DANIƐLƐ 3 - WE NU GALE 1995

Nwa ba nu a na owinɔ vɛ wa dɔnggɔ kpikima

¹ Nwa Nabukɔdɔnɔzɔrɛ ba nu a na, wa dolo kpikima mɔ mbali. 'Da du nɛ dɛ ngɔ a mɛtrɛ 'bu nɛ talɛ, nɛ gã zã nɛ a mɛtrɛ talɛ. Wa dɛa ma do'do, nɛ a zĩ ma tɛ ngɔ mbɛ nù Dura, tɛ kɔ 'bili tɛ nù Babilonia.

² Nɛ a tombo Owele na, wa sa mɔ hã ogã wi ti nu a vɛ̃, okosolo nwanɔ, owi fɔmɔ lenɔ, Owi tɔ̃ mbula hã nwa, Owi fɔmɔ mbili, Owi gɔnɔ we, na wa tɛ, hã wa dɛ mɔ dɔ be kpikima kɛ a zĩ ma ni hã owinɔ.

³ Nɛ ogã wi dɛa tonɔ 'da nwa wa tɛa vɛ̃, nɛ wa yolo dɛ dati kpikima ni.

⁴ Nɛ mbe wi sa mbila 'da nwa hɔ, nɛ a he mɔ do nga gɛlɛ na: “Aa nɛ, owinɔ kɛ nɛ yolo kɔ onu kɔnggɔnɔ, do nu fɛlɛ kulanɔ, do lɛnggɛnɔ kpi do kpi ni, nɛ zélé mbula gɛ!

⁵ Nɛ zele sɛ giti mɔtũlũ, kpangge, be kundu, zaka, kembe, do za sa'de, do omɔ zɛ zuma kpi do kpi tɛ dɔ̃lɔ̃ nɛ. Kɔ nɛ zele ma, nɛ nɛ gú li nɛ nù we dɔnggɔ kpikima mɔ mbali, kɛ nwa Nabukɔdɔnɔzɔrɛ zĩ ma ni.

⁶ Fala kɛ wele bɛ̃ we gu li a nù we dɔnggɔ ma, nɛ wa ba sɛ a do ti, nɛ wa da sɛ a dɛ kɔ furu kɛ we nyɛ kɔ nɛ nganda wena ni.”

⁷ Na mɛ ni, owinɔ kɔ nu kɔnggɔnɔ kpi do kpi, wa nɛa we zele giti omɔ zɛ zumanɔ ni, nɛ wa gu li wa nù do ti, nɛ wa dɔnggɔ kpikima mɔ mbali kɛ nwa Nabukɔdɔnɔzɔrɛ zĩ ma ni.

Ongba Daniɛlɛ wa bɛ̃a we gu li wa nu

⁸ 'Do nɛ là nyɛlɛ gɔ, nɛ mbe Owi Babilɔnɛ wa nɛ 'da nwa Nabukɔdɔnɔzɔrɛ i we da Oyudanɔ hã a.

⁹ Nɛ wa tɔ̃ hã a na: “Aa nwa, e kɔ mɔ 'bana tɛ dɛa to nwa fai!

¹⁰ Mɔ do tɛ mɔ, mɔ ba nu mɔ na, 'da fala giti omɔ zɛ zuma kpi do kpi dɔ̃lɔ̃, nɛ owinɔ vɛ̃ wa gu li wa nù we dɔnggɔ kpikima mɔ mbali.

¹¹ Kɔ fala kɛ wele bɛ̃ we gu li a nù we dɔnggɔ ma, nɛ wa da sɛ a kɔ furu, kɛ we nyɛ kɔ nɛ nganda wena ni.

¹² Hã mɔ zɔ, Oyudanɔ gɛ, Sadrakɛ, Mesakɛ, do Abɛdɛ-Nego, kɛ mɔ hã dɛa to mbati hã wa ngɔ 'bili tɛ nù Babilɔnɛ gɛ, wa bɛ̃a we dɛ mbula ni. Wa bɛ̃a we dɛ to hã ogalenɔ 'da mɔ, nɛ wa bɛ̃ 'bɔ we dɔnggɔ kpikima mɔ mbali kɛ mɔ zĩ ma ni.”

¹³ Nwa Nabukɔdɔnɔzɔrɛ nɛa we zele ni, nɛ dã ba a nganda wena. Nɛ a ba nu a na, wa tɛ do Sadrakɛ, Mesakɛ do Abɛdɛ-Nego hã ɛ. Wa nɛa we hɔ dati a,

¹⁴ nɛ a aka wa na: “Sadrakɛ, Mesakɛ do Abɛdɛ-Nego, mɛ a gbãlã we na, nɛ bɛ̃a we dɔnggɔ ogalenɔ 'da mi nde? Nɛ gù nù dati kpikima mɔ mbali kɛ mi zĩ ma ni gɔ nde?

¹⁵ Ngangga ni, mi kɔ̃a na, fala kɛ nɛ zele mɔtũlĩ, kpangge, be kundi, zaka, kembe, za sa'de, do omɔ zɛ zuma kpi do kpi tɛ dɔ̃lɔ̃ nɛ, nɛ nɛ gú nù we dɔnggɔ kpikima mɔ mbali ni. Nɛ dɛ̃ ni gɔ, nɛ wa da sɛ nɛ li gba nyɛa we kɔ furi ni do ti. Nɛ mi zɔ sɛ gale kɛ a we sɛ we kpasa nɛ ti kɔ̃ mi ni.”

¹⁶ Nɛ Sadrakɛ, Mesakɛ do Abɛdɛ-Nego, wa gisa hã nwa na: “Aa nwa, lɛ gésé sɛ nu we hã mɔ gɔ.

¹⁷ Mɔ ĩ́ na, Gale 'da lɛ, wele kɛ lɛ dɔnggɔ a ni, a wia we kpasa lɛ li gba nyɛa we, nɛ a wia we kpasa 'bɔ lɛ ti kɔ̃ mɔ.

¹⁸ Nɛ gɛnɛ kɔ a dɛ̃ 'bɔ ma gɔ, nɛ nde lɛ dɔ́nggɔ́ sɛ ogalenɔ 'da mɔ gɔ. Nɛ lɛ gu sɛ nù ti kpikima mɔ mbali kɛ mɔ zĩ ma ni gɔ.”

Nabukɔdɔnɔzɔrɛ 'bili na wa gbɛ ongba Daniɛlɛ talɛ ni

¹⁹ Nwa Nabukɔdɔnɔzɔrɛ nɛa we zele ni, nɛ dã ba a wena, nɛ li a fele, nɛ sila a 'bɔ dɛ tɛ Sadrakɛ, Mesakɛ do Abɛdɛ-Nego. Nɛ a ba nu a na, wa dã we kɔ furu, nɛ ma ba we nɛ ngɔ kɛ wa dã dɛ ni fala sambo.

²⁰ Nɛ a ba 'bɔ nu a hã ombe nga sodanɔ 'da a na, wa ɛnzɛ Sadrakɛ, Mesakɛ do Abɛdɛ-Nego, nɛ wa da wa kɔ furi ni.

²¹ Ma kɛ wa ɛnzɛ wa, do tulunɔ 'da wa dɛ tɛ wa vɛ̃, nɛ wa da wa li gba nyɛa we.

²² Nɛ nde Owi dã we kɔ furi ni, wa dɛa olo nu nwa, nɛ wa dã we, nɛ ma nyɛa nganda wena. Nɛ galagula we ni, ma gbɛa osodanɔ wa nɛa we da Sadrakɛ, Mesakɛ do Abɛdɛ-Nego li nɛ ni.

²³ Nɛ Sadrakɛ, Mesakɛ do Abɛdɛ-Nego, wa ala dɛ li gba nyɛ we i do fɛlɛ dɛ tɛ wa ni.

Gale kpasa owinɔ 'da a talɛ ni li gba nyɛa we

²⁴ Nwa Nabukɔdɔnɔzɔrɛ ka mɔ kɔ furi, nɛ ma ba we nu a fala kpo. Nɛ a aka Owi olo li a na: “Lɛ ɛnzɛ Owele talɛ, nɛ lɛ da wa li we gɔ nde?” Nɛ Owi olo li a wa gese na: “Aa nwa, ma a mɔ tɔ̃a ni.”

²⁵ Nɛ a aka wa na: “Kɔ gulu kɛ mi zɔ Owele nalɛ, nɛ fɛlɛ tɛ wa bina, wa yɛnggɛ do kɔ nyɛa we ni we ge nde? Fo olo dani kpo tɛ wa bina. Nɛ wele kɛ nalɛ, a ɔ nɛ gale ni.”

²⁶ Nabukɔdɔnɔzɔrɛ kɔla do nu furi, nɛ a he mɔ na: “Aa Sadrakɛ, Mesakɛ do Abɛdɛ-Nego, Owi tonɔ 'da Gale kɛ a nɛa ngɔ mɛnɔ vɛ̃, nɛ hɔ́ nza li gba nyɛa we gɛ dɔ́!” Wa nɛa we zele ni, nɛ wa hɔ nza li we do talɛ zu wa do ti.

²⁷ Okosolo nwa, do ogã wi fɔmɔ le, do Owi fɔmɔ le, do Owi olo li nwa, wa mba ngba wa, nɛ wa tɛ we fa tɛ owinɔ talɛ ni. Wa fa tɛ wa, nɛ nde we hɔ́ tɛ wa gɔ. Mili zu wa fèlè gɔ, nɛ tulu tɛ wa bɛ̀lɛ̀ 'bɔ gɔ. Nɛ fala tɛ zɛ̃ we únú tɛ wa kpo gɔ.

²⁸ Nabukɔdɔnɔzɔrɛ nɛa we zɔ ni, nɛ a tɔ̃ na: “Lɛ dɔ́nggɔ́ Gale 'da Sadrakɛ, Mesakɛ do Abɛdɛ-Nego. A tumba anzɛ 'da a we kpasa owinɔ 'da a kɛ wa gbini zã wa do a ni. Wa bɛ̃a mbula 'da mi, nɛ wa saka zɛlɛ tɛ. Wa bɛ̃a we dɔnggɔ ogele galenɔ, nɛ wa dɔnggɔ tati a Gale 'da wa zu a kpo.

²⁹ Ma kɛ mi ba nu mi na: Fala kɛ wi a wio nde, wi nu kɔnggɔ tabi nu lɛnggɛ ge nde, a yɔndɔ Gale 'da Sadrakɛ, Mesakɛ do Abɛdɛ-Nego, nɛ wa 'bili sɛ sanga a vɛ̃, nɛ wa 'danga sɛ 'bɔ tɔa 'da a vɛ̃. Mba gɔ, mbé gele gale wè we kpasa wele ɔ nɛ wele kɛ gɛ gɔ.”

³⁰ 'Do nɛ, nɛ Nabukɔdɔnɔzɔrɛ hã gã to nɛa ngɔ kɛ dati ni hã Sadrakɛ, Mesakɛ do Abɛdɛ-Nego kɔ 'bili tɛ nù Babilonia.

Bɔa yalɛ 'da nwa

³¹ Nwa Nabukɔdɔnɔzɔrɛ tumba to hã onu kɔnggɔ winɔ do nu lɛnggɛnɔ ngɔ nùi vɛ̃ na: “Mi hã balɛ hã nɛ!

³² Nɛ zélé we gba sɔ mɛnɔ do ɔngba mɛnɔ Gale kɛ a nɛa ngɔ mɔ vɛ̃, a bia ma hã mi gɛ!

³³ Gba sɔ mɛnɔ 'da nwa ma gã la li. Ɔngba mɛnɔ a dɛ ni, ma nganda wena. Gale ni, a dungu sɛ nwa fai, nɛ dɛa to nwa 'da a é sɛ gɔ.