KƆLƆSƐ 2 - WE NU GALE 1995

¹ Ma hã mi kɔ̃a na, nɛ ĩ tɛlɛ tɛ kɛ mi gbɛ tɛ mi kɔ dɛa toe we duzu nɛ Owi Kɔlɔsɛ, do Laodise, do ogele winɔ vɛ̃ kɛ wa tɛ zɔ̀ kuti mi gɔ ni.

² Mi dɛa ni, takɔ wa kpa kpã sila, nɛ wa mba kpo, nɛ wa kɔ̃ gɛnɛ ngba wa. Na mɛ ni, nɛ wa ĩ sɛ ti gulu usu linggamɛ 'da Gale ngboo, nɛ ma dɛ sɛ na, kafi sĩ tɛ ɔ̀ kɔ sila wa gɔ. Usu linggamɛ 'da Gale ni, wi a Kristo do tɛ̃ a.

³ Hã zã, do ngawi ĩ ti mɛnɔ 'da Gale vɛ̃, ma yolo kɔ̃ a. Nɛ mɛnɔ ni a gã kpamɔ ngboo.

⁴ Mi tɔ̃a hã nɛ ní na, dɔ wele kpo ɔ́lɔ́ nɛ do ɛ̃fɛ̃ lɛnggɛ iko gɔ.

⁵ Gɛnɛ kɔ mi sanga nɛ bina, nɛ nde do sila mi, mi fala nɛ kpo do nɛ. Nɛ mi zɔ bɔlɔ zu dɛa mɛnɔ 'da nɛ, do nɔa sila 'da nɛ kɔ kɔ̃a we kɛ nɛ kɔ̃a do Kristo ni, nɛ ma hã yangga hã mi wena.

Kristo hã ngbongbo kpasi hã lɛ

⁶ Ɔ nɛ kɛ nɛ kɔ̃a gɛnɛ Nwa Yezu Kristo ia ni, nɛ mba do a kpo kɔ dungi 'da nɛ.

⁷ Nɛ 'bé a nganda ɔ nɛ liã te 'be do te ni, nɛ nɛ tɔ́ndɔ́ tɛ nɛ do a. Nɛ sila nɛ nɔ́ tɛ kɔ̃a we 'da nɛ dɛ dati fai, ɔ nɛ kɛ wa bia zi hã nɛ ni. Nɛ nɛ ha iɔ̃nae hã Gale do sila nɛ vɛ̃.

⁸ Li nɛ sɔ̃̀, dɔ wele kpo ɔ́lɔ́ nɛ do bia we bɛlɛ kɛ ma yula kɔ hã zã mɔ́ wele iko ni gɔ. Ki ni, mɛ a mɔ olo oyaa wa, nɛ ma yula 'da o'dã hi winɔ nù gɛ, nɛ nde ma yòlò 'da Kristo gɔ.

⁹ Mba gɔ, 'da fala Kristo zi a wele ngɔ nù gɛ, nɛ a wia zi kɔ̃ do Gale vɛ̃.

¹⁰ Nɛ nɛ, kɛ nɛ mba kpo do a ni, nɛ kpa ngbongbo kpasi kɔ̃ a, kɛ a a nwa ngɔ ohi winɔ vɛ̃ kɛ wa dungu nwa, nɛ wa do ngawi ni.

¹¹ Kɔ nɛ́ kɛ nɛ mba kpo do Kristo ni, nɛ nɛa gaza ia. Gaza ni, mɛ a gaza kɛ owele wa a wa gɔna gɔ, nɛ nde mɛ a gaza kɛ Kristo hã a gɔna. Gulu nɛ na, a fua nɛ ti ngawi 'da 'dã wɔ kɔ sila nɛ.

¹² Mba gɔ, ngba soe nɛ kpa zi batisimɔ ni, ma be na wa mi zi nɛ fala nɛ kpo do Kristo, nɛ Gale tunu zi nɛ kɔ fio fala nɛ kpo do a. Gale dɛa ni, we duzu kɛ nɛ gbini zi zã nɛ do ngawi 'da a, kɛ a tunu do Kristo kɔ ofionɔ ni.

¹³ Zi dati, nɛ ɔ zi nɛ fio, we duzu 'dã mɛnɔ 'da nɛ, do we duzu kɛ nɛ zi a opaganɔ. Nɛ nde ngangga gɛ, Gale tunu nɛ kɔ fio fala nɛ kpo do Kristo, nɛ a fua ku'da 'dã mɛnɔ zu nɛ vɛ̃.

¹⁴ Zi dati, lɛ tia zi do ngbangga, we duzu kɛ lɛ bɛ̃a zi mbula 'da Gale. Nɛ nde Gale fua ngbangga ni zu lɛ do'do. Ma ɔ nɛ kɛ a ba mbɛti ku'da zu lɛ ni, nɛ a gbɛa ma ngɔ finda te 'da Kristo ni.

¹⁵ We duzu fio 'da Kristo ngɔ finda te, ma hã Gale fua ngawi 'da ohi winɔ, kɛ wa a ogã wi do onwa li ngɔ gɛ vɛ̃, nɛ a ɛnzɛ wa, nɛ a gbɔtɔ wa dɛ 'do Kristo dɛ gbali winɔ vɛ̃ we be na, Kristo nɛa ngɔ wa.

¹⁶ Kɔ we duzu ma, ma wè na wele kpo e mbula hã nɛ ngɔ nyɔngɔmɔ, do mɔ kɛ nɛ wia we nɔ nɛ ni gɔ. Nɛ wele tɛ è mbula hã nɛ ngɔ ɛngganɔ kɛ nɛ wia tɛ dungu nɛ, ɔ nɛ ɛngga mbé hɔa zɛkɛ, tabi otũ kpe tɛ winɔ gɔ.

¹⁷ Mba gɔ, mɛnɔ ni vɛ̃ mɛ a ohi mɛnɔ kɛ ma dɛ sɛ tɛ̃ ɛ do 'do gɛ ni iko, nɛ nde ngbongbo mɛ wi a Kristo.

¹⁸ Nɛ tɛ lènggè do winɔ kɛ wa a tɛ wa do mɛnɔ wa zɔa li yalɛ, nɛ wa dɛ yangga ba tɛ wa dɛ nù, do dɔnggɔ anzɛnɔ nɛ́ ogale ni gɔ. Nɛ tɛ hã̀ wala hã wa na, wa nɛ ngɔ nɛ gɔ. We kɛ linggamɛnɔ 'da wa mɛ a linggamɔ mɔ́ wele iko, nɛ kɔ sila wa dunu do wali.

¹⁹ Owinɔ ni wa la fala mba kpo do Kristo, kɛ a a zu Eklezia ni do'do. Kristo dɛ na, owinɔ kɔ Eklezia wa mba vɛ kpo, ɔ nɛ kɛ li gbili tɛ wele do nĩnɔ mba kili tɛ wi kpo ni. Nɛ a dala Eklezia, takɔ ma gã dɛ dati fai, ɔ nɛ kɛ zã Gale kɔ̃a ni.

Le fia nɛ Iɛ tunu fala nɛ kpo do Kristo

²⁰ Nɛ́ kɛ nɛ fia do Kristo fala nɛ kpo ni, nɛ 'bɔ ti mbula 'da o'dã hi winɔ, kɛ wa a nwa ngɔ nù gɛ ni bina. Kɔ gulu kɛ nɛ dɛ 'bɔ mɔ tɛ nɛ ɔ nɛ kɛ 'da owinɔ nù gɛ we ge nde?

²¹ Gulu kɛ nɛ dɛ mbulanɔ 'da wa kɛ ma tɔ̃ na: “Nɛ tɛ bà kɛ gɛ gɔ, nɛ tɛ nyɔ̀ngɔ̀ kɛ gɛ gɔ, nɛ tɛ 'bè tɛ kɛ gɛ gɔ” ni we ge nde?

²² Mbulanɔ ni vɛ̃, ma we mɛnɔ ngɔ nù gɛ, kɛ ma dɛ to hã wele fala kpo, nɛ ma 'danga iko ni. Owele wa a wa dɛa mbulanɔ ni, nɛ wa be 'bɔ ma.

²³ Gbãlã we, owinɔ wa zɔ ma nɛ́ mbula mɔ́ owi hã zã ni, we kɛ ma hã wala hã wele do wele we dɔnggɔ Gale nɛ́ kɛ zã a kɔ̃a ni, nɛ ma tombo winɔ na, wa dɛ ɔ nɛ kɛ wa ba tɛ wa dɛ nù ni, nɛ a hã ngamɔ hã kili tɛ wa. Nɛ nde fo gulu mbulanɔ ni kpo bina, nɛ ma gálá wele we bɛ̃ gɛnɛ 'dã wɔ kɔ kili tɛ̃ a gɔ.