DANIƐLƐ 6 - WE NU GALE 1995

Owi sɛnɛ Daniɛlɛ wa ndɔa bili hã a

¹ Nɛ Dariusi, wi Mɛdɛ dungu nwa olo Baltazarɛ. Do 'da fala ni, nɛ nde Dariusi zi do 'bu sabɛlɛ gazɛlɛ ngɔ nɛ bɔa.

² Dariusi kpa zi linggamɔ gɔnɔ sanga nùi 'da a do 'bili tɛ nù kama do 'bu nɛ bɔa, nɛ a e kosolo nwa ngɔ nù kpo kpo.

³ Nɛ a e 'bɔ ogã wi talɛ ngɔ okosolo nwanɔ na, wa tɔ̃ nu dɛa tonɔ 'da wa hã wa, nɛ wa zɔ na, da dɛ kɔ wele 'dángá kpamɛnɔ 'da nwa gɔ. Daniɛlɛ zi a kpo kɔ ogã wi ngɔ okosolo nwanɔ ni.

⁴ Hã zã dɛa toe 'da Daniɛlɛ nɛa ngɔ wanɔ bɔa ni, nɛ ma nɛ 'bɔ ngɔ kɛ 'da okosolo nwanɔ vɛ̃. We duzu ma, nwa Dariusi kɔ̃a we e to mbati ngɔ nùi 'da a vɛ̃ dɛ kɔ̃ Daniɛlɛ.

⁵ Nɛ nde ogele gã winɔ bɔa ni, do okosolo nwanɔ, wa nɛa we zɔ ni, nɛ wa fa we kpa Daniɛlɛ do 'dã mɔ kɔ dɛa toe 'da a. Nɛ nde wa kpà a do 'dã mɔ, tabi gana dɛa to gɔ. We kɛ Daniɛlɛ dɛ̃ zi 'dã mɔ kpo gɔ, nɛ mɔ kɛ na wa kɔ'dɔ 'bɔ a ngɔ nɛ kɔ'da ni bina.

⁶ Ma kɛ owinɔ ni wa tɔ̃a dɛ ngbala wa na: “Lɛ kpá sɛ 'dã mɔ kpo kɔ Daniɛlɛ na, lɛ da a we nɛ gɔ. Lɛ fá we kpa a tabi si ngɔ tɛlɛ tɛ kɛ a dɔnggɔ do gale 'da a ni iko.”

⁷ Wa nɛa we tɔ̃ ni do'do, nɛ wa dà'bà gɔ, nɛ wa la 'da nwa i, nɛ wa tɔ̃ hã a na: “Aa nwa Dariusi, e kɔ mɔ 'bana tɛ dɛa to nwa fai!

⁸ Mɔ zɔ́, lɛ Owi ti nu mɔ vɛ̃, okosolo nwa, owi fɔmɔ le, do owi olo li mɔ, lɛ mba li ngba lɛ, nɛ lɛ kɔ̃a na, mɔ e mbula hã winɔ na: Kɔ zɛkɛ kpo vɛ̃, wele kpo tɛ sàmbàlà gele gale, tabi gele wele gɔ. A sámbálá tati a mɔ nwa. Nɛ mɔ zɔ́ na, mbula ni ma dɛ tɛ̃ ɛ. Kɔ wi kɛ a dɛ̀ ni gɔ, nɛ wa da sɛ a kɔ kɔ̃ɛ wa zã we a do ogbɔgbɔnɔ ni.

⁹ Aa nwa, mɔ é kɔ mɔ ti mbula ni na, wele tɛ kpòlò ma gɔ. Mɛ sɛ a mbula 'da Omɛdɛ do Opɛrsɛ, nɛ ma sɛ do ngawi fai.”

¹⁰ Nwa Dariusi nɛa we zele ni, nɛ a e kɔ a ti mbula ni.

Wa da Daniɛlɛ kɔ kɔ̃ɛ 'da ogbɔgbɔnɔ

¹¹ Daniɛlɛ nɛa we zele na, nwa Dariusi ia kɔ̃ ɛ ti mbula ni, nɛ a si dɛ nu tɔa 'da a i. Nɛ a kũ dɛ kɔ 'bili tɔa kɛ ngɔ i ni, nɛ a hũi li holo kɛ ma ka mɔ si Yeruzalɛmɛ i ni. Nɛ a gu gba zugolo we dɔnggɔ Gale dɛ di ni, ɔ nɛ kɛ a dɛ li wese kpo fala talɛ ni.

¹² Owi sɛnɛ a wa hɔa, nɛ wa kpa a, nɛ nde a tɛ sambala do ala nu a hã Gale.

¹³ Wa nɛa we zɔ ni, nɛ wa la 'da nwa Dariusi i, nɛ wa tɔ̃ hã a na: “Aa nwa, mɔ ia kɔ̃ mɔ ti mbula na, kɔ zɛkɛ kpo vɛ̃, wele tɛ sàmbàlà gele gale, tabi gele wele gɔ, a sambala tati a mɔ nwa. Kɔ wi kɛ a dɛ̃ ni gɔ, nɛ wa da sɛ a kɔ kɔ̃ɛ 'da ogbɔgbɔnɔ. Ma a ni gɔ nde?” Nɛ nwa gese na: “Mbula mi ia ngboo gɛ a ni. Nɛ wele wè tɛ kpolo ma gɔ. Mɛ a mbula 'da Omɛdɛ do Opɛrsɛ kɛ ma sɛ do ngawi fai.”

¹⁴ Nɛ wa tɔ̃ 'bɔ hã nwa na: “Aa nwa, mɔ zɔ́, mbe kpo sanga owinɔ wa kala wa do 'duli ngɔ nù Yuda i ni, li a a Daniɛlɛ, a dɔ́nggɔ́ mɔ gɔ. Nɛ a dɔ́nggɔ́ 'bɔ mbula kɛ mɔ ia kɔ mɔ ti nɛ ni gɔ. A tɛ sambala gale 'da a li wese kpo fala talɛ.”

¹⁵ Nwa Dariusi nɛa we zele ni, nɛ sila a gbini do 'bako, nɛ a fa do walanɔ vɛ̃ na, a amba zu Daniɛlɛ. A fa ni gbaa we hɔ gɛ̃a wese, nɛ nde a kpà wala gɔ.

¹⁶ Owi sɛnɛ Daniɛlɛ wa kpolo tɛ wa 'da a i, nɛ wa tɔ̃ hã a na: “Aa nwa, mɔ ĩ de wena na, mbula 'da Omɛdɛ do Opɛrsɛ ma tɔ̃ na, wele wè tɛ kpolo mbula kɛ nwa ia ni gɔ.”

¹⁷ Ma kɛ nwa ba nu a, nɛ wa ba Daniɛlɛ la do a, nɛ wa da a kɔ kɔ̃ɛ 'da ogbɔgbɔnɔ. Nɛ nwa tɔ̃ hã a na: “E kɔ Gale kɛ mɔ dɔnggɔ a do sila mɔ vɛ̃ ni, a kpasa mɔ!”

¹⁸ Wa tɛa do gã ta, nɛ wa kimili ma dɛ nu kɔ̃ɛ. Nɛ nwa to kasɛ 'da a, do kɛ 'da ogã wi tonɔ 'da a tɛ nɛ na, da dɛ kɔ wele tɛ́ we kpasa Daniɛlɛ kɔ kɔ̃ɛ ni gɔ.

¹⁹ 'Do nɛ, nɛ nwa kpolo tɛ̃ a dɛ nu tɔa i. A nɛa we hɔ i mɔ, nɛ a bɛ̃ nyɔngɔmɔ, nɛ a kɔ̃̀ 'bɔ na, wele dɛ sa do ɛ gɔ. Nɛ do tũi ni vɛ̃, yala bà li a gɔ.

Daniɛlɛ hɔa nza kɔ kɔ̃ɛ 'da ogbɔgbɔnɔ do lɔa tɛ̃ a

²⁰ Ma hɔa sanga titole belee, nɛ nwa Dariusi kulu ngɔ, nɛ a wɛlɛ tɛ̃ a dɛ nu kɔ̃ɛ 'da ogbɔgbɔnɔ i.

²¹ Nɛ a sa mɔ hã Daniɛlɛ do sa mɔ 'bako na: “Daniɛlɛ, wi toe 'da Gale, wele kpasi! Gale 'da mɔ kɛ mɔ dɔnggɔ a do sila mɔ vɛ̃ ni, a kpasa mɔ ti kɔ̃ ogbɔgbɔnɔ nde?”

²² Nɛ Daniɛlɛ gese na: “Aa nwa, e kɔ mɔ 'bana tɛ to nwa 'da mɔ fai!

²³ Gale 'da mi tumba anzɛ 'da a we kpe nu ogbɔgbɔnɔ. Nɛ wa dɛ̀ mɔ kpo do mi gɔ. Mba gɔ, mi do ngbangga dɛ 'da Gale bina, nɛ mi dɛ̀ 'bɔ 'dã mɔ kpo dɛ 'da mɔ nwa gɔ.”

²⁴ Nwa nɛa we zele ni, nɛ sila a dunu do yangga, nɛ a ba nu a na, wa fo Daniɛlɛ kɔ kɔ̃ɛ 'da ogbɔgbɔnɔ dɛ nza. Daniɛlɛ nɛa we hɔ kɔ kɔ̃ɛ dɛ nza, nɛ wa zɔ na, fo dani tɛ̃ a bina, we kɛ a gbini zã a do Gale 'da a.

²⁵ 'Do nɛ, nɛ nwa ba nu a na, wa kala winɔ wa da zi Daniɛlɛ ni, hã wa da wa kɔ kɔ̃ɛ 'da ogbɔgbɔnɔ, fala nɛ kpo do owukonɔ do obenɔ 'da wa. Wa 'bana dɛ li ngɔ gɛ iko, nɛ ogbɔgbɔnɔ wa kala wa, nɛ wa o gbãlã tɛ wa dati kɛ na, wa ala dɛ go'do kɔ̃ i ni.

²⁶ 'Do nɛ, nɛ nwa Dariusi tumba to hã onu kɔnggɔ winɔ do nu lɛnggɛnɔ ngɔ nùi vɛ̃ na: “Mi hã balɛ hã nɛ!

²⁷ Mi ba nu mi na, owinɔ ngɔ nùi vɛ̃ kɛ ma ti mbula 'da mi ni, wa dɛ kili Gale 'da Daniɛlɛ, nɛ wa dɔnggɔ a. A a Gale wele kpasi, a 'bana sɛ fai. Dɛa to nwa 'da a, ma sɔ́kpɔ́ sɛ gɔ, ma ɔ sɛ fai.

²⁸ A fo wele kɔ ngamɔ, nɛ a kpasa a, a dɛ oɔngbamɔ do ogba sɔ mɔ tɛ li nza i do ngɔ nù nga. A kpasa Daniɛlɛ ti kɔ ogbɔgbɔnɔ.”

²⁹ Dɛ 'do ki ni, nɛ Daniɛlɛ ɔa zi 'bɔ tɛ gã dɛa to mbati do 'da fala dɛa to nwa 'da Dariusi. Nɛ a 'bana zi 'bɔ tɛ nɛ do 'da fala 'da Sirusi, nwa ngɔ nù Pɛrsɛ.