DANIƐLƐ 4 - WE NU GALE 1995

¹ “Mi Nabukɔdɔnɔzɔrɛ, mi zi kɔ tɔa nwa 'da mi do yangga, nɛ mɔ yɛkɛ sila mi kpo bina.

² Nɛ mbe tũ kpo, nɛ mi ɔa nù do tũ, nɛ mi yala zu mi. Nɛ nde yalɛ mi yala ni, ma vĩ zu mi wena. Mba gɔ, mɛ mi zɔa ni, ma hã kili hã mi wena.

³ Nɛ mi ba nu mi na, Owi hãnɔ ngɔ nù Babilonia vɛ̃, wa mba li ngba wa dɛ dati mi, kɔ wa tɔ̃ gulu yalɛ ni hã mi.

⁴ Nɛ owi dɛ sɔ̃nɔ, do Owi zɔ gulu mɛnɔ do wala 'da sɔlanɔ, wa tɛa, nɛ mi tɔ̃ yalɛ 'da mi hã wa, nɛ nde wele kpo kɔ wa ni wè zi we tɔ̃ gulu yalɛ ni gɔ.

⁵ Nɛ do Sɔkpɔ nɛ vɛ̃, nɛ Daniɛlɛ, kɛ wa sa 'bɔ mbe li a na Bɛltasarɛ, kɛ mɛ a li gale 'da mi ni, a hɔ 'bɔ. A zi do hi wi 'da galenɔ kɔ a boe. Nɛ mi tɔ́a yalɛ 'da mi hã a na:

⁶ Bɛltasarɛ, mɔ a wi ngɔ wi zɔ gulu mɛnɔ. Mi ĩ na, hi wi 'da galenɔ kɔ mɔ boe, nɛ mɔ ĩ 'bɔ ti usu mɛnɔ vɛ̃. Mɔ zélé yalɛ 'da mi, kɔ mɔ tɔ̃ gulu nɛ hã mi.

⁷ Mi ɔa, nɛ mi yala zu mi, nɛ nde mi zɔa gã te gã wena dɛ gbogbo nùi.

⁸ Te ni ma gã dɛ dati gbaa, nɛ sɔti zu nɛ ma to li nza. Nɛ owinɔ nyanga nza vɛ̃ wa zɔa ma.

⁹ Nwá te ni de wena, nɛ te ni wala 'bɔ wena. Winɔ ngɔ nùi vɛ̃ wa nyɔngɔ zi wala nɛ, nɛ ma kpa zu wa. Osa'de zamɔ wa ɔ ti gɔlɔ nɛ, nɛ onɔɛ wa dɛa tɔa ngɔ ogbakɔ̃ te ni. Nɛ Otunu li mɛnɔ ngɔ nùi gɛ vɛ̃, wa nyɔngɔ wala nɛ.

¹⁰ “Mi ma ngɔ lengge mɔ dɛ ngɔ mɔ ɔi 'da mi ni, nɛ mi zɔa anzɛ, a yula li nza i, nɛ a zĩlĩ,

¹¹ Nɛ a he mɔ nganda wena na: ‘Nɛ gɔ́mɔ́ te gɛ dɛ nù, nɛ nɛ sɛlɛ ogbakɔ̃ nɛ do'do. Nɛ lɛ́ onwá nɛ, nɛ nɛ pɛsɛ owala nɛ. Nɛ ndáká osa'denɔ ti nɛ nyɛlɛ, nɛ nɛ ndí 'bɔ onɔɛnɔ ngɔ ogbakɔ̃ nɛ do'do.

¹² Nɛ nde nɛ lá tati a zugbulu te ni dɛ ngɔ nùi, nɛ nɛ ɛ́nzɛ́ ma do dɔkpɔ, kɛ wa dɛa ma do nga mɔ bolo do tũ mɔ bolo. Nɛ lá wi ni dɛ zã wɔkɔsɔnɔ kɔ fɔ i, nɛ mbɔɛ 'bɔ tɛ̃ a, nɛ a nyɔngɔ wɔkɔsɔ fala nɛ kpo do osa'denɔ.

¹³ Linggamɔ zu a, mɛ sɛ 'bɔ a linggamɔ zu wele gɔ, ma kifi sɛ linggamɔ mɔ́ sa'de. Nɛ a ɔ sɛ ni gbaa 'do sabɛlɛ sambo.’

¹⁴ Winɔ wa tɛa do mbula ni, wi a anzɛnɔ. Na mɛ ni, nɛ owinɔ vɛ̃ wa ĩ na, Gale kɛ a gã wena ni, a a nwa ngɔ nwanɔ ngɔ nù gɛ vɛ̃, nɛ a hã to nwa hã wi kɛ zã a kɔ̃a a ni. Gɛnɛ kɔ wi kɛ Owele wa zɔ a yala iko ni, nɛ Gale wia we ba a dɛ ngɔ, nɛ a e a ngɔ kpongbo nwa.

¹⁵ “Yalɛ mi nwa Nabukɔdɔnɔzɔrɛ, mi yala gɛ a ni. Kɔ ma wia na, mɔ Bɛltasarɛ, mɔ tɔ̃ gulu yalɛ ni hã mi. Wele kpo kɔ Owi hãnɔ ngɔ nùi 'da mi gɛ wè do tɔ̃ gulu nɛ hã mi gɔ. Nɛ nde mɔ wia we tɔ̃ gulu nɛ, we kɛ hi wi 'da ogalenɔ kɔ mɔ boe.”

Daniɛlɛ tɔ̃a gulu yalɛ hã Nabukɔdɔnɔzɔrɛ

¹⁶ Nwa Nabukɔdɔnɔzɔrɛ tɔ́a 'bɔ na: “Daniɛlɛ kɛ li a 'bɔ a Bɛltasarɛ, nɛa we zele yalɛ ni, nɛ linggamɔ zu a la, nɛ a kolo do kili. Nɛ mi lɔ̃ hã a na: Bɛltasarɛ, mɔ tɛ dè kili tɔ̃ gulu yalɛ gɛ hã mi gɔ. Nɛ Bɛltasarɛ gese na: ‘Aa nwa, e kɔ yalɛ gɛ ma tɔ̃ we si ngɔ Owi sɛnɛ mɔ!

¹⁷ Mɔ zɔa te, ma gã wena, nɛ ma nganda 'bɔ wena. Nɛ sɔti zu nɛ tua li nza, nɛ owinɔ nyanga nza vɛ̃, wa zɔa ma.

¹⁸ Nwá te ni de wena, nɛ te ni wala 'bɔ wena. Winɔ vɛ̃ wa nyɔnga wala nɛ, nɛ ma kpa zu wa. Osa'de zamɔ wa ɔa ti gɔ̃lɔ̃ nɛ, nɛ onɔɛ wa dɛa tɔa ngɔ ogbakɔ̃ te ni.

¹⁹ “ ‘Aa nwa, te ni wi a mɔ. To nwa 'da mɔ gã wena, nɛ mɔ nganda 'bɔ wena. Mɔ ngala gbaa, nɛ mɔ to li nza, nɛ ngawi 'da mɔ hɔa tɛ ndɔti nùi.

²⁰ 'Do kɛ mɔ zɔa te ni, nɛ mɔ zɔa 'bɔ anzɛ a yula li nza i, nɛ a zĩlĩ. Nɛ a tɔ̃ na: Nɛ gɔ́mɔ́ te dɛ nù, nɛ nɛ 'dángá ma. Nɛ nde nɛ la tati a zugbulu ma iko, nɛ nɛ ɛ́nzɛ́ ma do dɔkpɔ kɛ wa dɛa ma do nga mɔ bolo do tũ mɔ bolo. Mbɔɛ ma 'bɔ sɛ tɛ wi ni, nɛ a ɔ fala nɛ kpo do osa'denɔ 'do sabɛlɛ sambo.

²¹ “ ‘Aa nwa, mɔ zélé gulu nɛ! Gale kɛ a gã wena ni, a 'bili we 'da mɔ na,

²² wa ndaka sɛ mɔ sanga winɔ do'do, nɛ mɔ ɔ sɛ dɛ sanga osa'de zamɔ. Mɔ nyɔngɔ sɛ wɔkɔsɔ ɔ nɛ ngɔmbɔ ni, nɛ mbɔɛ ma 'bɔ sɛ tɛ mɔ. Mɔ ɔ sɛ na mɛ ni 'do sabɛlɛ sambo vɛ̃, sɛ nɛ mɔ ĩ sɛ na, Gale kɛ a gã wena ni, a a nwa ngɔ nwanɔ nù gɛ vɛ̃, a hã to nwa hã wi kɛ zã a kɔ̃a a ni de.

²³ Nɛ kɛ anzɛ ba nu a na, wa la zugbulu te dɛ di ni ni, ma be na, Gale, kɛ a li nza i ni, a gese sɛ to nwa 'da mɔ hã mɔ do 'da fala mɔ ĩ sɛ na, a a nwa ni.

²⁴ Ma kɛ aa nwa, mɔ zélé mbula 'da mi. Mɔ lá fala dɛ 'dã mɔ, nɛ mɔ dɛ bɔlɔ zu dɛa mɔ, nɛ mɔ dɛ dia mɔ hã owi sã. Mɔ dɛ na mɛ ni, nɛ mbe gɔ, nɛ 'do to nwa 'da mɔ ma nyɛlɛ sɛ dɛ dati fai.’

Yalɛ ma dɛa tɛ ɛ

²⁵ “Mɛnɔ ma bia tɛ̃ ɛ kɔ yalɛ hã mi nwa Nabukɔdɔnɔzɔrɛ ni, ma dɛa tɛ̃ ɛ.

²⁶ 'Do nɛ la sabɛlɛ kpo, nɛ mi tɛ yɛnggɛ do fala dungi kɛ wa 'dafa do ngɔ zu tɔa nwa 'da mi tɛ Babilɔnɛ ni,

²⁷ nɛ mi tɔ̃ na: Nɛ zɔ́ Babilɔnɛ, gã le kɛ mi dɛa ma do fala ɔi 'da mi gɛ. Ma be na, mi nganda wena, nɛ to nwa 'da mi do dɔ́lɔ́ li wena.

²⁸ Lɛnggɛ ni 'bana dɛ nu mi ni iko, nɛ wila we yolo li nza i, nɛ ma wele na: ‘Nwa Nabukɔdɔnɔzɔrɛ, mɔ zélé toe gɛ! Gale fua to nwa kɔ mɔ ia.

²⁹ Wa ndaka sɛ mɔ sanga owinɔ do'do. Mɔ ɔ sɛ dɛ sanga osa'de zamɔ, nɛ mɔ nyɔngɔ sɛ wɔkɔsɔ ɔ nɛ ngɔmbɔ ni. Mɔ ɔ sɛ na mɛ ni 'do sabɛlɛ sambo vɛ̃, sɛ nɛ mɔ ĩ sɛ na, Gale kɛ a gã wena, nɛ a a nwa ngɔ nwanɔ ngɔ nù gɛ vɛ̃ ni, a hã to nwa hã wi kɛ zã a kɔ̃a a ni de.’

³⁰ “Do kpo fala ni, nɛ wila we ni ma dɛa gbãlã we. Wa ndaka mi Nabukɔdɔnɔzɔrɛ sanga owinɔ, nɛ mi ma ngɔ nyɔngɔ wɔkɔsɔ ɔ nɛ ngɔmbɔ ni. Nɛ mbɔɛ 'bɔa tɛ mi, nɛ mili zu mi hɛ̃a, nɛ ma dulu ɔ nɛ sala tɛ ziki ni, nɛ oɛ̃lɛ̃ kɔ mi dulu 'bɔ, ɔ nɛ ɛ̃lɛ̃ kɔ̃ nɔɛ ni.

NWA kpasa Nabukɔdɔnɔzɔrɛ

³¹ “Sabɛlɛ sambo nɛa we Sɔkpɔ nɛ, nɛ mi Nabukɔdɔnɔzɔrɛ, mi ba li mi dɛ li nza i, nɛ linggamɔ zu mi kpolo tɛ̃ ɛ dɛ olo nɛ. Nɛ mi hã iɔ̃nae hã Gale na: Gale a dungu nwa fai, to nwa 'da a do Sɔkpɔ nɛ bina.

³² Ogili winɔ ngɔ nù gɛ vɛ̃, wa ɔ li a yala iko. A dɛ do ohi winɔ li nza i, tabi owinɔ ngɔ nù gɛ, ɔ nɛ kɛ zã a kɔ̃a. A dɛ mɔ kɛ a lingga ni, nɛ wele kpo wè tɛ aka gulu nɛ, tabi kɔ'dɔ a we nɛ gɔ.

³³ “Do 'da fala linggamɔ zu mi kpula tɛ̃ ɛ dɛ olo nɛ ni, nɛ Gale gisa 'bɔ dɔlɔ li to nwa 'da mi do dĩ 'da mi hã mi. Owi olo li mi, do ogã wi tonɔ 'da mi, wa wɛlɛ tɛ wa we tɛ we kpa mi. Nɛ mi kpula tɛ mi dɛ ngɔ kpongbo nwa 'da mi, nɛ mi kpa gã dɔ̃lɔ̃ li nɛa ngɔ kɛ zi dati ni.

³⁴ Ma kɛ da dɔ́ ni, mi Nabukɔdɔnɔzɔrɛ, mi dɔnggɔ NWA Gale kɛ li nza i. Mi to de zu li a, nɛ mi hã dɔ́lɔ́ li hã a. Mɛnɔ vɛ̃ kɛ a dɛ ni, ma a gbãlã we, nɛ walanɔ 'da a vɛ̃ a bɔlɔ. A do ngawi we ba wi gã zunɔ dɛ nù.”