AZE 2 - WE NU GALE 1995

Mbé Tɛmpɛloe ma ndele sɛ nɛ ngɔ kuti kɛ

¹ Do zɛkɛ 'da sambo, kɔ̃ nɛ 'bu nɛ bɔa ngɔ nɛ kpo, kɔ kpo sabɛlɛ ni, nɛ NWA Gale ba 'bɔ nu ɛ hã wi gba olo nu a Aze, we tɔ̃ we.

² A tumba a we tɔ̃ we ni hã wi fɔmɔ nù Yuda, Zorobabɛlɛ, be 'da Sealtiɛlɛ, do gã nwa nganga Yesua, be 'da Yosadakɛ, do tala wanɔ vɛ̃ kɛ wa yula kɔlɔ 'duli ni.

³ We ni ma kɛ: “nwa aka na: Sanga nɛ winɔ nɛ 'bana nza gɛ, wi ta zu a 'bana ngɔ kɛ Tɛmpɛloe ndele zi nɛ dati gɛ ni, wi a wio nde? Kɔ da dɔ̃ gɛ, nɛ zɔ tɔa ni gbali nɛ nɛ nde? Ma ɔ́ gbali nɛ nɛ mɔ yala iko ni gɔ nde?

⁴ Nɛ nde mi NWA, mi tɔ̃ hã nɛ na: Mɔ, Zorobabɛlɛ, mɔ kpã́lã́ sila mɔ! Nɛ mɔ, gã nwa nganga Yesua, be 'da Yosadakɛ, mɔ kpala sila mɔ! Nɛ nɛ, obe Yuda vɛ̃, nɛ kpã́lã́ 'bɔ sila nɛ! Mi tɔ̃ hã nɛ na, nɛ bá tɛ nɛ we toe, we kɛ mi NWA ngɔ mɔ nyanga nza vɛ̃, mi do nɛ fala nɛ kpo.

⁵ Mi kpua zi mbulu hã oyaa nɛ na mɛ ni, tɛ fala hɔa nza 'da wa ngɔ nù Ezipeto. Kɔ nɛ tɛ dɛ̀ kili gɔ, we kɛ mi do nɛ boe.

⁶ Ma ni kpaa, mi NWA ngɔ mɔ nyanga nza vɛ̃, mi tɔ̃ hã nɛ na: Ma 'bana be sĩ, nɛ mi yaka sɛ li nza do nùi, do gba lìnɔ do nga nùnɔ.

⁷ Nɛ mi dɛ sɛ na, zu ogele winɔ vĩ vɛ̃, nɛ wa dɛ kili, nɛ wa tɛ do kpamɛnɔ ngɔ nùnɔ 'da wa ni, nɛ wa ngɛmɛ ma dɛ kɔ Tɛmpɛloe gɛ, sɛ a ma ndila de.

⁸ Mba gɔ, mɔ mbalinɔ do fɛ̃a mɔ bolonɔ ngɔ nù gɛ vɛ̃, wele nɛ a mɔ mi.

⁹ Nɛ 'da fala wa ngɛmɛ sɛ kpamɛnɔ ni dɛ kɔ mbé Tɛmpɛloe ni, nɛ ma ndele sɛ nɛ ngɔ kuti kɛ. Nɛ mi hã sɛ dia dungu hã nɛ dɛ fala gɛ. Mi NWA ngɔ mɔ nyanga nza vɛ̃, mi tɔ̃a ní.”

Owinɔ wa hɔa Owi ndi li Gale

¹⁰ Do zɛkɛ 'da kusi, kɔ̃ nɛ 'bu nɛ bɔa ngɔ nɛ nalɛ kɔ kpo sabɛlɛ ni, nɛ NWA ngɔ mɔ nyanga nza vɛ̃ wila 'bɔ we hã wi gba olo nu a Aze.

¹¹ A na: “Mɔ áká onganganɔ do we gɛ na:

¹² Fala kɛ wele ba mulu sa'de kɛ wa dɔa we dɔnggɔ do mi Gale, kɔ a fi ma kɔ koe tulu 'da a, kɔ tuli ni dĩ tɛ gele nyɔngɔmɔ ɔ nɛ mapa, Sanggo, dɔ̃, tabi nɔ, nɛ nyɔngɔmɛnɔ ni wia we hɔ nyɔngɔmɔ kɛ ma santo li mi Gale nde?” Nɛ onganganɔ wa gisa hã Aze na: “Gɔ!”

¹³ Nɛ Aze aka 'bɔ wa na: “Kɔ fala kɛ wele hɔ wi ndi li Gale we kɛ a 'bia tɛ wɔlɔ, kɔ a 'be 'bɔ tɛ nyɔngɔmɔ, nɛ nyɔngɔmɛ ni wia we hɔ nyɔngɔmɔ ndi li Gale nde?”

Nɛ onganganɔ wa gisa hã a na: “Ĩi!”

¹⁴ Ma kɛ Aze tɔ̃a na: “Na mɛ ni, nɛ zélé we NWA tɔ̃ gɛ! A na: Ma tɛ mɛ 'bɔ ní we owinɔ ngɔ nùi gɛ, do tonɔ kɛ wa dɛ do kɔ̃ wa ni. Mɛnɔ vɛ̃ kɛ wa hã we dɔnggɔ do mi ni, mɛ a omɔ ndi li mi.”

NWA Gale a dɛ sɛ dia mɔ hã obe Yuda

¹⁵ NWA tɔ̃a 'bɔ na: “Nɛ zɔ mɛnɔ kɛ ma la do nɛ ni zɔa nde? Dati kɛ na nɛ ndo zi nyanga dɛ Tɛmpɛloe 'da mi dɛ olo nɛ,

¹⁶ nɛ mɛ nɛ kpa zi olo toe 'da nɛ ni a ge nde? Fala kɛ wele kũ zi yangga, we kala sanggi kpalɛ 'bu nɛ bɔa, nɛ a kpa tati a sanggi 'bu iko. Nɛ fala kɛ wele nɛ we so litrɛ dɔ̃ 'bu nɛ mɔlɔ kɔ kpana dɔ̃ɛ, nɛ a kpa tati a litrɛ 'bu nɛ bɔa iko.

¹⁷ Mi 'danga zi mɔ olo toe 'da nɛ vɛ̃. Kpalɛnɔ 'da nɛ kula zi, tabi zɛlɛ tia zi zu ma, tabi gba kolo Gbãlã mũlũ tɛa zi dɛ ngɔ ma, nɛ ma 'danga. Nɛ gɛnɛ kɔ na mɛ ni, nɛ nde nɛ kpòlò zi tɛ nɛ dɛ 'da mi NWA gɔ.

¹⁸ Nɛ nde ma wia na, yolo do kɔ̃ tũi sɔɛ gɛ ni, nɛ sókó mɛ ma nɛ la nɛ ni do sɔ̃a li. Sɔɛ gɛ mɛ a zɛkɛ 'da kusi, kɔ̃ nɛ 'bu nɛ bɔa ngɔ nɛ nalɛ, nɛ mɛ a kɔ tũi wa ia zi do nyanga dɛ kuti Tɛmpɛloe ni.

¹⁹ Gbaa sɔɛ gɛ, kpalɛ kpo 'bànà 'bɔ ngɔ yangganɔ gɔ, ma a ni gɔ nde? Ote vinɔ, do figɛ, do grɛnadɛ, do olivɛ, ma wàlà 'bɔ gɔ. Gɛnɛ kɔ na mɛ ni, nɛ nde yolo do sɔɛ gɛ, mi nɛ hã odia mɔ hã nɛ.”

NWA Gale saka Zorobabɛlɛ, nɛ a kpo mbulu hã a

²⁰ Do kpo tũ kɔ̃ zɛkɛ ni, nɛ NWA wila 'bɔ we hã Aze,

²¹ nɛ a tumba a we tɔ̃ we ni hã Zorobabɛlɛ, be 'da Sealtiɛlɛ, wi fɔmɔ nù Yuda na: “Mi NWA ngɔ mɔ nyanga nza vɛ̃, mi nɛ yaka li nza do nùi.

²² Nɛ mi nɛ a Onwanɔ ngɔ nùi gɛ vɛ̃ nù, nɛ mi fo ngawinɔ 'da wa kɔ̃ wa vɛ̃. Mi zɛ sɛ nyanga ngilingili nɛ bolonɔ ti ma, nɛ owi ba yinda nɛ wa ala sɛ do ma. Ombalatanɔ wa fe sɛ, nɛ zu Owi kũ mbalatanɔ ma vĩ sɛ, nɛ wa gbɛ sɛ ngba wa do nya wa.

²³ Nɛ nde do kɔ̃ tũi ni, mi e sɛ mɔ Zorobabɛlɛ, wi toe 'da mi we dungu olo li mi. Mɔ sɛ do ngawi ɔ nɛ kasɛ kɛ wele to ti mbɛti, nɛ ma hã ngawi hã mbɛti kɛ a kɔma ma ni, we kɛ mi a mi saka mɔ. Mi NWA ngɔ mɔ nyanga nza vɛ̃, mi tɔ̃a ní.”