KƆLƆSƐ 4 - WE NU GALE 1995

¹ Nɛ, Onwanɔ, nɛ dɛ́ mɔ do ngbánɔ 'da nɛ nɛ́ kɛ ma wia ni, nɛ nɛ ɔ́ do dia sila dɛ 'da wa. Nɛ nɛ ĩ́ na, nɛ tɛ mɛ 'bɔ do nwa ngɔ nɛ li nza i boe.

Tala mbula

² Nɛ tɛ là fala sambala Gale gɔ. Kɔ nɛ ma ngɔ sambala nɛ, nɛ nɛ ɔ́ do sɔ̃a li, nɛ nɛ hã iɔ̃nae hã Gale.

³ Nɛ nɛ sámbálá 'bɔ a we duzu lɛ na, a hã wala hã lɛ we be we 'da a hã owinɔ, do tɔ̃ gulu usu we 'da Kristo, kɛ mi lia bɔlɔkɛ we ma ni.

⁴ Nɛ áká Gale we mi na, mi yɔlɔ gulu we 'da Kristo hã owinɔ ɔ nɛ kɛ ma wia ni, takɔ wa zele ma do dia nɛ.

⁵ Nɛ yɛ́nggɛ́ sanga owinɔ kɛ wa tɛ kɔ̃̀ zu li Kristo gɔ ni do hã zã. Kɔ nɛ kpa fala we dɛ de mɔ, nɛ nɛ dɛ́ ma.

⁶ Ma wia na, lɛnggɛ nu nɛ ɔ a bɔlɔ na, ma de tɛ wele ɔ nɛ nyɔngɔmɔ kɛ tɔ̃ se'de ni. Nɛ nɛ ĩ́ ti gese nu we hã wele nɛ́ kɛ ma wia ni.

Tala balɛnɔ

⁷ Nya mi Tisikɛ, kɛ a ngɔ sila mi ni, a tɔ̃ sɛ sako 'da mi vɛ̃ hã nɛ. A a ngba mi wi dɛa toe 'da Nwa, nɛ a dɛ toe ni do wala olo nɛ ngboo.

⁸ Gulu kɛ ngboo mi tumba a hã nɛ ni na, a tɔ̃ tɛlɛ tɛ kɛ lɛ dungu do ma gɛ hã nɛ, nɛ a kpãlã sila nɛ.

⁹ Mi tumba wa do Onezimɛ, nya lɛ kɛ a ngɔ sila lɛ, nɛ a dɛ mɔ do wala olo nɛ ni. A a wi 'da nɛ. Wa bɔa nɛ ni, wa tɔ̃ sɛ wenɔ vɛ̃ kɛ ma la i nga gɛ hã nɛ.

¹⁰ Aristarkɛ, ngba mi wi bɔlɔkɛ, mba do Marko, nya Barnabasi wa tumba balɛ hã nɛ. Mi tɔ̃a zi we 'da Marko hã nɛ ia. Kɔ a hɔ 'da nɛ mɔ, nɛ nɛ dɛ́ a do dia nɛ.

¹¹ Nɛ Yezu, kɛ wa sa 'bɔ li a na Yustusi ni, a tumba 'bɔ balɛ hã nɛ. Sanga Oyudanɔ kɛ wa hɔa Owi Kristo ni, wi tati a wa zu wa talɛ ni a wa gala mi kɔ dɛa to nwa 'da Gale. Nɛ wa hã kpã sila hã mi wena.

¹² Epafrasi, kɛ a 'bɔ a wi 'da nɛ ni, a hã balɛ hã nɛ. A a wi dɛa to 'da Yezu Kristo, nɛ a sambala Gale we nɛ 'da fala fai. A sambala na, nɛ yolo nganda, nɛ nɛ hɔ owinɔ kɛ kɔ̃a we 'da wa nganda ia ni. Nɛ nɛ ĩ ti mɛ kɛ zã Gale kɔ̃a na nɛ dɛ ma ni, nɛ nɛ tɛ ɔ̀ do kafi gɔ.

¹³ Mi wia we tɔ̃ do zu li a na, a dɛ to we duzu nɛ, do owinɔ tɛ Laodise, do Hierapolisɛ wena.

¹⁴ Luka, monganga kɛ a ngɔ sila lɛ ni, do Demasi wa hã balɛ hã nɛ.

¹⁵ Nɛ ha balɛ hã onya lɛ tɛ Laodise ni, nɛ nɛ hã 'bɔ balɛ hã Nimfa, boko nya lɛ, mba do Owi kɔ̃a wenɔ kɛ wa mba li ngba wa dɛ tɔa 'da a ni.

¹⁶ 'Da fala kɛ nɛ tɔlɔ mbɛti gɛ do'do, nɛ nɛ tómbó, hã wa tɔlɔ ma kɔ eklezia tɛ Laodise i. Nɛ nɛ tɔ́lɔ́ tɛ mɛ 'bɔ mbɛti kɛ mi tumba hã eklezia tɛ Laodise i ni.

¹⁷ Nɛ tɔ̃́ hã Arkipɛ na, a bata toe kɛ Nwa hã ma hã a ni, nɛ a dɛ ma do dia nɛ.

¹⁸ Mi Polo, mi hã balɛ hã nɛ kɔ mbɛti mi kɔmɔ hã nɛ do zu kɔ̃ mi wele nɛ gɛ. Kɔ da dɛ kɔ ta zu nɛ élé na, mi a kɔ bɔlɔkɔ ni gɔ. E kɔ dia zã 'da Gale 'bana do nɛ.