã wi ni.

¹² Nɛ owinɔ wa la fala hã dɔnggamɛnɔ kɛ wa hã zi ma tũ kpo kpo fai ni do'do, nɛ wa ma ngɔ dɛ 'dã mɔ dɛ kɔ Tɛmpɛloe ni. Nɛ be za ni 'danga ngbongbo sambala do'do. Nɛ mɛnɔ vɛ̃ kɛ a kɔ̃a we dɛ ma ni, ma dɛa tɛ̃ ɛ.

¹³ “'Do nɛ, nɛ mi zele gɛlɛ anzɛ tɛ aka ngba a na: ‘Omɛnɔ ma bia tɛ̃ ɛ li wi gɛ, ma ɔ sɛ fai nde? Ma Sɔkpɔ sɛ soe ki nge nde? Wa bɛ̃ sɛ gɛnɛ hã dɔnggamɛnɔ, kɛ wa hã zi ma tũ kpo kpo ni gbaa soe ki nge nde? Wa faka sɛ Tɛmpɛloe, nɛ wa ma owinɔ li nza i ti nyanga wa, nɛ wa 'danga mɛnɔ yala iko fai nde?’

¹⁴ Nɛ mi zele gɛlɛ mbe kpo anzɛ tɛ gese na: ‘Ma dɛ sɛ ni gbaa 'do tũ koto kpo, do kama do 'bu nɛ mɔlɔ. Kɔ̃ tũnɔ ni vɛ̃, wa hã sɛ 'bɔ dɔnggamɛnɔ do titole do gɛ̃a wese gɔ. Nɛ 'do nɛ, nɛ wa 'dafa sɛ Tɛmpɛloe dɛ olo nɛ.’

Anzɛ tɔ̃a gulu yalɛ ni hã Daniɛlɛ

¹⁵ “Mi Daniɛlɛ, mi tɛ fa gulu mɛ ma hɔa li mi ni, nɛ mɔ ɔ nɛ wele ni tɛa, nɛ ma yolo dɛ dati mi.

¹⁶ Nɛ mi zele gɛlɛ wele, tɛ he mɔ nu lì Ulai i na: ‘Gabriɛlɛ! Mɔ tɔ̃ gulu mɛ ma hɔa li wi gɛ hã a!’

¹⁷ Kɔ Gabriɛlɛ nɛa we zele ni, nɛ a tɛ, nɛ a kɔlɔ do mi. Nɛ kili ba mi wena, nɛ mi te, nɛ mi gu li mi nù. Nɛ a tɔ̃ hã mi na: ‘Aa mɔ, be 'da wele, mɔ ĩ́ na, mɛ ma hɔa li mɔ gɛ, ma dɛ sɛ tɛ̃ ɛ do ndɔti 'da fala lɛ do ma gɛ.’

¹⁸ 'Da fala a ma ngɔ wele we ni, nɛ nde mi 'bana gu li mi nù, nɛ zu mi vĩ do'do. Nɛ a 'bia tɛ mi, nɛ a ba mi dɛ ngɔ,

¹⁹ nɛ a tɔ̃ hã mi na: ‘Gale wia ngba soe kɛ a be sɛ Sɔkpɔ nɔ̃lɔ̃ zã 'da a dɛ nza ni ia. Kɔ mi nɛ be mɛ ma dɛ sɛ tɛ̃ ɛ ngba soe ni hã mɔ.

²⁰ Wili bata kɛ mɔ zɔa a, nɛ nde zamba zu a bɔa ni, a be onù Mɛdɛ do Pɛrsɛ.

²¹ Nɛ wili dua be nù Grɛsɛ. Nɛ gã za kɛ ma do ngɔ zɔ̃ a ni, ma be kuti nwa ngɔ nùi ni.

²² 'Da fala za ni ma gbini ni, nɛ mbe gele nɛ nalɛ hɔa dɛ olo nɛ. Ki ni ma be na, nùi olo nwa wele kɛ dati ni, ma kɛ̃ sɛ sanga tɛ ngbɛ ɛ dɛ kɔ̃ onwa nalɛ. Nɛ nde ngawi 'da wa, ma wé sɛ kɔ̃ do kɛ 'da wele kɛ dati ni gɔ.

²³ “ ‘'Da fala dɛa to nwa 'da owinɔ ni ma kɔlɔ sɛ do Sɔkpɔ nɛ ni, nɛ o'dã winɔ wa dɛ sɛ Sɔkpɔ tala 'dã mɔ. Nɛ mbe wi 'dã sila ngboo, kɛ a ɔkɔlɔ wele wena ni, a hɔ sɛ nwa.

²⁴ Ngawi 'da a ma gã sɛ wena, nɛ nde ngawi ni, yòlò dɛ kɔ̃ a wele nɛ gɔ. A 'danga sɛ omɔ wena, nɛ mɛnɔ vɛ̃ kɛ a kɔ̃ sɛ we dɛ ma ni, ma dɛ sɛ tɛ̃ ɛ. A gbɛ sɛ ogã winɔ, nɛ a gbɛ 'bɔ owinɔ 'da Gale.

²⁵ Nɛ a ɔlɔ sɛ ogele winɔ, we duzu kɛ hã zã a dɔ wena. Wali 'da a ma gã sɛ dɛ dati, nɛ a gbɛ sɛ ogili winɔ kɛ wa lengge na, mɔ kpo dɛ́ sɛ lo gɔ ni. A dɛ sɛ 'bɔ nga zu dɛ tɛ Wele kɛ a a gã wi ngɔ Onwanɔ vɛ̃ ni. Nɛ do 'da fala ni, a fe sɛ. Nɛ nde wele kpo gbɛ́ sɛ a gɔ.

²⁶ Hã mɔ ĩ́ na, mɛ kɛ mɔ zɔa ma si ngɔ dɔnggamɛnɔ, kɛ wa hã ma do gɛ̃a wese do titole, nɛ wa tɔ̃a gulu nɛ hã mɔ ni, mɛ a gbãlã we. Kɔ mɔ usu ma dɛ kɔ zã mɔ, mɔ tɛ tɔ̃̀ ma gɔ. Mba gɔ, ngba soe ma dɛ sɛ tɛ̃ ɛ ni, ma 'bana nyɛlɛ wena.’

²⁷ “Do 'da fala ni, nɛ mi Daniɛlɛ, mi mbɔka, nɛ mi te do zɛlɛ, nɛ mi ɔa nù 'do nɛ nyɛlɛ wena. Mi nɛa we kpa ngawi, nɛ mi kpolo tɛ mi tɛ toe 'da mi 'da nwa i. Nɛ nde mɛ ma hɔa li mi ni, ma vĩ zu mi wena, we kɛ mi ĩ̀ ti gulu nɛ gɔ.