AZE 1 - WE NU GALE 1995

Wa dɛa Tɛmpɛloe dɛ olo nɛ

¹ Do zɛkɛ 'da gazɛlɛ, kɔ̃ nɛ kpo, kɔ bɔa sabɛlɛ dɛa to nwa 'da Dariusi, nɛ NWA Gale wila we hã wi gba olo nu a Aze. A ba nu a hã a na, a tɔ̃ toe gɛ hã wi fɔmɔ nù Yuda kɛ li a a Zorobabɛlɛ, be 'da Sealtiɛlɛ. Nɛ a tɔ̃ 'bɔ ma hã gã nwa nganga Yesua, be 'da Yosadakɛ.

^2-3 Ma kɛ Aze tɔ̃a toe 'da NWA hã wa na: “NWA ngɔ mɔ nyanga nza vɛ̃ tɔ̃a na: Nɛ, obe Yuda, nɛ tɛ tɔ̃ na, 'da fala dɛ Tɛmpɛloe dɛ olo nɛ, ma tɛ wè gɔ.

⁴ Ĩ na, nɛ ɔ kɔ osaka tɔa, nɛ nde Tɛmpɛloe 'da mi, ma tia do'do, nɛ nɛ zɔ ma li nɛ na, ma de wena nde?

⁵ Kɔ mi NWA ngɔ mɔ nyanga nza vɛ̃, mi tɔ̃a hã nɛ na, nɛ lénggé mbe ngɔ mɛnɔ kɛ ma kpa nɛ gɛ sɛ.

⁶ Nɛ mi okpalɛ wena, nɛ nde ma kó ngboo gɔ. Nɛ nyɔngɔ mɔ, nɛ nde zã nɛ hɛ̃́ gɔ. Nɛ nɛ 'bɔ do ngbongbo dɔ̃ takɔ nɛ nɔ, hã nɛ dɛ yangga bina. Nɛ 'bɔ do dia tulu, takɔ nɛ kele do tɛ nɛ tɛ gɛ̃ɛ bina. Nɛ mbili kɛ wi dɛa to kpa olo dɛa toe 'da a ni, ma dɛ̃ dɔa kɔ̃ tũ gɔ, ɔ nɛ kɛ go'do koe 'da a 'dɔ 'dɔla ni!

⁷ Ma kɛ mi NWA ngɔ mɔ nyanga nza vɛ̃, mi tɔ̃a hã nɛ na, nɛ ĩ gulu mɛnɔ kɛ ma kpa nɛ gɛ nde?

⁸ Nɛ kũ ngɔ okalanɔ, kɔ nɛ fá ote, kɔ nɛ sí nɛ we dɛ do Tɛmpɛloe 'da mi. Fala kɛ nɛ dɛ ni, nɛ mi NWA, mi tɔ̃ hã nɛ na, mi dɛ sɛ yangga, nɛ mi be sɛ dɔ̃lɔ̃ li 'da mi di ni.

⁹ “Nɛ lingga zi we kpa ogba dɔa kpalɛ, nɛ nde nɛ kpa ma 'bana sanga iko. Nɛ nɛ si do ma dɛ le, nɛ mi pɛsɛ ma do bũ nu mi. Mi NWA ngɔ mɔ nyanga nza vɛ̃, mi aka nɛ na, mi dɛa zi ni we ge nde? Mi dɛa ni, we kɛ Tɛmpɛloe 'da mi, ma tia do'do, nɛ nde wele do wele 'dafa tati a tɔa 'da a iko.

¹⁰ Gulu mɛ kolo tɛ̀ gɔ, nɛ kpalɛ kpo kpàsà do dia nɛ gɔ gɛ a ni.

¹¹ Mi dɛa zi na, ngangga yolo ngɔ okalanɔ, do ngɔ ofɔ blenɔ, do ngɔ ofɔ vinɔnɔ, do ofɔ olivɛnɔ ngɔ nùi 'da nɛ. Owele do osa'de wa zɔa ngamɔ, nɛ tonɔ 'da nɛ, ma 'danga zi vɛ̃.”

¹² Kɔ Zorobabɛlɛ, be 'da Sealtiɛlɛ, do gã nwa nganga Yesua, be 'da Yosadakɛ wa nɛa we zele ni, nɛ wa ia sila wa ngɔ we 'da NWA Gale 'da wa, ɔ nɛ kɛ Aze, wi gba olo nu Gale tɔ̃a hã wa ni. Nɛ tala owinɔ vɛ̃, kɛ wa yula zi kɔlɔ 'duli ni, wa dɛa tɛ mɛ 'bɔ kpasaa na mɛ ni. Aze dɛa to gba olo nu NWA, ɔ nɛ kɛ NWA tumba zi do a ni, nɛ winɔ wa dɛa kili NWA.

¹³ Dɛ 'do nɛ, nɛ Aze gba 'bɔ mbé olo nu NWA hã wa na: “Mi NWA, mi tɔ̃ hã nɛ na, mi do nɛ boe.”

^14-15 Na mɛ ni, nɛ NWA gbangba 'da linggamɔ zu Zorobabɛlɛ, wi fɔmɔ nù Yuda, do Yesua, gã nwa nganga, do tala owinɔ vɛ̃, kɛ wa yula zi kɔlɔ 'duli ni. Nɛ do zɛkɛ 'da gazɛlɛ, kɔ̃ nɛ 'bu nɛ bɔa ngɔ nɛ nalɛ, kɔ kpo kpo sabɛlɛ ni, nɛ wa ba tɛ wa we dɛ Tɛmpɛloe 'da Gale 'da wa, NWA ngɔ mɔ nyanga nza vɛ̃ dɛ olo nɛ.