DANIƐLƐ 7 - WE NU GALE 1995

Daniɛlɛ zɔa osa'de nalɛ do li yalɛ

¹ Do kuti sabɛlɛ dɛa to nwa 'da Baltazarɛ ngɔ nù Babilonia, nɛ Daniɛlɛ ɔa nù do tũ, nɛ a yala zu a, nɛ mɔ hɔa li a kɔ yalɛ ni. Nɛ a kɔma yalɛ ni

² na: “Mi ɔa nù do tũ, nɛ mi zɔa mɔ kɔ yalɛ, nɛ nde gba bũ yula si 'biti falanɔ nalɛ tɛ nyanga nza, nɛ ma pɛsɛ dɛ ngɔ gba lì.

³ Nɛ ogã gba sɔ̃ sa'de nalɛ wa yolo 'dɔ gba lì ni, nɛ wa hɔ nza. Sa'de kpo kpo si tɛ̃ ɛ do ongba a.

⁴ Wele kɛ dati, a wia kɔ̃ do gbɔgbɔ, nɛ nde a do osala 'baka a ɔ nɛ sala 'baka ziki ni. Mi tɛ ka mɔ tɛ̃ a, nɛ wa zu'du sala 'baka a dɛ nù, nɛ wa bɔlɔ a dɛ ngɔ. Nɛ a yolo dɛ ngɔ nyanga a kɛ 'do gɛ ɔ nɛ wele ni. Nɛ wa dɛa na, linggamɔ zu wele tɛ dɛ zu a.

⁵ Sa'de wele kɛ bɔa wia kɔ̃ do sa'de li a a ursi ni. Nɛ a yula dɛ ngɔ mbee nyanga a, nɛ a 'bɔmɔ gbãlã ngu'du sa'de talɛ dɛ li gogo a. Nɛ wa ba nu wa hã a na, a bɔlɔ tɛ̃ a, kɔ a nyɔngɔ mulu sa'de, ɔ nɛ kɛ ma wia do a ni.

⁶ Nɛ mi nɛ ka mɔ, nɛ mbé gele sa'de hɔ. A wia kɔ̃ do gɔ̃̀, nɛ nde sala 'baka a nalɛ ɔ nɛ sala 'baka nɔɛ ni. A 'bɔ do zu a nalɛ, nɛ wa hã ngawi hã a we dungu ngɔ ongba a.

⁷ “Mi 'bana tɛ ka mɔ tɛ mɛnɔ ma hɔ dɛ li mi kɔ yalɛ ni, nɛ mi zɔ sa'de kɛ nalɛ. Mɛ a gba sɔ sa'de, kɛ a do ngawi wena, nɛ a gã 'bɔ wena. Mɔ zɔ a, nɛ kili ba mɔ iko. Gogo a a mɔ bolo, a ɛ̃ do sanga owinɔ kɛ a kpa wa ni, nɛ a nyɔngɔ wa, nɛ a ma kɛnɔ a nyɔ̀ngɔ̀ gɔ ni ti nyanga a. Zamba zu a 'bu, nɛ a wè mbe kɔ̃ do ogele sa'denɔ talɛ sɔ dati ni be sĩ gɔ.

⁸ Mi nɛ ka mɔ tɛ ozanɔ zu a ni, nɛ mbé be nɛ ma ngɔ kunu dɛ ti gele kɛnɔ ni, nɛ ma fo mbe ã za zu a talɛ do'do. Mbé za ni do gbali ɛ ɔ nɛ gbali wele ni. Nɛ ma 'bɔ do nu ɛ, nɛ ma tɔ̃ lɛnggɛ gã zu.

Daniɛlɛ zɔa kpasa wi wili kɔ yalɛ

⁹ “Mi 'bana tɛ ka mɔ tɛ nɛ, nɛ mi zɔ, nɛ nde wa 'dafa okpongbo nwa. Nɛ mbe kpasa wi wili dungu ngɔ mbe kpongbe ni kpo. A hi'da tulu, ma fɛnga nde nde ɔ nɛ gba kutu ni, nɛ mili zu a fɛnga ɔ nɛ tukia ni. Kpongbo dungi 'da a nyɛ do we, okolo nyanga nɛ yele ɔ nɛ gba nyɛa we ni,

¹⁰ nɛ we ma fo do dati a ɔ nɛ lì ni. Gba gili Owele koto do koto, wa yolo dɛ dati a, we dɛ to hã a. Nɛ ombé gba gili wele dɛlɛ wena, wa yolo dati a, takɔ a gɔnɔ we 'da wa. 'Da fala gɔnɔ we ma wia, nɛ wa ma ngɔ hũi li 'bukunɔ.

¹¹ Mi 'bana tɛ zɔ be zamba zu sa'de ni, do zele lɛnggɛ gã zunɔ a tɔ̃ ma ni, nɛ mi nɛ ka mɔ, nɛ nde wa gbɛa sa'de wele kɛ nalɛ ni do'do. Nɛ wa da wɔlɔ a li we, nɛ ma bɛlɛ vɛ̃.

¹² Nɛ ngawi 'da otala gele sa'denɔ ni, ma fo 'bɔ tɛ̃ ɛ. Nɛ nde wa hã wala hã wa na, wa 'bana do tunu li wa gbaa we hɔ ndɔti tũi wa wia hã wa ni.

¹³ “Mi 'bana tɛ zɔ omɛnɔ ma hɔ li mi kɔ yalɛ do tũi ni, nɛ mi zɔ mɔ ɔ nɛ wele ni tɛ sanga kutunɔ li nza i. Wi ni nɛa, nɛ wa kã a dɛ ti kpasa wi wili a dungu ngɔ kpongbo nwa ni.

¹⁴ Wa hã ngawi do dɔ̃lɔ̃ li hã a, nɛ wa ia a do nwa, takɔ onu kɔnggɔnɔ vɛ̃, do nu fɛlɛ kulanɔ vɛ̃, do lɛnggɛnɔ vɛ̃, wa dɛ to hã a. To nwa 'da a, ma ɔ sɛ fai, ma sɛ do ndɔti nɛ bina. Nɛ le nwa 'da a, ma 'dángá sɛ gɔ.

Anzɛ tɔ̃a gulu yalɛ kɛ dati ni hã Daniɛlɛ

¹⁵ “Oyalɛnɔ mi yala ni, ma hã 'bako hã mi wena, nɛ ma 'danga linggamɔ zu mi.

¹⁶ Nɛ mi nɛa, nɛ mi kɔlɔ do mbe wele kpo kɔ owinɔ wa yolo di ni ni, nɛ mi aka a na, a tɔ̃ ngbongbo gulu mɛ mi zɔa li yalɛ ni hã mi. Nɛ a tɔ̃a gulu nɛ hã mi.

¹⁷ A na: ‘Ogã sa'denɔ nalɛ ni, ma be onwa nalɛ kɛ wa kpolo sɛ ngba wa ngɔ nù gɛ.

¹⁸ 'Do nwanɔ nalɛ ni, nɛ owinɔ 'da Gale kɛ a gã nɛa ngɔ mɔ vɛ̃ ni, wa ba sɛ to nwa. Nɛ wa fɔmɔ sɛ ma gbaa, ndɔti nɛ sɛ bina.’

¹⁹ “'Do nɛ, nɛ mi kɔ̃a we ĩ ti gulu sa'de wele kɛ nalɛ ni ngboo, we kɛ a si tɛ̃ ɛ do wanɔ talɛ dati ni. Mɔ zɔ a, nɛ kili ba mɔ iko. Gogo a a mɔ bolo, nɛ ɛ̃lɛ̃ kɔ̃ a a tũ mɔ bolo. A ɛ̃ sanga winɔ kɛ a kpa wa ni do gogo a, do ɛ̃lɛ̃ kɔ̃ a, nɛ a nyɔngɔ wa, nɛ a ma kɛnɔ a nyɔ̀ngɔ̀ gɔ ni ti nyanga a.

²⁰ Nɛ mi kɔ̃a 'bɔ we ĩ ti gulu zamba zu a 'bu ni, do gulu be zamba zu a kɛ ma kunu do 'do, nɛ ma fua ã za zu a talɛ do'do ni. Be za ni do gbali ɛ boe, nɛ ma do nu ɛ, nɛ ma tɔ̃ lɛnggɛ gã zu. Nɛ ma hã zi 'bɔ kili nɛa ngɔ ogele zanɔ vɛ̃.

²¹ Mi tɛ ka mɔ tɛ be za ni, nɛ mi zɔ, nɛ nde ma tɛ bi bolo do owinɔ 'da Gale, nɛ ma ma ngɔ nɛ ngɔ wa.

²² Nɛ kpasa wi wili tili, nɛ a gɔnɔ dia gulu we hã owinɔ 'da Gale, kɛ a gã nɛa ngɔ mɔ vɛ̃ ni. Nɛ 'do nɛ, nɛ ngba soe nɛ wia, nɛ owinɔ 'da Gale wa ba to nwa.

²³ “Wa tɔ̃a gulu sa'de wele kɛ nalɛ ni hã mi na: ‘Mɛ a le nwa kɛ nalɛ ngɔ nù gɛ, ma si tɛ̃ ɛ do gele le nwanɔ vɛ̃. Le nwa ni a 'danga sɛ lenɔ ngɔ nù gɛ vɛ̃, nɛ a ma sɛ ma ti nyanga a.

²⁴ Oza sa'denɔ 'bu ni, ma be Onwanɔ 'bu kɛ wa dungu sɛ ngɔ le nwa ni. Wa dɛ sɛ to nwa dɛ 'do ngba wa. Nɛ 'do nɛ, nɛ nwa wele kɛ 'bu ngɔ nɛ kpo a hɔ sɛ, nɛ a si sɛ tɛ̃ ɛ do wanɔ dati ni. A fo sɛ ogele nwa talɛ, sɛ nɛ a ba to nwa 'da a de.

²⁵ A tɔ̃ sɛ 'dã we do zu li Gale kɛ a gã nɛa ngɔ mɔ vɛ̃ ni, nɛ a hã sɛ ngamɔ hã owinɔ 'da Gale. A fa sɛ we 'danga mbulanɔ do tũ ɛngganɔ 'da wa. Nɛ wa dungu sɛ ti mbula 'da a 'do sabɛlɛ talɛ do dɔ nɛ.

²⁶ 'Do nɛ, nɛ owi gɔnɔ wenɔ tɛ li nza i, wa gɔnɔ sɛ we 'da a, nɛ wa fo to nwa kɔ̃ a do'do. Wa 'danga sɛ dɛa to nwa 'da a, nɛ ma Sɔkpɔ sɛ fai.

²⁷ Wa hã sɛ ngawi hã owinɔ 'da Gale, kɛ a gã nɛa ngɔ mɔ vɛ̃ ni. Nɛ wa e sɛ wa do nwa, nɛ lenɔ ngɔ nù gɛ vɛ̃ sɛ ti mbula 'da wa. Dɛa to nwa 'da wa, ma ɔ sɛ fai, ndɔti nɛ sɛ bina. Nɛ owi ngawinɔ ngɔ nù gɛ, wa zele sɛ nu wa, nɛ wa dɛ to hã wa.’

²⁸ “Ki ni a Sɔkpɔ lɛnggɛ 'da mi Daniɛlɛ. Mɛnɔ ni ma hã kili hã mi wena, nɛ mi fɛngɛ kpayuu. Nɛ mi usu wenɔ ni dɛ kɔ sila mi.