DANIƐLƐ 1 - WE NU GALE 1995

Daniɛlɛ do ongba a tɛ kɔ le Babilɔnɛ

¹ Do kɔ talɛ sabɛlɛ dɛa to nwa 'da Yoakimɛ tɛ ngɔ nù Yuda, nɛ Nabukɔdɔnɔzɔrɛ, nwa ngɔ nù Babilonia linggi le Yeruzalɛmɛ, nɛ a bi ma.

² Nɛ NWA Gale dɛa na, Nabukɔdɔnɔzɔrɛ nɛ ngɔ Yoakimɛ li bole. Nɛ Nabukɔdɔnɔzɔrɛ ba Yoakimɛ, nɛ a kala 'bɔ ombe mɔ dɛa tonɔ kɔ tɔa Tɛmpɛloe 'da Gale, nɛ a si do a, mba do mɛnɔ ni dɛ Babilonia i, nɛ a a ma kɔ tɔa kpamɛnɔ, kɔ tɛmpɛloe 'da ogalenɔ 'da a.

³ Nabukɔdɔnɔzɔrɛ ba nu ɛ hã Asɛpenazɛ, wi ngɔ wi dɛa tonɔ 'da a na, a saka mbe obe zagbãlã kɔ obe Israɛlɛ we dɛ to hã ɛ. Nɛ a sáká tati a wanɔ wa kɔ nu fɛlɛ nwa, do wanɔ wa kɔ nu fɛlɛ Owi dĩ ni.

⁴ Obe zagbãlãnɔ ni, wa tɛ ɔ̃ do kunda tɛ wa kpo gɔ, nɛ wa de zagbãlã wena. Nɛ ma wia 'bɔ na, wa ɔ do sɔ̃a gbãlã tɛ, nɛ wa ɔ do wi hã zã, nɛ wa ĩ ti gɔnɔ sanga dia mɔ do 'dã mɔ. Na mɛ ni, sɛ a wa wia we le kɔ tɔa 'da nwa, we dɛ to hã a de. Wa be sɛ lɛnggɛ nu Obabilonia hã wa, nɛ wa yambala 'bɔ we kɔmɔ ma.

⁵ Nwa Nabukɔdɔnɔzɔrɛ ba 'bɔ nu ɛ na, tũ kpo kpo wa hã kpo nyɔngɔmɛ do dɔ̃ɛ kɛ wa tɛ nɛ hã ɛ ni hã wa. Nɛ wa be mɔ hã wa 'do sabɛlɛ talɛ. Hã kɔ̃ tũi ni ma Sɔkpɔ, sɛ nɛ wa we sɛ we hɔ dati ɛ de.

⁶ Sanga owinɔ wa saka wa ni, wi a Daniɛlɛ, Hanania, Mikaɛlɛ do Azaria. Wa zi vɛ̃ a Owi nu kpala Yuda.

⁷ Wi ngɔ wi dɛa tonɔ 'da nwa ia mbé li zu wa: A ia li Daniɛlɛ na Bɛltasarɛ, nɛ a e li Hanania na Sadrakɛ, nɛ a e li Mikaɛlɛ na Mesakɛ, nɛ a e li Azaria 'bɔ na Abɛdɛ-Nego.

⁸ Kɛ 'da Daniɛlɛ, a 'bili na, ɛ nyɔ́ngɔ́ sɛ mɛ, nɛ ɛ nɔ́ dɔ̃ɛ kɛ wa nɛ nɛ hã nwa ni fala kpo gɔ, da dɛ kɔ ɛ hɔ́ wi ndi li Gale gɔ. Ma kɛ a aka Asɛpenazɛ, wi ngɔ wi dɛa tonɔ 'da nwa na, a tɛ ngbɔ̀kɔ̀ ɛ na, ɛ nyɔngɔ mɛ tabi ɛ nɔ dɔ̃ɛ, kɔ ɛ hɔ wi ndi li Gale gɔ.

⁹ Nɛ Gale 'dafa sila Asɛpenazɛ na, Daniɛlɛ de li a, nɛ a kɔ̃ gɛnɛ we kɛ Daniɛlɛ aka ni.

¹⁰ Nɛ a gese hã Daniɛlɛ na: “Wi a nwa do tɛ̃ ɛ hã a ba nu a ngɔ nyɔngɔmɛ ma wia na, nɛ nyɔngɔ, do dɔ̃ɛ na nɛ nɔ ni. Kɔ mi dɛ kili na, fala kɛ a zɔ̃ na tɛ nɛ ndele nɛ́ kɛ 'da ongba nɛ gɔ, nɛ a gbɛ sɛ mi.”

¹¹ Nɛ Daniɛlɛ tɔ̃ hã wi kɛ Asɛpenazɛ ia a we zɔ mɔ tɛ wa ni na:

¹² “Mɔ tɛ hã̀ mɔ sɔkpã hã lɛ gɔ. Mɔ hã hã lɛ tati a onwá sanggonɔ do lì nɔ nɔa iko. Nɛ mɔ yámbá lɛ ni 'do tũ 'bu.

¹³ 'Do nɛ, nɛ mɔ we sɛ ndala tɛ lɛ do kɛ 'da obe zagbãlãnɔ wa nyɔngɔ kpo kpo nyɔngɔmɛ kɛ wa nɛ do ma hã nwa ni. Do 'da fala ni, nɛ mɔ dɛ sɛ ɔ nɛ kɛ mɔ zɔa ni.”

¹⁴ Nɛ wi ni kɔ̃a, nɛ a yamba Daniɛlɛ do ongba a 'do tũ 'bu.

¹⁵ Kɔ tũi ni nɛa we Sɔkpɔ nɛ, nɛ nde wa do dia kili tɛ wi, nɛ wa dĩlĩ la obe zagbãlãnɔ kɛ wa nyɔngɔ mɛnɔ 'da nwa ni.

¹⁶ Ma kɛ wi zɔ mɔ tɛ wa ni la wa na, wa nyɔngɔ tati a onwá sanggonɔ. Nɛ a ha 'bɔ nyɔngɔmɛ do dɔ̃ɛ kɛ wa nɛ nɛ hã nwa ni hã wa gɔ.

¹⁷ Gale hã gã hã zã ĩ ti lɛnggɛ kɔ le ni hã obe zagbãlãnɔ nalɛ ni. Nɛ a hã 'bɔ hã zã tɔ̃ gulu mɛnɔ ma hɔ li wele do oyalɛ ni hã Daniɛlɛ.

¹⁸ Ma hɔa Sɔkpɔ sabɛlɛ talɛ kɛ nwa Nabukɔdɔnɔzɔrɛ ia ni, nɛ Asɛpenazɛ nɛa do obe zagbãlãnɔ vɛ̃ dati nwa.

¹⁹ Wa hɔa dati nwa, nɛ a wele we do wa vɛ̃. Nɛ nde Daniɛlɛ, Hanania, Mikaɛlɛ do Azaria wa nɛa ngɔ tala wanɔ ni vɛ̃ do hã zã. Nɛ nwa kala wa do Owi dɛa tonɔ 'da a.

²⁰ Nɛ 'da falanɔ vɛ̃ kɛ nwa aka zi obe zagbãlãnɔ nalɛ ni si ngɔ mɔ kɛ ma zɔa hã zã, nɛ a zɔ na gisa we 'da wa nɛa ngɔ kɛ 'da Owi zɔ gulu mɛnɔ, do Owi sɔ̃nɔ ngɔ nùi 'da a fala 'bu.

²¹ Daniɛlɛ dɛa zi to kɔ tɔa 'da nwa gbaa we hɔ 'da fala Sirusi, nwa ngɔ nù Pɛrsɛ bi le Babilɔnɛ, nɛ a ba ma ni.