DANIƐLƐ 10 - WE NU GALE 1995

Daniɛlɛ zɔa wele li yalɛ

¹ Do kɔ talɛ sabɛlɛ dɛa to nwa 'da Sirusi tɛ ngɔ nù Pɛrsɛ, nɛ Gale tumba to hã Daniɛlɛ, kɛ li a 'bɔ a Bɛltasarɛ ni. Toe ni zi a saka to ngboo, nɛ ma tɔ̃ we ongamɔ dɛlɛ wena. Nɛ Daniɛlɛ lingga mɔ ngɔ nɛ wena, nɛ a kpa gulu nɛ do kɔ yalɛ, nɛ a tɔ̃ na:

² “Do 'da fala ni, nɛ mi Daniɛlɛ, mi dungu zi do 'bako pɔsɔ talɛ.

³ Mi nyɔ̀ngɔ̀ zi sa'de, tabi gbãlã we nyɔngɔmɔ gɔ, nɛ mi nɔ̀ 'bɔ dɔ̀ gɔ. Nɛ mi bɛ̃a kɛlɛ zu mi gbaa, nɛ pɔsɔnɔ talɛ ni ia.

⁴ Do zɛkɛ 'da kpo, kɔ nɛ 'bu nɛ bɔa ngɔ nɛ nalɛ, nɛ mi zi tɛ nu gã lì Tigrɛ.

⁵ Mi ka mɔ, nɛ mi zɔ wele, a hi'da tulu linɛ, nɛ a kpo 'dɛ̃ mɔ mbali 'dɛ tili a.

⁶ Tɛ̃ a de wena ɔ nɛ dia ta olo gã gole ni. Bula li a yele ɔ nɛ nyɛa kolo, nɛ gbali a sala ɔ nɛ nyɛa we ni. O'baka a do onyanga a ndele kpala kpala ɔ nɛ tũ mɔ bolo, kɛ wa lɔa tɛ nɛ lɔa ni. A wele we, nɛ ma wele ɔ nɛ gɛlɛ ogba gili wele ni.

⁷ Mi Daniɛlɛ, mi zɔa wi ni zu mi kpo. Owinɔ zi kɛ zã mi ni, wa zɔ̀ a gɔ. Nɛ nde kili ba wa, nɛ wa yu, nɛ wa usu tɛ wa.

⁸ Wa la mi dɛ di ni zu mi kpo tɛ zɔ ɔngbamɛ ni. Mi nɛa we zɔ na mɛ ni, nɛ ngawi 'da mi ia, nɛ kili tũ li mi, nɛ mi mbɔkɔ vɛ̃.

⁹ 'Da fala mi zila gɛlɛ wi ni tɛ wele wenɔ ni, nɛ zu mi vĩ, nɛ mi tia, nɛ mi gu li mi nù.

¹⁰ Nɛ 'do nɛ, nɛ kɔ wele dĩ tɛ mi, nɛ ma 'be mi dɛ ngɔ. Nɛ mi sula dɛ ngɔ nyanga mi, nɛ mi a kɔ mi nù, nɛ nde tɛ mi tana wena.

¹¹ Nɛ wi ni to hã mi na: ‘Daniɛlɛ, Gale kɔ gɛnɛ mɔ wena. Kɔ mɔ dɛ̃ nganda we ĩ ti gulu wenɔ mi tɔ̃ hã mɔ gɛ. Mɔ kúlú ngɔ, we kɛ Gale tumba mi hã mɔ.’ Mi nɛa we zele we ni, nɛ mi kulu ngɔ, nɛ nde tɛ mi 'bana tɛ tana nɛ fai.

¹² “'Do nɛ, nɛ a tɔ̃ 'bɔ na: ‘Daniɛlɛ, kili tɛ bà mɔ gɔ. Ndo do kɔ tũi mɔ ba tɛ mɔ dɛ nù dati Gale, nɛ mɔ ia sila mɔ we ĩ ti mɛ ma la ni, nɛ nwa zila sambala 'da mɔ. Kɔ mi tɛa we gese nu sambala ni.

¹³ Nɛ nde anzɛ kɛ a fɔmɔ le nwa Pɛrsɛ ni, a kpia wala hã mi gbaa 'do 'bu tũ bɔa ngɔ nɛ kpo. Nɛ Mikaɛlɛ, kɛ a a mbe kpo sanga ogã anzɛnɔ ni tɛa we gala mi. Ma kɛ mi la ti kɔ nwa ngɔ nù Pɛrsɛ we a.

¹⁴ Nɛ mi tɛa do to hã mɔ, takɔ mɔ ĩ ti mɛ ma dɛ sɛ owinɔ 'da mɔ do 'do nza ni.’

¹⁵ “'Da fala a ma ngɔ wele we hã mi ni, nɛ nde mi gu li mi nù. Nɛ mi wè tɛ wele we kpo gɔ.

¹⁶ Nɛ mbé anzɛ, a ɔ nɛ wele ni tɛa, nɛ a ndɔ kɔ̃ a tɛ nu mi, nɛ nu mi hũi, nɛ mi ma ngɔ wele 'bɔ we. Nɛ mi tɔ̃a hã a na: Aa nwa, mɛ ma hɔa li mi gɛ, ma dɛa na, ngawi 'da mi e vɛ̃, nɛ mi kpa zɛlɛ tɛ̃ wena.

¹⁷ Mi a wele iko, gbãlã tɛ mi gbini vɛ̃, nɛ hi mi ha. Kɔ mi nɛ dɛ fala wele we dati mɔ nwa 'da mi nɛ nde?

¹⁸ Mi nɛa we tɔ̃ ni, nɛ anzɛ kɛ a ɔ nɛ wele ni, 'bia 'bɔ mbé tɛ mi, nɛ mi kpa ngawi do ti.

¹⁹ Nɛ a tɔ̃ hã mi na: ‘Gale kɔ̃ gɛnɛ mɔ wena, kɔ mɔ tɛ dɛ̃ kili gɔ. Mɔ ɔ̃ do gɛ̃a sila, nɛ mɔ ngo tɛ mɔ, kɔ ngawi 'da mɔ ma tɛ dɛ olo nɛ.’ 'Da fala a tɛ wele we hã mi ni, nɛ ngawi 'da mi ma ngɔ tɛ dɛ olo nɛ. Kɔ mi nɛa we zɔ ni, nɛ mi tɔ̃ hã a na: Aa nwa, mɔ wélé we hã mi dɛ dati, we kɛ mɔ ma ngɔ wele we, nɛ ma hã ngawi hã mi.

^20-21 Nɛ a aka mi na: ‘Mɔ ĩ gulu kɛ mi tɛa 'da mɔ nga ni nde? Mi tɛa we tɔ̃ gulu we wa kɔma kɔ 'buku gbãlã we ni hã mɔ. Dati, mi nɛ nɛ we bi do anzɛ kɛ a fɔmɔ le nwa Pɛrsɛ ni. Nɛ 'do nɛ, nɛ anzɛ kɛ a fɔmɔ le nwa Grɛsɛ ni, a hɔ sɛ, nɛ mi bi sɛ a. Nɛ nde fo wele kpo we gala mi na, mi bi wa bina. Wi gala mi tati a anzɛ Mikaɛlɛ, kɛ a fɔmɔ obe Israɛlɛ ni iko.