KƆLƆSƐ 1 - WE NU GALE 1995

¹ Wi a mi Polo, kɛ Gale saka mi do kɔ̃a zã 'da a, nɛ a ia mi do wi nɛ toe 'da Yezu Kristo ni. Lɛ do nya mi Timote, lɛ kɔma mbɛti gɛ hã nɛ,

² onya lɛ winɔ 'da Gale tɛ kɔ le Kɔlɔsɛ, kɛ nɛ mba kpo do Yezu, nɛ nɛ 'bana tɛ kɔ̃ gɛnɛ a do sila nɛ kpo ni. E kɔ Baa lɛ Gale be dia zã 'da a hã nɛ, nɛ a dɛ na, nɛ dungu do gɛ̃a sila.

Polo gisa iɔ̃nae ha Gale

³ 'Da falanɔ vɛ̃ lɛ sambala Gale, Baa Nwa 'da lɛ Yezu Kristo ni, nɛ lɛ hã iɔ̃nae hã a we duzu nɛ.

⁴ Mba gɔ, lɛ zila sako kɔ̃a we 'da nɛ, kɛ nɛ kɔ̃a do zu li Yezu Kristo, do tɛlɛ tɛ kɛ nɛ kɔ̃a do gɛnɛ owinɔ 'da Gale vɛ̃ ni.

⁵ Kɔ̃a we do kɔ̃ gɛnɛ ngba wi 'da nɛ ni, ma nganda, we kɛ nɛ tɛ gbini zã nɛ do de mɛ kɛ ma 'bɔ 'da nɛ li nza i ni. Mba gɔ, kuti kɛ wa bia zi gbãlã we kɛ ma kɔ Dia Sakoe hã nɛ ni, nɛ nɛ zila zi we de mɛ kɛ nɛ wia we kpa ma olo nɛ ni.

⁶ Dia Sakoe ni tɛ yɛ'bɛ ngɔ nù gɛ vɛ̃, nɛ ma dɛ dia mɔ hã winɔ wena, ɔ nɛ kɛ ma dɛa zi tɛ mɛ 'bɔ dia mɔ hã nɛ, ndo do kɛ nɛ zila zi we dia zã 'da Gale, nɛ nɛ ĩ na, mɛ a gbãlã we ngboo ni.

⁷ Wi bia zi we ni hã nɛ, wi a Epafrasi, yali ngba lɛ wi toe 'da Kristo, kɛ a ngɔ sila lɛ ni. A dɛ toe 'da Kristo sanga nɛ do wala do nɛ ngboo.

⁸ Wi a a hã a tɔ̃a tɛlɛ tɛ kɛ Hi Wi Santo ia kɔ̃ gɛnɛ ngba wi kɔ sila nɛ ni hã lɛ.

⁹ Gulu nɛ a yolo do ngba soe kɛ lɛ zila do lɛnggɛ 'da nɛ ni, lɛ ɔ̀mɔ̀ tɛ sambala Gale we duzu nɛ gɔ. Lɛ aka a na, Hi Wi 'da a hã hã zã hã nɛ, takɔ nɛ ĩ ti mɛnɔ vɛ̃ kɛ Gale kɔ̃a na, nɛ dɛ ma ni.

¹⁰ Na mɛ ni, nɛ nɛ dungu sɛ nɛ́ kɛ ma wia do owinɔ 'da Gale ni, nɛ dɛa mɔ tɛ nɛ ma hã sɛ yangga hã a fai. Nɛ dɛ sɛ de mɔ kpi do kpi, nɛ nɛ ĩ sɛ ti Gale dɛ dati fai.

¹¹ Lɛ aka Gale na, a kpãlã sila nɛ do ngawi 'da a kɛ ma do dɔ̃lɔ̃ li wena ni, takɔ nɛ ɔ do nɔa sila, nɛ nɛ ĩ ti kunu sila nɛ kɔ ngamɛnɔ vɛ̃.

¹² Nɛ dɛ́ yangga, nɛ nɛ hã iɔ̃nae hã Baa lɛ Gale, we duzu kɛ a 'dafa nɛ na, nɛ we wi kpa de mɛnɔ kɛ a a ma kɔ sa fala 'da a ngɔ i, we 'bɔ do 'da winɔ 'da a ni.

¹³ A fua zi lɛ ti ngawi 'da ohi wi kɔ gba tũ, nɛ a a lɛ kɔ le nwa 'da Be 'da a, kɛ a ngɔ sila a ni.

¹⁴ Gale gɔnɔ zu lɛ, nɛ a fua ku'da 'dã mɛnɔ zu lɛ do'do we duzu Be 'da a ni.

Kristo a wio nde?

¹⁵ Kristo a bula li Gale, kɛ lɛ zɔ́ a gɔ ni. A a kuti Be, nɛ Gale dɛa winɔ do mɛnɔ vɛ̃ dɛ 'do a.

¹⁶ Mba gɔ, Gale dɛa mɛnɔ vɛ̃ do wala 'da a: omɛnɔ li nza i, do kɛnɔ nù nga, kɛnɔ wa zɔ zɔa, do kɛnɔ wa zɔ́ gɔ ni, mba do ohi winɔ li ngɔ gɛ kɛ wa a onwa, tabi ogã wi, nɛ wa do ngawi wena ni. Gale dɛa mɛnɔ nyanga nza gɛ vɛ̃ do wala 'da Kristo, nɛ ma ɔ hã a.

¹⁷ Kristo dati hã mɛnɔ vɛ̃. Nɛ mɛnɔ vɛ̃ ma 'bana dɛ do nɛ we duzu a.

¹⁸ A a zu Eklezia, nɛ Eklezia a kili tɛ̃ a. Nɛ a a ndua nyanga kpasi 'da Eklezia. A a kuti be, nɛ a 'bɔ a kuti wi kɛ Gale tunu a sanga ofionɔ, takɔ a dungu nwa ngɔ owinɔ do mɛnɔ vɛ̃.

¹⁹ We kɛ Gale kɔ̃a zi na, Kristo ba tɛlɛ tɛ̃ ɛ, nɛ a we kɔ̃ do ɛ kɔ mɛnɔ vɛ̃.

²⁰ Nɛ do wala 'da Kristo ni, Gale 'dafa dɛa na sanga a do omɛnɔ vɛ. A 'dafa dɛa na sanga a do mɛnɔ li nza, do kɛnɔ nù nga vɛ do wala 'da tɔkɔ tɛ Kristo kɛ a fia ngɔ finda te ni.

²¹ Nɛ nɛ tɛ mɛ 'bɔ, nɛ nyɛlɛ zi do Gale wena. Nɛ zi a Owi sɛnɛ Gale, we kɛ dɛa mɔ tɛ nɛ do linggamɛnɔ 'da nɛ, ma dè zi gɔ.

²² Kɔ ngangga ni, Gale dɛa na do nɛ do wala 'da Be 'da a, kɛ kili tɛ a fia zi we duzu nɛ, takɔ nɛ hɔ santo li Gale, nɛ 'dã mɔ kpo tɛ ɔ̀ kɔ nɛ gɔ, nɛ a tɛ kpà mɔ kɔ'dɔ wi kpo kɔ nɛ gɔ ni.

²³ Nɛ nde ma wia na, nɛ 'be kɔ̃a we 'da nɛ nɔ, nɛ nɛ yolo nganda nɛ́ tɔa kɛ wa a nyanga nɛ dɛ ngɔ ta ni. Nɛ dɔ wele kpo ɔ́lɔ́ nɛ na, nɛ la fala gbini zã nɛ do Dia Sakoe kɛ wa bia zi ma hã nɛ ni gɔ. Dia Sakoe ni, wa bia ma hã owinɔ ngɔ nù gɛ vɛ̃, nɛ mi Polo mi hɔa wi nɛ to we be ma.

Dɛa toe 'da Polo kɔ Eklezia

²⁴ Nɛ ngangga gɛ, zɛlɛ tɛnɔ mi kpa we duzu nɛ ni, ma hã yangga hã mi. Mba gɔ, ngamɛnɔ mi zɔ kɔ kili tɛ mi ni, ma gbala nu kɛnɔ Yezu zɔa zi ma we Eklezia, kɛ mɛ a kili tɛ̃ a ni.

²⁵ Mi hɔa wi dɛa to 'da Eklezia, we kɛ Gale ia mi na, mi dɛ ma sanga nɛ. Gale tumba mi na, mi be we 'da a hã nɛ do do tɛ nɛ vɛ̃.

²⁶ We 'da Gale ni, mɛ a linggamɔ kɔ sila a kɛ a usu zi ma do winɔ kɔ sabɛlɛnɔ vɛ̃ ma la zi dati ni. Nɛ ngangga gɛ, a bia ma hã owinɔ 'da a.

²⁷ Gale kɔ̃a we be hã wa na, we a usu ma ni mɛ a dia mɔ kɛ ma gã wena, nɛ ma do dɔ̃lɔ̃ li wena, nɛ ma 'bɔ we ogele winɔ vɛ̃. Usu we ni mɛ a kɛ na Kristo ɔ kɔ nɛ, nɛ nɛ wia we gbini zã nɛ do a na, nɛ mba sɛ do a kpo kɔ dɔ̃lɔ̃ li 'da a.

²⁸ Ma kɛ, lɛ be we 'da Kristo hã winɔ vɛ̃. Lɛ tɔ̃ mbula, nɛ lɛ be we hã wa do wala hã zãnɔ vɛ̃ kɛ Gale hã ma hã lɛ ni, takɔ lɛ 'dafa winɔ kɛ wa mba kpo do Kristo ni na, kɔ̃a we 'da wa nganda.

²⁹ Kɔ mi gbɛ tɛ mi we dɛa toe ni, nɛ mi bi nganda wena do ngawi 'da Kristo kɛ ma dɛ toe kɔ mi ni.