KƆLƆSƐ 3 - WE NU GALE 1995

¹ Nɛ́ kɛ Gale tunu nɛ kɔ fio do Kristo fala nɛ kpo ni, ma wia na, nɛ a sila nɛ ngɔ mɛnɔ li nza i, tɛ fala kɛ Kristo dungu nɛ si ngɔ ngawili kɔ̃ Gale ni.

² Nɛ lénggé do omɛnɔ li nza i. Nɛ tɛ lènggè do kɛnɔ ngɔ nù gɛ gɔ,

³ we kɛ nɛ ɔ nɛ Go ni. Nɛ nde kpasi 'da nɛ fala nɛ kpo do Kristo, nɛ ma usu tɛ̃ ɛ tambala kɔ̃ Gale.

⁴ Kristo a kpasi 'da nɛ ngboo. Kɔ 'da fala kɛ a tɛ sɛ 'bɔ mbé nɛ ni, nɛ nɛ hɔ sɛ tɛ mɛ 'bɔ, nɛ nɛ mba do a kɔ dɔ̃lɔ̃ li 'da a.

Lɛ kpóló ã dɛa mɔ tɛ Iɛ

⁵ We duzu ma, nɛ bɛ̃́ gɛnɛ wɔ mɔ li nùi kɛ ma 'bana kɔ sila nɛ ni. Nɛ lá fala yɛnggɛ vĩ zu yɛli, do dɛ mɔ sape, lengge mɔ sape, kɔ̃ gɛnɛ 'dã wɔ kɔ sila wi, do dɛ nga'ba kpamɔ, kɛ ma ɔ nɛ dɔnggɔ gele gale ni.

⁶ Mɛnɔ ni ma nɔ̃lɔ̃ zã Gale dɛ tɛ owinɔ wa dɛ ma ni wena.

⁷ Nɛ tɛ mɛ 'bɔ, 'da fala kɛ nɛ 'bana zi tɛ yɛnggɛ 'dɔkɔlɔ mɛnɔ ni, nɛ dɛ zi 'bɔ ni.

⁸ Nɛ nde ngangga ni, nɛ bɛ̃ gɛnɛ mɛnɔ ni vɛ. Nɛ lá fala nɔ̃lɔ̃ zã, mãlã, dɛ 'dã hã, tɔ̃ tɛ ngba wi, do tɔ̃ lɛnggɛ sape.

⁹ Nɛ tɛ 'bìlì bɛlɛ hã ongba nɛ gɔ, we kɛ nɛ la ã dungi 'da nɛ, do mɛnɔ nɛ dɛ zi ni,

¹⁰ nɛ nɛ hɔa mbé wi ia. Gale kɛ a dɛa nɛ do mbé wi ni, a tɛ kifi dɛa mɔ tɛ nɛ fai na, nɛ hɔ a ngboo, nɛ nɛ ĩ ti a do dia nɛ.

¹¹ Na mɛ ni, nɛ nde mɔ kɛ ma gɔnɔ sanga be Yuda do gele wi, tabi wi nɛ gaza do manda'ba ni bina. Nɛ wi kɛ a yàmbàlà mɔ gɔ, do wi kɛ a ĩ̀ ti mɔ wena gɔ, do ngbá, tabi wele le, wa vɛ wa wia kɔ̃ li Gale iko. We kɛ Kristo ngɔ mɛnɔ vɛ, nɛ a kɔ winɔ 'da a vɛ.

¹² Nɛ a owinɔ 'da Gale. A kɔ̃a gɛnɛ nɛ, nɛ a saka nɛ do owinɔ 'da a ngboo. We duzu ma, nɛ ĩ́ 'bako hã ngba nɛ, nɛ nɛ ɔ́ do dia sila dɛ 'da wa, nɛ nɛ bá tɛ nɛ dɛ nù, nɛ nɛ ɔ́ do gɛ̃a sila, do du sila.

¹³ Nɛ kúnú ongba nɛ. Kɔ fala kɛ ngba mɔ dɛ mɔ 'danga nde, nɛ mɔ mbɔ́kɔ́ a. Ma wia na, nɛ mbɔkɔ ngba nɛ ngɔ 'dã mɛ wa dɛa do nɛ ni, ɔ nɛ kɛ Kristo mbɔkɔ zi tɛ mɛ 'bɔ nɛ ni.

¹⁴ Nɛ dɛ ngɔ mɛnɔ ni vɛ̃, nɛ kɔ̃́ gɛnɛ ngba nɛ, we kɛ kɔ̃a ngba wi ma mba nɛ ngboo dɛ tɛ ngba nɛ, nɛ nɛ hɔ kpo.

¹⁵ Kɔ ma wia na, dɛa na kɛ Kristo hã ma ni 'dafa dungi 'da nɛ. We duzu kɛ Gale sa mɔ hã nɛ na, nɛ mba vɛ, nɛ nɛ hɔ kili tɛ wi kpo, nɛ nɛ dɛ na sanga tɛ ngba nɛ. Nɛ nɛ hã̀ 'bɔ iɔ̃nae hã a Gale.

¹⁶ Nɛ úsú wenɔ 'da Kristo do dia mɔ nɛ vɛ dɛ kɔ sila nɛ. Nɛ bé ma sanga tɛ ngba nɛ, nɛ nɛ tɔ̃ mbula sanga nɛ do hã zã vɛ̃. Nɛ gá ozuma hã Gale do sila nɛ vɛ, nɛ nɛ hã iɔ̃nae hã a. Nɛ gá zuma kpi do kpi, kɛ Hi Wi Santo ia dɛ nu nɛ ni.

¹⁷ Wenɔ vɛ nɛ tɔ̃ ma, do mɛnɔ nɛ dɛ ni, nɛ dɛ́ do zu li Nwa Yezu Kristo, nɛ nɛ hã 'bɔ iɔ̃nae hã Baa lɛ Gale do wala 'da Kristo ni.

Dungi 'da owinɔ 'da Kristo

¹⁸ Aa nɛ, owukonɔ, nɛ zélé nu wili nɛ ɔ nɛ kɛ ma wia do owinɔ 'da Nwa ni.

¹⁹ Nɛ nɛ, owi wilinɔ, nɛ kɔ gɛnɛ owukonɔ 'da nɛ, nɛ nɛ tɛ ɔ̀ do nga sila dɛ 'da wa gɔ.

²⁰ Nɛ nɛ, obenɔ, nɛ zélé nu owi ko nɛ kɔ mɛnɔ vɛ, we kɛ Nwa kɔ̃a ní.

²¹ Nɛ, obaa benɔ, nɛ tɛ nɔ̃̀lɔ̃̀ zã obenɔ 'da nɛ gɔ, dɔ wa mbɔ́kɔ́ gɔ.

²² Nɛ, ongbánɔ, nɛ zélé nu owele nɛ ngɔ nù gɛ kɔ mɛnɔ vɛ̃. Nɛ tɛ zèlè nu wa do ngɔ li wa iko, we de li wa gɔ, nɛ nde nɛ zélé nu wa do dia sila vɛ̃, we kɛ nɛ dɛ kili Nwa Yezu.

²³ Mɛnɔ vɛ̃ nɛ dɛ ni, nɛ dɛ́ ma do sila nɛ kpo, ɔ nɛ kɛ nɛ dɛ ma hã Nwa Yezu, nɛ nde nɛ dɛ́ hã wele gɔ ni.

²⁴ Nɛ nɛ ĩ́ na, Nwa Yezu a hã sɛ si olo nɛ, kɛ a 'dafa we owinɔ 'da a ni hã nɛ. Mba gɔ, Nwa kɛ nɛ dɛ toe hã a ni, wi a Kristo.

²⁵ Nɛ nde Gale a hã sɛ etumbu hã Owi dɛ 'dã mɛnɔ olo 'dã mɛnɔ wa dɛ ni. We kɛ Gale zɔ́ bula li wele gɔ.