DANIƐLƐ 5 - WE NU GALE 1995

Nwa Baltazarɛ dɛa gbalimɔ

¹ Mbe tũ kpo, nɛ nwa Baltazarɛ dɛa gbalimɔ hã ogã wi tonɔ 'da a koto kpo. Nɛ a ma ngɔ nɔ dɔ̃ do wa.

² Dɔ̃ɛ ba a do'do, nɛ a ba nu a na, wa tɛ do kɔpɔ mɔ mbalinɔ do kɔpɔ fɛ̃a mɔ bolonɔ, kɛ baa a Nabukɔdɔnɔzɔrɛ kala zi ma kɔ tɔa Tɛmpɛloe tɛ Yeruzalɛmɛ i ni. A kɔ̃a na wa tɛ nɛ, takɔ a nɔ do dɔ̃ɛ fala nɛ kpo do ogã wi tonɔ 'da a, do owukonɔ, do omakangonɔ 'da a.

³ Wa tɛa do kɔpɔ mɔ mbalinɔ kɛ ma yula kɔ Tɛmpɛlo 'da Gale tɛ Yeruzalɛmɛ i ni, nɛ nwa nɔa do dɔ̃ɛ fala nɛ kpo do owinɔ a sa mɔ hã wa tɛ gbalimɛ ni.

⁴ Wa nɔa dɔ̃ɛ ni gbaa, nɛ wa ndo dɔnggɔ okpikimanɔ. Mɛ a okpikima kɛ wa dula do mɔ mbali, fɛ̃a mɔ bolo, tũ mɔ bolo, do gele mɔ bolo, nɛ wa sɛa mbe nɛ do te, tabi do ta.

⁵ Do 'da fala ni, kɔ wa nɛ ka mɔ, nɛ wa zɔ kɔ̃ wele dɛ kɛ zã mɔ a do mwindanɔ. Nɛ kɔ̃ wi ni kɔmɔ mɔ dɛ ngɔ dɛlɛ tɔa 'da nwa kɛ wa zɛa fɛ̃a mbu tɛ nɛ ni. Nwa Baltazarɛ nɛa we zɔ kɔ̃ wi ma kɔmɔ mɛ ni,

⁶ nɛ ma hã kili hã a wena, nɛ bula li a fɛngɛ kpayuu, nɛ zu a vĩ, nɛ zugolo a to ngbɛ ɛ.

⁷ Nɛ a he mɔ na, wa sa mɔ hã Owi hãnɔ tɛ Babilɔnɛ, do Owi dɛ sɔ̃ mɛnɔ, do Owi tunumɛnɔ, do Owi zɔ gulu mɛnɔ do wala 'da sɔlanɔ. Nɛ winɔ ni wa tɛa, nɛ a tɔ̃ hã wa na: “Wele kɛ a tɔlɔ sɛ kɔma mɛ gɛ, kɔ a tɔ̃ gulu nɛ hã mi, nɛ mi he'de sɛ tulu dɔ̃lɔ̃ li tɛ̃ a. Mi fi sɛ mɔ gɛlɛ wi mɔ mbali gɛlɛ a, nɛ a sɛ a wi kɛ talɛ kɔ dɛa to nwa ngɔ nùi gɛ.”

⁸ Owi hãnɔ wa dɛ toe 'da nwa ni, wa hɔa dati nwa, nɛ nde wele kpo kɔ wa wè we tɔlɔ kɔma mɛ ni, nɛ a tɔ̃ gulu nɛ hã nwa gɔ.

⁹ Baltazarɛ nɛa we zɔ ni, nɛ kili ba a nganda wena, nɛ bula li a fɛngɛ 'bɔ dɛ dati. Nɛ zu ogã wi tonɔ 'da a ma vĩ tɛ mɛ 'bɔ.

Daniɛlɛ tɔ̃a gulu gba sɔ̃ kɔma mɛ

¹⁰ Naa nwa Baltazarɛ zila hiamɔ gɛlɛ a do ogã wi tonɔ 'da a, nɛ a le kɔ tɔa wa dɛa do gbalimɛ ni, nɛ a tɔ̃ na: “Aa nwa, e kɔ mɔ 'bana tɛ dɛa to nwa fai. Linggamɔ zu mɔ tɛ ha kili hã mɔ, kɔ bula li mɔ fɛngɛ ni gɔ.

¹¹ Mbe wele ngɔ nùi 'da mɔ gɛ boe, a do hi wi 'da ogalenɔ kɔ a. Do 'da fala 'da baa mɔ, nɛ wa kpa zi na, a do hã zã ɔ nɛ kɛ 'da ogalenɔ ni. Ma kɛ baa mɔ, nwa Nabukɔdɔnɔzɔrɛ, ia zi a do gã wi ngɔ owi zɔ gulu mɛnɔ, do owi dɛ sɔ̃nɔ, do Owi tunumɛnɔ, do owi zɔ gulu mɛnɔ do wala 'da sɔlanɔ.

¹² Li a sɔ̃ wena, nɛ a do hã zã wena we gɔnɔ sanga 'dã mɔ do dia mɔ, nɛ a ĩ 'bɔ ti tɔ̃ gulu oyalɛ. A tɔ̃ 'bɔ gulu obe to do gulu mɛnɔ kɛ ma usu tɛ̃ ɛ usu ni. Mɔ tombo, hã wa sá mɔ hã wi ni. Li a a Daniɛlɛ, nɛ nwa ia zi 'bɔ mbé li a na Bɛltasarɛ. A be sɛ gulu kɔma mɛ gɛ hã mɔ.”

¹³ Wa kpa Daniɛlɛ, nɛ wa tɛ do a dɛ dati nwa Baltazarɛ. Nɛ nwa aka a na: “Wi a mɔ Daniɛlɛ, be Yuda, kɛ baa mi ba zi mɔ do 'duli ngɔ nù Yuda i, nɛ a si do mɔ ni nde?

¹⁴ Wa tɔ̃a hã mi na, mɔ do hi wi 'da ogalenɔ kɔ mɔ boe. Nɛ li mɔ sɔ̃ wena, nɛ mɔ 'bɔ do hã zã wena.

¹⁵ Hã mɔ zɔ, wa tɛa do owi hãnɔ do wi dɛ sɔ̃ mɛnɔ hã mi na, wa tɔlɔ kɔma mɛ gɛ, kɔ wa tɔ̃ gulu nɛ hã mi. Nɛ nde wa wè tɛ tɔ̃ gulu nɛ gɔ.

¹⁶ Nɛ nde mi zila na, mɔ wia we tɔ̃ gulu be to, do omɛnɔ ma usu tɛ̃ ɛ ni dɛ nza. Fala kɛ mɔ tɔlɔ kɔma mɛ ni, kɔ mɔ tɔ̃ gulu nɛ hã mi, nɛ mi he'de sɛ tulu dɔ̃lɔ̃ li hã mɔ. Mi fi sɛ mɔ gɛlɛ wi mɔ mbali gɛlɛ mɔ, nɛ mɔ sɛ a wi kɛ talɛ kɔ dɛa to nwa ngɔ nùi gɛ.”

¹⁷ Nɛ Daniɛlɛ gese hã nwa na: “Aa nwa, mɔ 'báná do odia mɛnɔ 'da mɔ, tabi mɔ hã ma hã ogele wele. Nɛ nde mi tɔlɔ sɛ kɔma mɛ ni, nɛ mi tɔ̃ sɛ gulu nɛ hã mɔ.

¹⁸ Gale kɛ a nɛa ngɔ mɛnɔ vɛ̃ ni, a dɛa zi na, baa mɔ Nabukɔdɔnɔzɔrɛ hɔ gã nwa, kɛ a do dɔ̃lɔ̃ li.

¹⁹ Nɛ we duzu ma, onu kɔnggɔnɔ vɛ̃, do nu fɛlɛ kulanɔ vɛ̃, do nu lɛnggɛnɔ vɛ̃ wa tana zi kili dati a. A gɔnɔ zi we na, wele fé, nɛ wi ni fe. A gɔnɔ na, wele 'báná nza, nɛ a 'bana nza. A kɔ̃ we ba wele dɛ ngɔ, nɛ a ba a dɛ ngɔ. Kɔ a kɔ̃ we ba a dɛ nù, nɛ a ba a dɛ nù.

²⁰ Nɛ nde a zɔa zi na mɛ ni, nɛ a ma ngɔ dɛ wali do gã zu. Ma kɛ wa fua zi a ngɔ kpongbo nwa, nɛ dɔ̃lɔ̃ li 'da a ma ia.

²¹ Wa ndaka a sanga winɔ do'do, nɛ a yɛnggɛ fala nɛ kpo do osa'denɔ. A ɔa dɛ sanga opunda zamɔ, nɛ a nyɔngɔ wɔkɔsɔ ɔ nɛ ngɔmbɔ ni, nɛ mbɔɛ 'bɔa tɛ̃ a. Ma ɔa ni gbaa we hɔ kɔ̃ tũ kɛ a ĩ na, Gale kɛ a gã wena, a a nwa ngɔ nwanɔ nù gɛ vɛ̃, nɛ a ba wi kɛ zã a kɔ̃a ni dɛ ngɔ, nɛ a e a ngɔ kpongbo nwa ni.

²² “Nɛ mɔ be 'da a Baltazarɛ, mɔ ĩ ma de wena, nɛ nde mɔ bà tɛ mɔ dɛ nù gɔ.

²³ Mɔ yɔndɔ sila Gale kɛ a li nza i ni. Mɔ kala okɔpɔ santonɔ, kɛ ma yula kɔ Tɛmpɛloe 'da a ni, nɛ mɔ nɔ do dɔ̃ do ogã wi tonɔ 'da mɔ, do owukonɔ, do omakangonɔ 'da mɔ. Mɔ dɔnggɔ 'bɔ okpikimanɔ kɛ wa dɛa ma do fɛ̃a mɔ bolo, mɔ mbali, tũ mɔ bolo, te, tabi do ta. Ogalenɔ ni wa zɔ́ mɔ kpo gɔ, nɛ wa zélé we gɔ, wa ĩ́ 'bɔ mɔ gɔ. Nɛ mɔ bɛ̃a we hã dɔ̃lɔ̃ li hã Gale, kɛ dungu nza 'da mɔ sɔɛ gɛ do kɛ 'do nza dɛ kɔ̃ a ni.

²⁴ Ma kɛ Gale tumba kɔ̃ wele na, ma kɔmɔ mɛ gɛ ni.

²⁵ Mɛ wa kɔma ni, ma kɛ: MƐNE MƐNE, TƐKƐLƐ, DO PARSINƐ.

²⁶ Nɛ gulu nɛ ma kɛ: MƐNE gulu nɛ na: Wa tɔlɔ mɔ tɔla. Gale tɔlɔ tũ dɛa to nwa 'da mɔ, nɛ a ia Sɔkpɔ nɛ.

²⁷ TƐKƐLƐ gulu nɛ na: Wa gãlã mɔ gãlã. Wa gãlã mɔ nu kilo, nɛ wa zɔa na, mɔ dĩ̀lĩ̀ gɔ.

²⁸ PARSINƐ gulu nɛ na: Wa kɛ̃a mɔ kɛ̃a. Wa kɛ̃a sanga nùi 'da mɔ hã Omɛdɛ do Opɛrsɛ.”

²⁹ Baltazarɛ nɛa we zele ni, nɛ a ba nu a do ti hã Owi tonɔ 'da a na, wa he'de tulu dɔ̃lɔ̃ li hã Daniɛlɛ, nɛ wa fi mɔ gɛlɛ wi mɔ mbali gɛlɛ a. Nɛ a ia Daniɛlɛ do wi kɛ talɛ kɔ dɛa to nwa ngɔ nùi.

³⁰ Do kpo tũi ni iko, nɛ Owele wa gbɛ Baltazarɛ, nwa ngɔ nù Babilonia.