DANIƐLƐ 12 - WE NU GALE 1995

Ngba soe mɛnɔ ma Sɔkpɔ sɛ nɛ ni

¹ “Anzɛ kɛ a hi'da tulu linɛ ni, a tɔ̃a hã mi na: ‘Do 'da fala ni, nɛ Mikaɛlɛ, gã wi ngɔ anzɛnɔ kɛ a fɔmɔ owinɔ 'da mɔ ni, a hɔ sɛ. Mɛ sɛ a 'da fala ngamɔ ngboo. Ndo nyanga kɛ wa dɛa do nùi gbaa we hɔ sɔɛ gɛ, mbe ngamɔ nɛ́ mɛ ni dɛ̃ mbe tɛ̃ ɛ fala kpo gɔ. Nɛ nde do 'da fala ni, nɛ owinɔ 'da mɔ vɛ̃ kɛ li wa kɔ 'buki 'da Gale ni, wa kpasa sɛ.

² Odɛlɛ winɔ kɛ wa fia zi ia ni, wa tunu sɛ 'bɔ. Ombe wa kpa sɛ kpasi kɛ ma é sɛ gɔ ni, nɛ ombe wa kpa sape do zɛlɛ tɛ kɛ ma é sɛ gɔ ni.

³ Owi hã zãnɔ wa to sɛ ɔ nɛ wese li nza gɛ ni. Nɛ owinɔ kɛ wa bia hã ogili wele na, wa dɛ bɔlɔ zu dɛa mɔ ni, wa to sɛ ɔ nɛ osɔlanɔ ni fai.’

⁴ “Nɛ anzɛ ni tɔ̃ 'bɔ hã mi na: ‘Mɔ Daniɛlɛ, mɔ úsú wenɔ kɔ 'buki gɛ. Da dɛ kɔ mɔ tɔ̃́ dɛ nza gɔ gbaa na, ma hɔ ndɔti 'da fala sɛ nɛ de. Nɛ gba gili Owele wa tɔlɔ sɛ 'buki ni, nɛ ma gã sɛ hã zã 'da wa.’

⁵ “'Do nɛ, nɛ mi zɔa Owele bɔa, wa yula dɛ nu lì. Mbe kpo do kulu lì i, nɛ mbee nɛ do kulu nɛ nga.

⁶ Nɛ mbe anzɛ yula dɛ ngɔ lì. Nɛ mbe wi ni kpo aka a na: ‘Ogba sɔ̃ mɛnɔ ma hɔa gɛ, ma Sɔkpɔ sɛ soe ki nge nde?’

⁷ Anzɛ ni nɛa we zele ni, nɛ a kala kɔ̃ a bɔa nɛ dɛ li nza i, nɛ mi zele gɛlɛ a tɛ tɔ̃ na: ‘Mi kana tɛ mi do zu li Gale, kɛ a ɔ fai ni na, ogba sɔ̃ mɛnɔ ni ma ɔ sɛ sabɛlɛ talɛ do dɔ nɛ. Ma Sɔkpɔ sɛ do 'da fala kɛ ngamɛ 'da owinɔ 'da Gale, ma e sɛ ni.’

⁸ Mi zila we a tɔ̃a ni, nɛ nde mi ĩ̀ ti gulu nɛ gɔ. Ma kɛ mi aka a na: Aa nwa, mɛnɔ ni ma Sɔkpɔ sɛ nɛ nde?

⁹ Nɛ a gisa hã mi na: ‘Daniɛlɛ, mɔ tɛ lènggè mɔ gɔ. We kɛ ma wia na, sakoe gɛ ma 'bana do usu nɛ gbaa we hɔ 'da fala ndɔti nùi.

¹⁰ Ongamɛnɔ kɛ owinɔ 'da Gale wa kpa ni, ma dɛ sɛ na, wa wena wa hɔ sa wi li Gale. O'dã winɔ wa zélé sɛ mɔ gɔ, wa 'bana sɛ tɛ dɛ 'dã mɔ fai. Nɛ nde owanɔ kɛ wa do hã zã ni, wa ĩ sɛ gulu mɛ ma la ni.

¹¹ Yolo tɛ ngba soe osodanɔ wa bɛ̃a na, owinɔ wa tɛ ha dɔnggamɔ hã Gale tũ kpo kpo gɔ ni, we hɔ tɛ 'da fala osodanɔ wa e sɛ gã mɔ sape dɛ ngɔ gbagala 'da Gale, nɛ wa faka ma ni, ma la sɛ tũ koto do kama bɔa do 'bu nɛ kusi.

¹² Mɛ sɛ a yangga wena we owinɔ kɛ wa kpãlã sila wa kɔ kɔ̃a we dɛ 'da Gale gbaa 'do tũ koto do kama talɛ do 'bu nɛ talɛ ngɔ nɛ mɔlɔ ni.

¹³ Nɛ mɔ Daniɛlɛ, mɔ dúngú do kɔ̃a we dɛ 'da Gale, gbaa we hɔ Sɔkpɔ nɛ. Nɛ mɔ fe sɛ, nɛ nde do ndɔti nùi, nɛ mɔ tunu sɛ kɔ fie, we kpa si olo kɔ̃a we 'da mɔ.’ ”